(81). PARTURE NI ACARA MINGGU UJUNG TAON PARHURIAON 22 NOVEMBER 2020

 

PARTORDING NI PARMINGGUON

 DI MINGGU UJUNG TAON PARHURIAON

(PARNINGOTAN DI ANGKA NAUNG MONDING)

                   Ev.Mateus 25 : 31 - 46                     Ep. Hesekiel 34 : 11 - 16 

TOPIK:

 

ARI UHUM SOGOT

 HURIA KRISTEN BATAK PROTESTAN

 

Minggu, 22 Nopember 2020

 

01.  PAMUHAI

U   :  Horas jala selamat ari Minggu ma di hamuna angka dongan na hinaholongan ni Tuhanta. Nunga bongot hita sadari on tu Minggu Ujung Taon Parhuriaon. Laos di Minggu sadari on do hita marningot  angka donganta ruas ni huria naung monding dibagasan na sataon parhuriaon on. Antong aha ma sidohononta taringot tusi ?

R   :  Martingki be do luhutna na tinompa. Martiti be do huhut nasa sangkapsangkap di hasiangan on. Martiti be do: Na tubu dohot na mate; na manuan dohot na mangurati na sinuan i. Laho salpu do sogot langit dohot tano on, alai Hata ni Debatanta ndang olo salpu, sai na hot do i ro di saleleng ni lelengna

U   :  Sai burju ma ho rasirasa mate, dung i lehononHu ma tu ho tumpal hangoluan i. On ma sunggulsunggul ni Tuhanta tu hita paima sahat hita tu ARI UHUM SOGOT i. Luhutma hita manghirim di tumpal i marhite haporseaonta na manongtong salelengnilelengna.  Tapuji ma Debatanta, taendehon ma Ibana sitompa daging dohot tondinta, marende ma hita.

02. Marende BE No. 3: 1,3     PUJI JAHOWA ALE TONDINGKU  BL.  210

v Puji Jahowa ale tondingku, puji Ibana Debatami.

Tagan so suda dope bohalhu, naeng pujionku basaNa i.

Sitompa daging, tondi pe ingkon dipuji sasude,  Haleluya, Haleluya

----Jongjong---

v Martua halak na niondingan ni Debatanta Jahowa i.

Angka na hot marhaporseaon di Jesus  Kristus Tuhanta i.

Molo Debata donganmu ndang adong hurang tuamu. Haleluya, Haleluya.

03. VOTUM – introitus – tangiang:

U   :  Marhitehite Goar ni Debata Ama, dohot Goar ni AnakNa Tuhan Jesus Kristus, dohot Goar ni Tondi Porbadia na tumompa langit dohot tano on. Amen. Dungo ma hamu jala martangiang, asa unang hamu bongot tu pangunjunan. Managam ma hamu, dungo ma hamu jala martangiang, ai ndang diboto hamu manang andigan tingki ni i. Haleluya

R   :               (Mangendehon): Haleluya, Haleluya, Haleluya!

U   :  Martangiang ma hita :  Ale Tuhan Jesus, Tuhan ni angka na mate dohot angka na mangolu! Ho do nampuna hami, manang mangolu manang mate pe hami. Nang pe mardalan hami di rura nilinggoman ni hamatean, ndang huhabiari hami be hamatean, ai Ho do dongannami. Ndang tartiop hamatean manang tanoman be hami, ai Ho do Tuhannami naung humophop hami, jala Ho nampuna hami. Ro hami nuaeng tu Ho mangido : Sahat tu Ho ma tondinami dohot dagingnami, asa di Ho hami manang na mangolu manang na mate pe. Sai tiop ma tangannami, urupi hami marhitehite panghophopMi, asa sahat hami tu hangoluan na so ra suda. Amen.                            (Hundul)

