(55). TATA IBADAH PARTANGIANGAN KELUARGA - RABU, 01 JULI 2020

PARTORDING PARTANGIANGAN KELUARGA/SEKTOR (KHUSUS)

MENYIKAPI SITUASI “PHYSICAL DISTANCING” MEMBERANTAS PENYEBARAN CORONAVIRUS DISEASES – 19 (COVID – 19)

HKBP PETUARAN RESSORT PERBAUNGAN

RABU, 01 JULI  2020                      PUKUL 19:30 WIB 

P A N G A R A D E O N

-          Paradehon Buku Ende, Bibel,  tarlumobi roha di bagasan haporseaon di Tuhan Jesus Kristus

01.   MARENDE : BE. HKBP. NO. 36 : 1 + 3              “PASUPASU HAMI”

1.   Pasu pasu hami O Debata nami

      Sai sondangkon bohiMi Tu na pungu on sude

2.   Lehon ma di hami Dame ganup ari

      Sai pasaor ma  TondiMi Tu na pungu on sude.

02.   VOTUM – INTROITUS - TANGIANG

P :  Marhitehite Goar ni Debata Ama, dohot Goar ni AnakNa Tuhan Jesus Kristus, dohot Goar ni Tondi Parbadia na tumompa langit dohot tano on.

K   :        Amen.

P :  Ise do jadi nangkok tu dolok ni Jahowa, jala ise do na jadi jongjong di hajongjongan ni habadiaonNa i ? Halak partangan na lidang dohot na ias roha. Haleluya ... ! Martangiang ma hita !  Ale Tuhan Debata, Pargogo na so hatudosan jala Parasiroha ! Hupaserep hami rohanami di joloM jala hupangido hami tu Ho : Sai lehon asi ni rohaM manggohi rohanami, jala sondangi rohanami marhitehite TondiM, asa lam hutinggalhon hami nasa dosanami, jala hutangihon hami HataM na badia i. Sai paian ma HataM di bagasan rohanami, asa marparbue na denggan hami. Hupangido hami saluhutna i marhitehite Tuhan Jesus Kristus Tuhannami. A m e n.

03.   MARENDE : BE. HKBP. NO. 792 : 1 – 2            “PASUPASU HAMI O TUHAN”  

1.   Pasu-pasu hami 0 Tuhan sai usehon dameMi, Sai ampehon tanganMi Tuhan,

Lehon tu au gogoMi di portibion. Baen ma au Tuhan habaoran ni las ni roha

Tu na marsak i tu na dangol i gabe pangapuli i.

2.   Diportibion, baen ma au Tuhan, Monang maralohon dosa dibahen gogoMi,

Talu musu i sibolis pangago i. Pasu-pasu hami O Tuhan ………

04.   EPISTEL :                   1 Musa 12 : 1 – 9

P : Turpuk Epistel di partangianganta di bodari on tarsurat di 1 Musa 12 : 1 – 9, tajaha ma marsingkat sorin: Dung i ninna Jahowa ma mandok si Abram: Bungkas ma ho sian tano hagodanganmu dohot sian hatubuanmu dohot sian bagas ni amam tu tano sipatuduhononku tu ho.

K:   Hubahen pe ho gabe bangso na bolon, jala pasupasuonku ma ho, jala pabalgaonku goarmu, asa gabe pasupasu ho.

P:   Jala pasupasuonku angka na mamasumasu ho, jala toruanku angka na mamburai ho, jala dapotan pasupasu marhitehite ho saluhut angka bangso ni tano on.

K:   Jadi bungkas ma si Abram, songon na nidok ni Jahowa tu ibana, bungkas ma dohot si Lot udur dohot ibana. Marumur pitupulu lima taon si Abram, di na bungkas i ibana sian Haran.

P:   Dung i diarahon si Abram ma si Sarai, jolmana i dohot si Lot, anak ni hahana i ro di sude na sinamotsamotnasida, dohot jolma, angka na tinuhornasida di Haran, jadi bungkas ma nasida laho tu tano Kanaan. Jadi dung tolhas nasida ro di tano Kanaan.

K:   Diliati si Abram ma tano i sahat tu inganan ni si Sikem, ro di tombak More, nunga di tano i hian halak Kanaan i, didapot.

