(36). TATA IBADAH PARTANGIANGAN KELUARGA, RABU 20 MEI 2020

ACARA PARTANGIANGAN KELUARGA

HKBP PETUARAN RESSORT PERBAUNGAN

Rabu, 20 Mei  2020 - Pukul 19.30 Wib 

I.     ACARA PARTANGIANGAN

1.    Joujou tu Parsaoran       

 U   :    Tahamuliatehon do pandonganion ni Debata dingolunta angka na hinophopNa sahat tu bagasan tingkion.Rade  do Ibana tontong mangalehon asi ni rohaNa tu hita alani marlas ni roha ma hita disi. Tutu, nang pe sahat tu tingkion sai tapatupa partangiangan ditongatonga ni bagasta ganup, alani hamaolon na masa di portibi on unang ma sumurut las ni rohanta disi. Taelekhon ma tu Debata asa martinangi Ibana di pangidoanta. Tapahibul ma rohanta laho marsaor dohot Ibana, marende ma hita:

2.    Marende BE. No. 10: 1+4 “Hupuji Hupasangap Ho”

Ø  Hupuji, hupasangap Ho, Amang pardenggan basa. Ai jadijadianMu do sude, angka na masa. Ditompa Ho do sasude, dagingku ro di tondi pe. Pinuji ma goarMu.

Ø  Tongtong pasangaponku Ho saleleng au mangolu ; Paratarataonku do barita ni goarMu.   Pamatang dohot tondingki  ingkon mamuji sangapMi. Pinuji ma goarMu.

3.    Votum-Introitus- Tangiang

U    : Marhitehite Goar ni Debata Ama dohot goar ni AnakNa Tuhan Jesus Kristus dohot Goar ni Tondi Parbadia na tumompa langit dohot tano on, Amen. Sai tangihon ma soarangku ale Jahowa, molo jou-jou ahu. Didok rohangku, Ho mandok: lului hamu ma bohingKu! Antong bohim ma na hulului ale Jahowa. Sai unang ma tabunihon bohiM maradophon ahu.

K    :  Jahowa do panondangi di ahu dohot hatuaonhu, tung mida ise ma mabiar ahu?

U    : Jahowa do partanobatoan di ngolungku, tung mida ise ma ahu biahaton?. Haleluya! Martangiang ma hita : Ale Tuhan Debata, pargogo naso hatudosan, Amanami na di banua ginjang i. usehon ma TondiM na badia i dohot hapistaran na sian Ho i tu saluhut huriaM, asa lam rarat jala lam hot hataM na badia i di tongatonga ni hami on. Lehon ma hiras ni roha di naposoM manjamitahon hataM, asa lam pita  jala lam ganda huriaM na badia i. Patongtong ma huhut rohanami mangoloi Ho sahat ro di ujung dibagasan haporseaon na ture marhitehite AnakMu, Tuhan Jesus Kristus Tuhannami. Amen.

4.    Marende BE. No. 275: 1  “O Jesus Tuhanki”

1.     O Jesus Tuhanki  Ho Siparmonang i  Raja tongtong

              Ndang na margogo au Molo so Ho di au

              I pe dongani au Di tano on.

2.     Sai ro do setan i Manaiti rohangki Dao sian Ho

               Ipe ingani au Ai molo Ho di au

               Ingkon manigor lao Musu naung ro

5.    Manjaha Turpuk Epistel   Mateus 20: 29-34

U    : Tajaha ma turpuk epistel di partangianganta di bagasan borngin on sian Evanggelium Mateus 20: 29-34 marsorinsorin ma hita manjaha: Jadi laho ruar sian Jeriko, torop ma halak mangihuthon Ibana.

K    : Jala hundulhundul ma dua halak na mapitung di pinggol ni dalan i; jadi dung dibege mamolus Jesus, joujou ma nasida, ninna ma: Asi ma roham di hami, Anak ni si Daud!

U    : Alai dipinsang angka natorop i ma nasida, asa sip nian: Alai lam gogo ma nasida manjoujou: Asi ma roham di hami, Tuhan, Anak ni si Daud!

K    : Jadi mangulon ma Jesus, dipanghulingi ma nasida: Aha dipangido rohamuna sibahenonku tu hamu?

U    :Dung i didok nasida ma: Naeng ma mungkap matanami, Tuhan!

K    : Gabe asi ma roha ni Jesus, dijama ma matanasida jadi pintor marnida ma. Jadi diihuthon nasida ma Ibana.

U    : Martua ma angka na tumangihon Hata ni Debata jala na umpeopsa. Amen. 

6.    Marende BE. No. 811: 1 “Di Au ma Ho Tuhan

Di au ma Ho Tuhan di ari-aringki,

Ai denggan ni basaM padame rohangki.

Di sude partingkian, di sude inganan

Di au ma Ho O Tuhan asi rohaM.

