(53). TATA IBADAH PARTANGIANGAN KELUARGA - RABU, 24 JUNI 2020

PARTORDING PARTANGIANGAN KELUARGA/SEKTOR (KHUSUS)

MENYIKAPI SITUASI “PHYSICAL DISTANCING” MEMBERANTAS PENYEBARAN CORONAVIRUS DISEASES – 19 (COVID – 19)

HKBP PETUARAN RESSORT PERBAUNGAN

RABU, 24 JUNI  2020                     PUKUL 19:30 WIB

P A N G A R A D E O N

ü  Paradehon Buku Ende, Bibel,  tarlumobi roha di bagasan haporseaon di Tuhan Jesus Kristus

 

01.   MARENDE : BE. HKBP. NO. 443 : 1 – 2 “DUNG TUHAN JESUS”      

1.   Dung Tuhan Jesus  nampu au,  songgop dame na, biar hu lao,  Taripar gogo ngoluna i, 

nasa dosangku naung sae do i. Tabari tahon holong-na i. Didia Tuhan, tudoshon i ?

Tuk manum pahi, tarlobida ? Sasada Jesus pinujima !

2.   Di Ho ngolungku !  Las rohangki jumolo Jesus siluami. PangiringonMu, tolongMu i,

mangalo dosa nang rohangki. Tabaritahon……..

02.   VOTUM – INTROITUS - TANGIANG

P :  Marhitehite Goar ni Debata Ama, dohot Goar ni AnakNa Tuhan Jesus Kristus, dohot Goar ni Tondi Parbadia na tumompa langit dohot tano on.

K: Amen.

P :  Parangehon hamu ma na tama di Tuhan i, marguru tu sandok lomo ni rohaNa, marparbuehon parbue marhitehite saluhut ulaon na denggan. Oloi hamu ma Jahowa marhitehite las ni roha, ro be ma hamu tu joloNa marhitehite olopolop. Haleluya ... ! Martangiang ma hita !  Ale Tuhan Debata, Pargogo na so hatudosan ! Sai lehon jala patubu ma di hami haporseaon na sintong. Tambai ma haporseaonnami ganup ari, asa lam togu. Lehon ma di hami holong ni roha na so marpangansi asa holong rohanami di Ho dohot di dongannami jolma. Lehon di hami pangkirimon na mangolu, asa marlas ni roha hami mambahen lomo ni rohaM i. Sai oloi ma pangidoannami ala ni AnakMu, Tuhan Jesus Kristus Tuhannami. A m e n.

03.   MARENDE : BE. HKBP. NO. 802 : 1 – 2 “PANGKE TINGKIM SAONARI” 

1.   Pangke tingkim saonari, dapothon ma Tuhan i, Unang godang sidalian,

ingot jempek ngolumi.  Nunga rade hasonangan, di surgo i, di surgo i,

Unang adong nanggo sada Naso parjambar disi.

2.   Suan ma holong ni roha, tiru ma Tuhanta i, Las ma roham digotilon, jalo ma balos ni i.

Nunga rade ………

04.   EPISTEL : Kolosse 3 : 18 – 21

P : Turpuk Epistel di partangianganta di bodari on tarsurat di Kolosse 3 : 18 – 21, tajaha ma marsingkat sorin,  Hamu angka parompuan, oloi hamu ma hata ni hamulianmuna be, songon na tama di roha ni Tuhan i.

K:   Hamu angka baoa, haholongi hamu ma pardihutamuna be, jala unang ma jungking hamu maradophon nasida!

P:   Hamu angka dakdanak, sandok pangoloi ma hamu di natorasmuna, ai i do dihalomohon Tuhan i!

K:   Hamu angka amaama, unang gintali hamu angka anakkonmuna, asa unang mandele!

P:   Ima sahatna. Martua do angka na tumangihon Hata ni Debata dohot na umpeopsa. Amen.

05.   MARENDE : BE. HKBP. NO. 743 : 1 – 2 “O TUHAN TOGUTOGU MA” 

1.   O Tuhan togu-togu ma au, tu dalan lomo ni rohaMi, Raphon Ho sonang mardalan au,

nang rahis maol sidalananki, TondiMi baen manggohi au on, Margogoihon au naposoMon,

Pasangap Ho dingolungkon, Paima sahat tu surgo au on.

