(42). PARTONDING NI ACARA PENTAKOSTA I - 31 MEI 2020

 

 

 

PARTORDING NI PESTA I

PARNINGOTAN HASASAOR NI TONDI PARBADIA

     Ev: Jesaya 63 : 11 – 14                                       Ep: Galatia 5 : 16 – 26      

TOPIK:

TONDI NI JAHOWA NA MANOGU TU HASONANGAN

HURIA KRISTEN BATAK PROTESTAN

 

Minggu, 31 Mei 2020

I.      PARHOBASON:

1.       Partangiangan on ni uluhon ni Ama manang Ina.

2.       Diaturhon ma na mamboanhon tangiang pangondianan

3.       Diparade hian ma inganan ni pelean.

II.      PARMINGGUON:

1.       PAMUHAI:

U   :  Tapuji ma Tuhan Debata di bagasan Jesus Kristus, naung pasauthon  bagabagaNa di na nidokNa di Johannes 14 : 16 – 17 “Jala pangidoonHu ma tu Ama i, asa dilehon tu hamu sada Pangondian na asing, asa i mandongani hamu salelengna i. I ma Tondi hasintongan i, na so tarjalo portibi on, ai ndang diida jala ndang ditanda; alai ditanda hamu do Ibana, ai na rap ma Ibana dohot hamu jala di bagasan hamu ma Ibana.”

R   :               Pinuji ma Debata Parasiroha naung mangondihon hita.

         U:     Hasasaut ni bagabaga i, i ma HASASAOR NI TONDI PARBADIA,  I ma nuaeng na taingot, na tapestahon dohot na tahalashon. Antong bongot ma hita tu parsaoran na badia rap dohot Debata di tongatonga ni partangianganta, marende ma hita:

2.       Marende BE No. 102: 1 – 2  “O TONDI PARBADIA I BONGOTI”

v  O Tondi Parbadia i, bongoti rohanami be, ro, Sipatiur roha!

O sondang sian Surgo i, sondangi rohanami be, tu halalas ni roha!

Asa masa patupahon pinodahon ni hataMu, sai tu hami ma rohaMu.

v Ho do silehon roha i di nasa na porsea i, tumpahi rohanaMi!

Patogu rohanami be, pasar hataM tu sasude sai tong dongani hami!

On pe, sude, parrohahon, hatuaon lehononMu, Sipujion do goarMu.

3.       VOTUM – introitus – tangiang:

U   :  Marhitehite Goar ni Debata Ama dohot Goar ni AnakNa Tuhan Jesus Kristus dohot Goar ni Tondi Parbadia, na tumompa langit dohot tano on. Amen. (Parhalado partohonan).

U   :  Songon on ninna Tuhan Jahowa: Lehononku tu hamu roha na imbaru dohot tondi na imbaru tu bagasan ateatemuna, jala unsatonKu do roha batu sian dagingmuna, jala lehononKu tu hamu roha na marpangkilalaan. Jala lehononKu ma TondingKu tu bagasan ateatemuna, Ahu do mambahensa, asa marparange hamu dibagasan angka PatikHu, angka uhumHu pe radotanmuna jala patupaonmuna do. Haleluya!

R   :               (Mangendehon): Haleluya, Haleluya, Haleluya!

U   :  Martangiang ma hita:  Ale Tuhan Debata, Amanami ! Ho do manondangi jala mangajari roha ni angka na porsea di HataM marhitehite Tondi Parbadia. Sai buhai ma rohanami asa ture parrohaonnami marhitehite TondiMi, asa tongtong gok dame rohanami manghalashon hagogoonNa i marhitehite Tuhan Jesus Kristus Tuhannami.  Amen.

4.       Marende BE No. 462:  1  “ALE TONDI PORBADIA”

v  Ale Tondi Porbadia, sai songgopi hami on.

Rohanami ma paria lao mamuji Ho tongtong.

Ho tongtong, Ho tongtong, lao mamuji Ho tongtong.

5.       Patik: 

U   :  Patik ni Debata sihangoluhonta di Pesta Parjolo Parningotan Hasasaor ni Tondi Parbadia sadari on, tarsurat di 2 Timoteus 1: 7 – 8. ”Ai dilehon Debata do tu hita tondi hagogoon, tondi haholongon, tondi pangarajaion diri, ndada tondi hatahuton. Onpe, unang ho maila, mangkatindangkon Tuhanta i, jala unang hailahon ahu, na tarhurung humongkop Ibana; dohot ma ho tahe mangkongkop barita na uli, sian hagogoon ni Debata!”

