(51). TATA IBADAH PARTANGIANGAN KELUARGA - RABU, 17 JUNI 2020

PARTORDING PARTANGIANGAN KELUARGA/SEKTOR (KHUSUS)MENYIKAPI SITUASI “PHYSICAL DISTANCING” MEMBERANTAS PENYEBARAN CORONAVIRUS DISEASES – 19 (COVID – 19)

HKBP PETUARAN RESSORT PERBAUNGAN

RABU, 17 JUNI  2020                     PUKUL 19:30 WIB

P A N G A R A D E O N

ü  Paradehon Buku Ende, Bibel,  tarlumobi roha di bagasan haporseaon di Tuhan Jesus Kristus

 

01.   MARENDE : BE. HKBP. NO. 559 : 1 + 3 “DEBATA NA SONGKAL JALA NA BADIA” 

1.   Debata na songkal Sitolu sada, Di songot ni ari hupuji GoarMi,

Debata na songkal Siparasi roha, Si Tolu sada, Na badia i. Amen.

3.   Debata na songkal, na so tarida, mata na mardosa, ndang tau marnida Ho

       Ho na sun badia, na so hatudosan, sun hinagogo, sun sangap do Ho.

02.   VOTUM – INTROITUS - TANGIANG

P :  Marhitehite Goar ni Debata Ama, dohot Goar ni AnakNa Tuhan Jesus Kristus, dohot Goar ni Tondi Parbadia na tumompa langit dohot tano on.

K: Amen.

P :  Martua do halak na manaon di pangunjunan, ai dung tau sian pangunjunan i, jaloonna do tumpal hangoluan, na pinarbagabaga ni Tuhan i tu angka na holong roha di Ibana. Haleluya ... ! Martangiang ma hita !  Ale Tuhan Debata jala Amanami ! Sai urupi ma hami, asa unang mandele hami, uju ro hapogoson tu hami, jala asa unang magopo hubahen hami silehonlehonMu na denggan i, uju ro pasupasuM tu hami. Ramoti hami, asa unang marpos ni roha hami tu arta na di hasiangan on. Lehon di hami haporseaon asa dohot hami parjambar di siteanon ni angka na porsea di Ho marhitehite Tuhan Jesus Kristus, Tuhannami. A m e n.

03.   MARENDE : BE. HKBP. NO. 670 : 1 + 2            “TARBEGE SOARA NA JOUJOU”  

1.      Tarbege soarana joujou,  Tongos ma sondangmi,

Tung torop parbegu di na holom i, Tongos ma sondangmi.

Tongos ma barita na uli, Mandungoi na modom i,

Tongos ma Barita na uli, Mandungoi na modom i.

2.      Tarbege ma angguk na joujou, Tongos ma sondangmi,

Taurupi ma angka na lilu i,Tongos ma sondangmi, Tongos ma ………

04.   EPISTEL : 3 Musa 25 : 1 – 13

P : Turpuk Epistel di partangianganta di bodari on tarsurat di 3 Musa 25 : 1 – 13, tajaha ma marsingkat sorin; Dung i ro ma hata ni Jahowa tu si Musa di dolok Sinai songon on:

K:   Paboa ma tu halak Israel jala dohononmu ma tu nasida: Ia dung masuk hamu tu tano, silehononku tu hamu, ingkon pataluonmu do tano i marparadianan Sabbat di Jahowa.

P:   Ingkon onom taon lelengna saburonmu ladangmu jala onom taon lelengna paiasiasonmu ranting ni hau anggurmu dohot papunguhon angka parbuena.

K:   Alai anggo di taon papituhon, ingkon marparadianan Sabbat do tano i, i ma Sabbat di Jahowa, ndang jadi saburonmu disi ladangmu manang paiasonmu ranting ni hau anggurmu.

P:   Alai anggo sagak, na tubu dung salpu gotilon, ndang jadi gotilonmu, angka parbue ni hau anggurmu na so pinaiasmu i pe ndang jadi tapuonmu, ala taon paradianan Sabbat di tano i do i.

K:   Ianggo gogo ni tano i di taon paradianan Sabbat i, ingkon gabe sipanganon di hamuna, di ho tahe dohot di naposom baoa dohot parompuan dohot di halak gajianmu dohot di donganmu sajabu, nang di halak dagang na manginsua di lambungmi.