P:   Dung i ro ma Jahowa, diida si Abram, didok ma: Tu pinomparmu ma lehononku tano on. Jadi dipajok disi sada langgatan di Jahowa na niidana i.

K:   Dung i borhat ma ibana sian i tu sada dolok na tungkan habinsaran ni Betel, jala dipagohon undungundungna, tungkan hasundutan ni Betel, jala tungkan habinsaran ni Ai; jadi dipauli ma disi sada langgatan di Jahowa, jala dipajoujou goar ni Jahowa.

P:   Dung i bungkas muse si Abram laho dompak dangsina. Ima sahatna. Martua do angka na tumangihon Hata ni Debata dohot na umpeopsa. Amen.

05.   MARENDE : BE. HKBP. NO. 463 : 1 – 2            “PASUPASUM TONGOSONMU”

1.      PasupasuM tongosonMu i do didok hataMi, Suru tondiM  na badia,

bosur ma baen rohangki. HagogoonMu songgop ma tu rohangkon.

Unang sai holan manetek, gohi sandok diringkon.

2.      Buat ma angka pangambat, unang songsong dalan i. Mual ni aek hangoluan

ringkot do di rohangki. HagogoonMu………………………..

06.   JAMITA : Rom 15 : 7 – 13 “Dipasupasu asa gabe Pasupasu”

                Hita na hinaholongan ni Tuhanta Jesus Kristus. Dao do ninna pasupasu molo sai marbadai. Manang didok halak tu hita : “Unang sai marbadai hamu unang dao pasupasu sian hamu”. Sintong do pandohan i. Boha ma tutu jumpang pasupasu molo sai holan marbadai diula jolma di portibi on. Sadihari be karejo, mangalului angka na ringkot di ngolu on. (i) Parjolo, di tonga ni keluarga, molo sai holan na marbadai amanta dohot inanta i di jabu boha ma jumpang pasupasu. Jala laos mangihut ma dohot ianakhon marbadabada muse. Ido umbahen sai dipaingot angka natuatua ianakhonna asa unang sai marbadai angka na marhahamaranggi dohot na mariboto. (ii) Paduahon, di angka na mardongansaripe, sai dipasahat angka natuatua, do tu angka na manjalo pasupasu parbagason dohot hata sipaingot di ulaon adat asa marsada pangoli dohot oroan (amanta dohot inanta). (iii) Patoluhon, di huria, mansai ringkot hasadaon di ruas ni huria asa jumpang pasupasu sian Debata. Ido umbahen didok hata ni endenta i : “Ida hinadenggan ni angka na saroha i, parpambahenan na burju nang hatana pe tutu. Diparbaga Debata tu na marsaroha da, pasupasu na godang ima roha na sonang” (BE. No. 122:1+4). Ido Hata ni Debata mamangkulingi hita di partangiangan bodari on marhite apoapo ni apostel Paulus tu huria Rom asa tangkas huria ni Kristus mangolu di bagasan hasadaon. Unang tubu angka parsalisian di ruas ni huria angka naung manjalo barita nauli. Didok apostel Paulus : “Dibahen i masijangkonan ma hamu, songon pangjanghon ni Kristus di hita, bahen hasangapon ni Debata”. Nunga ro Jesus Kristus tu portibi on manghophop hita sian gomgoman ni sibolis, mamboan hita sian haholomon tu hatiuron. Gabe jumpang hita ma hasesaan ni dosa dohot asi ni roha ni Debata. Tangkas do dipodahon apostel Paulus halak na porsea di Rom asa tongtong mangharingkothon hasadaon. Unang ma adong angka parbolaton hinorhon ni angka na marasingasing golongan, houm, status sosial dohot ulaon. Unang adong angka na masipabalian sian huria ala so sarombang dohot so sapingkiran. Ai bangko do godang angka parasingan di hasiangan on. Ndang sai dos dia angka na adong di hita. Ai huria do parpunguan ni nasa houm dohot marga. Unang masa na mandok holan halak Jahudi do bangso ni Debata na dapotan pasupasu. Manang mandok tu halak na so Jahudi ndang sarombang dohot halak Jahudi. Ala Tuhan Jesus do raja ni huria, ibana naung tarsunat gabe sihophop hita manisia.

