(31). PARTONDING NI ACARA PARMINGGUON - 10 MEI 2020

PARTORDING NI PARMINGGUON 

DI MINGGU KANTATE

(Psalmen 98: 1)

     Ev: Pangungkapon 12:10-12                                 Ep: 5 Musa 31:14-22  

TOPIK:

MANGENDEHON HALUAON NA SIAN TUHAN I

   

HURIA KRISTEN BATAK PROTESTAN

Minggu, 10 Mei 2020

     

1.        Partangiangan on ni uluhon ni Ama manang Ina.

2.        Diaturhon ma na mamboanhon tangiang pangondianan

3.        Diparade hian ma inganan ni pelean.

II.        PARMINGGUON:

1.        PAMUHAI:

U   :  Huria ni Tuhanta, digoari do minggunta sadari on KANTATE, na marlapatan: Endehon hamu ma di Jahowa ende na imbaru! (Psalmen 98: 1). Antong, hita angka na pinarhamaol ni Debata, beta ma hita mangendehon ende na imbaru di Jahowa. Marsuraksurak ma hita mangolophon Jahowa, tapangiar ma soaranta marolopolop, jala marende ma hita.

R   :  Endehon ma ende na imbaru di Jahowa, ai na songkal do Ibana.

U   :  Tapuji ma Jahowa, marangkup arbap, mardongan arbap dohot soara ni ende! Marolopolop ma hita di jolo ni Raja Jahowa, mardongan sarune dohot soara ni sangka. Mardorom ma laut ro di isina, portibi on ro di pangisina i. Martopaptopap ma angka batang aek, rap marolopolop ma angka dolok, ai nunga ro Ibana laho manguhum tano on, uhumonNa ma portibi on marhitehite hatigoran dohot angka bangso marhitehite hasintongan.

R   :  Endehon ma ende na imbaru di Jahowa, ai na songkal do Ibana.

U   :  Antong hamu na hinaholongan, beta ma hita marsomba laho mamuji dohot pasangaphon Tuhanta na gok halongangan. Ro ma hita mangadop tu jolonoNa angka na masihol marnida halongangan na pinatupaNa. Marende ma hita:

2.        Marende BE No. 14 : 1+ 6  “PUJI HAMU JAHOWA TUTU”  

v  Puji hamu Jahowa tutu, pardengganbasa,

parasiroha salelengna i: pardengganbasa i, parasiroha i.

v  Sai burju be marende sude,mamujimuji

Tuhanta Debata Jahowa i.Parasiroha i, na marmulia i.

3.        VOTUM – introitus – tangiang:

U   :  Marhitehite Goar ni Debata Ama dohot Goar ni AnakNa Tuhan Jesus Kristus dohot Goar ni Tondi Parbadia, na tumompa langit dohot tano on. Amen. (Parhalado partohonan).

U   :  Endehon hamu ma di Jahowa ende na imbaru, ai nunga dipambahen Ibana angka halongangan. Nunga dipabotohon Jahowa hatuaonNa, nunga dipapatar Ibana hatigoranNa di adopan ni angka sipelebegu. Nunga ditumpahi tangan siamunNa na badia I Ibana.  Haleluya.

R   :               (Mangendehon): Haleluya, Haleluya, Haleluya!

U   :  Martangiang ma hita:  Ale Tuhan Jesus Kristus, Ho do panondang na sintong, na manondangi ganup jolma na di portibi on! Sondangkon ma bohiM tu hami jala parbadiai ma rohanami, asa hutanda hami dalan hangoluan marhite sian i. Sai rajai ma hami, asa unang manimbil hami sian dalan na sintong i. Ale Tuhan Jahowa, patongtong ma rohanami marhaporseaon tu Ho marhitehite Tondi Parbadia ! Amen.

4.        Marende BE No. 565: 1 “LAS ROHANGKU LAO MAMUJI”

v  Las rohangku lao mamuji, Debata parholong i.

Songon bunga na mangerbang, di na binsar ari i.

Arsak, dosa, haporsuhon mago dibaen asiMi.

Las ni roha na manongtong, lehon di au Tuhanhi.

