(37). PARTORDING NI PESTA PARNINGOTAN DI HANANAEK NI TUHAN JESUS - KAMIS, 21 MEI 2020

PARTORDING NI PESTA 

PARNINGOTAN DI HANANAEK NI TUHAN JESUS

     Ev: Markus 16 : 15 – 20                                     Ep: Heber 11 : 1 – 6      

TOPIK:

MAMARITAHON BARITA NA ULI TU NASA NA TINOMPA 

HURIA KRISTEN BATAK PROTESTAN

 

Kamis, 21 Mei 2020

I.      PARHOBASON:

1.       Partangiangan on ni uluhon ni Ama manang Ina.

2.       Diaturhon ma na mamboanhon tangiang pangondianan

3.       Diparade hian ma inganan ni pelean.

II.      PARMINGGUON:

1.       PAMUHAI:

U   :  Huria na hinaholongan ni Tuhan Jesus Kristus, sadari on marpungu do hita di bagasta laho manghalashon Pesta Parningotan di Hananaek ni Tuhan Jesus tu banua ginjang. Didok Tuhan Jesus do di Johannes 14 : 1 – 3: “Unang ma bonsa rohamuna! Porsea ma hamu di Debata, jala porsea ma hamu di Ahu! Torop do inganan di bagas ni Damang. Aut so i, dohononHu ma tu hamu: Na laho do Ahu mangarade inganan di hamu? Jala laho pe Ahu mangarade inganan di hamu, sai mulak do Ahu mangalap hamu, asa rap hamu dohot Ahu!

         Antong di bagasan las ni roha beta ma hita sumombahon pujipujian tu Debata. Marende ma hita:

2.       Marende BE No. 99 : 1,3       “O ULUBALANG NA GOGO” 

v  O ulubalang na gogo, songon sadari on do Ho manaek tu hasangapon.

Naung sidung do ulaonMi, na ringkot patupaonMi humophop hajolmaon

Sabam, tongam do Ho muli tu na uli marhabangsa di siamun ni Jahowa.

v  O Jesus Ho do ulu ni saluhut na porsea i, ruasMu anggo hami

Ho hangoluannami on, Ho hasonangannami on, Ho hagogoonnami.

Suru, togu rohanami, asa hami mangalehon tu Ho nasa hasangapon.

3.       VOTUM – introitus – tangiang:

U   :  Marhitehite Goar ni Debata Ama dohot Goar ni AnakNa Tuhan Jesus Kristus dohot Goar ni Tondi Parbadia, na tumompa langit dohot tano on. Amen. (Parhalado partohonan).

U   :  Songon on do didok Tuhan i : BahenonKu do sogot na monang i rap dohot Ahu hundul di habangsangKi, songon Ahu na monang i jala hundul rap dohot Damang di habangsaNa i. Haleluya.

R   :               (Mangendehon): Haleluya, Haleluya, Haleluya!

U   :  Martangiang ma hita:  Ale Tuhan Jesus Kristus, Anak ni Natumimbul i, naung manaek tu banua ginjang jala hundul tu siamun ni Debata! Sai suru ma Tondi Parbadia tu rohanami, asa Ibana tongtong mangajari rohanami. Lehon tu hami parhalado na burju tu hataM, pargogoi ma nasida, asa tongtong diradoti nasida ulaonna jala asa marsahala nasida mangalo bisuk ni sibolis i, asa tung rarat harajaonMu di hasiangan on, paima sude musuM peak di toru ni patMu. Sai pamonang ma hami saluhutna manaluhon dosa dohot hamatean marhitehite Ho, ai Ho do na mangolu dohot na manggomgomi rap dohot Ama i dohot Tondi Parbadia. Amen.

4.       Marende BE No. 98: 1 – 2  “NAUNG MANAEK DO HO”

v  Naung manaek do Ho lao tu surgo do.

Ale Jesus Rajanami, Ho do ihuthononnami.

Ho partogi i, lao tu surgo i.

v  Maol do dalan i, togu hami on;

Asa tung malua hami, sian angka musunami.

Na di tano on, togu hami on.

5.       Patik: 

U    :  Patik ni Debata sihangoluhonta di Pesta Parningotan di Hananaek ni Tuhan Jesus sadari on, tarsurat di Heber 10 : 23 – 24. Momos ma tatiop panghirimon na taparhatopot i, ai haposan do na marbagabagahonsa!              Masiantoan ma hita, masipajujuan tu haholongon dohot tu angka ulaon na denggan!

