(46). TATA IBADAH PARTANGIANGAN KELUARGA - RABU, 03 JUNI 2020

PARTORDING PARTANGIANGAN KELUARGA/SEKTOR (KHUSUS)

MENYIKAPI SITUASI “PHYSICAL DISTANCING” MEMBERANTAS PENYEBARAN CORONAVIRUS DISEASES – 19 (COVID – 19)

DI HKBP RESSORT PERBAUNGAN

RABU, 03 JUNI  2020                     PUKUL 19:30 WIB

P A N G A R A D E O N

ü  Paradehon Buku Ende, Bibel,  tarlumobi roha di bagasan haporseaon di Tuhan Jesus Kristus

 

01. MARENDE : BE. HKBP. NO. 116 : 1 + 3   “DITOMPA HO DO AU”

 1. Di tompa Ho do au, sondangi rohangkon;  Tung basa-basaMi sude na di au on.

     Gomgomi pamatangku, naeng Ho do oloanku,  Sai lehon ma gogongku, lomoM naeng  ulaonku. Urupi tatap au tutu, Panompa na burju.

2.  Tuhan Sihophop au, sai buri tondingkon.  Marhite mudarMi torusi ngolungkon.

     Pinuji ma GoarMu, arga ma pangkophopMu, Dibaen pangalahongku, nang nasa ulaonku.  O Jesus Sipalua au, tu Ho ma au patau.

02.  VOTUM – INTROITUS - TANGIANG

P   :        Marhitehite Goar ni Debata Ama, dohot Goar ni AnakNa Tuhan Jesus Kristus, dohot Goar ni Tondi Parbadia na tumompa langit dohot tano on.

K: Amen.

P   :        Huida Tuhan i hundul di atas habangsa na timbo jala na marmulia, jala angka rambu ni paheanNa manggohi bagas joro. Jongjong di atas surusuruan Seraphim, jala masijouan ma nasida songon on : Na badia, na badia, na badia do Jahowa Sebaot, gok hamuliaonNa liat portibi on. Ida ma sai nolnol do mata ni Jahowa tu angka na manghabiari Ibana, angka na manghalungunhon asi ni rohaNa. Sai dihalungunhon rohanami do Jahowa. Ibana do panumpahi dohot lombulombunami. Ai mangasahon Ibana marlas ni roha do hami, marhaposan tu GoarNa na badia i do hami. Sai pasonggop ma asi ni rohaM tu hami, ale Jahowa, homar tu panghalungunhonnami di Ho. Haleluya ... ! Martangiang ma hita !  Ale Debata Sitolu sada, Debata Ama, Anak dohot Tondi Parbadia ! Na mandok mauliate ma hami tu Ho, ala ditompa, dipalua jala diparbadiai Ho hami hinorhon ni asi dohot holong ni rohaM na godang i. Sai ramoti ma hami di bagasan parmaraan dohot pangunjunan, apuli hami uju marsak, pahehe hami uju tinggang jala togutogu hami di hasusuda ni bohalnami tu harajaonMu na di banua ginjang i, asa disi pujionnami Ho marhitehite roha dohot hata na imbaru. Amen.

03.  MARENDE : BE. HKBP. NO. 695 : 1 + 4   “JESUS TUHANHU DI HO MA AU ON”

  1.    Jesus Tuhanku di Ho ma au on, Asa mangihut tu Ho au tongtong

Gohi rohangku ingani au on. Sonang si Ho tongtong, O Tuhan togu ma au.

O Tuhan togu togu ma au, Gohi rohangku ingani au on, Sonang di Ho tongtong.

 

2.      Mansai godang do pardangolanki, Tagan so Jesus dope tohaphi.

Disesa Jesus sude dosangki, gok dame rohangki, Asi rohaNa di au

Tongtong asi rohaNa di au.  Disesa Jesus sude dosangki, gok dame rohangki.

04.  EPISTEL :                                 1 Musa 1 : 26 – 31

P    :        Turpuk Epistel di partangianganta di bodari on tarsurat di 1 Musa 1 : 26 – 31, tajaha ma marsingkat sorin, Dung i mangkuling muse ma Debata: Tole ma, itatompa ma jolma, tumiru rupanta, tudos tu pangalahonta, asa dirajai dengke angka na di laut, dohot pidong angka na martongatonga langit, dohot angka dorbia, ro di sandok tano on nang sude gulokgulok, angka na manjirir di atas tano on.