                Hita na hinaholongan ni Tuhanta Jesus Kristus. Tangkas do dihamauliatehon apostel Paulus hajongjongan ni huria di manang piga inganan di angka ruas ni huria na parjolo i. Mangihuthon apostel Paulus tarpasupasu do huria i marhitehite Tuhan i. Alani ima ingkon jamothonon angka na porsea do huria i asa unang gabe sega parsaoran. Ala Kristus do nampuna huria i ndada jolma. Diapoi apostel Paulus halak Rom asa manjagahon hasadaon ni huria i. Unang adong parbolatbolaton, ala boi do i mambahen hasesega ni parsaoran di bagasan Kristus. On do na so hinalomohon ni apostel Paulus, asa unang tubu angka haributon dohot parsoalan di huria. Asa marasing jala tandi ma huria sian angka sipelebegu na so mangharingkothon hasadaon. Masibahen lomona do nasida, mangahut tu diri dohot masipasombuan. Alai anggo huria ni Kristus ingkon marsada, masihaholongan. Molo so mian hasadaon tontu lam sursar ma huria i. Songon i ma hajongjongan ni huria di portibi on, nang di hruainta ganup marsadasada. Rap marsada ma ruas sama ruas. Parhalado dohot parhalado suang songon i nang ruas tu parhalado. Asa jumpang pasupasu sian Debata tu angka na marsada roha i. Di angka na sapunguan pe naeng ma jumpang hasadaon. Unang songon nidok ni halak Batak. Patampaktampak hundul pulikpulik pandohan. Alai jumpang ma pandohan na mandok : Sada songon daion aek, unang mardua songon daion tuak. Lapatanna nang di hata nang dipambahenan ingkon tongtong sada. Somal do sai dipaingot angka natumua tu na umposo mandok asa sai mardamedame dohot masianjuanjuan. Ido tutu molo jumpang na sai mardame tubu ma pasupasu di ngolu. Alai sabalikna molo holan na parbadaan do na jumpang lam dao do pasupasu di ngolunta on. On do sipaingot ni apostel Paulus tu huria Rom. Asingkon ni naeng ma jumpang nang di halak Kristen panghirimon na mangolu tu asi ni roha ni Debata. Ndang magopo panghirimon i. Molo so marpanghirimon hita nunga moru haporseaonta. Alai ingkon manghirim do hita atik pe ndang taboto dope sihirimonta i. Songon si Abraham na manghirim di pasupasu na pinasahat ni Debata tu ibana (1 Musa 12:1-9). Jala dipatupa Debata ibana gabe bangso na bolon dohot tarpasupasu ibana.

                Hita na hinaholongan ni Tuhanta Jesus Kristus. (IV) Paopathon, asa jumpang hasadaon di tonga ni huria, naeng ma mian holong ni roha na sian Debata. Masihaholongan ido dalan manjalo dame dohot pasupasu sian Debata. Masipataluan roha mangehai dame dohot las ni roha, ido tanda ni naung tinobus ni mudar ni Kristus Jesus. Dung jumpang hasadaon i adong ma sisada panghirimon tu Debata laho manjalo pasupasu sian ibana pardenggan basa i. Tarparhatopot sude do jolma adong be hahuranganna. Alai molo na hurang di dongan ndang jadi masipailaan jala gabe pasidingon nasida sian parpunguanta. Sandok ingkon masijangkonan huhut masianjuan di angka na hurang i. Hot ma halak Kristen mian di bagasan panghirimon dohot hasadaon laho mangido pasupasu sian Debata. Tarida ma hasadaon di tonga ni angka punguan dohot di keluarga. Atik pe marasingasing be na adong di hita ganup marsadasada. Ro ma hita tu Debata di bagasan haporseaon paboa diparade do pasupasu tu hita saluhutna. Jesus Kristus Raja ni huria na mangarajai hita ndang madiaimbar hita di adopanna. Tontu godang dope na tahalungunhon di hasiangan on. Molo tapasada tangiangta tu Tuhan i sai na jumpang do pasupasu di hita.