         Antong rap mangido gogo ma hita sian Tuhan Debata.

R   :  Ale Tuhan Debata, sai pargogoi ma hami mangulahon na hombar tu PatikMi. Amen.

6.       Marende BE No. 424: 1 “SOARA NI TONDI” 

v  Soara ni Tondi ni Tuhanta i,

Jot-jot dilaosi, ditulak ho i.

Sai tanda jeamu, pauba roham,

Dapothon Tuhanmu, sisesa dosam.

7.       TANGIANG pangidoan dohot BAGABAGA NI DEBATA:

U  :  Ale Tuhan Debata Amanami. Ho do Debata naung mangusehon TondiM na badia i sumonggopi hami jolma na lea on. Asa diajari, dirajai, dipatiur, diparbadiai jala dipatongtong hami mian di Barita na Uli i. TondiMi do na papungupungu hami HuriaM asa masijaloan jala masihaholongan songon angka ruas ni daging ni Tuhan Jesus Kristus na badia i. Sian angka pardangolan na bagas do hami joujou tu Ho, ale Jahowa! Sai tangihon ma soaranami, sai patinggil ma pinggolMu tumangihon soara ni angguknami. Molo tung manjujur Ho ale Jahowa di angka dosa, tung ise ma manahan, ale Tuhan? Alai tahe marroha pamuation do Ho, asi ma rohaM di angguknami.

R  :  Ale Tuhan Debata Amanami, asi ma rohaM di hami.

U  :  Ale Tuhan Debata Amanami. Mauliate ma rohanami jala pujionnami ma Ho ala ni sude habalgaon dohot hamuliaonMu naung pinapatarMu tu hami. Na marlas ni roha do hami nuaeng ala naung dilehon Ho Tondi Parbadia sumonggopi hami. Alai na marningot do hami di sitaonon ni portibi on hinorhon ni sorimago Covid-19 na tongon huadopi hami nuaeng. Asi ma rohaM di hami, sai tumibu ma salpuhon sorimago Cavid-19 on sian tongatonganami. Songon na pinatupaM paluahon bangsoM sian parhatobanan Misir ni uluhon ni si Musa. Na marsagihon TondiM na badia i tu tongatonganasida. Naung patolak aek di jolonasida, na manogu nasida mamolus angka pusat. Songon pinahan na tuat tu rura, ditogihon Tondi ni Jahowa nasida tu hasonangan.   

R  :  Ale Tuhan Debata Amanami, asi ma rohaM di hami.

U  : Ale Tuhan Debata Amanami. Sai pasupasu ma huriaM na maringanan dope di hasiangan on. Asa nangpe mengadopi parungkilon huriaM ala ni sorimago Covid-19 on tongtong ditambai Ho silehonlehon tu Huria asa lam ganda torop ni Parbarita na Uli dohot pangajari dohot parasiniroha na mamaritahon habalgaonMu di portibi on. Pangke ma huriaM gabe habaoran ni pasupasuM tu angka na humaliang, maradophon angka na hurangan dohot angka na gale. Pasupasu jala pargogoi angka partohonon di huriaM. Sai sondangi jala pasupasu sude parpunguan ni halak Kristen di gareja, di parsingkolaan, nang di bagasna be. Sai tatap ma ruas ni huriaM manang di dia pe maringanan di angka inganan na marserak i. Molo pe ingkon mangadopi sitaonon di tingki on, alai pos do rohanami na paujungonMu do i marhite asi ni rohaM jala toguonMu do tu hasonangan.

R  :  Ale Tuhan Debata Amanami, asi ma rohaM di hami jala sesama dosanami.

U  :                  Ale Tuhan Debata, Amanami na di banua ginjang! Ho do na patupahon hasesaan ni dosa di hami halak na dangol on marhitehite Anak haholongan ni rohaM. Sai asi ma rohaM di hami, angka na mangarsakhon dosanami. Sai sahapi ma tu bagasan rohanami hasesaan ni dosanami i. Lehon ma tu hami TondiM na badia i, asa unang ganggu rohanami di asi ni rohaM, alai asa hot rohanami marhaporseaon laho manggotaphon nasa dosa dohot roha portibi on, asa hupasahat hami dirinami tu Ho, gabe pelean na mangolu jala na badia marhitehite Tuhan Jesus Kristus Tuhannami. Amen.