K:  Jadi ditompa Debata ma jolma i tumiru rupana, rupana ditiruanhon Debata laho manompa ibana, baoa dohot boruboru nasida ditompa.

P:  Dung i dipasupasu Debata ma nasida, ninna Debata ma tu nasida: Marpinompari ma hamu, asa sopar hamu, jala gohi hamu sandok tano on, jala patunduk hamu; jala raja i hamu dengke angka na di laut dohot pidong angka na martongatonga langit ro di sude binatang, angka na manjirir di atas tano on.

K:  Dung i ninna Debata ma: Boti ma i, nunga hulehon tu hamu nasa suansuanan na marparbuehon boni di sandok tano on, ro di sude hau angka na marparbue sisuanon, bahen panganonmuna ma i.

P:  Alai anggo tu sude angka binatang ni tano on dohot tu angka pidong na martongatonga langit, ro di sude na manjirir di atas tano on, angka na marhosa di bagasan: Bulung ni angka suansuanan (hulehon) bahen panganonna, gabe manjadi ma songon i.

H:  Dung i ditilik Debata ma sude na tinompana i, jadi nunga denggan situtu. Dung i bot ma ari, torang ma ari muse, i ma ari paonomhon.

P:  Ima sahatna. Martua do angka na tumangihon Hata ni Debata dohot na umpeopsa. Amen.

 

05. MARENDE : BE. HKBP. NO. 277 : 1           “MARSADA ROHA HITA”

1.   Marsada roha hita Sitanda Jesus i. Tatiop tong jamita Pasonang roha  i.

      Sai pir tondinta be, sada tongtong rohanta. Mangihut  tu Tuhanta Sihophop sasude.

 

06. JAMITA : Johannes 1 : 29 – 34 (Hamuliaon ni Jahowa)

                Hita na hinaholongan ni Tuhanta Jesus Kristus. Pemimpin yang berhasil adalah pemimpin yang berhasil membuat anggotanya menjadi pemimpin baru, itu kata seorang ahli. Demikian juga, seorang guru sangat bangga bila anak didiknya menggapai cita-cita tertingginya dan menduduki posisi yang terhormat. Sang guru semakin mundur karena usia tetapi anak-anak didiknya yang terus semakin maju. Songon i do si Johannes Pandidi. Dung mangula ibana di halongonan manjou sude jolma asa pauba roha jala mandidihon, mansai torop do na mangihuthon ibana. Dia menjadi tokoh yang disegani. I do ala gabe ro angka malim dohot halak Lepi, dohot Parise manungkun ibana : “ise do ho?”, tangkas do dialusi ibana : “Ndang ahu Kristus”, ala adong dope na naeng ro di pudina, na andul umbalga jala sumangap sian ibana, ai mambuka tali ni sipatuna pe ndang layak ibana. Holan “soara na joujou” sambing do.

                Dung i di marsogotna, diida ibana ma Jesus ro tusi. Pintor didok ibana ma tu angka siseanna dohot na torop i : “Ida ma ... (lihatlah)”. Lapatanna, tangkas parrohahon, ini hal yang sangat penting. Aha ma i ? Tangkas ma dipatandahon ibana ma tu siseanna i, ise do Jesus i. Sian i ma gabe diihuthon angka siseanna i ma Jesus. Ditadingkon ma ibana. Songon guru nangkin, nunga berhasil si Johannes mamboan siseanna i tu Tuhan Jesus. Dia rela kehilangan murid karena muridnya berhasil mengenal Yesus dengan baik dan menjadi murid Tuhan Yesus melalui pengajaran atau pemberitaan Yohanes. Hita na hinaholongan ni Tuhanta Jesus Kristus. Ima sitiruonta marhite turpuk jamita partangianganta on, tarlobi tongtong ma ingotonta taon on ima Tahun Orientasi Pekabaran Injil (Tahun Zending) ima taon 2020 on. Tangkas ma tapatandahon Jesus i tu angka halak na asing, asa nang nasida mambuat haputusan laho mangihuthon Jesus. Tontu sahali, ingkon hita na parjolo mananda Jesus i asa boi tangkas tapatandahon tu halak na asing. Tarlobi tu angka sundut na umposo, naeng ma sian sihadakdanahon nasida tapatandahon ma, ise do Jesus i, asa pintor dibuat nasida haputusan : Mengikut Yesus keputusanku. Kebanggaan kita yang terutama janganlah karena berhasil membuat anak menjadi orang yang berhasil di dunia, tetapi menjadi yang berhasil mengenal dan mengambil keputusan untuk mengikut Tuhan Yesus dengan setia dalam seluruh kehidupannya.

