(39). PARTONDING NI ACARA PARMINGGUON - 24 MEI 2020

 

PARTORDING NI PARMINGGUON  

DI MINGGU EXAUDI

( Psalmen 27 : 7 )

     Ev: Mateus 20 : 29 – 34                                    Ep: Psalm 27 : 7 – 14      

TOPIK:

DITANGIHON JAHOWA DO

JOUJOU NI HALAK NA PORSEA

    

HURIA KRISTEN BATAK PROTESTAN

 

Minggu, 24 Mei 2020

I.      PARHOBASON:

1.       Partangiangan on ni uluhon ni Ama manang Ina.

2.       Diaturhon ma na mamboanhon tangiang pangondianan

3.       Diparade hian ma inganan ni pelean.

II.      PARMINGGUON:

1.       PAMUHAI:

U   :  Hamuna angka dongan na hinaholongan, sadarion sahat ma hita tu minggu EXAUDI, lapatanna : Sai tangihon ma soarangku, ale Jahowa. (Psalmen 27 : 7). Marhite parmingguonta sadari on, joujou ma hita tu Debata, ai Debata do na tuk manangihon soaranta dohot hoihointa jala asi do rohaNa mida angka na joujou tu Ibana. 

R   :  Sai tangihon ma soarangku ale Jahowa jala asi ma rohaM mida ahu.

U   :  Sada do naung hupangidohon sian Jahowa, sai i do hulului! Naeng mian ahu di bagasan joro ni Jahowa saleleng mangolu ahu, paidaida hinadenggan ni Jahowa dohot mamingkiri ganup sogot di bagasan joroNa i. Ai diondingi do ahu di bagasan undungundungNa di ari hinamago, ditabunihon do ahu di partabunian ni undungundungNa, tu dolok partanobatoan do ahu dipanangkok. Asa mandirgak ulungku mida musungku, angka na humaliang ahu; jadi pelehononku ma di bagasan undungundungNa i angka pelean pujipujian, marende ma ahu huhut mamalu parhinaloan mamuji Jahowa.

R   :  Parhanalom ma Jahowa, pagomos jala patogu roham jala parhanalom Jahowa!

U   :  Antong hamu na hinaholongan, joujou ma hita tu Debata mangido asi ni rohaNa, tapasahat ma pujipujian holan tu Ibana, marende ma hita.

2.       Marende BE No. 2 : 1, 3 “NAENG PUJIONKU HO JAHOWA”

v Naeng pujionku Ho Jahowa ai Ho do Debata na tutu i

Sai suru Tondi Parbadia tu au asa hupuji goarMi

Marhitehite Jesus AnakMi asa lomo rohaM di endengki

v  Asi rohaM ale Jahowa pamalo au mamuji goarMi

Sai unang asal puas hata ingkon tutu dipuji rohangki

Ho Ama, Anak dohot Tondi i doshon na jongjong au di joloMi

3.       VOTUM – introitus – tangiang:

U   :  Marhitehite Goar ni Debata Ama dohot Goar ni AnakNa Tuhan Jesus Kristus dohot Goar ni Tondi Parbadia, na tumompa langit dohot tano on. Amen. (Parhalado partohonan).

U   :  Sai tangihon ma soarangku ale Jahowa molo joujou ahu. Didok rohangku, Ho mandok: Lului hamu ma bohingKu. Antong bohiM ma na hulului ale Jahowa. Sai unang ma tabunihon bohiM maradophon ahu. Jahowa do panondangi di ahu dohot hatuaonhu, tung mida ise ma mabiar ahu ? Jahowa do partanobatoan ni ngolungku, tung mida ise ma ahu biahaton ?   Haleluya.

R   :               (Mangendehon): Haleluya, Haleluya, Haleluya!

U   :  Martangiang ma hita:  Ale Tuhan Debata, Pargogo na so hatudosan, Amanami na di banua ginjang i! Usehon ma TondiM na badia i dohot hapistaran na sian Ho i tu saluhut HuriaM, asa lam rarat jala lam hot HataM na badia i di tongatonga ni hami on. Lehon ma hiras ni roha di naposoM manjamitahon HataM, asa lam pita jala lam ganda HuriaM na badia i. Patongtong ma huhut rohanami mangoloi Ho sahat ro di ujung, di bagasan haporseaon na ture, marhitehite AnakMu, Tuhan Jesus Kristus, Tuhannami. Amen.