                Hita na hinaholongan ni Tuhanta Jesus Kristus. Di bulan Maret sahat tu Bulan  Juni tung marsitutu do hita martangiang tu Debata asa dao Virus Corona 19 (Covid 19) na mambahen mara tu ngolunta, sai disosohon tu hita asa rap martangiang hita. Taparhatopot jala tahaporseai do huaso ni Debata marhite alus ni tangiangta gabe jumpang di hita las ni roha nuaeng dung jolo manang piga leleng hita sai mabiar. Alai di bagasan pos ni roha maralus ma tangiangta ala ni asi ni roha ni Debata. Ndada ala ni hajagoonta dohot hamaloonta, tung holan asi ni roha ni Debata sambing do umbahen jumpang i. Jala ndang holan di hamaolon hita marsada ingkon tongtong ma jumpang hasadaon tu joloan on. Masiurupan di angka na gale.

                Ido umbahen topik ni ari Minggu on “Dipasupasu asa gabe pasupasu”. Nunga dilehon Debata pasupasu tu huria, boi jongjong sahat tu tingki on, alani mandok mauliate ma hita tu Debata, ala Debata do nampuna huria ndada jolma. Jala ndang sarupa dohot organisasi huria i, sandok pamatang ni Kristus do. Jala di huria torop do angka ruas na boi manang berpotensi laho pauliulihon. Masitumpahan ma di angka pambahenan. Unang tubu hosom, bada dohot elat, late alai tanda ni huria na matoras ima molo jumpang hasadaon. Songon pardongansaripeon naung leleng jala matoras, jumpang ma dame. Ala ganup masibahen na uli na denggan ala naung dipasupasu Debata. A m e n.

07.   MARENDE : BE. HKBP. NO. 465 : 1 + 2            “PASUPASU LEHONONMU”                         

1.   Pasupasu lehononMu ido bagabagaMi. Songon angka udan nene sai tu au manetek i

Nang tu au, nang tu au, patetekkon i tu au

2. O Amang sai ro apuli dohot au na marsak i. Sai pamalum nang rohangku

na tongtong marsahit i, Dohot au, dohot au, sai pamalum dohot au

08.   TANGIANG PANGONDIANON

09.   MARENDE : BE. HKBP. NO. 716 : 1 – 2             “DI NA MAMOLUS SANDOK NGOLU ON”     

1.      Di na mamolus sandok ngolu on, gok do na marsak gale. Boan sinondang tu na holom i, 

         asa margogo muse. Bahen ma ahu parhiteanMu, pasupasuM mabaor ma i

         Ale Tuhan hu patupa ma au, baen pasupasu tu dongan sude.

2.      Sai baritahon Jesus na burju, tuk manesa dosa i, Asa porsea di Jesus tutu, 

         denggan pambaenmu disi. Bahen ma ahu parhiteanMu.......

10.   TANGIANG PELEAN, ALE AMANAMI, PASUPASUPASU, ENDE PANGUJUNGI

P : Tatangianghon ma peleanta, martangiang ma hita. Ale Debata, Amanami na di banua ginjang, Ho do haroroan ni saluhut silehonlehon na denggan dohot nasa ulibasa na mauliutus. Hupasahat hami ma sian na nilehonMi tu hami, peleannami tu Ho. Sai jalo ma i gabe uap na hushus di joloM. Pasupasu ma i jala ramoti asa huparhaseang hami pelean on, patimbulhon harajaonMu di tongatonga ni HuriaM dohot di portibi on. Buhai ma rohanami marhitehite TondiM, asa lam hutanda hami godang ni silehonlehonMi tu hami, asa lam girgir hami mandok mauliate tu Ho, marhitehite Jesus Kristus Tuhannami. Amen. Rap ma hita mandok di Tangiang Ale Amanami ... (Molo parhalado partohononan jumolo ma mandok Tangiang Pasupasu). Alai molo ndang langsung ma mangendehon :

 

K   :        (MANGENDEHON) BE. HKBP. NO. 36 : 3 “PASUPASU HAMI”

3) Amen hudok hami, ale Tuhannami ; na marasi roha i, sangap ma di goarMi.

Sunggul-Sunggul

-         Dipasahat Ma Pelean Partangiangan Marhite Uluan & Sekretaris Huria Selambat  Lambatna Di Ari jumat, Asa Boi Didata Jala Ditingtinghon Huria Ganup Minggu

-         Di Ari Rabu Na Naeng Ro, Ima Di Partangiangan Napinatupa Huria, Disangkapi Hurianta Do Patupahon Partangiangan Wijk. Taringot Tu Si, Dipatorang Huria Pe Muse Marhite Boa-Boa Manang Tingting.