(34). PARTONDING NI ACARA PARMINGGUON - 17 MEI 2020

 

PARTORDING NI PARMINGGUON 

DI MINGGU R O G A T E

( MARTANGIANG )

     Ev: 1 Kronika 17 : 16 – 27                                 Ep: Lukas 18 : 1 – 8      

TOPIK:

TANGIANG HAMAULIATEON 

HURIA KRISTEN BATAK PROTESTAN

 

Minggu, 17 Mei 2020

I.      PARHOBASON:

1.       Partangiangan on ni uluhon ni Ama manang Ina.

2.       Diaturhon ma na mamboanhon tangiang pangondianan

3.       Diparade hian ma inganan ni pelean.

II.      PARMINGGUON:

1.       PAMUHAI:

U   :  Hamuna angka dongan na hinaholongan, sadarion sahat hita tu minggu ROGATE, na marlapatan: Martangiang. Antong, hita angka na pinarhamaol ni Debata, beta ma hita mandok di tangiangta : Mauliate ma di Jahowa, ai pardenggan basa do Ibana, ai ro di saleleng ni lelengna do asi ni rohaNa. 

R   :  Ale Debatanami, mandok mauliate ma hami tu Ho dohot mamujimuji goarMu na marmulia i.

U   :  Sai arahon donganmi martangiang, dok hamu ma : Mandok mauliate ma hamu tu Tuhan ni angka tuan, ai ro di salelenglelengna do asi ni rohaNa. Mandok mauliate ma hamu tu Debata ni angka surgo, ai ro di saleleng ni lelengna do asi ni rohaNa.

R   :  Ale Debatanami, mangasahon goarMu hami mamuji manipat ari, jala mandok mauliate hami di asi ni rohaM  salelenglelengna.

U   :  Antong hamu na hinaholongan, beta ma hita sumombahon pujipujian tu Debata, ima tangiang tanda ni mauliate ni rohanta tu Ibana. Marende ma hita :

2.       Marende BE No. 574 : 1 – 2       “PUJI MA DEBATA” 

v  Puji ma, puji ma Debata, na niainNa do umpuji Debata.

Nunga sesa dosami, malum dohot rohami.

Puji ma, puji ma Debata, na niainNa do umpuji Debata.

v  Olophon, olophon Tuhan i, hatindanghon denggan ni basaNa i.

Sai arahon donganmi, ro tu Sipalua i.

Olophon, olophon Tuhan i, hatindanghon ma denggan basaNa i.

3.       VOTUM – introitus – tangiang:

U   :  Marhitehite Goar ni Debata Ama dohot Goar ni AnakNa Tuhan Jesus Kristus dohot Goar ni Tondi Parbadia, na tumompa langit dohot tano on. Amen. (Parhalado partohonan).

U   :  Marsoara olopolop ma hamu paboahon, patubegehon hata i, pasar hamu ma i ro di ujung ni tano on, dok hamu ma : Nunga dipalua Jahowa naposoNa si Jakop. Marolopolop tu Debata ma ho, ale sandok tano on! Endehon hamu ma hamuliaon ni GoarNa, marmulia ma bahen hamu pujipujianNa, Haleluya.

R   :               (Mangendehon): Haleluya, Haleluya, Haleluya!

U   :  Martangiang ma hita:  Ale Tuhan Debata, Pargogo na so hatudosan! Holan ala ni asi ni rohaM sambing do umbahen na tarbahen hami marpungu di joloM, marsada ni roha martangiang tu Ho. Diparbagabaga Ho do dibagasan HataM: Molo adong dua manang tolu halak marpungu marhitehite GoarMu, lehononMu do na pinangido nasida. Ale Tuhan, pasaut ma bagabagaM i, tangihon ma pangidoannami, lehon ma na tau hangoluannami. Lehon ma di hami saleleng di hasiangan on parbinotoan di hasintonganMi, dohot di hangoluan salelenglelengna marhitehite AnakMu, Tuhan Jesus Kristus, Tuhannami. Amen.

4.       Marende BE No. 127 : 2      “LAM GOGO”

v  Taon nama, taon nama, Sion taon na hansit i

Insakinsak pangunjunan, unang habiari i

Tatap tumpal hangoluan, pangarsahi ni sibolis i

Taon ma i, taon ma i

5.       Patik: 

U   :  Patik ni Debata sihangoluhonta di minggu Rogate sadari on, dienaet sian 1 Tessalonik 5 : 16 – 18. Tongtong ma hamu marlas ni roha! Unang mansadi hamu martangiang! Mandok mauliate ma hamu siala saluhutna! Ai i do dipangido Debata sian hamu marhitehite Kristus Jesus. 