4.       Marende BE No. 262 : 3      “ JAHOWA TUHANHI ”

v  Di na tarsosak au, padao ma pandelean

Sitaonon na di au, urupi au mamorsan

Pamonang au tongtong, palambok rohangki

Parroha na holong, baen angka donganhi

5.       Patik: 

U    :  Patik ni Debata sihangoluhonta di minggu Exaudi sadari on, dienaet sian 1 Korint 16 : 13 Dungo ma hamu, marsihohot marhaporseaon, tang ma hamu jala margogo. 

         Antong rap mangido gogo ma hita sian Tuhan Debata.

R   :  Ale Tuhan Debata, sai pargogoi ma hami mangulahon na hombar tu PatikMi. Amen.

6.       Marende BE No. 688 : 1 + 3     “ TUHAN ”  

v Tuhan jotjot do marsak donganhi ala na sala pambahenan hi

Hatanghu langka nang parulanhi, jora ma au

v Nuaeng na ro do au sumomba Ho, pasahat ngolungki Tuhan tu Ho

Tuhan lehon ma roha na holong, urupi au

7.       TANGIANG pangidoan dohot BAGABAGA NI DEBATA:

U    :               Ale Tuhan Debata, Pargogo na so hatudosan! Ho do panondanginami dohot hatuaonnami. Ho do partanobatoannami di ngolunami. Sai tangihon ma soaranami, ale Jahowa, di na joujou hami tu Ho, asi ma roham mida hami, jala alusi ma hami. Unang tung tabunihon bohiM maradophon hami, unang tung tulak hami di bagasan rimasmu, matua Ho do pangurupinami, unang tung ambolongkon hami, jala unang tadingkon hami, ale Debata ni hatuaonami! Asi ma rohaM di hami ala ni Tuhan Jesus Kristus Tuhannami.

R  :  Ale Tuhan Debata, Pargogo na so hatudosan, sai tangihon ma soaranami jala  asi ma rohaM di hami.

U  :  Ale Tuhan Debata, Pargogo na so hatudosan. Di hamamasa ni mara ala ni Covid-19 on, gok do biar huadopi hami na pola mambahen ganggu dohot haporseaonnami. Mabiar do hami di perekonomian na hurang denggan, mabiar do hami sotung hona sahit, mabiar do hami ndang dapot mangan, mabiar do hami sotung lam godang angka mara na asing ala ni Covid-19 on. Ale Tuhan Parasiroha, salpuhon ma mara Covid-19 on sian tongatonganami. Sai lehon ma di hami haporseaon na mangolu, ai Ho do na huhaposi hami na tuk paluahon hami sian mara i. Ho do na hu hasiholi hami laho mangalusi joujounami. Ale Tuhan, tangihon ma hami jala asi ma rohaM mida hami.  

R  :  Ale Tuhan Debata, Pargogo na so hatudosan, sai tangihon ma soaranami jala  asi ma rohaM di hami.

U  :  Ale Tuhan Debata, Pargogo na so hatudosan.  Di hamamasa ni mara sinuaeng, sai tatap ma hami saluhutna. Unang paloas hami marroha mago na holan mangulahon lomo ni rohanami sambing, na mangulahon ulaon na so lomo ni rohaM. Ale Tuhan, tompa ma roha na ias di bagasan hami, jala paimbaru rohanami jala pasintong hombar tu lomo ni rohaM.  

R  :  Ale Tuhan Debata, Pargogo na so hatudosan, sai tangihon ma soaranami jala  asi ma rohaM di hami.

U  :  Ale Tuhan Debata, Pargogo na so hatudosan. Tatap ma saluhut parsorionnami be. Di na humolso rohanami sumarihon bohal ni pardagingonnami, urupi ma hami, jala sarihon ma hami. Huboto hami holan Ho do haroroan ni nasa ulibasa na mauliutus, sai lehon ma i dohot di hami. Unang loas anturaparon manang ise sian hami angka na tinompaM, parade ma i di hami angka na hurangan nuaeng. Ai na porsea do hami, gari angka natinompaM di sandok portibi on, disarihon Ho do i saluhutna, sai dohot ma nang hami sarihononMu. Pasuang ma hami tu hinauli ni panompaonMu  di langit dohot tano on. HataM do na mandok: “Parhanalom ma Jahowa, pagomos jala patogu roham jala parhanalom Jahowa!

R  :  Ale Tuhan Debata, Pargogo na so hatudosan, sai tangihon ma soaranami jala  sesama dosanami.