2.      Panghulingi ma au O Tuhan, Na rade tumangihon hataM, Sai tumpahi ruasMu Tuhan,

Na uasan nuaeng di hataM, Sai patau ma au on naposoM, Manjou halak na dao sian Ho,

Ro di na so tumanda Ho, Muba gabe pangoloi di Ho.

 

06.   JAMITA : Ende 8 : 5 – 7  “Pajongjong Bagas Na Martua”

      Hita na hinaholongan ni Tuhanta Jesus Kristus. Nunga lam somal di pamasumasuon manang di partumpolon dipatupa acara tukar cincin. Ndang marimbar huria di kota manang di desa, keluarga na so paradongan dohot keluarga na paradongan, dipamasa do tukar cincin. Dirajumi angka na mambahensa do ia cincin i tanda di padan nang holong ni rohanasida, alani mansai badia ma dihilala nasida molo dipatupa tukar cincin i di ibadah pamasumasuon manang di partumpolon. Dipasahat (calon) pangoli ma tintin i tu (calon) oroan di jari manisna, dungi diuduti (calon) oroan ma patupahonsa muse songon i tu (calon) pangoli. Sungkunsungkun : tutu do boi tintin i mangarahut holong ni roha nasida ? Na gabe lebih romantis dohot lebih langgeng do rumatangga ni patupa tukar cincin di ulaon pamasumasuon manang di partumpolon sian na so patupahon ? Tontu ndada cincin ukuran ni kelanggengan ni rumatangga ; ndang na mandok, na so ringkot tukar cincin, alai asa tangkas do taantusi ia cincin i holan simbol do, asa na rumingkot ima na sinimbolhannai do sijagaon jala sihangoluhononhon. Dia ma i ? Ima na naeng taguruhon sian turpuk jamita partangiangan on.

              Ndang apala somal buku Angka Ende on gabe jamita bahkan hampir so hea. Jadi mauliate ma molo dipillit nuaeng buku on gabe jamita di partangianganta on. Holan ualu (8) bindu do buku Angka ende on, ndang apala ganjang ; Isina i ma holong ni baoa tu parompuan dohot sabalikna, jala mangihuthon angka na pistar, saluhutna i manggombarhon holong ni Debata tu huriaNa. Ia na gabe jamita di hita ima bindu parpudi, ima 8:5-7. Rap ma hita marsiajar sian turpuk on sinondangan ni tema “Pajongjong bagas na martua”.

1)  Na parjolo : Bahen ma ahu songon tintin sahap tu bagasan roham, songon tintin sahap tu botohonmu ! (ay. 6) Ndang holan di partingkian si saonari be hape masa na mamangke tintin gabe sahap. Di partingkian na jolo pe i ma songon na tarsurat di turpukta on na marpangidoan do oroan (parompuan) asa dibahen pangoli i ibana songon tintin sahap, na marlapatan rade oroan i gabe nampuna ni na marsahap i. Na menarik, molo taparrohahon ay. 6 on, dipangido parompuan i do asa tintin sahap i dibahen tu bagasan roha dohot tu botohon ni baoa i (Indonesia : pada hati dan lenganmu). Lapatanna, ingkon jumolo do adong holong dohot padan na saling memiliki di bagasan roha, ndang holan di jarijari. Songon na nidok nangkin di patujolo ni jamita on, ndang jaminan molo nunga tukar cincin di pamasumasuon manang di partumpolon jala ndang sada kepastian molo torus dipangke cincin i di jari manisna, gabe langgeng ma rumatanggai. Ndaong ; Na rumingkot i ma dipangke ma cincin sahap i di roha. Asa, andul ummarga do manjaga holong di bagasan roha, unang holan simbol-simbol na di duru. Boha angka amang, inang, hita na mamangke cincin kawin di jarinta nuaeng, lohot do holong i di bagasan rohanta manang holan di jarijarinta do ? Hata ni Debata mengajarhon tu hita asa jumolo ma nian holong, saling memiliki, janji, padanta masihaholongan i suan di bagasan rohanta. Molo di rohanta do, dao pe hita sian pasanganta, ndang mungkin tertarik hita tu baoa manang parompuan na asing ; ai molo di rohanta do pasanganta i tontu dohot ma nasida torus manang tu dia pe hita, nang pe ndang secara fisik ; molo di rohanta do tintin sahapi, adong pe na ummuli manang na gumanteng, adong pe na ummora, adong pe na umburju, ndang olo hita menduakan pasanganta. Tintin sahap holong na suan di roha, i do margogoihon hita tongtong setia dohot marpanganju. Alani, tasulingkiti ma jolo rohanta be, atik do, di mula na i di rohanta angka pasanganta be, alai ala ni angka partingkian gabe ndang di rohanta be ; so tung do holan na sajabu hita alai ndang saroha be. Molo adong do pasanganta i di rohanta sahat tu saonari, puji Tuhan ! Alai, molo so adong do, pintor disahaphon ma ate.