R  :  (Mangendehon): BE No. 432: 1  “SIAN HURUNGAN NI DOSANGKI”

v  Sian hurungan ni dosangki, ro au tu Ho, ro au tu Ho

Tuhaluaon di mudarMi, Jesus au ro tu Ho

Nasa rohangku malum, hipas, gabe mamora nang pe pogos

Sian jeangku ro au tu Ho, Jesus au ro tu Ho

U  :                  Bagabaga ni Debata : Ro ma hamu tu Ahu, asa mangolu tondimuna, ninna Tuhan Jahowa. Tung sura rara dosamuna songon abit bunga dapdap, bontar do bahenonHu songon itak; nang pe rara songon abit hasumba, gabe songon hapas do muse. Hasangapon ma di Debata na di ginjang!

R  :  Amen.

8.       Marende BE No. 194: 1, 4   “AUT SO ASI ROHAM”

v  Aut so asi rohaM, aut so godang basaM, tu dia au?

Alai dibaen basaM, dohot asi rohaM, tu surgo au

v  Disuru AnakMi, tu au TondiNa i, na sian Ho

Manogu tondingki, tu hasonangan i, pinuji Ho

9.       E p i s t e l:

U   : Hata ni Debata turpuk di Pesta Parningotan HASASAOR NI TONDI PARBADIA sadari on, ima na tarsurat di  Galatia 5 : 16 – 26. Alai on do hudok: Marguru tu Tondi i ma hamu marparange; unang pasaut hamu hisaphisap ni daging!

R   :  Ai na maralohon tondi do sangkapsangkap ni daging, jala maralohon daging i do sinangkap ni tondi: Na masialoan do i, asa unang dipasaut hamu pinangido ni rohamuna.

U   :  Alai molo ditogihon Tondi i hamu, ndang ginomgoman ni patik hamu.

R   :  Alai tandap do parulaon ni daging, i ma parmainanon, hahodaron, pargadombuson,

U   :  hasipelebeguon, hadatuon, parmusumusuon, parbadabadaon, pangiburuon, rimasrimas, pargutugutuon, parsalisian, partahitahion,

R   :  bunubunu, parmabuhon, haormuson jala angka na suman tusi. Naung hupaboa najolo tu hamu, songon i do nang nuaeng: Ndang teanon ni angka na mangulahon sisongon i harajaon ni Debata.

U   :  Alai angka on do parbue ni Tondi: Holong dohot las ni roha, dame dohot lambas ni roha, habasaron, habasaon, haporseaon, halambohon dohot hatomanon.

R   :  Ndang maralo patik dompak angka sisongon i.

U   :  Alai angka na ginomgoman ni Kristus Jesus, diparsilangkon do dagingna rap dohot angka hisaphisap dohot sangkapsangkap.

R   :  Ia dung dipangolu Tondi i hita, taparangehon ma Tondi i!

U   :  Unang ma taeahi hasangapon na rumar; unang masiasapan manang masilatean! Ima sahatna. Martua ma angka na tumangihon Hata ni Debata jala na umpeopsa. Amen.

10.   Marende BE No. 464: 3  “HUBOAN MA DIRINGKU”

v  Ias do au diburi Ho, ale Tuhanki,

Naeng dohot parulanhu hombar tu hataMi.

Pagalak ma rohangku, dison managam au.

TondiMi ma suru, na boi manggomgom au.

11.   MANGHATINDANGHON HAPORSEAON:

U   :  Tahatindangkon ma haporseaonta i, songon na hinatindangkon ni donganta sahaporseaon di sandok portibi on. Rap ma hita mandok:

R   :  Ahu Porsea…..

12.     Marende BE No. 109: 2 “SAI SONGGOPI HAMI ON”

v  Tondi hasangapon i sai ingani rohanami.

Pargogoi ma hami be maralohon dosanami

Asa tung malua hami sian hadosaonnami.

13.     TANGIANG PANGONDIANON:

14.     Marende BE No. 463: 1 “PASUPASUM TONGOSONMU”

v  PasupasuM tongosonMu, i do didok hataMi,

Suru tondiM na badia, bosur ma baen rohangki.