         Antong rap mangido gogo ma hita sian Tuhan Debata.

R   :  Ale Tuhan Debata, sai pargogoi ma hami mangulahon na hombar tu PatikMi. Amen.

6.       Marende BE No. 174: 1 “TOROP DOPE NA SIAT I”  

v  Torop do pe na siat i di hasampuran rea.

I pe hamu pardosa i sai olo ma porsea.

Ai Debata manjou hamu tu hasonangan situtu.

Hamu, hamu dijou Debatamu.

7.       TANGIANG pangidoan dohot BAGABAGA NI DEBATA:

U  :  Ale Tuhan Jesus Kristus, Anak ni Natumimbul i, naung manaek do Ho tu banua ginjang jala hundul tu siamun ni Debata! Ho do na pinabangkit ni Debata gabe Raja di atas ni saluhut. Dipatutoru Ho diriM tu toru ni saluhut, alai gabe tumimbo Ho sian sasude jala maruli Goar, asa lompit saluhut nasa ulu ni tot laho marsomba tu Ho, jala ganup pamangan marhatopothon: Ho do Tuhan. Ho do na mangungkap dalan tu banua ginjang, gabe sintua ni malim na mangondihon hami tu Debata. Na maporus do hami nuaeng tu adopanMu, mangasahon asi ni rohaM. Sai unang tulak hami, sai jalo ma tangiangnami.

R  :  Ale Tuhan Jesus Kristus, Anak ni Natumimbul i, asi ma roham di hami.

U  :  Ale Tuhan Jesus Kristus, Anak ni Natumimbul i. Na marlas ni roha do hami nuaeng ala naung monang i Ho gabe Raja di atas ni saluhut. Alai huingot hami do sitaonon ni portibi on hinorhon ni sorimago Covid-19 na tongon huadopi hami nuaeng. Asi ma rohaM di hami, sai tumibu ma salpuhon sorimago Cavid-19 on sian tongatonganami. Ai nunga torop na marsingkor jala marhoi. Alani pargogoi ma hami asa marsada hami laho masiurupan dohot masitoguan asa unang adong na mandele. Ai i do Barita na uli songon parsuruonMu andorang so manaek Ho tu banua ginjang: asa borhat hami manjamitahon barita na uli i tu nasa na tinompa.  

R  :  Ale Tuhan Jesus Kristus, Anak ni Natumimbul i, asi ma roham di hami.

U  : Ale Tuhan Jesus Kristus, Anak ni Natumimbul i.          Sai pasupasu ma huriaM na maringanan dope di hasiangan on. Asa nangpe mengadopi parungkilon huriaM ala ni sorimago Covid-19 on tongtong margogo laho mamaritahon barita na uliMi. Pangke ma huriaM gabe habaoran ni pasupasuM tu angka na humaliang, maradophon angka na hurangan dohot angka na gale. Pasupasu jala pargogoi angka partohonon di huriaM. Lehon sahala dohot hagogoon sian banua ginjang tu nasida asa nangpe di tongatonga ni partingkian hasusaan on, margogo nasida manghobasi huriaM jala marmulia  GoarMu di portibi on. Sai tatap ma ruas ni huriaM manang di dia pe maringanan di angka inganan na marserak i. Molo pe ingkon mangadopi sitaonon di tingki on, alai pargogoionMu do marhite asi ni rohaM.  

R  :  Ale Tuhan Jesus Kristus, Anak ni Natumimbul i, asi ma roham di hami.

U  :  Ale Tuhan Jesus Kristus, Anak ni Natumimbul i.  Sai ramoti ma na manggomgomi hami dohot suruan na pinabangkitna, lehon tu nasida hapistaran sian banua ginjang asa marbisuk nasida patupahon na dumenggan maradophon na pinarmahanna tarlumobi ma di na mangadopi mara ala ni Covid-19 on. Asi rohaM nang di angka paramedis, ramoti jala parbisuhi nasida di angka ulaon nasida, asa unang adong na mandele ala borat ni ulaon nasida. Asi ma rohaM di angka parsorionnami jala tangihon ma hami ale Tuhan Jesus Kristus naung manaek tu banua ginjang jala na hundul di siamun ni Debata.