U  :  Ale Tuhan Debata, na badia jala na bonar. Parasi jala Partalup ni roha jala na basar do Ho! Sai marpangulahi ma rohaM mida hami. Dibahen I sai sesa ma sude dosanami! Ndang adong na hupangasahon hami dungkon ni asi ni rohaM; hatigoran na pinatupa ni AnakMu do na hupangasahon hami tu joloM. Dibahen I pasonang jala apuli ma hami angka na hinophop ni Tuhan Jesus Kristus, Tuhannami. Amen.

R  :  (Mangendehon): BE No. 733 : 1   “DULO MA AU ON O TUHAN ”

v Dulo ma au on o Tuhan, bege anggukhon

Ro do Ho tu angka dongan, topot nang au on

Jesus Tuhan, bege anggukhon

Ro do Ho tu angka dongan, topot nang au on.

U    :              Bagabaga ni Debata : Ro ma hamu tu Ahu, asa mangolu tondimuna, ninna Tuhan Jahowa. Tung sura rara dosamuna songon abit bunga dapdap, bontar do bahenonHu songon itak; nang pe rara songon abit hasumba, gabe songon hapas do muse. Hasangapon ma di Debata na di ginjang!

R  :  Amen.

8.       Marende BE No. 701 : 2     “TU HO DO AU MARPADAN ”

v  Baen ma panghilalaan di au o Tuhanhi

Donok do Ho o Tuhan, mandopang musungki

Ragam do pangunjunan di hasiangan on

Ho partanobatoan di paraloanhon

9.       E p i s t e l:

U   :   Hata ni Debata turpuk di minggu EXAUDI sadari on, ima na tarsurat di  Psalmen 27 : 7 – 14. Sai tangihon ma soarangku ale Jahowa molo joujou ahu, asi ma rohaM mida ahu, jala alusi ahu

R   :  Nina rohangku do mandok Ho : Lului hamu ma bohingKu, antong bohiM ma na hulului, ale Jahowa

U   :   Unang tung tabunihon bohiM maradophon ahu, unang tung tulak naposoM dibagasan rimasMu, matua Ho do pangurupingku, unang tung ambolonghon ahu, jala unang tadinghon ahu , ale Debata ni hatuaonhu.

R   :  Ai nunga ditadinghon damang dohot dainang ahu, alai dijangkon Jahowa do ahu

U   :   Sai podahon ma tu ahu dalanMu ale Jahowa, jala togu ahu di dalan hatigoran, ala ni angka alongku

R   :  Unang tung pasahat ahu guru roha roha ni angka musungku, ai hehe do dompak ahu angka sitindangi pargabus, jala dibaushon hajahaton.

U   :   Aut unang huhaporseai paidaidaonhu sogot hinadenggan ni Jahowa di tano hangoluan on. Parhanalom ma Jahowa, pagomos jala patogu roham, jala parhanalom Jahowa. Ima sahatna. Martua ma angka na tumangihon Hata ni Debata jala na umpeopsa. Amen.

10.   Marende BE No. 298 : 2       “ DI LAMBUNGMI O JESUSHI ”

v  Di lambungMi o Jesushi, sumurut do na gaor i

Ai guru dokMu do sude, galumbang nang alogo pe

Lam sonang do nang rohangki, dung ho o Jesus Tuhanhi

11.   MANGHATINDANGHON HAPORSEAON:

U   :  Tahatindangkon ma haporseaonta i, songon na hinatindangkon ni donganta sahaporseaon di sandok portibi on. Rap ma hita mandok:

R   :  Ahu Porsea…..

12.     Marende BE No. 707 : 1       “HAGOGOON DOHOT APULAPUL”

v  Hagogoon dohot apulapul do dilehon Tuhan i tu au

Ganup ari au di togutogu, ganup tingki di ondingi au

Ai hombar tu lomo ni rohaNa do di lehon Tuhan i tu au

Ro marsorin arsak lasniroha, haporseaonhu di patau

13.     TANGIANG PANGONDIANON:

14.     Marende BE No. 772 : 2 - 3   “TUHANHU DO PATURE DALANHI”

v  Tuhanhu do pature dalanhi. Tuhanhu do patiur langkangki

Hulului do Tuhanhi, surut ma na holom i. Tuhanhu do patiur langkangki

v  Tuhanhu do pature dalanhi. Tuhanhu do patiur langkangki

Hupasahat diringki tu tangan ni Tuhanhi. Tuhanhu do patiur langkangki

15.     JAMITA:

“DITANGIHON JAHOWA DO JOUJOU NI HALAK NAPORSEA”

