(43). PARTONDING NI ACARA PENTAKOSTA II - 01 JUNI 2020

PARTORDING NI PESTA  II

PARNINGOTAN HASASAOR NI TONDI PARBADIA

     Ev: 1 Korint. 2 : 1 – 5                          Ep: 2 Musa 35 : 30 – 35      

TOPIK:

MANGOLU HINORHON NI TONDI I 

HURIA KRISTEN BATAK PROTESTAN

 

Senin, 1 Juni 2020

I.      PARHOBASON:

1.       Partangiangan on ni uluhon ni Ama manang Ina.

2.       Diaturhon ma na mamboanhon tangiang pangondianan

3.       Diparade hian ma inganan ni pelean.

II.      PARMINGGUON:

1.       PAMUHAI:

U   :  Hamuna angka dongan na hinaholongan, sadarion sahat ma hita tu Pesta Paduahon Parningotan Hasasaor ni Tondi Parbadia.  Di hirim do marhite pesta paduahon sadarion, naeng lam tangkas hita mangolu hinorhon ni Tondi ni Debata.  Ai didok Jesus do tu angka siseanNa : Alai jaloonmuna do hagogoon ni Tondi Parbadia na songgop tu hamu, gabe sitindangingku ma hamu di Jerusalem dohot di sandok Judea dohot di Samaria, sahat ro di ujung ni tano on. 

R   :  Hami do panindangi di hata on dohot Tondi Parbadia, na nilehon ni Debata tu angka na mangoloi Ibana.

U   :  Asa mardamedame ma huria i di liat luat Judea dohot Galilea ro di Samaria, jala lam tu toguna ma huhut mamarangehon hatahuton mida Tuhan i, jala lam tu toropna nasida hinorhon ni pangapoion ni Tondi Parbadia.

R   :  Alai gok halalas ni roha dohot Tondi Parbadia ma roha ni angka sisean i.

U   :  Alai hamu angka na hinaholonga, pauliuli hamu ma dirimuna di atas haporseaonmuna na badia situtu, jala martangiang dibagasan Tondi Parbadia.  Marende ma hita :

2.       Marende BE No. 102 : 1 + 7      “O TONDI PORBADIA I BONGOTI” 

v  O Tondi Parbadia i bongoti rohanami be, ro sipatiur roha

O sondang sian surgo i sondangi rohanami be tu halalas ni roha

Asa masa patupahon pinodahon ni HataMu. Sai tu hami ma rohaMu

v  Parbadiai ma hami on huhut patogu ma tongtong, torusi rohanami

Tanggali sian hami be huhut pabali sasude na tau mangago hami

Taiti hami tu na sonang na di ginjang sumangkaphon, hangoluan, hasonangan

3.       VOTUM – introitus – tangiang:

U   :  Marhitehite Goar ni Debata Ama dohot Goar ni AnakNa Tuhan Jesus Kristus dohot Goar ni Tondi Parbadia, na tumompa langit dohot tano on. Amen. (Parhalado partohonan).

U   :  Sian Sion, situan ni hinadenggan, marsinondang Debata. Sai na ro do Debata, jala ndang tagamon hohom Ibana; ai songonon do didok Jahowa: UsehononKu ma aek tu angka na mauas dohot angka sunge tu na mahiang. UsehononKu ma tutu TondingKu tu pinomparmuna nuaeng jala pasupasungKu tu pinomparmu sogot. Jahowa do Debata, jala Ibana manondangi hita. Tambathon hamu ma angka pelean pesta i sahat ro di angka tanduk ni langgatan. Haleluya…

R   :               (Mangendehon): Haleluya, Haleluya, Haleluya!

U   :  Martangiang ma hita:  Ale Tuhan Jesus! Hudok hami mauliate tu Ho sian nasa rohanami, ala dipaojak Ho huriaM di tano on, jala ala dohot hami di jou Ho tusi. Sai suru ma Tondi Parbadia tu rohanami, asa tung huparhatopot hami Ho hangoluannami, asa lohot tu Ho hami marhitehite haporseaon na sintong, jala asa tongtong huhalashon hami pasangaphon GoarMu, na tarpuji ro di saleleng ni lelengna. Amen.