         Antong rap mangido gogo ma hita sian Tuhan Debata.

R   :  Ale Tuhan Debata, sai pargogoi ma hami mangulahon na hombar tu PatikMi. Amen.

6.       Marende BE No. 686 : 1 + 3     “RAMUN DO AU”  

v  Ramun do au di joloMi, gok dosangki urasi au.

O Jesus Birubiru i dison do au, patau ma au.

v  Ala denggan ni basaMi, ro au tu Ho o Jesushi.

Parbadia i ma rohangki, dison do au, patau ma au.

7.       TANGIANG pangidoan dohot BAGABAGA NI DEBATA:

U  :  Ale Tuhan Debata, Pargogo na so hatudosan. Parasiroha na sumurung. Ho do Debata na marbagabagahon: Molo adong dua manang tolu halak marpungu marhitehite GoarMu, lehononMu do na pinangido nasida. Ale Tuhan Debata na maporus do hami nuaeng tu adopanMu, sai pasaut ma bagabagaMi. Ondingi ma hami angka na marhaposan tu Ho. Ro do hami nuaeng tu adopanMu mangasahon asi ni rohaM. Sai unang tulak hami, sai jalo ma tangiangnami.

R  :  Ale Tuhan Debata, Pargogo na so hatudosan, asi ma rohaM di hami.

U  :  Ale Tuhan Debata, Pargogo na so hatudosan. Di ida Ho do sitaonon na masa humaliang hami ima panghorhon ni Covid-19 na mambahen lam mabiar hami di parngoluonnami. Nunga tung marpangontak ale Tuhan sitaonon on nuaeng di tongatonga ni bangsonami nang di luat portibi on. Nunga leleng ale Tuhan ndang rap hami marpungu di gareja dohot angka dongannami ruas ni huriaM. Nunga tung so tarbahen hami be rap marpungu dohot angka dongan ala ingkon mian hami di bagasnami marsadasada. Tung mampanghorhon do ale Tuhan nang dohot tu parngoluon siapari, bobonosan do hami taringot tu sipanganonnami ala hurang tontu angka pansamotannami. Godangnai ale Tuhan angka dongan na mansohot sian ulaonna be ala so tarbahen be mardalan angka perusahaan di bangsonami.  Ale Tuhan,  di adopanMi, tung manungkap ma hami nuaeng, somba jarijarinami dohot unduk simanjujungnami, sai asi ma rohaM, salpuhon ma parsorion ala ni Covid-19 on sian  sandok portibi on. Tibu ma alusi anggukangguknami, asa tung  hatop sumuang hami mangula ulaonnami, jala asa tung tarbahen hami marsada di parpunguan ni huriaM nabadia.

R  :  Ale Tuhan Debata, Pargogo na so hatudosan, asi ma rohaM di hami.

U  :  Ale Tuhan Debata, Pargogo na so hatudosan. Parasiroha na sumurung. Sai tatap ma angka ianakhon naung leleng so boi be marsingkola, na mambahen bohabohaon roha nasida be. Sai unang paloas mansohot angka sintasinta ni roha nasida, sai lehon ma pingkiran na torang dinasida be, asa tongtong rade nasida marsiajar di bagasna be, paima sumuang hami sian sorimago i.  Unang loas nasida di gohi biar, alai sungguli roha nasida asa dohot martangiang mangido haluaon sian Ho.

R  :  Ale Tuhan Debata, Pargogo na so hatudosan, asi ma rohaM di hami.

U  :  Ale Tuhan Debata, Pargogo na so hatudosan. Parasiroha na sumurung. Tatap ma saluhut angka dongan na ingkon agoan ulaon nueng ala dipasohot sian inganan parkarejoanna be. Asi ma rohaM di nasida, sai unang loas madabu tu pandelean, alai papos ma roha nasida manghirim di na dumenggan si jaloon nasida dung sumuang hami sian sorimago i.

R  :  Ale Tuhan Debata, Pargogo na so hatudosan, asi ma rohaM di hami.