R  :  Ale Tuhan Jesus Kristus, Anak ni Natumimbul i, asi ma roham di hami jala sesama dosanami.

U  :                  Ale Tuhan Debata, Ama ni Tuhannami Jesus Kristus, Ho do Debata pargogo na so hatudosan, sitompa nasa na adong, paruhum na tigor, na manguhumi jolma manisia! Na ro do hami tu joloM manopoti dosanami, angka  na huula hami marhite sian pangalaosionnami di PatikMu, i ma marhite sian tubutubu ni rohanami na roa i, nang sian pangkataionnami na so ture, ro di pangoloionnami di hisaphisap ni rohanami. Na tama situtu do hona uhum hami ala ni dosanami i, alai na tarsolsol bagi do hami nuaeng  ala ni i. Asi ma rohaM di hami, ale Debatanami. Pardengganbasa jala Parasi roha do Ho ala ni Anak haholongan ni rohaM, Tuhan Jesus Kristus Tuhannami. Sai sesa ma dosanami saluhutna, jala suru ma Tondi Parbadia tu rohanami be, asa tarbahen hami mangoloi Ho di bagasan hatigoran dohot habadiaon, gabe sahat hami tu hangoluan na so ra suda, na pinarbagabagaM di angka na porsea di AnakMu Tuhan Jesus Kristus, Tuhannami. Amen.

R  :  (Mangendehon): BE No. 171: 1 – 2  “TANDAI MA AU”

v  Tandai ma au, sungkapi ma dohot rohangku.

Uji ma au, pamanat huhut ma dalanhu.

Olo ditanda Ho au Debata.

v  Asi ma rohaM, taringot tu pangalahongku.

Olo tutu, jotjot do na lilu dalanhu.

Sesa dosangku, sude Debata.

U  :                  Bagabaga ni Debata : Adong do di hita sintua ni malim na songon i, na hundul di siamun ni habangsa ni hatongamon di banua ginjang. Dibahen i tarbahen Ibana do pangoluhon ro di ujungna angka na sandok ro tu Debata marhitehite Ibana; na mangolu do Ibana tongtong, asa ditangianghonnasida. Hasangapon ma di Debata na di ginjang!

R  :  Amen.

8.       Marende BE No. 458: 1  “BARITA NA UMULI I”

v  Barita na umuli i, na sian Tuhan Jesus.

Sai i do margogoihon au, nang arsak pe hubolus.

On mangapuli rohangki : Sai Tuhanki na basa i do donganhi

9.       E p i s t e l:

U   :   Hata ni Debata turpuk di Pesta Parningotan di Hananaek ni Tuhan Jesus sadari on, ima na tarsurat di  Heber 11 : 1 – 6   Alai anggo haporseaon i, pos ni roha do i di angka sihirimon, jala pamotoan na tontu taringot tu na so niida. Di bagasan i do dapotan panindangion angka na tuatua na robi.

R   :  Hinorhon ni haporseaon do taantusi, naung marhitehite pandok ni Debata dipaojak angka hasiangan, asa sian na so tarida manjadi na tarida i.

U   :   Hinorhon ni haporseaon do dipelehon si Abel tu Debata pelean na dumenggan sian na binoan ni si Kain; marhite sian i do dihatindangkon ibana partigor, ai dihatindangkon Debata do angka pelean na binoanna, jala marhite sian i marsoara dope ibana, atik pe naung mate.

R   :  Hinorhon ni haporseaon i do tarhinsat si Henok, gabe ndang diida hamatean, jadi ndang jumpang be ibana, ala naung dihinsat Debata; ai andorang so tarhinsat, dihatindangkon do ibana, halomoan ni Debata.

U   :   Alai anggo so marhaporseaon, ndang tarbahen halomoan; ai halak na mandapothon Debata, ingkon dihaporseai: Adong Debata; laos Ibana do silehon upa tu angka na manjalahi Ibana. Ima sahatna. Martua ma angka na tumangihon Hata ni Debata jala na umpeopsa. Amen.

10.   Marende BE No. 541: 1 “NA MULAK JESUS I”

v  Na mulak Jesus i di dihasangapon i.

Mangalap nabadia i, tu hasonangan i.