(Mateus 20 : 29 – 34)

Hamu angka Amang, Inang, Naposo Bulung nang angka dakdanak ruas ni Huria ni Kristus hinaholongan, Di hita angka na porsea di ulaon ni Debata di ngolunta hajolmaon nunga tibu tangkas taboto, tatanda dohot tapanghlalahon na asi do roha ni Debata di na joujou tu Ibana, manang na sangap pe ibana manang na so dung dipasangap, na bahat artana manang na so mararta asing ni hahipason di pamatangna, na pistar naung mandai parsikkolaan na timbo nang naung bahat sira hangoluan pinanganna na mambahen pistar ibana, manang na manghilala ndang adong binotona, parhuaso nang natorop nirajaan ni na asing, pengusaha manang ndang, partani tano na bidang manang partani sarante dohot bola pinang, pengusaha na balga di marragam na ringkot di ngolu on nang pengusaha na mansai metmet. Di Bibelta i dohot di pardalanan ni ngolu ni jolma sintong do i. Ndang marimbar asi ni roha ni Debata tu na joujou tu Ibana.  Ganup do jolma i, tung songon dia pe hadirionna, manghilala hinaringkot ni asi ni roha ni Debata Pargogo Nasohatudosan i uju mangadopi parungkilon na so tarbahensa mangadopisa  ia sian hadirionna sandiri. Ala ni i do di angka negara naung denggan ngolungolu dohot sistim ekonomina, parTuhan manang ndang, sai diparade do angka na ringkot mangurupi hajolmaon na tongon marungkil. Dipaadong Rumah Sakit so ingkon margarar marubat, Psikolog dna.

Alai, hamu angka dongan, molo apala pas hadirionta masuk tu angka ruas masyarakat na targoar na tumoru di strata sosial, digoari di hata Indonesia orang pinggiran, angka halak na marasing hatauon ni ngoluna sian na somal (Ingris: diffable) jala ibana mian di sada inganan nang masyarakat na so mamparnampunahon dalan/sistim na manarihon donganta jolma sisongoni, isara angka na mapitung na paimaimahon asi ni roha ni halak di topi dalan asa boi ibana mangan ganup ari ndang anturaparon, manang molo sahat sasahalak tu panghilalaan na dos, tar marasing do joujou ni i tu Debata. Ruar sian nasa roha dohot panghilalaan na songon i do joujouna na mansai gogo, ai ia so i mian di bagasan dangol ni ngolu nama ibana salelengna. Sian panghilalaan na songon i do joujou (Gorik: ekraxen legountos) ni dua halak na mapitung di topi dalan haruar sian kota Jeriko tu Jesus Anak ni si Daud na tarsurat di Mat 20: 29-34 i, dung bortik tu sipareon nang panghilalaan nasida marhite soara pat nang husiphusip ni torop situtu natorop (Gorik: oxlos polus) na tongon mamolus di jolonasida Ibana naung tarbarita Sipamalum nasa na marsahit i, Jesus anak ni si David (Mat 4: 23-25). Ndang tarotapi manang ise joujou sisongon i. Nang sian torop situtu natorop. I nama di nasida kesempatan nauli sian naummuli.  Ala diantusi Tuhanta Jesus i do panghilalaannasida na songon i umbahen na, dung mangulon, dijou jala ditangkasi  Ibana pinangidonasida i,  pamatang parbagasan (Gorik: splagna) ni Jesus pe gabe targunsang meret tu marasiniroha ma(Gorik: splagxnisteis) jala, songon dia dokter mangula, dijama ma matanasida migor marnida satongkin i. Ndang dianturehon Jesus oraora ni natorop i pasauthon asi ni rohaNa i.

Ganup hita do na boi jala dumenggganan manangkasi songon dia joujounta tu Debata parasi roha i saleleng dung tatanda Ibana  mamungka sian di bortian ni dainang, dung tardidi, manghatindangkon haporseaon jala, dung i, di dalandalan ni ngolunta be na marragam i, jala songon dia alusNa tu joujounta i: Sian panghilalaan songon panghilalaan ni  dua na mapitung i do joujounta i, na pola sian roha parbagasan, gabe jotjot manang, pinomat, dung do taida Ibana mangasii hita? Manang baliksa, ala ndang sahat dope hita tu joujou na songon i, gabe ndang dung taida jala tapanghilalahon naung ro Jesus Kristus mangulon di ingananta, manjou hita gok asi ni roha, manangkasi huhut palumehon pangidoanta i, ndang targunsang diri parbagasanNa jala meret tu marasiniroha maradophon hita? Di tingki pandemi Covid 19 on pe, denggan do tapatupa pamilangmilangion sisongon i.  Diurupi Tondi ni Tuhanta ma ganup hita patupa pamilangmilangan i tu joloan ni ari on, sahat hita tu hamubaon na uli, tarpasupasu. Amen.