U  :  Ale Tuhan Debata, Pargogo na so hatudosan, Parasiroha na sumung. Tatap ma saluhut hami angka naung marhoihoi nuaeng laho manjalahi bohal ni parngoluon siapari. Angka dongan na so dapotan sipanganon ganup ari. Sai patongon ma angka pidong si Gak na boi suruonMu paradehon sipanganon di hami. Tumpahi sandok dongan na boi manarihon donganna, na olo marsilehonlehon sian angka na adong di nasida be. Tumpahi nang dohot huriaM di sandok portibi on anggiat tung boi huriaMi tongtong marsahala laho manghatindanghon asi ni rohaM.

R  :  Ale Tuhan Debata, Pargogo na so hatudosan, asi ma rohaM di hami jala sesama dosanami.

U  :                  Ale Tuhan Debata, Pargogo na so hatudosan. Tatap ma nang dohot pamarenta ni bangsonami, angka pangubati dohot sude angka na mangula arian dohot borngin laho manghobasi angka dongannami na hona sahit ala ni virus corona. Pargogo i ma nasida be, unang loas tahutan nasida. UlaulaM do nasida di tonga ni bangsonami asa tung saut sangkap hatuaonMu di portibi on. Paloas ma mardame sonang rohanami  pamarenta dohot rakyatna, asa dos rohanami laho manggotap harararat ni virus corona di hasiangan on. Ala ni i, huundukhon hami ro tu toru ni tanganMu na gogo i. Sai sesa sude dosanami, dohot dosa ni dongannami. Ho sambing do haporusannami, jala marhaposan tu Ho do hami. Sai lehon ma di hami hangoluan siganup ari, jala palua ma hami sian hagogotan na masa nuaeng, pasonang jala apuli ma hami angka na hinophop ni Tuhan Jesus Kristus, Tuhannami. Amen.

R  :  (Mangendehon): BE No. 228 : 1 + 5    “JESUS HAPOSANHU”

v  Jesus haposanhu unang ma pasombu

Au di hapunjungan, di na so mardongan

Ho tongtong donganhu di pardalananhu

Jesus haposanhu, unang ma pasombu

v  Jesus do Tuhanhu parsigantunganhu

Jesus do ojahan ni haporseaon

Ndada au tahutan nang di parmaraan

Jesus do Tuhanhu parsigantunganhu

U  :                  Bagabaga ni Debata : Songonondo Hata ni Jahowa : Unang ho mabiar, ai Ahu do siluluhon ho, nunga pola Hujou goarmu, Ahu nampuna ho. Hasangapon ma di Debata na di ginjang!

R  :  Amen.

8.       Marende BE No. 452 : 1     “ NA RO PANDAONI BOLON I ”

v  Na ro pandaoni bolon i, ima Tuhanta Jesus

Di daoni na marsahit i, hisar dibahen Jesus.

Uli ni barita i, las ni roha bolon i

Sai dipuji rohangki, Jesus, Jesus, Jesus

9.       E p i s t e l:

U   : Hata ni Debata turpuk di minggu ROGATE sadari on, ima na tarsurat di  Lukas 18 : 1 – 8 Dungi dihatahon ma tu nasida umpama sada, paboa ingkon tongtong nasida martangiang, na so tupa lemba. On do hatana : Adong ma di na sahuta panguhum sada, ndang dihabiari Debata, jala ndang dipardulihon jolma.

R   :  Alai adong ma di huta i parompuan na mabalu, na ro manopot ibana mandok : pintori ahu maralohon alongki!

U   :  Jadi leleng ndang ringkot rohana. Alai ninna ma muse dibagasan rohana, tutu do ndang huhabiari Debata, jala ndang parduli ahu di jolma

R   :  Alai hupintori nama na mabalu on, ala dinengnengi ahu, atik beha ro ibana maon muse manggariangi ahu

U   :  Dungi didok Tuhan i ma: Tangihon hamu ma pandok ni panguhum na geduk i.

R   :  Ia Debata, Tung so pintoranNa ma angka na pinillitNa, angka na manjou Ibana arian dohot borngin ? Tung pangerngeronNa ma di nasida ?

U   :  Hudok ma di hamu : magira ma pintoranNa nasida. Alai tagamon jumpang Anak ni jolma i ma haporseaon di tano on di haroroNa i ? Ima sahatna. Martua ma angka na tumangihon Hata ni Debata jala na umpeopsa. Amen.