HagogoonMu songgop ma tu rohangkon.

Unang sai holan manetek, gohi sandok diringkon.

15.     JAMITA:

JAMITA NI EPHORUS HKBP

DI PESTA PARNINGOTAN HASASAOR NI TONDI PORBADIA

HATA NI DEBATA: JESAYA 63: 11 - 14

PATUJOLO

Torop do halak na sungkunsungkun. Ise do Debata? Bangso Israel pe, suang songon i angka na porsea tu Debata, olo do manungkun: Ai adong do Debata? Ai tutu do Debata manontuhon ngolu on?

Sungkunsungkun na songon i, boi doi dalan patogu haporseaon. Tutu adong disi patuduhon lomos ni roha manghaporseai Debata. Alai sian sungkunsungkun sisongon i, laos i do dalan patoguhon haporseaon molo dapot ibana alus na sintong.

Dialusi Debata si Musa, na manungkun ise do Debata? Alusna: “Ahu do  Debata ni si Abraham. Debata ni si Ishak. Debata ni si Jakob” (2 Musa 3: 6). Dung i dihatingdanghon ma muse: “Ianggo Jahowa, Debatanta i, Jahowa Sasadasa do” (5 Musa 6: 4).

Sasintongna, ndang na tatanda hian Debata. Alai na dipatandahon Debata do diriNa, umbahen na boi tatanda Ibana. Dalan parhitean patandahon diri ni Debata ima ulaonNa, dohot ragam ni pambahenanNa tu portibion dohot tu nasa hajolmaon.

Dalan patandahon hadirion ni Debata ima marhite ulaonNa dohot pambahenanNa. Hadirion dohot pambahenanNa i tarida marhite hataNa dohot TondiNa. Ai mangula do Debata huhut marpambahenan marhite hataNa dohot TondiNa.

Uju ditompa Debata hasianganon, marhite hataNa do ditompa. “Jadi ma ho na tiur, jadi tiur ma tutu” (1 Musa 1: 3). Dung i ma mangareapreap ma Tondi ni Debata (1 Musa 1: 2) laho marnida na tinompaNa i.

Hata ni Debata dohot Tondi ni Debata do dibahen manompa hasianganon, jolma dohot nasa na adong. Marhite panompaonNa i ma tatanda na adong Debata. Jala tadok huhut tahaporseai muse na Debata do sitompa nasa na adong.

Di tingkina, gabe daging ma hata ni Debata i. Gabe jolma, ima Jesus Kristus (Joh. 1: 1 – 3 + 14). Dung i muse Tondi ni Debata pe mangula, paluahon angka na targogot. Tondi Porbadia ma mangurupi angka na niasian ni Debata. Ido na pinaingotingot ni bangso Israel, songon na sinoarahon ni panurirang Jesaya. Ai diparhatopot jala sai diingot nasida do Tondi ni Jahowa na mangurupi nasida manaripari laut na sai bidang. Ndang lomos roha nasida. Ndang tahuton nasida. Ai Tondi ni Jahowa maringan di ngolu nasida marsadasada.

Sai dipaingotingot bangso Israel do i, sian sundut tu sundut. Jala masihol nasida muse tu songon i. Andigan ma ulaning jumpang songon na masa tu ompu nasida na jolo, na ro Tondi ni Debata paluahon bangsoNa sian hagogotan.

Marhite sihol dohot lungun ni roha i, disuriranghon panurirang Joel ma bagabaga hasasaor ni Tondi ni Debata tu angka anak ni Israel. Tu angka na magodang dohot na metmet, tu dolidoli, dohot tu na marbaju. Ndada holan i, dohot do tu angka naposo boruboru dohot baoa, usehonon ni Debata TondiNa (Joel 3: 1 – 2).

HASASAOR NI TONDI PORBADIA

Dung hehe Tuhan Jesus sian na mate, 50 ari di jolona, saor ma Tondi Porbadia tu angka siseanNa dohot tu angka na porsea tu Ibana na tinggal di Jerusalem. Asa ido umbahen na digoari Pentakosta. Lapatanna ari palimapuluhon, dung hehe Tuhan Jesus sian na mate.