04. Marende BE No. 539: 3   SAI HUTAGAM DO TUHANHU   BL. 371   

v                          Sai rade ale tondingku tagam panjouonNa i

Sai tu langit an manomu ho di Jesus Tuhanmi

Sai mardongan olopolop huriaM managam Ho

Maranata, ro o Tuhan, amen, sai tibu ma ro

05. Patik: 

U   :  Tangihon hamu ma Patik ni Debata di Minggu Ujung Taon Parhuriaon sadari on, i ma na tarsurat di Konfessi  HKBP Bindu 16. Taringot tu Parningotan di na monding.  Tahaporseai jala tahatindanghon do : Ampe do tu jolma : mate sahali, dung i uhum i. Na maradian nama ibana sian ulaonna. Jala Jesus Kristus do Tuhan ni na mangolu dohot na mate. Asa ia tabahen pe parningotan di angka na monding, na marningot ajalta sandiri do hita disi dohot pahothon rohanta do i di ngolu parungkilon on. Marhite poda on : taalo jala tatulak do poda hasipelebeguon na mandok : adong pardomuan ni tondi ni naung mate dohot jolma na mangolu. Songoni poda na mandok : Laos tinggal di tanoman i do tondi ni na mate i. Laos songon i taalo jala tatulak do poda ni Rom Katholik na mamodahon : Api pangurason manang ari parpitapitaan na ingkon boluson mangurasi tondi ni naung mate asa tu hangoluan, jala na boi patupahon Misa di na mate, dohot na manangianghon naung mate i asa humatop malua sian api pangurasan. Laos songon i na martangiang tu tondi ni na badia naung mate dohot na manghirim taripar hagogoon dohot habadiaon ni angka naung mate, tanomanna, ulosna, barangbarangna, holiholina manang parmanomanoan. (Antong rap mangido gogo ma hita tu adopan ni Debata).

R   :  Ale Tuhan Debata, sai pargogoi ma hami mangulahon na hombar tu PatikMi. Amen.

06. Marende BE No. 167: 1,6  DIJANGHON JESUS DO PARDOSA  BL. 108

v  Dijangkon Jesus do pardosa na mangarsakkon dosa i.

Na mangundukkon hinaroa ni pambaenanna sasude

Alai ditangkup hata on, dijangkon Jesus nang au on.

v  Dison do hami, ale Tuhan asi rohaM paias ma. (Jongjong)

Togihon hami on tu ginjang tu surgo i tu Debata

Pujionnami ma disi Ho, Sipalua jolma i.

07. MANOPOTI DOSA:

U   :   Huria na hinaholongan ni  Tuhanta, tapahohom ma rohanta di adopan ni Tuhanta, tatopoti ma sandok dosanta na godang i.  

(tingki na hohom . .  : Musik ........BE No. 452 : 1......Bl. 303)

U    :  Ale Debatanami, na marasiroha jala na badia, Amanami, marhitehite Tuhan Jesus Kristus! Manang piga hali hami ro tu joloM, huhilala hami, ringkot do asi ni rohaM di saluhut hami halak pardosa.

R   :   Ale Tuhan Debatanami, ndang adong na tarpangasahon hami di hangoluannami on so holan asi ni rohaMi di hami. Huboto hami do nian na songon alogo sambing do hami di hasiangan on, jala songon orbuk na mura di ullushon alogo i, dungi salpu ma ngolunami, alai jotjot do partingkian na satongkin i ndang hupangke hami laho mangulahon lomo ni rohaM. Asi ma rohaMi di hami, sai ajari hami paubahon rohanami.

U   :   Ala ni i do umbahen na hupaserep hami dirinami sadari on di joloM, jala huparhatopot hami, tung na jotjot do hami manimbil sian angka dalanMu na badia songon birubiru na lilu. Sai unang pabali hami sian joloM ala ni dosanami i, ai ndang dihalomohon rohaM hamatean ni angka pardosa, alai hamubaon ni rohana do lomo ni rohaM, asa mangolu.

R   :   Ale Tuhan, sai unang pabali hami sian joloM. Paloas ma hami on jolo paubahon rohanami, asa tung hu parhaseang hami tingki hangoluan na nilehonMu dope di hami. Sai dasdasi ma rohanami marningot paboa parsatongkinan do ngolunami di hasiangan on, asa unang laos mate hami tutu hape tongon dibagasan dosa dohot haramunon dope hami. Lehon ma TondiM mangarajai rohanami asa sai tungki hami manolsoli dosanami gabe burionMu ma hami asa parsidohot di ujungna marsonangsonang di Surgo sambulo ni tondinami.

U    :  Sesa ma saluhut hageduhonnami dohot pangalaosionnami marhitehite pangulunami na sasada i, AnakMu Tuhan Jesus Kristus. Sai pahot ma asi ni rohaM di hami marhitehite panindangion dohot hagogoon ni Tondi Parbadia asa tarapul situtu rohanami manjou Ho, asa pantun, tigor jala daulat hami marpangalaho, bahen hasangapon di GoarMu na badia i. Amen.