5.        Patik: 

U    :  Patik ni Debata sihangoluhonta di minggu Kantate sadari on dienaet sian 1 Petrus 2 : 17. Marhapantunon ma hamu tu sasude; haholongi ma angka dongan; habiari ma Debata; pasangap ma raja!   

         Antong rap mangido gogo ma hita sian Tuhan Debata.

R   :  Ale Tuhan Debata, sai pargogoi ma hami mangulahon na hombar tu PatikMi. Amen.

6.        Marende BE No. 432: 1 “SIAN HURUNGAN NI DOSANGKI”  

v  Sian hurungan ni dosangki ro au tu Ho, ro au tu Ho.

Tu haluaon di mudarMi, Jesus au ro tu Ho.

Nasa rohangku malum, hipas, gabe mamora nang pe pogos.

Sian jeangku ro au tu Ho, Jesus au ro tu Ho.

7.        TANGIANG pangidoan dohot BAGABAGA NI DEBATA:

U  :  Ale Debata Jahowa, Debata na patupa angka halongangan. Debata na patupa haluaon dohot hasintongan di adopan ni angka bangso. Na manguhumi portibion marhitehite hasintongan dohot hatigoran. Na pungu do hami nuaeng di joloM martangiang tu Ho; Ndada mangasahon hatigorannami, na mangasahon asi ni rohaM na godang i do. Sai asi ma rohaM di tangiang dohot elekeleknami, ala ni AnakMu Tuhan Jesus Kristus Tuhannami.

R  :  Ale Tuhan Debata na patupa hasintongan dohot hatigoran, asi ma rohaM di hami.

U  :  Ale Tuhan Debata, na patupa hasintongan dohot hatigoran. Di ida Ho do parsorion ni bangsonami nang sandok portibi on ala ni mara Covid-19 on. Alai Tuhan di tongatonga ni mara ala ni Covid-19 on sai adong dope hakorason ala ni porang di piga Negara di portibion. Ala ni asi ma roham di hami nang di nasida na lagi mangadopi parporangon ala huaso. Godang na gabe marsingkor jala marungkil. Tarlumobi ma maradophon dakdanak dohot angka parompuan. Sai pasada ma nasida asa dao parporangon. Lehon dame na sian ho i asa jumpa las ni roha di tongatonga ni parungkilon ala ni Covid-19 on.

R  :  Ale Tuhan Debata na patupa hasintongan dohot hatigoran, asi ma rohaM di hami.

U  :  Ale Tuhan Debata, na patupa hasintongan dohot hatigoran. Di tongatonga ni mara ala ni Covid-19 on boi do lam godang angka parungkilon na lam doras jala koras. Alai didok naposoM apostel Paulus do asa marlas ni roha hami dohot angka na marlas ni roha jala tangis hami rap dohot angka na tangis. Ala ni ndang boi hami holan manarihon dirinami sandiri, ingkon tangkas do marpanarihon di angka dongan, lumobi ma di na mangadopi hamaolon dohot parungkilon sinuaeng on. Patupa ma di hami roha na tangkas masiantoan di nasa parsorion ni dongan. Naeng ma lam tangkas roha na masitungkolan dohot masitumpahan asa unang adong na mandele, unang adong na talu dibahen parungkilon ala ni mara Covid-19 on.

R  :  Ale Tuhan Debata na patupa hasintongan dohot hatigoran, asi ma rohaM di hami.

U  :  Ale Tuhan Debata, na patupa hasintongan dohot hatigoran. Tutu do ingkon adopannami ragam ni sitaonon ala manghaporseai Kristus Jesus. Alani unang paloas hami gale jala talu binahen ni angka parungkilon dohot sitaonon tarlumobi ma di masa ni pandemi Covid-19 on. Alai na tongtong gomos maniop hasintongan di HataM, songon Tuhan Jesus na manaluhon pangunjunan ni sibolis di halongonan, maporus do sibolis i sian joloNa. Porsea do hami marujung do angka sitaonon jala ndang tagamon loasonMu angka sitaonon i torus manusai ngolunami. Pargogoima hami asa marbenget ni roha di na masa angka sitaonon on, unang talu hami tung sura pe mansai porsuk jala posa huhilala hami alai na marujung do i patupaonMu. Asa marhamonangan jala las ni roha di ujungna. Ale Tuhan asi ma rohaM di hami.