P:   Di pinahanmu dohot di binatang na di tanomu; sandok gogo ni tano i tahe ingkon gabe sipanganon.

K:   Dung i bilangonmu ma di ho pitu taon paradianan Sabbat, i ma pitu hali pitu taon, asa leleng ni na pitu taon paradianan Sabbat gabe opatpulu sia taon toropna.

P:   Ingkon mangkuling ma bahenonmu soara ni sarune tingting di bulan sipaha pitu di ari sampulu, ingkon di ari pardengganan tahe mangkuling bahenonmuna soara ni sarune tingting di sandok tanomuna i.

K:   Ingkon parbadiaanmuna do taon palimapuluhon jala tingtingkononmuna haluaon di tano i tu saluhut halak pangisina; ingkon gabe taon parolopolopon do i di hamu, jala ingkon mulak hamu ganup tu partalianna, mulak huhut ganup tu donganna hian.

P:   Taon parolopolopon do tahe di hamu taon palimapuluhon i; ndang jadi hamu manabur disi jala ndang jadi hamu manggotil sagakna, jala ndang jadi tapuonmuna parbue ni hau anggur na so pinaias i rantingna.

K:   Ai taon parolopolopon do i, ingkon badia do i di hamu ingkon panganonmuna disi gogo ni ladang na tubu boti.

P:   Ia di taon parolopolopon i, ingkon mulak tu ganup partalianna hian. Ima sahatna. Martua do angka na tumangihon Hata ni Debata dohot na umpeopsa. Amen.

05.   MARENDE : BE. HKBP. NO. 115 : 1 + 3            “TUHAN DEBATA”           

1.  Tuhan Debata Sai ramoti ma daging dohot tondinami

      I do pangidoannami Sai pahipas be Hami on sude

3.   Sai parbadiai Sai tongtong rajai Ale Tondi Parbadia

      Rohanami asa ria Mangoloi hataM Hombar tu rohaM

06.   JAMITA : Pangungkapon 7 : 1 – 3

                Andorang so taida dia na nidok ni turpuk jamita on ringkot do tajaha muse bindu na paonomhon taringot tu sahap na paonomhon. Dung diungkap sahap na paonomhon (Pangungkapon 6:12-13) diida si Johannes do lalo bolon, gabe mamirong mata ni ari songon harung hori, jadi sandok bulan songon mudar. Mardekdehan bintang angka na di langit i tu tano, songon hau antaujau na mameuthon parbuena ia jumpa hinutur ni alogo na gogo. Hira na so tarpatorang do songon dia posi ni na masa di parnidaan i. Nang di tingki diida ibana sahap paopathon (Pangungkapon 6:7), nunga mansai maol niantusan hansit ni na masa: porang, haleon, banua toru, hamatean. Molo masa na songon i, ise ma na tahan mangadopi. Tung parir situtu do diae angka jolma masa na songon i. Ndang adong be na boi paluahon ia so holan paima hamatean. Boha do ulaning molo songon niida ni si Johannes on masa tu parngoluonta nuaeng ? Tu dia ma hita maporus. Adong do tagamon na boi patudu dalan hangoluan di hinahansit ni na masa i ? Ro ma nuaeng bindu papituhon gabe boi ma hita tongkin marhosa ganjang sai hira naung sumuang do haulion ni portibi on ai nunga salpu angka hasosakan. Aha do diida si Johannes di bindu pitu on ? (a) Diida adong opat surusuruan jognjong di na opat desa ni tano i, di Utara, Purba (Timur), Dangsina (Selatan), Pastina (Barat). Na opat surusuruan i maniop na opat alogo ni tano i, asa unang mangombus alogo di tano, nang di laut nang tu sada hau pe. Aha ma na masa molo so mangullus be alogo tu tano, laut nang hau ? Taboto do, molo pola so ro alogo sian na opat desa laho mangalehon hosa hangoluan tu na tinompa ni Tuhan i holan hamatean sambing nama sipaimaon, ndang tagamon adong na boi malua. Hamatean nama na masa di saluhut tano on ; (b) diida ibana ma muse sada surusuruan sian habinsaran ni mata ni ari na maniop sahap ni Debata na mangolu, jadi balga ma soarana manjouhon dompak surusuruan na opat i angka naung manjalo sahala mangago tano dohot laut, ninna ma “Unang ma ago hamu tano nang laut nang angka hau”.