10.   Marende BE No. 474 : 3       “ INGKON JESUS DO DONGANHU ”

v      Ingkon Jesus do donganhu molo na tarunjun au

Tuhan Jesus do parmonang, dipamonang dohot au

Ndang mabiar au disi, Tuhan Jesus donganhi

Sai ihuthononku Jesus oloanhu nama i.

11.   MANGHATINDANGHON HAPORSEAON:

U   :  Tahatindangkon ma haporseaonta i, songon na hinatindangkon ni donganta sahaporseaon di sandok portibi on. Rap ma hita mandok:

R   :  Ahu Porsea…..

12.     Marende BE No. 149 : 3       “ HO TONGTONG IHUTHONONHU ”

v  Manang aha pe na masa, las ni roha, arsak pe

Tioponhu Ho nabasa na marholong roha pe

Tung saleleng au mangolu, nang dung suda bohalhon

Ingkon Ho o Sipangolu, pujionghu sai tongtong

13.     TANGIANG PANGONDIANON:

14.     Marende BE No. 487 : 1   “ TUNG HALAK NA MARGOGO ”

v  Tung halak na margogo si partangiang i

Dokdok pe sitaonon ndang olo talu i

Pos situtu rohana di Debatana i

Tuhanna manaluhon sude pangalo i.

15.     JAMITA:

MARTANGIANG

HUNDUL DIADOPAN NI JAHOWA

(I Kronika 17 : 16 – 27)

Patujolo.

                Hamu angka dongan sahaporseaon, Ndang naadong hian disangkapi patupa program dohot anggaran ni pemerintah khusus laho membangun rumah sakit tu namarsahit positif Terdampak Korban Covid-19, dohot inganan isolasi Pengawasan PDP, ODP, Manuhor peralatan khusus, dna. Dipatupa bantuan langsung tunai, sembako tu napogos. Kementerian Perhubungan manutup penerbangan berlaku tu wilayah PSBB. Sudenai ala masa sahit Pandemi Virus on gabe dipatupa ma i.  Laos ala ni masa on di bangso, Pamarenta manosohon napatupahon angka ibadah, aha pe ugamona, asa maribadah di bagasnabe, jala alani ima gabe di bagastabe hita martangiang, mambege hata ni Debata. 

Nunga dipatupa panggomgomi, lembaga2 sosial dohot hita patupa D3 laho mangadopi angka namasa on: Doa, Daya dan Dana, gabe tarfokus, tartuju tusi do pikiran ni pamarenta, dohot hita sude laho mangadopi namasa on.   Songon i do Raja Daud di tingki harajaonna, di ngoluna: Doa, Daya dan Dana, Tangiang, Gogona, Sibahenon angka naringkot nunga diparade ibana ima sangkapna laho pature, mambangun Bagasjoro ni Debata. Sian hata ni Debata di bagasan Minggunta. Rogate on, Martangiang, sian turpuktaon naeng tangkas hita mangantusi aha do tangiang, sian isi ni tangiang si Daud nang hitape angka naung porsea tu Tuhan i di bagasan situasi nataadopi, hita mangido di tangiangta, angka natahasiholi, tahirim patupaon ni Debata, nunga tapatupa Doa, Daya dohot dana.

1. Di bagasan Tangiang jala marhite tangiang tapasahat sihol ni roha dohot na natahirim tu Debata.

Si Daud, disihol ni rohana dohot napinarungkilhonna di ngoluna sai tongtong do ibana martangiang, manungkun, dohot mangido naringkot di ngoluna tu Debata. Tangiang ido ngoluna, manghatai dohot Debata jala ido hagogoonna laho patupahon angka siulaonna. Sai tongtong mandok mauliate sian nasa rohana tu Debata, ai dihilala ibana do naholan Debata sandiri do napatauhon saluhut di ngoluna.  Dung dibege ibana hata ni Debata marhitehite panurirangon ni si Natan naso ibana dipatau Debata pajongjong bagasjoro ni Debata.

Masuk ma raja Daud tu bagasan undungundung i, laos hundul di adopan ni Jahowa, patuduhon haunduhon dohot parjumpangan naadop bohi dohot Debata jala namansai solhot, jonok ibana. Debata do patauhon ibana dohot keluarganya gabe mandok mauliate tu Debata jala pangidoanna pahothon ni Tuhan i pasupasu na dihilala ibana sasaleleng on

Di pillit Debata do si Daud gabe raja di bangso Israel, ndada ala ni hahebatona, manang naluar biasa ibana alai jolma na biasa situtu namanghaporsea i jala  marhabiaran tu Debata jala unduk tu hata ni Debata.  Nangpe hea do ibana so diargahon halak, ndang diparetonghon alai tongtong ibana mengasahon Debata di ngoluna. Nangpe naung tokoh central, raja ibana alai tongtong mandok mauliate tu Debata ala ni balga ni asini roha ni Tuhan i tu ibana dohot keluargana.