1. Pasadahon

Hasasaor ni Tondi Porbadia i, tarida marhite dila ni api na songgop tu angka na porsea. Laos marhata na asing ma nasida. Alai boi diantusi angka na torop, na ro i. Nasida na ro i ima bangso na leban. Alai diantusi be do parhataan nasida ganup. Asa ido panghorhon ni Tondi Porbadia. Nang pe marasingasing parhataan alai boi marsiantusan. Nang pe marragam pangalaho, bangko dohot hasomalan alai boi do nasida marsiantusan jala masioloan. Asa ulaon ni Tondi Porbadia ima laho pasadahon roha ni angka na porsea tu Ibana.

Alai boi do tong Tondi Porbadia paserakhon angka siula na so lomo ni roha ni Debata. Ima na masa di tingki ni si Nimrod di na laho patupa tungkup di huta Babel. Di na tongon nasida pature tungkup i, ala ndang dihalomohon Debata sangkap nasida i. Disursari ma parhataan nasida. Ndang masiantusan nasida sama nasida. Gabe lola ma ulaon nasida. Ndang marnasidung be ulaon nasida i (1 Musa 11: 1 – 10). Asa margogo do Tondi ni Debata manundati sangkapsangkap na roa na so hinalomohon ni Debata.

2. Panindangion

Dung saor Tondi Porbadia tu ngolu ni angka sisean i, muba ma pangalaho dohot panindangion nasida. Tarida do i sian parngoluon ni angka sisean ni Tuhan Jesus. Sada sian nasida ima si Simon Petrus. Taboto do pangalaho na masa tu Simon Petrus ima na mansoadahon Tuhan Jesus sampe tolu hali.

Tuani ma nunga dipalumbahon Jesus hian si Simon Petrus andorang so disoadahon na ditanda ibana Jesus. Laos dihatiha i ma diondihon Jesus haporseaonna. Didok Jesus ma tu si Simon Petrus: “Alai Ahu do manangianghon ho, unang mintop haporseaonmi” (Lukas 22: 32a).

Asa dung saor jala songgop Tondi Porbadia tu angka sisean i, lam togu ma haporseaon nasida tu Jesus Kristus. Lam marsitutu jala lam margogo ma panindangion nasida. Tarida do i sian Jamita ni si Petrus, di na nidokna di jolo ni rapot godang: “Ingkon oloan do iba tu Debata asa tu jolma” (Ulaon 5: 29).

Asa na manjalo Tondi Porbadia, manang halak naung sinonggopan ni Tondi Porbadia lam marsitutu do laho marbarita nauli. Ndang mabiar jala ndang lomos rohana. Pos situtu do rohana di pangondihonon ni Tondi i di ganup langka dohot ulaonna. Tondi Porbadia do na patauhonsa marpanindangion di jolo ni ganup jolma.

3. Tandi Panindangionna

Halak naung sinonggopan ni Tondi Porbadia ima halak na tandi panindangionna dohot haporseaon tu Jesus Kristus. Hatandionna tarida ma i sian ngoluna ganup ari. Jumpang ma di ngoluna siganup ari songon na nidok ni Apostel Paulus: “Alai angka on ma parbue ni Tondi: Holong dohot asi ni roha, dame dohot lambas ni roha, habasaron, habasaon, haporseaon, halambohon dohot hatomanon” (Gal. 5: 22).

Asa manang ise naung sinonggopan ni Tondi Porbadia tarida doi sian pangalaho dohot ulaonna siganup ari. Lam hinsa mangulahon na denggan. Hobas jala hibas marbarita nauli. Olo jala rade mangurupi dongan jolma na gale, na marhahurangan dohot na so mardihadiha. Saurdot ma hatana dohot pangulaonna.

4. Mangadopi Virus Corona

Mauliate do dohononta tu Debata ala nunga diain hita gabe anakhonNa. Ai dihatindanghon Apostel Paulus do: “Ai nasa na tinogihon ni Tondi ni Debata, angka i do anak ni Debata”. Ai ndang dijalo hamu tondi hatobanon asa laho mabiar. Tondi haanakhon do dijalo hamu: mangasahon i do panjounta “Abba” mandok: “Ale Amang”. Alai molo anak hita, dohot ma panean: panean di Debata, dongan panean ni Kristus:  molo tung dongananNa hita di sitaonon, gabe donganNa hita sogot nang di hasangapon (Rom. 8: 14 – 17).