R   :  (Mangendehon): BE. 452: 2   NA RO PANDAONI BOLON I   BL. 303     

v  Tung sae do dosa i sude ai nunga mate Jesus.

Ndang jujuronNa i muse, parholong roha Jesus.

Uli ni barita i, lasniroha bolon i.

Sai dipuji rohangki, Jesus, Jesus, Jesus.   

U    :  Tabege ma hata bagabaga taringot tu hasesaan ni dosa:   Songon on do Hata ni Tuhan Jahowa: Nunga diarsahi Ho Ahu marhite sian angka dosam, jala nunga dilojai ho Ahu marhite sian angka hajahatonmu. Ahu tutu, Ahu sandiri manalesei angka pangalaosim  ala ni hadirionKu, jala ndang be Hupaingotingot angka dosam. Hasangapon ma di Debata na di ginjang!

R   :  Amen               (Hundul)

08. Marende BE No. 392: 3   SAI PASIAT TUHAN JESUS  BL. 261

v                          Ai sadia leleng nari laos so putus rohami.

Unang toishon so tung salpu, tingki parasian i.

Sai pasiat Tuhan Jesus, jangkon i tu rohami.

Nunga tingki parasian, sotung jolo salpu i.

09. E p i s t e l :

U  :  Tabege ma Hata ni Debata turpuk ni ari Minggu Ujung Taon Parhuriaon sadari on, ima na tarsurat di Hesekiel 34: 11 – 16.  Ai songon on do hata ni Tuhan Jahowa: Ida ma, Ahu, apala Ahu sandiri usouso sogot di birubirungKu, jala luluanHu nasida.

R  :  Songon pangalului ni parmahan di punguanna di ari uju di tongatonga ni birubirunna angka na mampar i ibana, suang songon i Ahu mangalului birubirungKu sogot, jala paluaonHu nasida sian saluhut inganan parserahannasida i,  uju di ari ombun dohot haholomon marimpotimpot.

U  :  Jala Ahu manogihon nasida ruar sian angka bangso dohot papunguhon nasida sian angka luat, asa Huboan nasida mulak tu tanonasida i, laos Ahu marmahan nasida di atas ni angka dolok Israel, dibagasan angka rura dohot di bagasan saluhut parmianan di tano on.

R  :  Di  jampalan apala na lomak Ahu marmahan nasida, jala di atas dolok angka na timbo di Israel parudamannasida, disi ma mangulon nasida di parudaman na denggan, jala jampalan apala na lomak jampalanna di atas ni angka dolok ni Israel.

U  :  Ahu sandiri ma marmahan birubirungKu, jala Ahu paulon nasida, ninna Tuhan Jahowa.

R  :  LuluanHu ma na mago i, jala mulak boanonHu na tardempar i, jala lilitanHu do na mabugang i, jala pargogoanHu do na marsahit i; alai anggo na mokmok i dohot na gogo i siaphononHu do, Ahu sandiri tahe marmahansa marhitehite uhum.

U  :  I do sahatna: Martua ma angka na tumangihon Hata ni Debata jala na umpeopsa. Amen.

10. Marende BE No. 759: 1,4   JAHOWA SI PARMAHAN AU-2

v Jahowa Siparmahan au ndang na hahurangan au;

Tongon dibaen na lomak i pangolu tondingki

v Di rura hamatean pe, ndang be mabiar au, (jongjong)

Ai disondangi do sude sonang mardalan au.

11. MANGHATINDANGHON HAPORSEAON:

U   :  Tahatindanghon ma haporseaonta i, songon na hinatindanghon ni donganta sahaporseaon di sandok portibi on. Rap ma hita mandok:

R   :  Ahu Porsea…..     (Hundul)

 