Panandaon diri naso adong manang aha, ndang layak ibana maradophon Debata. Alai Debata do patauhon, namamasumasu ibana, keluarga dohot bangsona Alani sikap dohot rohana tu Debata. Songon i do nang tu hita, Debata marnida sikap dohot rohanta parbagasan di ngolunta siganup ari, ndang ala penampilan sian duru atik beha adong pencitraan angka nataula (pandaohan nuaeng Chasing/baju-bajuna idaon uli, asli, original hape isina KW, tiruan, palsu)

Di bagasan undungundung i dipatuduhon ibana dirina; tung ise ma ahu pola, ale Jahowa Debatangku, jala tung ise ma pola anggo pinomparhu, umbahen tung diboan Ho ahu sahat ro tuson?.... ayat 16-18.

Dihilala si Daud hadirion ni Debata naluar biasa di ngoluna jala sai mandok mauliate ibana tu Debata ala dipanghilalahon ibana do pasupasu ni Debata di ngoluna nasailaon jala sahat tu pinomparna, angka halongangan, ndang adong natarpatudos tu Debata…. ayat.19-22

Ndang tarbahen ibana jongjong diadopan ni Debata maradophon nasa pambahenan ni Debata di ngoluna jala angka sangkap ni Debata naso hasuhatan, ndang tarpatudos ni ibana angka nabinahen ni Debata tu bangsona, haruar sian Mesir dohot angka lan naasing dope. Jahowa napatupa halongangan bolon, pabotohon habalgaonNa, naso adong hatudosanna, naso adong Debata dungkon ni Tuhan i. Napabangkithon bangsoNa, jala diain bangso Israel mambahen marbarita goar ni Debata. Ima isi tangiangna pasangaphon Debata.

Laos songon ima hita di partingkian namasa nuaeng, nataadopi di sandok portibion naholan Debata do tapangasahon, natuk mangalusi tangiangta, natahirim namasa saonari on, di portibi on. Di Tangiangta naeng pasangaponta Debata Ama, Tuhan Yesus Kristus dohot tondi porbadia namarhuaso namangatasi saluhut ngolunta, mangolu manang mate pe hita tongtong solhot tu Debata. Tapasangap, tapuji ma Tuhanta di tangiangta, tapaserep ma rohanta di adopan ni Tuhan i, tatinggalhon ma ginjang ni roha, namanghilala hita nasintong, nahebat, naluar biasa, ise nasongon ahu. Asa dialusi Debata tangiangta.

2. Mangido tu Debata asa HOT bagabagaNa tu Ibana dohot Pinomparna.

                Ala naung dihilala si Daud do pandonganion ni Debata di ngoluna sian nasailaon, ala ni i do umbahen ditangianghoon ibana tu Debata: sai pahot ma hata naung pinarbagabagami tu naposom taringot tu pinomparna sahat ro di salelenglelengna, jala bahen ma hombar tu na pinarbagabagami! Ala sadar do ibana dipandonganion ni Debata di pardalanan ni ngoluna, huasona, harajaonna, hasangaponna, dohot bangso Israel napauluahon sian parhatobanon di Mesir dohot malua sian huaso ni bangso nagogo. Sudenai ala ni pambahen ni Debata, huaso dohot hagogooon ni Debata.  Jala tangkas do panandaonna tu Debata natuk mangalehon, mangalusi tangiang pangidoanna i.

Holan ala ni pandonganion ni Debata do saluhut angka namasa boi di adopi, dibolus ibana. Hot do hasetiaon ni Debata dohot bagabagana tu si Daud dohot bangsona, jala sian ponompar ni si Daud do haroro ni sipalua i, Ima Yesus Kristus i nasinuriranghon angka panurirang. Ndang hea diose Debata padanna, nangpe hita jolma sai olo marpadan alai taose (songon hata ende; Kau yang berjanji kau yang mengingkari) jotjot hita mangose padan tu Debata dohot tu donganta jolma.  Alai Debata hot do padanna, tangiang ni Si Daud; ale Jahowa, sai pahot ma hata naung pinarbagabagami tu naposom, nunga sapala lomo roham mamasumasu pinompar ni naposomon, asa hot di adopanmu ro di salelenglelengna; ai manang ise na pinasupasum ale Jahowa, i ma dapotan pasupasu ro di salelenglelengna!  ayat 23-27