Asa ndang jadi hita tahuton mida dohot mangadopi sumbia ni portibion. Ai nunga dihongkop Jesus hita gabe anak ni Debata. Jala marhite haanakhon i do hita tau jala haposan, huhut margogo manaluhon nasa hamusuon ima sumbia ni portibion.

Tutu ditongatonga ni parmaraan do ngolunta nuaeng. Adong sorimago Virus Corona na mangalantap tu liat portibion. Laho mangadopi parmaraan on, nunga disosoi pamarenta hita patupa haiason ni pamatang, jabu dohot ingananta. Unang pajonokhu marpungu, unang patupa ulaon parpunguan na torop. Laos didok muse, dumenggan ma nian hita di bagasta be.

Nuaeng marhite sosososo ni Presiden Republik Indonesia, Ir. Joko Widodo, nunga masuk hita tu pangalaho na imbaru, ima “mardame dohot virus corona”. Lapatanni i, asa unang be holan di jabu, unang monggop di jabu. Ingkon laho do hita tu duru, tu inganan na humaliang hita. Ingkon marparsaoran do hita, laho tu balian mangula ulaonta be.

Pos ma rohanta. Ai ganup na porsea tu Debata, ima na gabe ondihonon ni Debata do hita di ngolu na taadopi. Gariada, songon angka anak ni Debata hita, lam tu ringgas na do hita marbarita nauli. Borhat manopot dongan jolma, patoguhon haporseaonna, papos pangkirimonna tu Tuhan Jesus Kristus.

Asa marhite hasasaor ni Tondi Porbadia naeng ma lam hehe huria rap dohot angka na porsea laho marpanindangion manogu, mangarahon, dohot manogihon torop jolma manghaporseai Tuhanta Jesus Kristus. Amen

Selamat mamestahon parningotan hasasaor ni Tondi Porbadia ma hita sude.

Pearaja, 31 Mei 2020

Tabe sian Ehorus HKBP,

Pdt.Dr. Darwin Lumbantobing

16.     Marende BE No. 467: 1,2  “ASI NI ROHAM HUPUJI” ( Pelean I tu Huria; Pelean II tu Hatopan)

v  Asi ni rohaM hupuji ala Ho manobus au.

Dipaias Ho rohangku, gabe soranganMu au.

IngananMu rohanami, TondiMi manggohi i.

Pangke dohot ngolunami gabe ulaulaMi.

v  Sai ramoti ma rohangku, asa boi gohanMu au.

Sai mabaor ma pasupasu, nang marhite sian au.

IngananMu….

17.     PANGUJUNGI:

U   :   Huria ni Tuhanta, pos ma roham, ai Tondi ni Jahowa do manogu hamu tu hasonangan. Ala ni tongtong ma hamu marpanghirimon na mangolu tu Ibana. Ai saleleng di portibi on hita sai rongom do angka parungkilon, haporsuhon dohot sitaonon manosak ngolunta. Molo tongtong hita marpanghirimon na mangolu tu Debata dohot tu bagabagaNa, manahan ma hita mamolus saluhut na masa i sahat ro di ujungna. Ai didok Hata ni Debata do di Jesaya 63:14 “Songon pinahan na tuat tu rura, ditogihon Tondi ni Jahowa nasida tu hasonangan; songon i pe ditogihon Ho bangsoM asa mambahen goarMu marmulia.”

R   :   Pinuji ma Debata na manogihon hita tu hasonangan.

U   :   Unang ma taeahi hasangapon na rumar; unang masiasapan manang masilatean! Alai borhat ma hita tu portibion mamparangehon Tondi ni Tuhan i laho mamparbuehon: Holong dohot las ni roha, dame dohot lambas ni roha, habasaron, habasaon, haporseaon, halambohon dohot hatomanon. Ai angka I do dihalomohon Debata laho parohon harajaonNa di portibi on..

R   :   (Mangendehon) BE No. 305: 3  “ALE TONDINGKU HEHE MA”

v  Tatopot ulaonta be baen sangap di Tuhanta

Sai hehe hita sasude paboa las rohanta

Mamangke hagogoon i nilehon ni Tuhanta i

Tu hita saluhutna.