12. KOOR : INA KAMIS

13.   TINGTING HURIA

NO.	TATA IBADAH	MINGGU SIANG (BE) 10:00 WIB	ROSTER NATAL & KEGIATAN HKBP PETUARAN
1.	Marende No.	TATA IBADAH DISEDIAKAN OLEH GEREJA	22/12/20	Natal Ama & Ina HKBP Petuaran (19:00 WIB)
2.	Votum – Introitus
3.	Marende No.
4.	Patik		24/12/20	Parpunguan Bodari HKBP Petuaran (19:00 WIB)
5.	Marende No.
6.	Manopoti Dosa		25/12/20	Pesta Natal I HKBP Petuaran (10:00 WIB)
7.	Marende No.		26/12/20	Pesta Natal II HKBP Petuaran (10:00 WIB)
8.	Epistel
9.	Marende No.		26/12/20	Ulaon Tardidi Dohot Malua HKBP Petuaran (10:00 WIB)
10.	Manghatindanghon Haporseaon		27/12/20	Natal SKM & RN HKBP Petuaran (19:00 WIB)
11.	Koor
12.	Tingting Huria		30/12/20	Tutup Buku Keuangan HKBP Petuaran (09:00 WIB)
13.	Koor
14.	Marende No.		31/12/20	Rapat Program Tahun 2021 HKBP Petuaran (09:00 WIB)
15.	Jamita
16.	Marende No.		31/12/20	Parpunguan Bodari
17.	Tangiang Panutup + Pasu – Pasu + Amen – Amen – Amen			HKBP Petuaran (19:00 WIB)
			01/01/21	Parpunguan Tahun Baru 2021 HKBP Petuaran (10:00 WIB)

II. PARHOBAS MINGGU

ULAON	MINGGU SIANG (10:00)
Parjamita	CPdt. Rahman Tamba, S.Th
Paragenda	St. M. Manurung
Tingting	-
Papungu Pelean	Marpelean Tu Jolo
Parorgan	-

III. JADWAL KEBAKTIAN LINGKUNGAN & LATIHAN KOOR

PELAYANAN	ARI	PUKUL	INGANAN / ALAMAT
SERMON HURIA	Selasa	20 : 00 WIB	DITIADAKAN UNTUK SEMENTARA WAKTU
SERMON PARHALADO RESSORT	Jumat	14 : 30 WIB	HKBP SABUNGAN RESSORT
PHD INA + KOOR	Kamis	20 : 00 WIB	DITIADAKAN UNTUK SEMENTARA WAKTU
PHD AMA + KOOR	Jumat	20 : 00 WIB
PHD RN + KOOR	Sabtu	20 : 00 WIB

IV. DIAKONIA

Taboan be ma dibagasan tangiangta angka donganta na tongtong dibagasan parsahiton, asa lam tumibu malum sian parsahitonna.

 

No.	GOAR DAN MARGA	SEKTOR	KETERANGAN
1.	Op. Angel br. Pardosi	Dusun II	Pemulihan – Rumah
3.	Op. Mei br. Sihite	Dusun I	Pemulihan – Rumah
4.	Op. Vicky br. Lubis	Dusun I	Pemulihan – Rumah
5.	Op. Juntra br. Sagala	Dusun III	Pemulihan – Melati
6.	St. B. Sitorus	Dusun I	Pemulihan – Rumah
7.	Op. Silvia br. Sitorus	Dusun V	Pemulihan -  Rumah

 Yesus berkata kepadana: “Aku akan datang menyembuhkannya” (Matius 8:7). 

V. ULANG TAON HATUTUBU DOHOT PARSARIPEON

Saluhut parhalado dohot ruas HKBP Petuaran pasahathon selamat ulangtahun ma tu amanami, inanami, naposobolung, remaja nang dakdanak, na marulang tahun (hatutubu dohot parsaripeon) dibagasan na saminggu on, ima mulai tgl. 22 Nopember 2020 sahat tu tgl. 28 Nopember 2020. 

No.	GOAR – MARGA	TUBU	MARBAGAS	UMUR / TAHUN
1.	Op. Mangihut Simanjuntak	25 – 11 – 1953	-	67 Tahun
2.	Nora br.Simamora	26 – 11 – 2013	-	07 Tahun
* Sesuai Dengan Database Sementara Yang Diterima Oleh Gereja

Karena oleh Aku umurmu diperpanjang dan tahun-tahun hidupmu ditambah (Amsal 9:11).

TINGTING NA MARRAGAM

1. Goar Ni Minggu

Goar Ni Mingguta Sadarion ma : Minggu Ujung Taon Parhuriaon, Jala Topik Minggunta Ima : Ari Uhum Sogot – Penghakiman Terakhir.  