4.       Marende BE No. 640 : 2  “HAHOLONGAN SIAN GINJANG”

v Lehon tondi haholongon tu parroha na bojok

Baga-baga hadameon sahat baen tu hami on

Jesus Alpha nang Omega bona ni haporseaon

Sai padao ma angka dosa, sai palua hami on.

5.       Patik: 

U    :  Patik ni Debata sihangoluhonta di Pesta paduahon Parningotan Hasasaor ni Tondi Parbadia, dienaet sian Rom 12: 11. “Unang sumurut ringgas ni rohamuna! Partondi na girgir ma hamu! Oloi hamu ma Tuhan i!”

         (Antong rap mangido gogo ma hita sian Tuhan Debata.)

R   :  Ale Tuhan Debata, sai pargogoi ma hami mangulahon na hombar tu PatikMi. Amen.

6.       Marende BE No. 461 : 2     “SONGGOP TU HAMI”   

v  Suru TondiM paluahon au on, palua ma o Debata

Bereng daginghu tondingku dison, palua ma o Debata

Dao ma pangambat di soaraMi, hisap ni daging sandok diringki

Na mangarsahi tongtong TondiMi, palua ma o Debata.

 

7.       TANGIANG pangidoan dohot BAGABAGA NI DEBATA:

U  :  Ale Tuhan Debata, Amanami na di banua ginjang! Ho do na patupahon hasesaan ni dosa di hami halak na dangol on marhitehite Anak haholongan ni rohaM. Sai asi ma rohaM di hami, angka na mangarsakhon dosanami. Sai sahapi ma tu bagasan rohanami hasesaan ni dosanami i. Lehon ma tu hami TondiM na badia i, asa unang ganggu rohanami di asi ni rohaM, alai asa hot rohanami marhaporseaon laho manggotaphon nasa dosa dohot roha portibi on, asa hupasahat hami dirinami tu Ho, gabe pelean na mangolu jala na badia marhitehite Tuhan Jesus Kristus Tuhannami.

R  :  Ale Tuhan Debata, lehon ma tu hami TondiM na badia i

U  :  Ale Tuhan Debata Amanami di bagasan Jesus Kristus, tongon dope di ari sadari on, di pesta lasniroha hasasaor ni TondiM tu hami, ingkon adopannami parungkilon, panghorhon ni Covid-19 na so apala salpu dope sian hasiangan on.  Alai mauliate ma rohanami di Ho jala pujionnami ma Ho ala silehonlehonMu na arga i di hami, ima Tondi Parbadia. Sai TondiM ma na manogunogu hami, na mangajari hami, dohot na mangaramoti hami ganup ari, asa unang masa be parmaraan hinorhon ni virus corona.

R  :  Ale Tuhan Debata, lehon ma tu hami TondiM na badia i

U  :  Ale Tuhan Debata, Parasiroha na sumurung, hupanghilalahon hami do naung gabe humurang parsaoran na denggan di tongatonga ni portibi on. Panghorhon ni covid-19, nunga ingkon mandao hami sian angka dongan, tutu sada dalan do i laho manggotap harararat ni sahit binoan ni virus corona i. Ale Tondi Parbadia, sai tongtong pasada rohanami asa masijaloan, jala masihaholongan  songon angka ruas ni daging ni Tuhan Jesus Kristus na badia i. Ala ni i sai sondangi jala pasupasu parpunguan ni halak Kristen di bagasna be. Tibu ma salpuhon ale Tuhan parmaraan na dokdok i nuaeng sian hasiangan on.

R  :  Ale Tuhan Debata, lehon ma tu hami TondiM na badia I, jala sesama dosanami.