U   :  Tatangianghon ma peleanta: Ale Debata, Amanami na di banua ginjang, Ho do haroroan ni saluhut silehonlehon na denggan dohot nasa ulibasa na mauliutus. Hupasahat hami ma sian na nilehonMi tu hami, peleannami tu Ho. Sai jalo ma i gabe uap na hushus di joloM. Pasupasu ma i jala ramoti asa huparhaseang hami pelean on, patimbulhon harajaonMu di tongatonga ni huriaM dohot di portibi on. Buhai ma rohanami marhitehite TondiM, asa lam hutanda hami godang ni silehonlehonMi tu hami, asa lam girgir hami mandok mauliate tu Ho, marhitehite Jesus Kristus Tuhannami. AMEN

R   :  (Mangendehon) BE No. 204 : 2 “NDANG TADINGKONONHU HO”

v Nasa na nilehonMi, tondi ro di pamatanghu.

Hosa dohot gogongki, ro di saluhut artanghu.

Hupasahat i tu Ho, na so unsatonhu do.

U   :  Martangiang ma hita: Ale Tuhan Debata, Amanami! Na so tarasam do godang ni silehonlehonMu di hami. TondiM na badia i dilehon Ho tu hami jolma, sumonggopi hami na lea on. Na umarga i do dilehon Ho tu hami, jala gumodang do i sian portibi on dohot sian pangisina sude. On pe mauliate ma rohanami jala pujionnami ma Ho ala ni sude habalgaon dohot hamuliaonMu, naung pinapatarMu tu hami. Sai lehon ma Tondi Parbadia i tu HuriaM, angka na olo mangihuthon Tuhan Jesus Kristus, Tuhannami asa diajari, dirajai, dipatiur, diparbadiai jala dipatongtong hami mian di Barita na Uli i. Ale Tondi Parbadia! Sai pasada ma HuriaM na pinapungupunguMi, asa masijaloan jala masihaholongan songon angka ruas ni daging ni Tuhan Jesus Kristus na badia i. Sondangi jala patiur ma hami, asa hutanda hami angka dosa na balga dohot na metmet sipasidingonnami. Sai buas ma Ho manesa dosanami, asa lam badia jala imbaru hami ganup ari, asa tarbahen hami saor di bagasan Huria na badia, na sasada i. Sai ondihon jala padomu hami tu Ama i, asa pos rohanami mandok: Amanami di bagasan Tuhan Jesus Kristus. Sai tambai silehonlehon tu Huria, asa lam ganda torop ni angka Parbarita na Uli dohot pangajari dohot parasiroha, na mamaritahon habalgaonMu di portibi on. Sai sondangi jala pasupasu sude parpunguan ni halak Kristen di gareja, di parsikolaan, nang di bagasna be, asa tau nasida saor tu parpunguan sogot. Sai sungguli angka na tarpodom, jala pargogoi angka na gale. Sai songgoti ma angka na neang dohot na tangkang marroha, asa ditinggalhon nasida hajahatonna be. Sai parrohai angka na bojok roha, jala apuli angka na marsak dohot na dangol i, asa unang diruparupa portibi on angka na mangoloi Ho. Sai tatap ma na targogot dohot na pinaburuburu ni halak ala ni haporseaon di Tuhan Jesus, sai ajari nasida maralus jala mian ma Ho di bagasan nasida. Sai ramoti ma pingkiran ni angka panggomgomi dohot panguhum asa tigor uhumnasida, jala asa dihabiari nasida ari paruhuman sogot. Sai patogu haporseaonnami, asa tongtong huingot hami, naung sesa dosanami, jala boanonMu hami tu hangoluan sogot. Sai sungguli pangkirimon na mangolu di hami, asa pos rohanami, nang malangke daging on, pangoluonMu do muse, asa masuk hami marnida Debata Ama marhitehite Tuhan Jesus Kristus, Tuhannami. Amen.

         Ale Amanami na di banua ginajang! Sai pinarbadia ma GoarMu! Sai ro ma harajaonMu! Sai saut ma lomo ni rohaM di banua tonga on songon na di banua ginjang! Lehon ma tu hami sadari on hangoluan siapari! Sesa ma dosanami songon panesanami di dosa ni dongan na mardosa tu hami! Unang hami togihon tu pangunjunan! Palua ma hami sian pangago!

R   :  (Mangendehon):

v Ai Ho do nampuna harajaon, dohot hagogoon.

Ro di hasangapon, saleleng ni lelengna, Amen

U   :  Pasupasu ! (Parhalado Partohonan).

R   :  (Mangendehon) Amen, Amen, Amen.