Hutundalhon ma, na di pudingki.

Jesus ma haposanki, di haroroNa i.

11.   MANGHATINDANGHON HAPORSEAON:

U   :  Tahatindangkon ma haporseaonta i, songon na hinatindangkon ni donganta sahaporseaon di sandok portibi on. Rap ma hita mandok:

R   :  Ahu Porsea…..

12.     Marende BE No. 522: 1  “SURGO I SAMBULONTA DO I”

v  Surgo i sambulonta do i, ndang adong be siaeon disi.

Na mamuji tongtong na disi, pinalua ni Tuhanta i.

Surgo i, surgo i, ndang adong be siaeon disi.

Surgo i, surgo i, surgo i, ndang adong be siaeon disi.

13.     TANGIANG PANGONDIANON:

14.     Marende BE No. 130: 2  “PAROHON HARAJAONMI”

v  O Jesus ndada sahat Ho tu hasangaponMi.

Tung sura na manjua Ho manaon na porsuk i.

Sai jalo hami on sude, tu harajaonMi muse.

Ndang na manjua hami on maniru Ho di tano on.

Pabongot pe tu surgo hami be.

15.     JAMITA:

JAMITA NI EPHORUS HKBP

TU PESTA PARNINGOTAN HANANAEK NI TUHAN JESUS KRISTUS

HATA NI DEBATA : MARKUS 16: 15 – 20

Hupasahat hami ma tabe tu hamu sude, Amanami/Inanami, angka dongan na hinaholongan, sude angka pangula na gok tingki dohot sude ruas di ingananta ganup. Mandok mauliate ma hita tu Debata Pardengganbasa i, siala pangaramotionNa, sahat ro di tingki on dilehon do tu hita partingkian laho mamuji goarNa Na Badia i. Porsea do hita, diurupi Tuhanta do hita, bangsoNa, digomgomi jala ditogutogu do hita sude laho mandalani ngolu on nang songon i pe di na masa pandemi Covid 19 on.

Tarajumi do, hagogoonta holan di bagasan goarNa, siala i ma, hita margogo mangolu di bagasan haporseaon dohot panghirimon tu Tuhanta. Tuhan Jesus na tahaporsea i nunga mate, jala hehe, dohot naek tu surgo, ima na patuduhon tu hita, ia haporseaonta tu Ibana ndada so marlapatan, alai hot do i jala tutu. Saonari, tapestahon do sada parningotan na balga na dipatupa Tuhanta tu hita, ima na patuduhon huasoNa, hamonanganNa, dohot parnampunaonNa tu ngolunta, ima na tapestahon di bagasan sadarion parningotan hananaek ni Tuhan Jesus Kristus tu surgo.

Di pesta parningotan hananaek ni Tuhan Jesus Kristus nuaeng, tontu marasing do dohot na somal tapestahon nasailaon. Tapestahon parningotan hananaek ni Tuhan Jesus nuaeng di bagasan panghorhon ni pandemi corona on, alai anggo hasasaut ni hamonangan dohot haluaon na pinatupa  ni Tuhan Jesus ndada gabe tarambati i manang gabe so sahat tu hita angka na porsea, songon na nidok ni Tuhanta i ma na gabe barita nauli tu hita di bagasan pestanta on, ima na tarsurat di Evangelium Markus 16: 15 – 20.

1.    Andorang Tuhan Jesus Naek Tu Surgo

Tolu ari lelengna Tuhan Jesus mate songon dipaboa tu angka siseanNa i. Dung i hehe do Ibana di ari patoluhon – di ari Minggu. Dung Tuhan Jesus hehe sian hamatean, didapothon Tuhan Jesus do angka sisean i dohot torop jolma. Mangihuthon Panurat Ulaon ni Apostel, “40 ari ma lelengna Tuhan Jesus marulakulak patuduhon diriNa dohot manghatai tu nasida taringot harajaon ni Debata” (Ulaon. 1: 3b).

Saleleng na 40 ari i, Tuhan Jesus paradehon angka siseanNa i. Tu nasida do dipaboa taringot tu Ibana na marungkil jala mate dohot hehe muse sian hamatean. Saleleng 40 ari i, Tuhan Jesus mangajarhon taringot tu harajaon banua ginjang, taringot tu hangoluan di bagasan harajaon ni Debata, nang songon i taringot tu angka partontangan dohot panggulmiton na diadopi angka sisean i. Saleleng 40 ari i ma, Tuhan Jesus paradehon angka siseanNa i, angka na porsea, huria na marsaor di bagasan goarNa. 