U  :  Ale Tuhan Debata, Parasiroha na sumung. Sai sungguli ma panghirimon na mangolu di hami, asa pos rohanami na paluaonMu hami sian parungkilonnami. Ho do Tuhan ni angka tuan, jala pargogo na so hatudosan. Papatar ma huasoM dohot hagogoonMu asa sumuang hami tu hinauli dohot hinadenggan ni hasonangan di portibi on. Ale Tondi Parbadia, pangapul di na marsak roha, pamalum ma saluhut na bernit ala ni dosanami. Amen

R  :  (Mangendehon): BE No. 683:1,4  “DI ADOPANMU JESUS”

v  Di adopanMu Jesus, lea tutu do diringkon,

Dibaen godang ni dosangkon, di adopanMu Jesus.

v  Di adopanMu Jesus, taruli au di asiMi,

Tu Ho ma sahat diringki, di adopanMu Jesus.

U  :                  Bagabaga ni Debata : Munsat pe angka dolok, jala humuntal angka robean, alai anggo parasi ni rohangKu na so tupa munsat sian ho, jala padan ni hadameonKu na so tupa humordit, ninna Jahowa Siasii ho. Hasangapon ma di Debata na di ginjang!

R  :  Amen.

8.       Marende BE No. 169 : 2     “ HO SIPANGOLU AU ”

v  Gogo ni mudarMi papatar ma di au

Tondi Parngolu i  tongtong manogu au

Ro Sipangolu  ro tibu   baen ma au anakMu tutu

Dohot mudarMi buri au  ias songon hapas ma au

Ias tutu ias tutu, dohot mudarMi buri au ias songon hapas ma au.

9.       E p i s t e l:

U   :   Hata ni Debata turpuk di Pesta paduahon, Parningotan Hasasaor ni Tondi Parbadia sadarion, tarsurat di  2 Musa 35 : 30 - 35 “Dung i ro ma hata ni Musa tu halak Israel: Ida hamu ma, nunga pola dijou Jahowa sahalak na margoar Bezaleel, anak ni si Uri, i ma anak ni si Hur sian marga Juda.

R   :  Nunga pola digohi Tondi ni Debata rohana i marhapistaran, marhapandean dohot marparbinotoan mangaradoti saluhut ulaon i.

U   :   Asa dipingkiri rohana hapandean na sumurung laho mamandei sere, perak dohot tombaga.

R   :  Huhut manguhir dohot mamijor batu intan, mamandei hau pe mambahen hapandean marragamragam.

U   :   Angkup ni nunga dibasabasahon Jahowa hamaloon tu bagasan rohana mangajari halak na asing, ibana dohot si Oholiab, anak ni si Ahisamakh sian marga Dan.

R   :  Nunga digohi Jahowa rohanasida dohot hapistaran laho mambahen hapandean marragamragam,

U   :   mamandei hau, mamunsa dohot mangangit abit sian bonang na rata langit, na rara dohot na merham, nang hain bontar na halus, tole hapandean ni partonun, asa dibahen nasida hapandean marragamragam, jala dipingkirpingkiri rohanasida hapandean angka na sumurung. Ima sahatna. Martua ma angka na tumangihon Hata ni Debata jala na umpeopsa. Amen.

10.   Marende BE No. 753 : 1       “ DIPARDALANAN JESUS DI JOLONGKU ”

v  Dipardalanan Jesus dijolongku

Holong ni tanganMi manogu au

Nang di ngoluku Ho do sombaongku

Tung sonang mardalan raphon au.

Huboto do tangkas pangouonMu

Diiringiring Ho do langkangki

Sahat ro di ujung ni pardalanku

Togu ma au jonok tu lambungMi,

11.   MANGHATINDANGHON HAPORSEAON:

U   :  Tahatindangkon ma haporseaonta i, songon na hinatindangkon ni donganta sahaporseaon di sandok portibi on. Rap ma hita mandok:

R   :  Ahu Porsea…..