R  :  Ale Tuhan Debata na patupa hasintongan dohot hatigoran, asi ma rohaM di hami jala sesama dosanami..

U  :                  Ale Tuhan Debata, Pargogo na so hatudosan jala Ama Parasiroha! Ndang lomo rohaM mida hamatean ni pardosa; mulak ma nian parjahat i tumadingkon dalanna, asa mangolu ibana, i do dipangido rohaM. Ala ni i umbahen dipangido hami; sai sundati ma torutoruM asa unang mangonai be tu hami. Sai sesa sude dosanami, asa mangolu hami di bagasan asi ni rohaM. Sai pargogoi ma hami, asa margogo hami, marhitehite Tuhan Jesus Kristus Tuhannami.  Amen.

R  :  (Mangendehon): BE No. 182: 1,4 “TU JOLOM O DEBATANGKU-1”

v  Tu joloM o Debatangku, sai use do rohangkon.

Sai pasiat tangianghu dohot iluilungkon.

v  Ala nii tungki rohangku jongjong di adopanMi.

Sai asi rohaM Tuhanhu, sesa nasa dosangki.

U  :                  Bagabaga ni Debata : Songon on do Hata ni Tuhan Jesus: Ro ma hamu tu Ahu, hamu angka na loja jala na sorat, hupasonang pe hamu. Buat hamu ma augangKu tu hamu, guruhon hamu ma sian Ahu, ai na lambok do Ahu jala na serep marroha, asa dapotan hasonangan tondimuna. Ai lambok do augangKu jala neang do dohot na hupaporsanhon. Hasangapon ma di Debata na di ginjang!

R  :  Amen.

8.        Marende BE No. 695: 1 “JESUS TUHANHU DI HO MA AU ON”

v  Jesus Tuhanhu di Ho ma au on, asa mangihut tu Ho au tongtong.

Gohi rohangku ingani au on, sonang di Ho tongtong.

O Tuhan togu ma au, o Tuhan togu togu ma au.

Gohi rohangku ingani au on, sonang di Ho tongtong.

9.        E p i s t e l:

U   :   Hata ni Debata turpuk di minggu Kantate on, ima na tarsurat di  5 Musa 31 : 14 – 22. Dung i ro ma hata ni Jahowa tu si Musa: Ida ma, nunga jumpang ne ajalmu, na mate ma ho; antong jou ma si Josua, jala jongjong ma hamu di bagasan undungundung parluhutan i, asa martona Ahu tu ibana. Jadi laho ma si Musa rap dohot si Josua, jala jongjong nasida di bagasan undungundung parluhutan i.

R   :  Jadi tarida ma Jahowa di bagasan undungundung i, di bagasan ombun na marsijongjong, di atas pintu ni undungundung i do marsijongjong ombun i.

U   :   Dung i ro ma hata ni Jahowa tu si Musa: Ida ma, na laho modom ma anggo ho, gabe top dohot angka ompum; hehe ma anggo bangso on jala marmainan mangihuthon tu angka debata sileban di tongatonga ni tano sibongotanna i, jala tadingkononnasida do anggo Ahu, jala oseonna do padan naung hubahen i tu nasida.

R   :  Jadi marsigorgor ma rimashu di ari na sasada i mida nasida, jala tadingkononku ma nasida, jala padaoonku ma Bohingku sian nasida, asa suda nasida marhinamago.

U   :   Ia dung mangonai tu nasida angka hinamago godang dohot hagogotan marragamragam, dohononna ma di ari na sasada i: Nda manginona do angka hinamago on tu ahu, ala so di tongatongangku Debatangku?

R   :  Alai anggo Ahu tongtong do padaoonku situtu Bohingku di ari na sasada i, ala saluhut hajahaton na binahenna i, ala naung marbalik nasida tu angka debata sileban.

U   :   Nuaeng pe surathon hamu ma di hamu ende on, jala ajarhon ma i tu halak Israel jala memehon tu bagasan pamangannasida, asa ende on gabe sitindangi di Ahu dompak halak Israel.

R   :  Ia dung sahat nasida huboan masuk tu tano naung huuarihon hian tu ompuna, tano habaoran ni susu dohot situak ni loba,

U   :   jadi dung mangan nasida jala bosuran maradu mokmok, marbalik ma nasida tu angka debata sileban jala marsomba tusi, alai toisanna ma anggo Ahu jala oseonna padan na hubahen i.