                Molo taida turpuk epistel dohot evangelium, saurdot do pinatolhasna, ima panarihonon ni Debata paluahon tano on sian hamagoan. Evengelium mangondolhon joujou ni Debata tu Israel marhite si Musa laho patupa taon paradianan tu tano ; jamita partangiangan on patubegehon huaso ni Debata marhite surusuruanNa mangondihon na tinompaNa. Tangkas do tarida hadomuan ni na dua turpuk i, taringot tu haluaon ni na tinompa ni Debata. Ndang diloas manang dipasombu Debata mago na tinompaNa i di liat portibi on, alai dipalua do i sian hagogoon ni na boi manegai, mangalengsehon dohot mangago. Ihut tusi, taida ma dia binaritahon ni turpuk on di partingkian ni si Johannes jala songon dia hadomuanna tu hita di partingkian nuaeng.

                Parjolo, adong do Debata na mangolu jala na tongtong sumarihon na ringkot di jolma uju masa hangaluton. Ndang dipaloas Ibana tano on nang pangisina marhinamago alai disarihon do marhite na diorai alogo ndang mangullus. Sada gombaran do na pinabotohon ni si Johannes di turpuk on taringot tu parsorion ni angka siihuthon Kristus di huria na parjolo i. Torop sian angka ruas ni huria na digosagosa, dilelei dohot dipusa ala hasatiaonnasida di Kristus. Hira so adong be inganan na boi marhosa di nasida ala dihaliangi angka parjahat na martahi mamusa. Ndang adong be inganan partabunian na mangholipinasida jala tu dia pe nasida morot manang marhusor nunga sai tarondam ngoluna jala holan hamatean nama na masa, tu dua ma jolma i mangalualu ? Ise do nasida tahe na satia mangihuthon Jesus ? I ma angka na ro sian horong Jahudi dohot na so Jahudi na manjalo barita nauli taringot tu hangoluan na so ra suda (Pangungkapon 14:6). Nasida naung manjalo barita i satia mangihuthon na hinaporseaanna ndang olo muba nang pe di bagasan biar. Asa na niida ni si Johannes on boi talapati songon apulapul na pahothon dohot margogoihon haporseaonnasida.

                Paduahon, huaso ni Debata maminsang, mangorai dohot mangambati tahi ni parjahat. Tung tangkas do huaso ni Tuhan i mangorai sangkap hajahaton na naeng mamusa angka na porsea i. Marhite surusuranNa marsoara Tuhan i mandok, “Unang ma ago hamu tano nang laut nang akha hau”. Ndang sadia leleng dung mangae angka na satia i ro do Debata marsuru surusuruanNa mangorai, asa unang ditorushon laho pasohon alogo ndang mangullus. On ma alus na tangkas na boi taida sian turpuk ayat 3. Dung diida Ibana hasatiaon ni angka na porsea i ndang dipasombu mago nasida. Disarihon do ngolu nasida unang laos mago ala porsuk ni na masa.

Hombar tu topik ni jamita minggu on, taida ma ringkot sihangoluhononta sian turpuk on :

1)    Mamarangehon panarihonon ni Debata di angka tinompaNa. Hira di sude luat do nuaeng sai adong hamaolon diadopi torop jolma taringot tu portibi on. Holan ala mangalului sinamot mansai godang, ndang maralang roha ni jolma manegai angka hau, suansuanan na boi paulihon parhosaan. Dapotsa do nian godang sinamot sian ulaonna i, alai gumodang ma jolma susa dihorhon panegaina.

2)    Dipinsang Debata do jolma na patubu hasusaan tu dongan jolma. Nang pe hira na dipasombu Ibana tongkin jolma i patupahon na hinalomohon ni rohana, alai unang lupa hita ndang gabe boi jolma i mambahen lomo ni rohana sandiri tu na tinompaNa. Unang ma nian adong be jolma na so marningot pinsangpinsang ni Debata di angka na patuduhon gogona laho manegai. Haru tu angka na dipasahat huaso laho manguji hasatiaon ni na porsea, ndang dung gabe boi holan lomona sambing pamasaonna tu ngolu ni angka na porsea. Dipinsang Debata do jolma na so marpanarihon di ngolu ni donganna. Taingot ma ndang adong huaso ni jolma laho manusai donganna jolma. Alani, molo tongon masa songon na niadopan ni huria na parjolo i hasahatan ni pangungkapon ni si Johannes on di hita nuaeng, pos ma rohanta na so dipasombu Ibana hita manaon na hansit ala hatangkangon ni angka na marsogo ni roha di hita.