Na mangihut, tangkas didok, disahaphon ndang holan di roha alai dohot do di botohon. Dia do lapatanna disahaphon tu botohon ? Botohon simbol pangulaon. Jadi ndang sae nidok na holong roha tu sasahalak alai ndang adong pambahenanta. So tung do tadok “tung holong do rohangku di ho, suan bagas di rohangkon” alai holan di hata, ndang tarida di parulaon siganup ari. Tintin sahap holong ingkon do rahuton di botohon ; jadi denggan ma molo tapangke di jarinta asa ummura hita marningot. Molo tutu do holong rohanta tu pasanganta, tapataridahon ma i marhite pambahenanta. Rade ma ama mambahen las roha ni inantana ; so tung adong ama na umlomo rohana manghatai dohot anak boru manang dohot inanta ni halak. So tung adong ina na umlomo rohana pasuda tingkina manghatahatai dohot dolidoli manang amanta ni halak. Boasa nidok songon i ? Ala ni perkembangan teknologi informasi nuaeng, nunga mura hita manghatahatai dohot dongan na so di lambungta. Godang masa nuaeng perselingkuhan. Di mulana i holan manghatahatai di media sosial do, alai ala pajotjothu berkomunikasi ujungna curhat dung i gabe semacam kebutuhan. Gabe so sonang rohana molo so manghatahatai (chatting) di bagasan sadari, dungi dibahen ma janji pajumpang bohi, rap minum, rap mangan, dungi gabe lam jotjot ma, dungi gabe terjadi ma perselingkuhan. Dia ma tanda na holong rohanta tu pasanganta ? Ndang sae dohono ni ama, “pokokna nunga hualap ho gabe ripengku, aha dope na hurang buktina?” Tutu, mangoli manang marhamulian sada bagian bukti ni holong do i alai ringkot do tong patuduhonon marhite pambahenan sepanjang pardalanan ni rumatangga i.

2)  Na paduahon : Ai tung na gogo do roha haholongon i, songon gogo ni hamatean tahe (ay. 6). Ndang boi pinatudu secara fisik holong i alai boi do tarida ianggo gogona. Bagas situtu do digomabarhon di turpukta on na gogo do haholongon i. Dibaen do tudosanna songon “gogo ni hamatean”. Olo do sala mangantusi hita di lapatanni ayat on molo holan sepintas tajaha, alai molo tajaha hombar tu konteksna, sasintongna na naeng dohononna ndang na mangago. Antong dia do ? Ndang adong jolma na boi manulak hamatean, na mora nang na pogos, na poso dope nang na matua ; na pasti hamatean i ma kenyataan na so tartulak jolma, na ingkon mate do nasa jolma songon hata ni BE. No. 334:1. Suang songon i ma hagogoon ni holong i dang tartulak jolma. I do umbahen olo jatuh cinta jolma na uli situtu rupana tu na so apala uli rupana ; adong do na mora olo marrumatangga tu halak na pogos. Sipata olo hita mandok : “Olo ma ate amanta i tu inanta i hape hurang do rupana”. Jotjot do ndang masuk tu angkal holong on, alai ima buktina tung gogo do holong i padomuhon dua individu ; jala na umbagas sian i tung mansai gogo do holong i mangurupi jolma patutoru dirina. Asa boi sahat tu sinirang ni hamatean rumatangga ingkon na olo do ama dohot ina patutoru dirina, hape ndang mura na patutoru diri. Holong na sian Debata di bagasan Kristus Jesus ido tiruan di hita laos i do gogo di hita mangulahon i. Alani, molo disungkun tu hita, mungkin do angka ama patutoru dirina tu inantana ? Alusna, ndang holan mungkin, alai ingkon. Ala ni aha ? Holan, tintin sahap i margogoihon ama patutoru dirina tu inantana, suang songon i nang sebalikna.