Di Bibel – Padan Na Robi dohot Padan Na Imbaru, adong do lapatan na khusus taringot tu nomor 40. Isarana ima :

40 ari lelengn aek na sumar – Noak (1 Musa 7: 4, 12)

40 ari lelengna si Musa di Dolok Sinai (2 Musa 24: 18)

40 Taon lelengna Bangso Israel di halongonan (3 Musa 32: 13, 34: 33)

40 ari lelengna Tuhan Jesus mangorom diri di halongonan (Mateus 4: 1 – 2, Lukas 4: 1 – 2), dohot na parpudi

40 ari lelengna Tuhan Jesus di portibion dung hehe – dung i manaek tu Surgo (Ulaon. 1: 3)

Nomor 40 dirajumi nomor na singkop. Lapatanna, Tuhan Jesus paradehon siseanNa – dohot angka na porsea di bagasan partingkian na tang i, angka sisean i diajari asa mangolu di bagasan parsaoran na polin dohot mamelehon ngoluna di bagasan goar ni Tuhan Jesus. Lapatanna, andorang so manaek tu surgo, Tuhan Jesus nunga paradehon angka na porsea dohot angka siseanNa i asa boi mangolu di bagasan hasatiaon, marsihohot marhaporseaon tu Tuhan Jesus Kristus.

Di bagasan Evangelium Mateus, andorang so naek tu Surgo, Tuhan Jesus marsuru angka siseanNa dohot angka na porsea tu Ibana asa laho marbarita nauli, asa torop bangso gabe sisean ni Tuhan Jesus dohot mandidi nasida. Dungi didok ma : “Ai ida ma, sai na dongananku do hamu ganup ari, rasirasa ro ajal ni hasiangan on!” (Mat. 28: 20).

Alani i, andorang Tuhan Jesus naek tu Surgo, tu angka sisean dohot angka na porsea tu Ibana, diajari, dipasupasu asa mangolu di bagasan huaso dohot pandonganion ni Tondi Porbadia. Alani i ma asa dihaposi Hata i na mandok, Tuhan Jesus tongtong mandongani sahat ro di hasusuda ni hasianganon.

2.    Lapatan Ni Portibi

Dung Tuhan Jesus singkop paradehon angka sisean dohot angka na porsea saleleng 40 ari i – alani ma muse Tuhan Jesus marsuru nasida asa laho tu sandok portibion laho marbarita nauli.

Di bagasan pangantusion tu Buku Na Badia i, portibi lapatanna ndada holan pangantusion geografis – ima portibi songon inganan, alai dohot do pangantusion “pangalaho”, pambahenan dohot pangulaon ni sasahalak. Bibel jotjot do manggombarhon angka na so manjalo / manjangkon Hata Ni Debata ima angka na mangolu di bagasan haholomon manang di bagasan huaso ni tondi portibion. Alani i ma, marbarita nauli tu sandok portibion marlapatan mamboan Hata Ni Debata dohot hatiuron sian Debata tu angka na so porsea, na so mananda Tuhanta, na di bagasan haholomon, tu bagasan ngolu na so hombar tu Hata Ni Debata dope.

3.    Disuru Marbarita Nauli

Adong tolu so na boi dilaoshon di bagasan ngolu on, ima Panjouon, Pamilliton, dohot Parsuruon.

Dijou do hita, dipillit, jala disuru laho marbarita nauli, pasahathon Hata Ni Debata ima Barita – Haluaon sian Tuhan Jesus Kristus. Na tolu i ma impola ulaon ni halak Kristen, na ingkon tongtong diulahon di bagasan ngoluna. Angka na dijou ima halak na dipillit. Angka na dipillit i ma halak na disuru. Dohot angka na disuru i ma na mangula, marparbue. Tuhan Jesus mandok “Ndada hamu mamillit Ahu; Ahu do mamillit hamu jala hupadiri hamu, asa laho hamu marparbue, jala asa mian parbuemuna i; asa dilehon tu hamu nasa sipangidoonmuna sian Ama i marhitehite Goarhu”, Johannes 15: 16 – pamasumasuon tu angka na disuru.