Kepala Departemen Koinonia

Pdt. Dr. Martongo Sitinjak

 

16.     Marende BE No. 758 : 1+3    “JAHOWA PANGURUPI”  ( Pelean I tu Huria; Pelean II tu Hatopan)

v  Jahowa pangurupi di si ulaonmi, dilehon pos ni roha di ganup tingki i

Nang pe sipata ganggu haporseaonmi, jamot tongtong Tuhanmu manjaga ngolumi

v  Jahowa pandongani di na porsea i, Ibana patuduhon nang sidalananmi

Asa marolopolop ho di ujungna i, Ibana do donganmu nuaeng nang sogot i.

17.     PANGUJUNGI:

U    :   Nunga tabege Hata ni Debata marhite jamita sadari on: Na di tangihon Debata do joujou ni angka na porsea di Ibana, songon tu dua halak  na mapitung na joujou mandok: Asi ma roham di hami, Anak ni si Daud!. Antong, tadok ma mauliate tu Debata dibagasan Kristus Jesus, ai ditangihon do soara ni na joujou tu Ibana, jala dilehon do asinirohaNa tu angka na mangido sian Ibana.

R   :   Mauliate ma Tuhan di asi ni rohaM jala sai saut ma lomo  ni rohaM di hami.

U    :   Diparbaga Debata do tu hita naeng tangihononNa soaranta na joujou tu Ibana. Didok Tuhan Jesus: Aha dipangido rohamuna sibahenonku tu hamu? Alani i unang ho mabiar, sai lului ma bohiNa. Parhanalom ma Jahowa, pagomos jala patogu roham jala parhanalom Jahowa! Di hamamasa ni parungkilonta nuaeng, hinorhon ni mara Covid-19, sai lam pagogo ma soaram manjoujouhon : Asi ma rohaM di hami, Tuhan, Anak ni si Daud. Ingot ma ndang pasombuonNa ho torus di bagasan parungkilon alai na marujung do bahenonNa hinorhon ni asi ni rohaNa.

R   :   (Mangendehon) BE No. 207 : 4   “ SAI TIOP MA TANGANHU ”

v  Di lambung patMu Tuhan, di joloMon, sai loas maradian siseanMon

Pitpit hubaen matangku maniop Ho, ai sonang do rohangku mardongan Ho

U   :  Tatangianghon ma peleanta: Ale Debata, Amanami na di banua ginjang, Ho do haroroan ni saluhut silehonlehon na denggan dohot nasa ulibasa na mauliutus. Hupasahat hami ma sian na nilehonMi tu hami, peleannami tu Ho. Sai jalo ma i gabe uap na hushus di joloM. Pasupasu ma i jala ramoti asa huparhaseang hami pelean on, patimbulhon harajaonMu di tongatonga ni huriaM dohot di portibi on. Buhai ma rohanami marhitehite TondiM, asa lam hutanda hami godang ni silehonlehonMi tu hami, asa lam girgir hami mandok mauliate tu Ho, marhitehite Jesus Kristus Tuhannami. AMEN

R   :  (Mangendehon) BE No. 204 : 2 “Ndang Tadingkononhu Ho”

v Nasa na nilehonMi, tondi ro di pamatanghu.

Hosa dohot gogongki, ro di saluhut artanghu.

Hupasahat i tu Ho, na so unsatonhu do.

U   :  Ale Amanami na di banua ginajang! Sai pinarbadia ma GoarMu! Sai ro ma harajaonMu! Sai saut ma lomo ni rohaM di banua tonga on songon na di banua ginjang! Lehon ma tu hami sadari on hangoluan siapari! Sesa ma dosanami songon panesanami di dosa ni dongan na mardosa tu hami! Unang hami togihon tu pangunjunan! Palua ma hami sian pangago!

R   :  (Mangendehon):

v Ai Ho do nampuna harajaon, dohot hagogoon.

Ro di hasangapon, saleleng ni lelengna, Amen

U   :  Pasupasu ! (Parhalado Partohonan).

R   :  (Mangendehon) Amen, Amen, Amen.