12.     Marende BE No. 109 : 1       “SAI SONGGOPI HAMI ON”

v  Sai songgopi hami on ale Tondi Parbadia

Sai ajari ma tongtong Hami on huhut paria

Martangiang tu Tuhanta asa tongtong oloanNa.

13.     TANGIANG PANGONDIANON:

14.     Marende BE No. 108: 2    “ BAEN MA GABAGABA ”

v  Jangkon ma Ibana ai asi rohaNa ro tu hita on

Asa sondangonNa tiur bahenonNa parohaon tongtong.

Jangkon ma Ibana da asa lao sude arsakmu,nang pardangolanmu.

15.     JAMITA:

MANGOLU HINORHON NI TONDI

(1 Korint 2:1 – 5)

 

Dongan Sahaporseaon di bagasan Goar ni Tuhanta Jesus Kristus!

Selamat Pentakoste ma di hita saluhutna!

Nantuari, di Pesta Parjolo parningotan hasasaor ni Tondi Parbadia, nunga digohi Hata ni Debata hita na mandok: Tondi Parbadia manogunogu halak na porsea i tubagasan hasonangan. Saonari dina tapestahon parningotan hasasaor ni Tondi Parbadia na paduahon on, digohi do hita marhite topik ni minggunta, asa mangolu hinorhon ni Tondi i. Dua topik di pestanta na bolon on mansai relevan jala berkesinambungan, ala tarida do hinaringkot ni Tondi Parbadia i dibagasan halak na porsea di Ibana. Nunga dibagabagahon Jesus do marhite hataNa asa dilehon tu hita sada Pangondian na asing, asa i na mandongani hita salelenglelengna (ida Joh 14:16-18; 15:26; 16:17); jala dipatuduhon do i dung hinsat Ibana tu surgo. Hagogok Padan ni Kristus nipatuduhon do i marhite panindangion ni Ap. Petrus dibagasan ari Pentakosta. Pentakosta pe, ima ari hatutubu ni  Huria (Gereja). Sian on ma patar Barita na Uli i tu sandok isi ni tano on marhite angka sisean ni Jesus, na saleleng on rap mangihuthon Ibana. Termasuk do i tu Apostel Paulus. Paulus mandok, mansai maralo do ia Barita na uli dohot bisuk ni Portibion. Ndang boi domu i. Aha na mambahen i marasing? Ia dibaritahon Ap. Paulus i do barita na uli i ala mangolu nasida dibagasan huaso ni Tondi ni Debata, alai ianggo bisuk ni portibion padaohon parbaritaan nauli i.

Alani i, adong piga-piga point siputihonta marhite barita na uli na binaritahon ni Apostel Paulus i:

1.   Fokus ni Parbaritaan i, ima Jesus naung Tarsilang i.

Dung ditanda Paulus i Jesus, gabe muba ma parngoluon nasida. Gari didok nasida do di suratna: “…Raphon Kristus i do ahu tarsilang. Ndada ahu be na mangolu i nuaeng; Kristus do mangolu di bagasan ahu. Ia mangolu pe ahu nuaeng di bagasan daging, mangolu marhitehite, haporseaon di Anak ni Debata, na mangkaholongi ahu jala na mangalehon dirina humongkop ahu.”  (Gal. 2:19b-20). Marhite i, tarida do hamubaon na total sian bagas diri ni Ap. Paulus jala olo manghatindanghon Barita na Uli i saleleng ngoluna. Ia parbaritaan nang jamitana i berpusat tu diri ni Jesus naung tarsilang i -ndada tu dirina- jala ndada terpancing imana tu angka gaya-gaya ni apostel na asing laho sekadar pageok-geokkon pinggolnasida i. Mansai marasing do ibana sian angka halak orator na patuduhon retorika-retorika na mansai balga. Ai tangkas do didok imana di ayat na parjolo i: ai ndada marhata hamaloon manang marhabisuhon ahu ro mamaritahon tu hamu panindangion taringot tu Debata. Ala berfokus do dirina tu Jesus Kristus naung tarsilang, hehe jala mulak mangolu manaek tu surgo.