Angka na disuru Tuhan Jesus dilehon do bohal, laho manaluhon ragam ni hajahaton dohot mangulahon ragam ni angka na denggan. Angka na porsea tu Tuhan Jesus dilehon do hagogoon laho manaluhon ragam ni hajahaton dohot didongani laho mangulahon angka na denggan. Ganup angka na porsea dilehon huaso dohot hagogoon laho mangulahon angka na denggan i.

Di tingki sasahalak naung manghatindanghon haporseaon – ima tu nasida i, dilehon Tuhan i do angka i, dilehon hagogoon mangalo angka na jahat, dohot dilehon hagogoon mangulahon na denggan.

Alani i, ganup angka na porsea tu Tuhan Jesus Kristus nunga dibohali laho mangalo ragam ni angka hajahaton dohot mangulahon angka na denggan.

4.    Barita Nauli Tu Sude Na Tinompa ni Debata

Barita Nauli dibaritahon ndada holan tu jolma sajo, alai dohot do tu sude na mangolu, na tinompa ni Debata. Ala barita haluaon do i, barita nauli sian Tuhan Jesus Kristus i ingkon sahat tu sude na adong di portibi on, tu sude na mangolu, tu sude na ditompa Debata.

Dasor boasa Barita Nauli ingkon dibaritahon tu sude na tinompa, ima ala portibion dohot sude pangisina nunga di bagasan dosa.

Alani i, sude na tinompa ni Debata ingkon do adong hamubaon, haimbaruon, restorasi (dipature asa mulak tu denggan). Ala portibion dohot sude na mangolu nunga sega alani dosa ni jolma. Portibion dohot sude na mangolu ndada be denggan songon mulana na ditompa ni Debata. Portibion dohot sude na mangolu nunga marlaok dosa alani dosa portibion.

Di partingkian na parpudion, jumpangta do angka sima, rasun, dohot ragam ni hajahaton na boi pamatehon ngolu ni jolma. Porsea do hita adong angka i. Nunga taadopi i di bagasan ngolunta on. Adong sima, virus songon Covid 19, Corona saonari nunga sai lohot di pingkiranta, ima songon tanda na paboahon, na tinompa ni Debata i nunga marlaok.

Hape, Debata nunga manompa langit dohot portibion nang sude pangisina di bagasan hadengganon sian mulana. Ndang adong na tinompa ni Debata hona sima nang mambunu angka tinompa na asing. Ima haadongon na tinompa sian mulana, andorang so madabu tu bagasan dosa jolma i. Ima na sinuriranghon ni Panurirang Jesaya, asa mulak muse na tinompa i songon mulana andorang so madabu tu bagasan dosa jolma i.

Songon i ma dihirim dohot na dihalomohon ni Debata marhite Panurirang Jesaya, na mandok :

“Disi ma maringanan gompul di lambung ni birubiru, jala manggompang babiat di lambung ni hambing, jala tampak do anak ni lombu, babiat dohot pinahan na pinamokmok, jala dakdanak na metmet marmahan nasida. Rap manjampal ma lombu dohot babiat, jala tampak modom angka anakna be, jala panganon ni singa duhutduhut songon dorbia. Jala posoposo marmeameam di lambung ni ruang ni ulok dari, jala dakdanak nambura sirang susu mangarorohon tanganna tu ruang ni libe. Ndang be manjahati manang mangago nasida di sandok dolok habadiaonku, ai gok parbinotoan ni Jahowa tano on sogot, songon aek ni laut mangalungkupi tondolanna” (Jes. 11: 6 – 9). Ima na masa na tinompa ni Debata di mulana.

Alai na tinompa ni Debata i nuaeng nunga muba be. Di bagasan na tinompa i nunga adong be sima, rasun, na rap dohot ngolunta. Sarupa do i songon na nidok ni Tuhan Jesus di bagasan umpamaNa i, ia di bagasan ngolu on adong “Eme dohot Simaremeeme” – “Padi dan Lalang” (Mateus 13: 26).

Marhite umpama i, angka pangula i diorai do mangumpat simaremeeme na tubu di holangholang ni eme i. Ala molo diulahon songon i, boi do eme i gabe dohot tarumpat sian uratna i, jala gabe mate.