                Hita na hinaholongan ni Tuhanta Jesus Kristus. Ise ma huroha Jesus i ? Adong manang piga dipatorang si Johannes Pandidi dison :

1.   Di ay. 29b didok si Johannes : “On do Birubiru ni Debata na mamorsan dosa ni portibi on: Aha do lapatan ni i ?

a) Parjolo, Diingot ibana do, jala i do pinatorangna tu na torop, peristiwa parharuar ni Israel sian parhatobanon Misir, di na sinuru ni Debata nasida maneat birubiru tunggal. Jala mudarna i diusaphon tu tohang (disapukan di ambang atas) ni pintu ni jabu nasida (2 Musa 12:21-22). Ise na mian di jabu i, malua ma angka anakna sihahaan (anak sulung), ndang dohot mate songon anakhon ni halak Misir. Songon i do Jesus. Ibana do Birubiru ni Debata, na dipelehon di dolok Golgata ; disi ma diporsan Jesus sude dosa ni portibi on. Diusehon do mudarNa, asa mudarNa i gabe hasesaan ni dosanta (pat. 1 Kor. 5:7).

b)  Paduahon, diingot ibana do na masa tu si Ishak, uju naeng pelehonon ni amangna si Abraham di dolok Moria. Diparade Debata do sada birubiru, jala ima manggontihon si Ishak gabe pelean. Songon i do Kristus i, gabe Birubiru ni Debata manggontihon hita angka pardosa, mate di hau silang i, asa dipamate hamateanta jala mulak mangolu.

c)   Patoluhon, diingot ibana do nang hata ni panurirang Jesaya di bindu 53:7, “songon birubiru na tinogu tu pamotongan”. I do na naeng dohonon ni si Johannes, naposo ni Debata na pinaimaimamuna, na ala holongNa olo mangae na hansit ala ni jolma pardosa. Nunga ro be Ibana, ima Jesus on.

2.   Na mangihut, di ay. 34 dihatindanghon si Johannes do, ia Jesus i ima Anak ni Debata. Dihatindanghon ibana do, di mulana ndang apala ditanda ibana, na Anak ni Debata do Jesus i. Alai, dididihon ibana Tuhan Jesus, gabe tangkas ma di ibana, ia Jesus i, tutu situtu, Anak ni Debata do. Memang ndang apala dipaboa dison peristiwa pandidion i songon na sinurathon ni si Lukas. Alai dipaboa si Johannes, di ay. 32, diida ibana do songgop darapati sian banuaginjang tu Tuhan Jesus. Di Palestina, binatang na dianggap kudus do darapati, ndang boi pamateon manang allangon nasida. Jotjot do i dipake nasida – songon na di 1 Musa 1:1 i, lambang ni Tondi ni Debata na mangareapreap. Jala didok Debata na marsuru ibana i : “Ia tusi diida ho tuat Tondi i, jala mian di Ibana, Ibana do sididihon Tondi Parbadia”. Molo songgop Tondi ni Debata tu sasahalak, marlapatan do i, nunga mian di ibana Debata. Alai umbagas sian i dope dihatindanghon si Johannes on. Ndada holan mian sambing Debata di Jesus, alai didok do : “Ibana do Anak ni Debata” (ay. 34).

      On ma sipatandahononta tu angka donganta, tarlobi tu pomparanta, ima : ia Jesus i, ima Anak ni Debata, na disuru Debata gabe Birubiru ni Debata laho mamorsan dosa ni portibi on. Ise na porsea di Ibana nunga be dohot dosana diporsan jala dibolongkon Jesus i.