2.   Dipatuduhon Apostel i do jati dirina sasintong-sintongna.

Somalna, ndang pala olo jolma patuduhon dirina; gari hahurangan manang hagaleonna na pe ndang olo nipataridahon tu loloan na torop. Alai marasing do ia Apostel Paulus on: dipatuduhon do dirina tu torop jolma. Atik pe adong keterbatasan manang hahurangan di dirinasida, ndang pintor mura minder jala mandao. Gari didok imana do di ay. 3 i: “Marhagaleon jala marhatahuton do ahu di tongatongamuna jala bobonosan situtu.”  Marhite on nipatuduhon do hahurangan manang kelemahan ni dirina tarlumobi roha na mabiar situtu di na marbarita nauli di huta na Metropolis songon keadaan di Korintus hatiha i. Diokui ibana do dirina di loloan na torop di na marbarita nauli nasida.

3.   Ai Hagogoon ni Tondi i do, ndada habisuhon ni Jolma.

Dibagasan parbaritaan na uli i, ndada habisuhonna nadiasangasang ibana, alai Hagogoon ni Tondi i do na dipangasahon. Tutu Tondi ni Tuhan i naung songgop tu ibana. Ai didok do di turpuk ta i di ayat 4: “Hatangku nang parjamitaonku pe, ndada marhata habisuhon na malo mangaithon; tondi dohot hagogoon di dipapatar disi”

Marhite i naeng patuduhon Ap Paulus do Hagogoon ni Tondi ni Debata laho paubahon ngolu ni halak Korintus na dibagasan huaso ni tondi ni jaman, tondi ni kemajuan ilmu pengetahuan jala angka pengaruh na sian duru laho padaohon nasida sian Debata jala sundat tu bagasan pertobatan. Sian diri ni Ap Paulus, narumingkot ndada retorika na mansai hebat naeng patuduhon disi, alai sada hamubaon ni roha tu angka jolma naung umbegesa. Ia hamubaon ni roha i, boi do tarpatupasa marhite hagogoon ni Tondi, ndada habisuhon ni jolma i sipangasahon. Jala hagogoon ni tondi i, boi do tupa molo jolma marhaporseaon na togu di ngoluna

Dongan Sahaporseaon di bagasan Goar ni Tuhanta Jesus Kristus!

Antong, dia ma relevansi na rumingkot tu konteks na taadopi nuaeng?

Tarajumi do hita mangolu di bagasan portibi na gok hamajuon: Maju di Peradaban, maju nang dibagasan Ilmu Pengetahuan, maju di bagasan Teknologi naung Mutahir, dohot angka hamajuon-hamajuon, naung masa di ganup tingki jala di sude ngolu na porsea. Tarlumobi nuaeng, nunga mangolu di bagasan Era Revolusi Industri 4.0 (ra boi muse muba tu fase 5.0).

Alani i, songon dia ma parbaritaan na uli di zaman sinuaeng on? Boha do prinsip nang gaya hidup Ap Paulus? Relevan dope i ditonga-tonganta? Ai panghobasionta i nunga tapangasahon Hagogoon ni Tondi i manang sebalikna: hagogoon manang habisuhonta sambing? Ia sungkun-sungkun on boi do mangurupi hita laho merefleksihon dirinta: ai nunga mangolu hita di bagasan Tondi ni Tuhan i? 