3)    Debata na mangolu maniop sahap paluahon na porsea. On ma apala na mansai tandi sian turpuk on ai ndang dos Debata dohot angka na sinomba ni na leban. Nunga sian panindangion ni Padan na Robi adong haporseaon na mansai togu taringot tusi. Dipaingot si Josua do bangso Israel na mandok, Debata na mangolu i do na rap dohot nasida uju mangadopi ragam hamaolon, jala holan rap dohot Ibana do dapotan parsaulian angka na porsea. Di buku Hosea 1:10 dipaingot do nang taringot tu hadirion ni bangso i, ai ndang sian mulana nasida bangso pinillit ni Debata, alai nionjar ni asi ni rohaNa gabe anak ni Debata na mangolu nasida. Molo Debata na mangolu na manggomgomi ngolunta ndang lomos be hita jala tahutan mangadopi angka na masa.

                Hita na hinaholongan ni Tuhanta Jesus Kristus. Songon panarihonon ni Debata di angka na tinompaNa i ma taparangehon saleleng mangolu hita di tano on. Taradoti ma nasa ulaon na pauliulihon tano on. Taida ma di naung masa pandemi Covid 19 on na mansai manegai pardalanan ni ngolu ni jolma nang hita na di portibi on. Humasusa jala mansai maol do sude jolma mangula angka siulaon tarlumobi tumorop jolma naung mangae di panahit ni Covid 19 on. Molo godang versi pe pandohan sumber ni pandemi Covid 19 on, alai ingkon ma ingotonta “Molo uli sude na tinompa i, uli do nang parngoluonta, hipas hita mangolu mandai denggan basa ni Tuhan i. Diondihon Tondi ni Tuhan i ma hita patupahon saluhutna i. A m e n.

07.   MARENDE : BE. HKBP. NO. 443 : 1 – 2            “DUNG TUHAN JESUS”

1.   Dung Tuhan Jesus  nampu au,  songgop dame na, biar hu lao, 

Taripar gogo ngoluna i,  nasa dosangku naung sae do i.

Tabari tahon holong-na i. Didia Tuhan, tudoshon i ?

Tuk manum pahi, tarlobida ? Sasada Jesus pinujima !

2.   Di Ho ngolungku !  Las rohangki jumolo Jesus siluami.

PangiringonMu, tolongMu I, mangalo dosa nang rohangki. Tabaritahon……..

08.   TANGIANG PANGONDIANON

09.   MARENDE : BE. HKBP. NO. 318 : 1 – 2             “NUNGA LOJA DAGINGHON”               

1.      Nunga loja dagingkon Naeng ma pitpit matangkon

         O Tuhanku mataMi Dungo di podomanki.

2.      Sesa jolo sasude Na hubaen na so ture

         Ai luhut na sala i  Dipature Jesuski

10.   TANGIANG PELEAN, ALE AMANAMI, PASUPASUPASU, ENDE PANGUJUNGI

P : Tatangianghon ma peleanta, martangiang ma hita. Ale Debata, Amanami na di banua ginjang, Ho do haroroan ni saluhut silehonlehon na denggan dohot nasa ulibasa na mauliutus. Hupasahat hami ma sian na nilehonMi tu hami, peleannami tu Ho. Sai jalo ma i gabe uap na hushus di joloM. Pasupasu ma i jala ramoti asa huparhaseang hami pelean on, patimbulhon harajaonMu di tongatonga ni HuriaM dohot di portibi on. Buhai ma rohanami marhitehite TondiM, asa lam hutanda hami godang ni silehonlehonMi tu hami, asa lam girgir hami mandok mauliate tu Ho, marhitehite Jesus Kristus Tuhannami. Amen. Rap ma hita mandok di Tangiang Ale Amanami ... (Molo parhalado partohononan jumolo ma mandok Tangiang Pasupasu). Alai molo ndang langsung ma mangendehon :

K   : (MANGENDEHON) BE. HKBP. NO. 36 : 3 “PASUPASU HAMI”

3) Amen hudok hami, ale Tuhannami ; na marasi roha i, sangap ma di goarMi.