Pos ma rohanta, Porsea ma hita aha nanidok ni Debata, nadipadanhon di Padan Narobi nunga dipasaut di Padan Naimbaru, nunga suru anak Tuhan Yesus Kristus sian pinompar ni si Daud ima holong ni roha ni Debata, ndada holan tu si Daud alai dohot do tu hita, keluarganta, bangsonta, nang saluhut angka naporsea natongtong satia, marhaposan tu Debata di situasi namasa nataadopi.

                Alani i Hot ma hita di bagabaga ni Tuhan i, Di bagasan pos ni roha dohot haporseaon ala ni pangurupion ni Tuhan i di hita, keluarga dohot bangsonta boi Sonang, dame, singkop jala dijamin Tuhan i. Asa sai tongtong ma hita martangiang, ai Hot do padan ni Tuhanta, ndang tarhirim hita bahenonNa

3. Dialusi Debata do tangiang ni naposoNa.

Adong do sihol ni roha, nahinirim ni Si Daud naso pinatulus ni Debata, disangkapi ibana naeng pajongjong bagas ni Debata, nunga singkop diparade saluhut nasa sibahenon, adong program D3: Doa, Daya, Dana, singkop diparade alai ndang dipaloas; Ndang jadi anggo ho pajongjong di Ahu sada bagas bahen ingananku ima di turpuk I Kronika 17 : 3-4.  Saut do i marhite anakna si Salomo. Alani ido di tangiang pangidoanna na on, ingkon paulionmu di ibana sada bagas; Ai Ho ale Debatangku, nunga dipapatar Ho tu pinggol ni naposomon, paboa ingkon paulionmu di ibana sada bagas; ala ni do umbahen hum roha ni naposomon martangiang di adopanmon.

Dialusi Debata do tangiang ni angka partigor, songon natarsurat; namargogo situtu do tangiang ni partigor, molo dihaburjuhon (Yakobus 5: 16 c

Antong; Unang mansadi Martangiang, Manongtong ma hamu martangiang; dungo ma hamu disi, huhut mandok mauliate (Kolose 4:2, I Tes 5: 17 Songon ima ngolu ni angka naporsea namangasahon Debata, jala marhaposan tu Debata di bagasan tangiang. Martangiang pasahathon sude na di rohanta, saluhut holso ni rohanta, angka parsorionta, biar ni roha, hatahutan ala ni angka namasa on, asa tibu ma salpu. Alai hitape ingkon satia, radot, disiplin, unduk, do hita laho manggotap sahit namangararati, memutus mata rantai pandemic Covid -19 on. Marhite naung diaturhon Panggomgominta, dohot Parkesehatan; Tinggal di Jabu, marsikolah di jabu, beribadah di jabu, sude pargumo satolop mangulahon tajaga jarak, pake masker, cuci tangan. Asa aha natatangianghon ingkon ulahononta do, jala aha nataulahon i ingkon tangianghononta. Bagaimana Tuhan menjawab doa kita, apabila kita juga tidak komit, konsisten dan konsekuen melakukan apa yang dikatakan Firman Tuhan; Manang ise na so parduli di hata ni Debata, mangago dirina sambing do, alai anggo halak na mangkabiari patik, maruli upa do. Poda ni halak na pistar do mual hangoluan, pasidingkon angka jorgong hamatean sian ibana (Poda 13; 13-14).

                Di Minggu sadarion Rogate, Martangiang, Ngolu  ni halak Kristen sipartangiang, Manontong ma hita martangiang, alusan ni Tuhanta do hita, keluarganta, masyarakat dohot bangsonta ditingkiNa, asa sai dipasupasu Tuhanta jala didongani Tuhan i. Si Daud tartuju, focus tu aha natuk nanaeng patupaon ni Debata di ngoluna, ndang tu aha nasoboi dipatupa siDaud, naso tuk tarpatupana. Tongtong mandok mauliate, jala diulahon aha napatut siulahonon. Dipatupa ibana aha naboi ulahononna laho papatarhon lomo ni roha ni Debata. Taulahon ma aha naboi tarulahon hita. Tangiangta, natahirim sai jumpang hita do alus. Tangiangta namangadopi angka namasaon asa salpu di tingki nabinuhul ni Tuhan I, waktu Tuhan, asa boi hita muse mulak songon nasomal mangula angka ulaontabe, pangabahan nadenggan dohot parsaoranta tu Debata,dohot donganta, keluarganta, masyarakat dohot bangsonta.