R   :  Jadi ia dung manginona tu nasida angka hinamago bolon dohot hagogotan marragamragam, ingkon ende on ma manindangi dompak nasida,

U   :   ai ndang jadi lupa i sian pamangan ni pinomparna; ai tangkas do hutanda hian tubutubu ni rohana, naung pinajadijadi ni rohana hian sadarion, tagan so sahat dope nasida huboan tu tano naung huuarihon i. Jadi disurathon si Musa ma ende on di na sadari i, jala diajarhon do i tu halak Israel. Ima sahatna. Martua ma angka na tumangihon Hata ni Debata jala na umpeopsa. Amen.

10.     Marende BE No. 453: 1 “SADA GOAR NA UMULI”

v  Sada goar na ummuli sian nasa goar i. Goar ni Tuhanta Jesus, i do na umuli i.

GoarMi, Tuhanhi, holan i do endengki. GoarMi, Jesushi do pamalum rohangki.

11.     MANGHATINDANGHON HAPORSEAON:

U   :  Tahatindangkon ma haporseaonta i, songon na hinatindangkon ni donganta sahaporseaon di sandok portibi on. Rap ma hita mandok:

R    :  Ahu Porsea…..

12.       Marende BE No. 417: 1 “RADE SITUTU HALUAON”

v  Rade situtu haluaon na naeng tangkuponmu antong.

Rade nang di ho hatuaon, sihalashononmu tongtong.

Bernit do ditaon Tuhanmu pasaehon dosam sasude.

Tung unang paujat Ibana, sai jangkon pangkophopNa i.

13.       TANGIANG PANGONDIANON:

14.       Marende BE No. 435: 3 “MAROLOPOLOP TONDINGKI”

v  Tu Jesus sahat ngolungki saleleng ni lelengna i.

Rap dohot au endehon ma, endengku na imbaru da.

Sonang ni tingki i, dung jumpang Jesus Tuhanki

Tondi na mangajari au. Tarbaen marlas ni ro ha au.

Sonang ni tingki i, dung jumpang Jesus Tuhanki.

15.       JAMITA:

“MANGENDEHON HALUAON NA SIAN TUHAN I”

(Pangungkapon 12: 10 – 12)

Punguan na hinaholongan ni Tuhan Yesus Kristus!

Ngolu ni halak Kristen Batak ima ngolu na marende. Molo masa hasusaan marende do nasida. Songoni nang molo masa las ni roha marende do nasida. Tung pe dang sude ruas ni Huria ni Tuhan i na malo marende. Ido umbahen ndang sude ruas ni Huria i masuk tu sadasada punguan parende. Tung pe nian sai adang do sadasada halak ndang malo marende alai masuk do ibana tu punguan ni parende asa boi jala malo ibana marende. Songoni do nang pardalanan ni ngolunta on songon ende i adong na marmelodi las ni roha, na paet, na sipata madabu, dohot ragam ni parsorion ni ngolu. Alani do jotjot tapangke ngolu ni na marende i songon dalan laho papuashon na dibagasan rohanta, manganggukhon nasa na ponjot na dibagasan rohanta asa boi hita puas, jala sahat tu hamonangan. Na pos situtu do roha ni halak na porsea di Tuhan i, na ingkon monang ibana manalpuhon hamaolon ni, manaluhon haporsuhon i marhite ngolu na marende. Alani sungkunsungkun di hita ima, ise do parnampuna di ende ni hamonangan ni?

Ia halak parnampuna ende hamonangan i ima halak na tinggil sipareonna, na torus patajom sipareonna marhite na pasomal diri ndada holan soara na di portibion, ndada soara ni sibolis na holan pageok sipareonna. Soara na gogo na marharoroan sian banua ginjang i do, na mandok: Nunga sahat nuaeng haluaon dohot hagogoon dohot harajaon ni Debatanta dohot hamuliaon ni Kristusna; ai nunga dipabali pangasung i, na mangasungi angka hahaangginta arian dohot borngin di jolo ni Debata. Soara sian banua ginjang, di tingkina mangaragehon huaso ni pandemi Covid-19 na mambahen gok biar, ganggu roha nang pingkiranta, jala mambahen godang marmatean gabe huaso na imbaru ima na so hea masa ima huaso na pangoluhon.