Di partingkian on, hita nuaeng rap mangolu dohot sima, rasun, nang virus na boi mangasupi ngolunta on. Alai ipe, ndada pola mabiar hita tusi. Asing ni na ingkon radot hita tu panghorhon virus na boi mangondam ngolunta on, porsea do hita tu Padan ni Tuhanta na mandok: Alai ingot ma, “Sai na dongananku do hamu ganup ari, rasirasa ro ajal ni hasiangan on!”.

Di minggu na salpu, Presiden Joko Widodo – mandok: Ingkon boi do hita mangolu “Mardame dohot Virus Corona”. Lapatanna, di bagasan ngolu on, boi sajo do hita jonok jala gariada nunga rap dohot Virus Corona. Alai ndada paloasonta virus corona i manegai, pamatehon ngolunta. Tudia hita laho, didia hita maringanan, virus corona boi sajo do adong disi. Alai ngolunta on ndang boi dihuasoi virus corona i. Hita do na marhuaso tusi, marhite na mangaradoti hahipason dohot mangulahon ulaon na pasohon virus i.

Alani i ma, ingkon radot do hita di hahipason ni pamatangta. Ingkon do hita mangaramoti dirinta asa virus corona ndang tubu jala mangararati, marhite na ingkon patupa holang, ndada rap dohot na asing – social distancing, dohot mangaradoti hahipason sandiri. Marhite i ma, hita boi mangolu jala dao sian sahit i. Marhite na mangulahon songon i ma, nunga dohot hita marbarita nauli tu sude na mangolu, asa sude na tinompa ni Debata boi mangolu hombar tu sangkap ni panompaon sian mulana.

Pamaritahonon Harajaon ni Debata – ima mangulahon angka na denggan di bagasan ngolunta, dohot manaluhon angka ragam ni hajahaton, sima, rasun, dohot virus na manegai ngolu ni jolma. Siala ni i ma, boi hita mangolu di bagasan hadameon rap dohot sude na mangolu – dohot sude jolma.

Sai dipasupasu jala diramoti Tuhanta ma hita sude di na mandalani basabasa hangoluan on... Amen

Tabe mardongan tangiang,

Ephorus HKBP,

Pdt. Dr. Darwin Lumbantobing

 

16.     Marende BE No. 669: 1 – 2  “RINGGAS AU PABOAHON” ( Pelean I tu Huria; Pelean II tu Hatopan)

v  Ringgas au paboahon Barita na uli.

Barita haholongon ni Jesus Tuhanhi.

Ringgas au paboahon ai na sintong do i.

Mambuat nasa holso soada tudos nii.

Ringgas au paboahon, barita na ummuli,

Barita haholongon, ni Jesus Tuhanhi.

v  Ringgas au paboahon Barita na uli.

Ai tung so tarpatudos tu na di tano i.

Ringgas au paboahon tu sude donganhi.

Ai tung marhite i do malua tondingki.

Ringgas au....

17.     PANGUJUNGI:

U    :   Hamu angka dongan, nunga marsaringar di tongatonganta Hata ni Tuhanta na marsuru hita asa borhat mamaritahon Barita na uli tu saluhut na tinompa. Alani borhat ma hita marhite HataNa marhite pambahenanta dohot  ngolunta maradophon saluhut na tinompa.       

R   :   AleTuhan patupa ma hami gabe ulaulaM di portibi on.

U    :   Tuhan Jesus do Ulu ni Huria i jala hita do ruasNa. Na hundul di siamun ni Debata, na pinabangkit ni Debata gabe Raja di atas ni saluhut. Marsitutu ma hita mangulahon parsuruonNa di tongatonga ni portibi on. Tapelehon ma dirinta dohot nasa na adong di hita gale ulaula ni Debata na papatarhon holong dohot asi ni rohaNa tu na humaliang hita. Pos ma rohanta sai na dongananNa do hita ganup ari rasirasa ro ajal ni hasiangan on.

R    :   (Mangendehon) BE No. 211: 3  “TUHAN JESUS SIPARMAHAN”

v  Dokhon ahu suruanMu, ai hataM so magopo.

Dung i Ho huhut manogu donganhi manopot Ho.

Taiti ma sude tu Ho, taiti ma sude tu Ho.

Sai asi rohaM sai togu, sahat ma sude tu Ho.