1.   Ganup angka na porsea ingkon mangolu dibagasan Tondi na sian Debata. On ma dasar na fundamental di ngolu haporseaonta. Dang adong na asing sian i! Mangolu hinorhon ni Tondi na sian Debata, ngolunta siganup ari gabe imbar sian ngolu na somal. Songon na nidok di Johannes 14:17, “ima Tondi hasintongan, na so tarjalo portibion, ai ndang diida jala ndang ditanda; alai ditanda hamu do Ibana, ai na rap ma Ibana dohot hamu jala dibagasan hamu ma Ibana.” Songon i do ngolu ni na porsea i, tangkas do panandaonna tu Debata ala dipaboa Tondi i do tu ibana. Baliksa, molo mangolu ndang dibagasan Tondi i, boha ma bahenon laho mananda Debata? Alani ngolu ni halak na porsea ingkon mian dibagasan Tondi Parbadia i, na laho mamaritahon barita taringot tu Jesus naung mate tarsilang, hehe jala manaek tu banua ginjang. Alai ngolu ni halak na mangasahon habisuhonna sambing ndang olo manjalo jala mamaritahon taringot Tuhan Jesus. Songon na tarsurat di 1 Korint 1:18, “Ai haotoon do hata taringot tu silang i di roha ni angka na laho mago; alai hagogoon ni Debata do i di hita na dapotan haluaon. “

2.   Asing ni i, ingkon manat jala jamot do hita diangka panurirang pargagap na tangkang jala na mamangke status ‘angka sisean ni Debata alai ngoluna dao sian Tondi ni Tuhan i’. Dipangke nasida do ragam ni angka panghobasion laho mangago haporseaonta. Marbarita do nasida sahat tu angka alaman, tarbarita do nasida ala ni malona mamangkulingi angka ruas. Dipasahat nasida ma hata nauli na denggan tu angka ruas dohot na tabo begeon ni sipareon. Mansai las ma roha ni angka ruas na tumangihonsa. Sude nai diula nasida, ala marasing motivasina. Ndada be Kristus na binaritahon disi; alai asa tarbarita do nasida gabe parjamita na terkenal, mangalului popularitas, dlna. Jala naumbagas ima: asa holan nasida ma na diharingkothon ruas i, dang be Tuhan i diharingkothon. Boi do dohononta Hata tu angka panurirang pargapgap i, ima mangago bohi ni Jesus jala manangko hajongjongan ni Kristus di tongatonga ni ngolu angka ruas. Ndada be ngolu na dibagasan Tondi, alai gabe tondi na ramun i do mangarajai ngolu nasida. Sasintongna, angka parbarita na uli i ingkon marsitutu mangungkap hasintongan na sian Debata jala manghatindanghon aha do naung binahen ni Debata tu hita jolma pardosa. Songon na tarsurat di Johannes 3:30 i: “Ianggo Ibana, patut lam ganda, lam moru ma anggo ahu.”

3.   Di ari Parningotan Hasasaor ni Tondi Parbadia manang Pentakoste sadarion, ditogihon do hita, ruas ni Huria, asa mangolu dibagasan Tondi ni Debata. TondiNa i do na manoguhon hita tu bagasan HataNa na tigor i, jala TondiNa i do na padaohon hita sian angka habisuhon na so tama, na mambahen sega dirinta. Marhite TondiNa i do na tongtong paingothon hita, asa rap dohot Ibana, jala lam margogo ma hita manghamonanghon parungkilon nang sitaonon ni portibion siala Pandemi Covid-19 on.

4.   Tongon do nang di Ari Pentakoste sadarion tapestahon Minggu Zending manang Minggu Pekabaran Injil di HKBP, jala ditotophon do taon on Orientasi Pelayanan HKBP 2020 na berfokus tu Ulaon Zending manang Panghobasion Parbaritaan Nauli. Dibagasan panghobasion na berfokus tu Orientasi pelayanan zending on, tutu masa do parungkilon na balga di sandok portibi on (Covid-19). Di Minggu Zending on, digohi hata ni Debatanta do hita asa unduk hita mangoloi Tondi ni Tuhanta i ditonga-tonga ni parungkilon na masa nuaeng on. Ingkon taoloi do Tondi ni Tuhan i mangarajai ngolunta, ala Tondi Parbadia i mangarahon ngolunta tu bagasan hasesaan ni dosa, hadameon dohot haluaon.