3.   Na parpudi, ia Jesus i ima sididihon Tondi Parbadia. Didok si Johannes, ia pandidion na pinatupana holan pandidion aek do, ima tanda hasesaan ni dosa dohot tanda ni hamubaon ni roha. Alai ianggo Jesus, didok Debata tu ibana di ay. 33c : Ibana do sididihon tondi Parbadia. Di Ulaon ni Apostel 1:5 pe didok do : “Ai aek do dididihon si Johannes i ; alai Tondi Parbadia do didihononhon tu hamu, ndang pola piga ari nari !” Alai sasintongna, ndada holan martudutudu tu Pentakoste hata on. Ai marlapatan do hata on, ia Jesus i torus manorus do mangalehon huasoNa tu sude angka na porsea di Ibana, huaso laho mamaritahon Barita na UliNa i.

                Hita na hinaholongan ni Tuhanta Jesus Kristus. I ma pos ni rohanta. Torus do dididihon Tuhan Jesus TondiNa i tu hita sahat tu saonari. Alani i, unang mabiar manghatindanghon Jesus dohot patuduhon huaso ni Jesus di ngolum tu halak na asing. Tarlumobi ma di konteks parngoluon na tabolus dope sahat ro di tingki on. Ima di na masa dope pandemi Covid 19 on. Dohononta ma ingkon tongtong do hita mamboan hangoluan (keselamatan) tu na di humaliangta, tanda di hita angka naung manjalo hangoluan i marhite haporseaonta di Tuhan Jesus Kristus. Sehat dirinta, sehat keluarganta, sehat songon i angka na di humaliangta. Jala laos dipaingot, songon jamita piga minggu na salpu, asa mangolu di bagasan’dikendalikan Tondi i ma hita asa tarparbuehon hita parbue ni Tondi. Ima mambahen lam rarat Barita na Uli i. Amen.

07. MARENDE : BE. No. 467: 1  “ASI NI ROHAM HUPUJI”

      Asi ni rohaM hupuji ala Ho manobus au. Dipaias Ho rohangku, gabe soranganMu au.

IngananMu rohanami, TondiMi manggohi i. Pangke dohot ngolunami gabe ulaulaMi.

08.  TANGIANG PANGONDIANON

09.  MARENDE : BE. HKBP. NO. 317 : 1-2  “LAO MODOM DO LUHUTNA” (Pelean)

 1.    Lao modom do luhutna Nuaeng sude na  loja. Sandok portibi on

         Ianggo ho tondingku. Pasangap ma Tuhanmu Na sumarihon ho tongtong

2.      Ale mata ni ari Tu dia ho saonnari. Dilele borngin ho ? Holom pe saluhutna

         Nuaeng diida mata Di Debatangku  tiur do.

10.  TANGIANG PELEAN, ALE AMANAMI, PASUPASUPASU, ENDE PANGUJUNGI

P   :        Tatangianghon ma peleanta, martangiang ma hita. Ale Debata, Amanami na di banua ginjang, Ho do haroroan ni saluhut silehonlehon na denggan dohot nasa ulibasa na mauliutus. Hupasahat hami ma sian na nilehonMi tu hami, peleannami tu Ho. Sai jalo ma i gabe uap na hushus di joloM. Pasupasu ma i jala ramoti asa huparhaseang hami pelean on, patimbulhon harajaonMu di tongatonga ni HuriaM dohot di portibi on. Buhai ma rohanami marhitehite TondiM, asa lam hutanda hami godang ni silehonlehonMi tu hami, asa lam girgir hami mandok mauliate tu Ho, marhitehite Jesus Kristus Tuhannami. Amen. Rap ma hita mandok di Tangiang Ale Amanami ... (Molo parhalado partohononan jumolo ma mandok Tangiang Pasupasu). Alai molo ndang langsung ma mangendehon :

K:  (MANGENDEHON) BE. HKBP. NO. 36 : 3 “PASUPASU HAMI”

3) Amen hudok hami, ale Tuhannami ; na marasi roha i, sangap ma di goarMi.