7.    Jamita:

Dang ditadinghon Debata angka na mangalului Ibana

Psalm. 27: 7-14

Huria na hinaholongan ni Tuhanta Jesus Kristus,

Molo ro ponjot ni roha, godang ni sipingkiran, borat ni siadopan di ngoluon, aha ma sibahenonta asa boi neang jala sonang panghilalaanta? Alusna ima martangiang. Mangalompit tangan tu adopan ni Debata asa tongtong ditatap saluhut parngoluonta na gok hamaolon i.

Di parungkilon na masa di ngolu ni Raja David, didok Ibana di tangiangna: “ sai tangihon ma soarangku ale Jahowa, molo jou-jou ahu, asi ma rohaM mida ahu jala alusi ahu”. Mangido jala mangelek ibana tu jolo ni Debata asa dibege jala dialusi Debata jou-jouna, ditatap saluhut sitaononna. Di Ay. 9 didok, unang tung tabunihon bohiM…. Mabiar ibana dipasombu Debata ibana mandalani saluhut hamaolon i.  Ido umbahen dipangido Raja David sondang na sian Debata, poda na sian Debata asa diajarhon Debata tu ibana dia do siulahononna jala sidalananna, jala dipangido ibana  asa ditogutogu ibana asa unang marmara, asa dapot haluaon ngoluna.

Huria na hinaholongan ni Tuhanta Jesus Kristus,

Godang do tantangan na ingkon siadopanta di ngolunta. Marganti sorin do angka hamaolon i ro tu ngolunta, jala godang do angka musu na so manghalomohon hita na naeng mandabuhon hita . sipata gale do daging nang tondinta molo mangadopi saluhutna i. alai unang gabe gale hita jala mandele, unang gabe lilu hita molo ro hamaolon i. talojong ma Tuhan i dibagasan tangiang, asa ditangihon soaranta jala dialusi tangiangta.  Tatiop ma gomos tangan ni Tuhan i, unang tapalua asa unang lilu hita disidalananta,asa dapot hita hasonangan dohot hamonangan. Ingkon jesus ma tabahen donganta. BE. 474: 1 “Ingkon Jesus do donganku sahalakku lilu do. Raphon Jesus boi au monang talu musu I na ro. Dang mabiar au disi…d.u..”. goar ni minggunta ima minggu EXAUDI “Sai tangihon ma soarangku ale Jahowa”. Martangiang ma hita tongtong tu Debata laho mandalani sidalananta na gok hamaolon i dohot mangulahon ulaonta na borat. Tarlumobi ma di na masa di tonga ni negaranta nuaeng ima sahit sorimago covid 19, rap ma hita mangido jala mangelek tu Jahowa asa disalpuhon parsahiton i. holan Debata sambing ma tabahen pangalualuanta. Pos ma rohanta, donganan ni Tuhan I do hita jala bahenonNa do sonang rohanta. Molo Jesus donganmi las roham,,.. Jesus i pangurupim las roham…Unang ganggu hita di ngolunta, sai tangihonon ni Tuhan i do soaranta jala jagaonNa do hita, urupanna di saluhut hamaolon i. Ndang hea ditadinghon , ditabunihon Debata bohiNa sian angka na porsea jala mangalului Ibana. Amen.

(dung simpul dijaha, denggan do na diuduti dohot tangiang sian na manjaha i )

8.    Marende BE. No.403:1-2 “Pos Rohangku di Tuhanku”

1.         Pos rohangku di Tuhanku, ndang  tarbaen tarhirim au.

  On do tongtong tangiangku : Tu lambaen tarhirim au.

  BungaMu au patau. Lobi pos do rohangki, sai patu luson nai,

  Boan on na au tu si.

2.         Huhilala ganup ari paniopNa di au on.

  Sai tong dipasarisari, naeng badia rohangkon.

  Naeng lam tu tinggilna I,

  Pinggol partondionki lao mambaen lomoNa i.

9.    Tangiang Pangondianon

10. Marende BE. No. 252: 1-2 “O Jesus sai dongani”

1.  O Jesus sai dongani Ma hami sasude

     Pasada rohanami Asa bulus sude.

2.  Ndang hadalanan hami Salangka na ture

     Dung Ho pe dongannami Tiur ma sasude 

11. Tatangiang Penutup + Tangiang Ale Amanami

Ale Tuhan Debata Amanami nadibanua ginjang, Ho do haroroan ni saluhut silehon lehon nadenggan dohot nasa ulibasa namauliutus .Hupasahat hami ma sian nanilehonMi tu hami peleannami tu Ho, sai jalo ma i gabe uap nahushus di joloM. Pasupasu ma i jala ramoti, asa huparhaseang hami pelean on, patimbulhon harajaonMu ditongatonga ni huriaM dohot diportibi on. Buhai ma rohanami marhite hite TondiM, asa lam hutanda hami godang ni silehonlehonMi tu hami, asa lam girgir hami mandok mauliate tu Ho, marhitehite Jesus Kristus Tuhannami. Amen. Antong rap ma hita mangido ditangiang Ale Amanami. (Amen- Amen-Amen)