Soara na gogo, mandok “Nunga sahat nuaeng haluaon dohot hagogoon dohot harajaon ni Debatanta dohot hamuliaon ni Kristusna; ai nunga dipabali pangasung i, na mangasungi angka hahaangginta arian dohot borngin di jolo ni Debata. Mudar ni Birubiru i do na marhagogoon, na marhuaso mangkamonanghon sude hamaolon na taadopi di portibion. Haporseaonta di Jesus Kristus naung mate di hau pinorsilang ido na mangkamonangkon hita mangalo nasa huaso ni sibolis. Haluaon na sian Kistus ido na tahatindanghon songon panghatindanghononta di Hata Haporseaonta i, margogoihon hita nuaeng mandalani parmingguon di bagasta be, mangulahon ulaon kantor sian bagasta be, jala mandalani proses parsiajaran sian bagasta be.

Nunga mamasuki 11 minggu (padohot Ari Hamamate, Buhabuha Ijuk, Ari Haheheon/Paskah parjolo dohot paduahon) hita patupa parmingguon di  bagasta be alani pandemi Covid-19. Sada konsukuensi na mansai borat do haputusan na tabuati songon warga negara mangihuthon na nidok ni pamarenta jala ingkon rampak do hita dohot pamarenta laho memutus mata rantai Covid-19. Songon i konsekuensi na beribadah di bagasta be,  dada holan menyangkut keselamanta pribadi, keluarga, alai konsukuensi tu sude na tahobasi bahkan masyarakat sekitar di dia hita maringanan, jala ido memang konsukuensi na ingkon tabuat songon parhobas ni Kristus na manghobasi so mamereng balosna. 

Songon Kristus na manghaholongi hita jala na manobus hita sian dosa dohot sian hamatean, songon i do nang hita na mangihuthon Ibana ingkon barani manghatindanghon Kristus di ngolunta rasirasa mate hita. Ido umbahen didok tu hita nuaeng: “Dibahen i marlas ni roha ma hamu, angka banua ginjang dohot pangisina! Marjea ma tano i dohot laut, ai nunga tuat sibolis i tu hamu, marrimas situtu; ai diboto, otik nama tingkina!” Tutu, tung mansai otik do tingki na pinasahat ni Debata tu hita ganup marsadasada, asa sahat hita tu banua ginjang. Ala di portibion dope hita nuaeng, ingkon tongtong do hita mangolu dibagasan pos ni roha na so mubamuba di parendeonta na tongtong mangendehon ende naimbaru di Tuhan ni, ende haluaon na sian Tuhan ni, ndada taloas adong sada ende pe na mandok na adong haluaon asing ni haluaon na sian Debata. Torus ma hita mardalan di dalan ni Tuhan i tung pe alani pandemi Covid-19 on pola ingkon mangula ulaon kantor sian bagasta, na asing nunga mansai dokdok pandaraman ala so ada pansarian, ngolu social pe gabe kaku, ngolu politik negara pe terganggu isara penundaan pemilihan pemimpin daerah songon i nang pemilihan pimpinan gereja di berbagai denominasi gereja pe terganggu. Angka teror media massa na masipaburukburukhon, mandabuhon na sada alai patimbohon na sada, black campaign, dlna,

Nunga naeng marlojong hami sian jabu ala bosan tinggal di jabu, dang na fokus be parendeonta mangendehon ende na imbaru, ende haluaon di Tuhan ni.  Hape dituntut do sian hita ganup marsadasada asa marserep ni roha, manahan jala margogo huhut mangendehon ende naimbaru dohot ende haluaon na sian Tuhan i tung pe mangadopi ragam ni parsorion. Di tingkion ma kualitas ni haporseaonta, haradeonta na mangihuthon Kristus sahat tu na mate, di uji. Holan tu halak na rade jala manahan ala ni Kristus do na patut manjalo hamonangan huhut na boi mangendehon ende hamonangan di anak ni Birubiru ni Debata. Angka na manahan dihaporsuhon angka i do na patut manjalo las ni roha bolon, jala las ni roha i  ndang sabanding dohot angka siaeon naung niaena hian. SELAMAT MINGGU KANTATE, TUHANTA MA NA MAMASUMASU. AMEN