2. Torop Ruas Na Mandohoti Parmingguon

	PARMINGGUON (Minggu, 15 Nopember 2020)
Ruas Ama	14
Ruas Ina	37
Ruas Remaja / Naposo	15
Sikkola Minggu (08:00)	13
Parhalado	11
TOTAL	77 Halak

3. Ruas Na Tamba

Pinabotohon Ma Tu Saluhut Ruas Ni Hurianta, Mamungka Minggunta Sadarion, Gabe Ruas Hurianta Ma Ima Kel. Alen Barus Dohot Nova br. Tampubolon. Taboan Ma Dibagasan Tangiangta Jala Diramoti Tuhanta Ma Keluarga Nasida.

4. Rapat Natal Sekolah Minggu & Remaja Naposobulung

Pinabotohon Ma Tu Ketua Seksi Sikola Minggu Dohot Remaja Naposobulung Hurianta, Diminggu Sadarion Tgl. 22 November 2020 Pukul 15:00 Wib Dipatupa Hurianta Do Ima Rapot Natal SKM Dohot RN. Alani Tahadohoti Ma Ulaon Parapoton I.

5. Parjamita Na Ro

Pinabotohon Ma Tu Saluhut Ruas Ni Hurianta, Di Minggu Tgl. 29 November 2020 Martugas Ma Inang CPdt. Nancy Lubis Tu Hurianta Marhite Acara Parmingguon.

6. Pasahathon Parbue Ni Celengan Zending Tu PA. ELIM HKBP

Pinabotohon Ma Tu Saluhut Ruas Ni Hurianta, Di Ari Kamis, Tgl. 26 November 2020 Pasahathon Ma Parbue Ni Celengan Zending Napinatupa Ni Hurianta Marhite Dewan Diakonia. Alani Borhat Do Uluan Ni Hurianta, Dewan Diakonia, Utusan Parhalado Na Didampingi Amang Pandita Ressort.

TINGTING PARHEPENGON

No.	PENERIMAAN		HADIR	HURIA	PEMB	PUSAT
				(Rupiah)
A. Pelean
1.	P. Minggu	15/11/2020	77	Rp. 259.000	Rp. 280.000	Rp. 133.000
2.	P. Tu Distrik			DISTRIK		Rp. 200.000
3.	P. Sikola Minggu		13	Rp. 10.000	-	Rp. 5.000
B. Balanjo Uluan
1.	-			-	-	-
C. Guguan Taon
1.	-			-	-	-
D. Hamuliateon, dll
1.	Pelean & Hamuliaon Pamasumasuon Alen Barus & Nova br. Tampubolon Di Ari Sabtu Tgl. 21 November 2020			Rp. 736.000	-	-
2.	Dipasahat Boru Ni Hurianta, Ima Mellisa br. Lubis Sumbangan Tu Pembangunan Cat Ni Hurianta Rp. 300.000				Rp. 300.000
3.	Hasil Total Pengumpulan Celengan Zending Di Ari Minggu Tgl. 15 November 2020			Rp. 5.225.000
TOTAL (Pelean Tingting Tgl. 22 /11 / 2020)				Rp. 6.230.000	Rp. 580.000	Rp. 338.000

14.   Marende BE No. 522: 1 + 2 SURGO I SAMBULONTA DO I BL.        

v  Surgo i sambulonta do i, ndang adong be siaeon disi,

Na mamuji tongtong na disi, pinalua ni Tuhanta i.

Surgo i, surgo i, ndang adong be siaeon disi,

Surgo i, surgo i, surgo i, ndang adong be siaeon disi.

v  Na marloksa naung sahat tusi, tu inganan na sai denggan i.

Aut naung domu ma au dohot i, gok las ni rohangku disi.

Surgo i, surgo i, ndang adong be siaeon disi,

Surgo i, surgo i, surgo i, ndang adong be siaeon disi.

 

15. JAMITA:  Mateus 25: 31 – 46

 

16. Marende BE No. 834: 1--   NA MASIHOL DO ROHANGKU   (Pel. 1a, 1b, + 2a)

v                          Na masihol do rohangku tu na sonang i tu inganan ni Tuhanta i

Tano on ro di sude na pangisina i,  susa sai susa rohangki

Marolopolop rohangki di Surgo di na sonang i,

Soada na hurang sabam sonang rohangki, molo dung sahat au tusi.