Antong, sahali nari hudok: Selamat Pentakoste! Sai mangolu ma hita hinorhon ni Tondi i ro di salelenglelengna! “Ai dilehon Debata do tu hita tondi hagogoon, tondi haholongon, tondi pangarajaion diri, ndada tondi hatahuton. (2 Tim 1:7).  Amen!

Pdt. Dr. Anna Ch. Vera Pangaribuan

Kepala Departemen Marturia HKBP

16.     Marende BE No. 670 : 1+3 “TARBEGE SOARA NA JOUJOU” ( Pelean I tu Huria; Pelean II tu Hatopan HKBP)

v  Tarbege soarana joujou, tongos ma sondangmi,

Tung torop parbegu di na holom i, tongos ma sondangmi.

Tongos ma ma barita na uli, mandungoi na modom i,

Tongos ma Barita na uli, mandungoi na modom i.

v  Tarbege ma angguk na joujou, tongos ma sondangmi,

Taurupi ma angka na lilu i, tongos ma sondangmi,

        Tongos ma ma barita na uli, mandungoi na modom i,

        Tongos ma Barita na uli, mandungoi na modom i.

17.     PANGUJUNGI:

U    :   Ta dok ma mauliate tu Tuhan Debata na mangalehon silehonlehon na arga i di hita ima TondiNa na badia, sumonggopi hita na lea on. Gumodang do i sian portibi on nang pangisina sudena.

R   :   Mauliate ma rohanami, jala pujionnami ma Ho, ale Debata di sude habalgaon dohot hamuliaonMu, naung pinapatarMu tu hami.

U    :   Dihirim Hata ni Tuhanta do sadarion asa tung marojahan haporseaonta di hagogoon ni Debata, unang di habisuhon ni jolma. Di hamamasa ni parungkilonta nuaeng, hinorhon ni covid-19, Ndang adong hagogoon na tarpangasahon hita di portibi on na boi paluahon hita, ala ni i sai hot ma hita marhaporseaon tu hagogoon ni Debatanta.

R    :   (Mangendehon) BE No. 681 : 2   “ALE AMANG ASI ROHAM ”

v  Amang sai pargogoi ma au di hasiangan on,

TondiM pasaor tu tondingkon pamalum rohangkon.

Sai usehon, sai usehon TondiMi tu au.

Asa monang maralohon parungkilon au.

U   :  Tatangianghon ma peleanta: Ale Debata, Amanami na di banua ginjang, Ho do haroroan ni saluhut silehonlehon na denggan dohot nasa ulibasa na mauliutus. Hupasahat hami ma sian na nilehonMi tu hami, peleannami tu Ho. Sai jalo ma i gabe uap na hushus di joloM. Pasupasu ma i jala ramoti asa huparhaseang hami pelean on, patimbulhon harajaonMu di tongatonga ni huriaM dohot di portibi on. Buhai ma rohanami marhitehite TondiM, asa lam hutanda hami godang ni silehonlehonMi tu hami, asa lam girgir hami mandok mauliate tu Ho, marhitehite Jesus Kristus Tuhannami. AMEN

R   :  (Mangendehon) BE No. 204 : 2 “Ndang Tadingkononhu Ho”

v Nasa na nilehonMi, tondi ro di pamatanghu.

Hosa dohot gogongki, ro di saluhut artanghu.

Hupasahat i tu Ho, na so unsatonhu do.

U   :  Ale Amanami na di banua ginajang! Sai pinarbadia ma GoarMu! Sai ro ma harajaonMu! Sai saut ma lomo ni rohaM di banua tonga on songon na di banua ginjang! Lehon ma tu hami sadari on hangoluan siapari! Sesa ma dosanami songon panesanami di dosa ni dongan na mardosa tu hami! Unang hami togihon tu pangunjunan! Palua ma hami sian pangago!

R   :  (Mangendehon):

v Ai Ho do nampuna harajaon, dohot hagogoon.

Ro di hasangapon, saleleng ni lelengna, Amen

U   :  Pasupasu ! (Parhalado Partohonan).

R   :  (Mangendehon) Amen, Amen, Amen