Pdt. Debora Purada Sinaga, MTh

Kepala Departemen Diakonia HKBP

16.       Marende BE No. 125: 1 – 2  “MARLASNIROHA HITA ON” ( Pelean I tu Huria; Pelean II tu Hatopan)

v  Marlasniroha hita on mamuji Debata

Ai asi ni rohaNa i do bongot tu rohanta i

Umbaen nuaeng mardomu i dison sadari on, dison sadari on

v  Dibaheni manggogo be ma hita on sude.

Mamuji Tuhan Jesus i parasiroha godang i.

Sibaen las ni rohanta i, nuaeng nang sogot pe, nuaeng nang sogot pe.

17.       PANGUJUNGI:

U   :   Endehon hamu ma ende na imbaru di Jahowa marhite na marpanarihon tu angka dongan tarlumobi ma ala ni mara Covid-19 sinuaeng on. Roha na tangkas masiantoan di nasa parsorion ni dongan. Masitungkolan dohot masitumpahan asa unang adong na mandele jala talu binahen ni mara Covid-19 on. Hata ni Debata mandok di Rom 12: 15 “Marlas ni roha ma hamu rap dohot angka na marlas ni roha, jala tangis ma hamu rap dohot angka na tangis”

R    :   Patupa ma hami asa sai tongtong marpanarihon tu angka dongan.

U    :   Saleleng di portibion hita ingkon adopanta do parungkilon alani tongtong ma gomos hita maniop hasintongan di Hata ni Debata, songon Tuhan Jesus na manaluhon pangunjunan ni sibolis di halongonan, maporus do sibolis i sian joloNa. Ingkon marujugn do sitaonon jala ndang tagamon loasonNa angka sitaonon i torus manusai ngolunta. Alani tongtong ma marbenget ni roha, unang talu tung sura pe mansai porsuk jala posa sitaonon i, ai sai na marujug do I bahenon ni Tuhanta.

R    :   (Mangendehon) BE No. 716: 1 “DI NA MAMOLUS SANDOK NGOLU ON”

v  Di na mamolus sandok ngolu on, gok do na marsak gale.

Boan sinondang tu na holom i, asa margogo muse.

Bahen ma ahu parhiteanMu pasupasuM mabaor ma i.

Ale Tuhanhu patupa ma au baen pasupasu tu dongan sude.

U   :  Tatangianghon ma peleanta: Ale Debata, Amanami na di banua ginjang, Ho do haroroan ni saluhut silehonlehon na denggan dohot nasa ulibasa na mauliutus. Hupasahat hami ma sian na nilehonMi tu hami, peleannami tu Ho. Sai jalo ma i gabe uap na hushus di joloM. Pasupasu ma i jala ramoti asa huparhaseang hami pelean on, patimbulhon harajaonMu di tongatonga ni huriaM dohot di portibi on. Buhai ma rohanami marhitehite TondiM, asa lam hutanda hami godang ni silehonlehonMi tu hami, asa lam girgir hami mandok mauliate tu Ho, marhitehite Jesus Kristus Tuhannami. AMEN

R    :  (Mangendehon) BE No. 204 : 2 “Ndang Tadingkononhu Ho”

v Nasa na nilehonMi, tondi ro di pamatanghu.

Hosa dohot gogongki, ro di saluhut artanghu.

Hupasahat i tu Ho, na so unsatonhu do.

U   :  Ale Amanami na di banua ginajang! Sai pinarbadia ma GoarMu! Sai ro ma harajaonMu! Sai saut ma lomo ni rohaM di banua tonga on songon na di banua ginjang! Lehon ma tu hami sadari on hangoluan siapari! Sesa ma dosanami songon panesanami di dosa ni dongan na mardosa tu hami! Unang hami togihon tu pangunjunan! Palua ma hami sian pangago!

R   :  (Mangendehon):

         Ai Ho do nampuna harajaon dohot hagogoon ro di hasangapon saleleng ni lelengna. Amen!

U   :  Pasupasu ! (Parhalado Partohonan).

R   :  (Mangendehon) Amen, Amen, Amen.