 

v    Ai andigan idaonku haholonganhi, raphon Jesus ale-alengki,

       Haholongan na badia sian Jesus i, sonang sai sonang rohangki.

                Marolopolop rohangki di Surgo di na sonang i,

                Soada na hurang sabam sonang rohangki, molo dung sahat au tusi.

                                                   ------Musik-----

v  Di na hundul au manatap dompak langit i, di na ro sibalik hunik i

Digombarhon i do ujung ni ngolunta i, ndang be mabiar au disi

Marolopolop rohangki di Surgo di na sonang i,

Soada na hurang sabam sonang rohangki, molo dung sahat au tusi.

17.   PARNINGOTAN DI ANGKA NAUNG MONDING:

a.   Marende BE No. 835: 1,3    NUNGA LAO, NUNGA LAO

v  Nunga lao, nunga lao dongan deba tu nadao

Mandapothon Debatanta, dialapi suruanNa

Tu Banua Ginjang i, tu Banua Ginjang i

v  Tua ni i, tua ni i saluhutna na porsea

Di Jesus Kristus Tuhanta, hangoluan salelengna

Do pinaradeNa i, do pinaradeNa i.

b.  Manjaha goar ni angka naung monding:

Hamu angka dongan sahaporseaon na hinaholongan ni Tuhan Jesus Kristus. Molo tapatupa pe sadari on parningotan ni angka na monding ndang na mangarungkari sidangolon parningotan on. Alai marhite parningotan ni angka na monding on ingotonta ma hita pe na ingkon marujung do di tingki na be songon angka donganta naung parjolo monding i. Ndang sihabiaran be sorop ni hamatean i ai nunga dipatunduk Tuhan Jesus Kristus marhitehite haheheonNa sian na mate. "Jo hamatean, didia hamonanganmi? Jo hamatean, didia soropmi?" Alai dosa do sorop ni hamatean, jala patik i do gogo ni dosa i. Alai mauliate ma di Debata, na pamonang hita marhitehite Tuhanta Jesus Kristus! Antong tabegema nuaeng goar ni angka donganta naung jumolo monding, mulai sian 24 Nopember  2019  sahat tu 22  Nopember 2020. (laos dijahahon ma goar-goar ni angka naung monding i ]

 

NO	GOAR	MONDING	KET
1.	Damayanti br. Barus	21 – 08 – 2020	PU. Desa Petuaran Hulu

 

c.  Mangendehon  BE No. 347: 1 – 3  BL.  11             

v  Sai masipaidaan do na porsea i, dung sahat be langkana tu hasonangan i, tu hasonangan i, tu hasonangan i.

v  Antong burju ma hita mangalo dosa i, sai unang tading  hita di tongan dalan i, di tongan dalan i di tongan dalan i.

v  Sai masipaidaan ma hita on muse, di lambung ni Tuhanta. Dung monang hita be, dung monang hita be, dung monang hita be. (Jongjong)

 

18.   PANGUJUNGI

U    :  Nunga tabege Hata ni Debata tu hita di minggu ujung taon parhuriaon sadari on ima taringot tu ari uhum sogot. Asa dung ro sogot Anak ni jolma i marhasangapon, hundulanNa ma disi habangsa hasangaponNa i. Marluhut ma tu joloNa nasa bangso, jadi sirangonNa ma nasida songon binahen ni parmahan na manirang birubiru boruboru sian birubiru tunggal. Dung i dohonon ni Raja i ma tu angka na di siamunNa i: Ro ma hamu, angka na pinasupasu ni Damang, tean hamu ma harajaon i, na pinature di hamu sian haoojak ni tano on! Antong borhat ma hamu mardongan Tuhan i, patupa ma hombar tu lomo ni rohaNa.

 

R   :  Ale Tuhan Debata, urupi ma hami patupahon aha sibahenonnami.

 

U   :  “Situtu do na hudok on tu hamu; Nasa na binahenmuna tu sada sian anggingku angka na metmet on, na tu Ahu do i dibahen hamu!” Alani,  molo adong na male lehon hamu ma mangan, molo adong na mauas lehon hamu ma minum, molo adong na buro janghon hamu ma nasida, molo adong na marsangkotbulung parulosi hamu ma nasida, molo adong na hansitan tingkir hamu ma nasida, molo adong na tarhurung dulo hamu ma nasida.