3)  Na patoluhon : Ro pe angka aek magodang, ndang tarbaorhonsa anggo roha haholongan i, jala ndang taraup angka batang aek (ay. 7). Dung dipatudos hagogoon ni holong i tu hamatean, nuaeng di ayat 7 on digombarhon ma hagogoon ni holong i na so taraup manang aha pe. Aek magodang dohot batang aek i ma sada hagogoon na mansai balga ; boi do dibaorhon aek magodang jabu, suansuanan, dohot angka na asing. Boi do disapuhon aek magodang angka jolma. Rap umboto do hita na godang korban dohot kehancuran molo nunga ro aek magodang manang banjir. Alai didok di turpukta on, tung songon dia pe gogo ni aek magodang i ndang monang i maradophon holong. Andul umbalga do hagogoon ni holong sian hagogoon ni aek magodang nang batang aek. Ala ni i angka amang, inang, ndang adong alasan ni rumatangga ni halak Kristen marsirang. Tontu godang tantangan, isarana parianakhon na so adong, perekonomian na maol, keluarga na sai manusai, pihak ketiga na naeng mamolmola. Alai molo tutu do holong rohanta tu pasanganta ndang tarauphonon ni i rumatangga. Manang aha pe masalah di rumatangga, na boi do diadopi suami istri molo tutu nasida masihaholongan, ai holong ni roha nasida na sian Debata i do margogoihon nasida manghamonanghon saluhutna i.

                Hita na hinaholongan ni Tuhanta Jesus Kristus. Di turpuk jaimta tu ari Minggu na ro on ima sian Kolosse 3:18-21 dipangido angka ina asa unduk tu amantana, jala amanta asa holong rohana tu inantana. Jala dipasingkop ma i marhitehite jamita partangiangan on, i ma holong na sian Debata ma margogoihon hita mangulahon i. Tapangke manang so tapangke tintin kawinta di jarijarinta, alai na umarga tapangke ma i di rohanta nang di botohonta asa gabe bagas na martua angka bagasta be. Masihaholongan ma ama dohot ina di rumatangga marhite hata nang pambahenan, A m e n.

08.   TANGIANG PANGONDIANON

09.   MARENDE : BE. HKBP. NO. 319 : 1 – 2 “TUNG SONANG MODOM AHU”                

1.  Tung sonang modom ahu Saborngin on So jolo Ho Tuhanku Ingotonkon  ?

     Na mampar do rohangku Narian i Tu Ho ma luluanku Na sonang i.

2.  Sai sesa nasa dosa Ale Amang Ho na marholong roha Asi rohaM 

     Paias ma rohangku Na ramun i Pagirgir au mamuji Ho Tuhanki

10.   TANGIANG PELEAN, ALE AMANAMI, PASUPASUPASU, ENDE PANGUJUNGI

P : Tatangianghon ma peleanta, martangiang ma hita. Ale Debata, Amanami na di banua ginjang, Ho do haroroan ni saluhut silehonlehon na denggan dohot nasa ulibasa na mauliutus. Hupasahat hami ma sian na nilehonMi tu hami, peleannami tu Ho. Sai jalo ma i gabe uap na hushus di joloM. Pasupasu ma i jala ramoti asa huparhaseang hami pelean on, patimbulhon harajaonMu di tongatonga ni HuriaM dohot di portibi on. Buhai ma rohanami marhitehite TondiM, asa lam hutanda hami godang ni silehonlehonMi tu hami, asa lam girgir hami mandok mauliate tu Ho, marhitehite Jesus Kristus Tuhannami. Amen. Rap ma hita mandok di Tangiang Ale Amanami ... (Molo parhalado partohononan jumolo ma mandok Tangiang Pasupasu). Alai molo ndang langsung ma mangendehon :

 

K   :        (MANGENDEHON) BE. HKBP. NO. 36 : 3 “PASUPASU HAMI”

3) Amen hudok hami, ale Tuhannami ; na marasi roha i, sangap ma di goarMi.

 

Sunggul-Sunggul

-       Dipasahat Ma Pelean Partangiangan Marhite Uluan & Sekretaris Huria Selambat  Lambatna Di Ari jumat, Asa Boi Didata Jala Ditingtinghon Huria Ganup Minggu