U   :  Tatangianghon ma peleanta: Ale Debata, Amanami na di banua ginjang, Ho do haroroan ni saluhut silehonlehon na denggan dohot nasa ulibasa na mauliutus. Hupasahat hami ma sian na nilehonMi tu hami, peleannami tu Ho. Sai jalo ma i gabe uap na hushus di joloM. Pasupasu ma i jala ramoti asa huparhaseang hami pelean on, patimbulhon harajaonMu di tongatonga ni huriaM dohot di portibi on. Buhai ma rohanami marhitehite TondiM, asa lam hutanda hami godang ni silehonlehonMi tu hami, asa lam girgir hami mandok mauliate tu Ho, marhitehite Jesus Kristus Tuhannami. AMEN

R   :  (Mangendehon) BE No. 204 : 2 “NDANG TADINGKONONHU HO”

v Nasa na nilehonMi, tondi ro di pamatanghu.

Hosa dohot gogongki, ro di saluhut artanghu.

Hupasahat i tu Ho, na so unsatonhu do.

U   :  Martangiang ma hita: Ale Tuhan Jesus Kristus, naung manaek tu banua ginjang, na hundul di siamun ni Debata! Hasangapon dohot hamuliaon ma di Ho ro di saleleng ni lelengna. Na marlas ni roha do hami nuaeng ala naung monang Ho, jala dipabangkit Debata Ho gabe Raja di atas saluhut, alai gabe tumimbo Ho sian sasude jala maruli Goar, asa lompit saluhut ulu ni tot laho marsomba tu Ho, jala ganup pamangan marhatopothon: Ho do Tuhan! Mauliate ma rohanami tu Ho, ala naung diungkap Ho dalan tu banua ginjang, gabe Sintua ni malim Ho, na mangondihon hami tu Debata. Sai pasupasu ma HuriaM, na maringanan dope  di hasiangan on, paima marpungu hami tu lambungMu. Sai pasaut ma bagabagaM tu angka suruanMu. Lehon tu nasida sahala dohot haogoon sian banua ginjang, asa marmulia GoarMu di portibi on. Sai ajari ma angka partohonan di HuriaM, asa hombar tu lomo ni rohaM angka aturan, paminsangon dohot panogunoguon na niaturhonnasida di HuriaM. Sai gomgomi jala parentai ma HuriaM di sandok portibi on, asa lam rarat jala monang HuriaM i; lehon hapistaran sian banua ginjang tu angka induknami, tu angka Pandita, Guru dohot tu angka Sintua, asa lam maraturan HuriaM di tano on. Sai pajongjong harajaonMu di bagasan rohanami, asa marhiras ni roha hami mangoloi dohot mangihuthon Ho. Pahot ma rohanami tu Ho, asa huhatindanghon hami, mangolu manang mate pe hami: Ho do Tuhannami. Sai paian ma HataM dohot dame di HuriaM, asa huingot hami: ndada hasiangan on inganannami, alai di banua ginjang di lambungMi do. Sai ramoti ma na manggomgomi hami dohot raja dohot suruan na pinabangkitna; lehon tu nasida hapistaran sian banua ginjang dohot induk ni roha, asa dohot nasida mangoloi parentaM. Pasupasu ma saluhut parpunguan ni halak Kristen, sai Ho ma dongan nasida jumpa marpungu di gareja, di parsikolaan, nang pe di bagasna be. Sai lam longkangi sian hami dosa dohot sude na pasorathon hami di hasianganon, asa lam malungun hami, paimahon haroroM mangalap hami tu lambung ni Ama i. Amen.

         Ale Amanami na di banua ginajang! Sai pinarbadia ma GoarMu! Sai ro ma harajaonMu! Sai saut ma lomo ni rohaM di banua tonga on songon na di banua ginjang! Lehon ma tu hami sadari on hangoluan siapari! Sesa ma dosanami songon panesanami di dosa ni dongan na mardosa tu hami! Unang hami togihon tu pangunjunan! Palua ma hami sian pangago!

R   :  (Mangendehon):

v Ai Ho do nampuna harajaon, dohot hagogoon.

Ro di hasangapon, saleleng ni lelengna, Amen

U   :  Pasupasu ! (Parhalado Partohonan).

R   :  (Mangendehon) Amen, Amen, Amen.