 

R   :  (Mangendehon) BE No. 730: 1,2  SAI PATAU MA AU TUHAN

v  Sai patau ma diringku ale Tuhan, papatarhon hinauliMi Tuhan,

Suru ma tondiMi saor tu rohangki, lao papatar holongMu tu donganki.

v  Sai patau ma diringku ale Tuhan, papatarhon hinauliMi Tuhan,

Suru ma TondiMi saor tu rohangki, patariparhon basaM tu donganki.

U   :  Tatangianghon ma peleanta: Ale Debata, Amanami na di banua ginjang, Ho do haroroan ni saluhut silehonlehon na denggan dohot nasa ulibasa na mauliutus. Hupasahat hami ma sian na nilehonMi tu hami, peleannami tu Ho. Sai jalo ma i gabe uap na hushus di joloM. Pasupasu ma i jala ramoti asa huparhaseang hami pelean on, patimbulhon harajaonMu di tongatonga ni huriaM dohot di portibi on. Buhai ma rohanami marhitehite TondiM, asa lam hutanda hami godang ni silehonlehonMi tu hami, asa lam girgir hami mandok mauliate tu Ho, marhitehite Jesus Kristus Tuhannami. AMEN

 

R   :  (Mangendehon) BE No. 204: 2  NDANG TADINGHONONHU HO BL. 73

v  Nasa na nilehonMi, tondi ro di pamatanghu.

Hosa dohot gogongki, ro di saluhut artangku.

Hupasahat i tu Ho, na so unsatonhu do.

 

U   :  Ale Tuhan Debata, na sian na hinan jala na mangolu ro di saleleng ni lelengna! Huingot hami sadari on angka na mate sian hami, naung pajolohon tu lambungMu. Di Ho do anakhinsu di banua ginjang, jala diungkap Ho do i diangka na mangasahon Tuhan Jesus Kristus. Na rungka do rohanami sadari on marningot ajalnami, dohot haheheon ni daging di ari sogot. Mauliate ma rohanami tu Ho, ala ditubuhon Ho hami tu pangkirimon na mangolu, gabe partohap hami di hangoluan na so ra suda. Ndada na mandele hami di ari parningotan on, alai na malungun do hami di sambulo ni tondinami. Nunga torop dongannami naung nialapMu; tau sipaingot do ujung ni langkanasida di hami, bahen pangkirimon mida Tuhan Jesus di ujung ni langkanami be. Sai sungguli ma rohanami mambahen tiruan na denggan di angka pinomparnami. Sai apuli ma na marsak roha dohot na matean, asa unang mangandungi jala mandele nasida. Sai taiti ma rohanasida mamereng dompak ginjang. Sai lehon TondiM  tu hami asa tangkas dihatindanghon tu hami, naung dohot do hami anakMu jala panean di arta na di banua ginjang. Sai padao ma ganggu ni roha sian hami, asa hot haporseaonnami maniop Tuhan Jesus Sipangolu i, andorang hubolus hami rura linggoman ni hamatean i. Molo homur matanami be, ungkap ma mata ni rohanami asa tangkas niida dalan tu hasonangan i. Molo hallang dilanami, so binoto be mangkuling, pargogoi ma hami marhitehite TondiM i, asa tarjouhon hami: Ale Amang! Sahat tu tanganMu ma tondingku! Sai patiur hian rohanami, asa hobas langkanami jala sonang hami laho mate di bagasan Tuhan Jesus Kristus, Tuhannami. Amen.  Ale Amanami na di banua ginjang! Sai pinarbadia ma GoarMu! Sai ro ma harajaonMu! Sai saut ma lomo ni rohaM di banua tonga on songon na di banua ginjang! Lehon ma tu hami sadari on hangoluan siapari! Sesa ma dosanami songon panesanami di dosa ni dongan na mardosa tu hami! Unang hami togihon tu pangunjunan! Palua ma hami sian pangago!

 

R   :  (Mangendehon):

v  Ai Ho do nampuna harajaon, dohot hagogoon.

                   Ro di hasangapon, saleleng ni lelengna, Amen

U   :  Pasupasu !

 

R   :  (Mangendehon ) Amen… Amen… Amen...