Marhite tangiangta adong alus ni sude angka na masa, tanda halongangan masa, dipasaut hombar tu huaso dohot tingki ni Debata, Amen.

Pdt. David Farel Sibuea, MTh, D.Min

Sekretaris Jenderal HKBP

 

16.     Marende BE No. 814 : 1+3 “SAI AJARI AU TUHANHU” ( Pelean I tu Huria; Pelean II tu Hatopan)

v  Sai ajari au Tuhanhu di na martangiang au

Patuduhon tu rohangku sangkap ni rohaM di au

Songon na binaen ni Jesus na manaon humonghop au

Unang lomo ni rohangku, lomo ni rohaM ma saut

v  Di bagasan Ho Tuhanhu boi marlas ni roha au

Ho sambaing haporusanhu, Ho ma paluahon au

Pargogoi ma au Tuhanhu ai mansai gale do au

Unang lomo ni rohangku, lomo ni rohaM ma saut.

17.     PANGUJUNGI:

U   :   Ta dok ma mauliate tu Debata dibagasan tangiangta, ai Debata do na patongon angka asi ni roha dohot denggan basaNa di hita jolma na tinompaNa.

R   :   Mauliate ma di Tuhan Debata, ai marbagabaga do Ibana taringot tu na masa sogot, jala nunga di tatap Ibana ahu sian habangsaNa na di ginjang.

U   :   Diparbaga Debata do tu hita naeng bahenonNa halongangan na bolon laho pabotohon sude habalgaon ni asi ni rohaNa. Di hamamasa ni parungkilonta nuaeng, hinorhon ni mara binoan ni covid-19, sai pos ma rohanta martangiang tu Tuhanta mandok : Ale Jahowa, ndang adong nanggo sada tudoshon Ho, jala ndang adong Debata dungkon ni Ho. Antong, nunga sapala lomo rohaM mamasumasu hami asa hot di adopanMu. Ai manang ise na pinasupasuM ale Jahowa, i ma dapotan pasupasu ro di salelenglelengna. Antong ale Jahowa, sai pahot ma hata naung pinarbagabagaMi taringot tu hami sahat ro di saleleng ni lelengna, jala bahen ma hombar tu na pinarbagabagaMi.

R   :   (Mangendehon) BE No. 207 : 3   “SAI TIOP MA TANGANHU ”

v  Ianggo hasusaan godang do i, alai panghilalaan sonang do i

Na tiur do matanghu nang pe holom ni i da ni matangku di tano on

U   :  Tatangianghon ma peleanta: Ale Debata, Amanami na di banua ginjang, Ho do haroroan ni saluhut silehonlehon na denggan dohot nasa ulibasa na mauliutus. Hupasahat hami ma sian na nilehonMi tu hami, peleannami tu Ho. Sai jalo ma i gabe uap na hushus di joloM. Pasupasu ma i jala ramoti asa huparhaseang hami pelean on, patimbulhon harajaonMu di tongatonga ni huriaM dohot di portibi on. Buhai ma rohanami marhitehite TondiM, asa lam hutanda hami godang ni silehonlehonMi tu hami, asa lam girgir hami mandok mauliate tu Ho, marhitehite Jesus Kristus Tuhannami. AMEN

R   :  (Mangendehon) BE No. 204 : 2 “NDANG TADINGKONONHU HO”

v Nasa na nilehonMi, tondi ro di pamatanghu.

Hosa dohot gogongki, ro di saluhut artanghu.

Hupasahat i tu Ho, na so unsatonhu do.

U   :  Ale Amanami na di banua ginajang! Sai pinarbadia ma GoarMu! Sai ro ma harajaonMu! Sai saut ma lomo ni rohaM di banua tonga on songon na di banua ginjang! Lehon ma tu hami sadari on hangoluan siapari! Sesa ma dosanami songon panesanami di dosa ni dongan na mardosa tu hami! Unang hami togihon tu pangunjunan! Palua ma hami sian pangago!

R   :  (Mangendehon):

v Ai Ho do nampuna harajaon, dohot hagogoon.

Ro di hasangapon, saleleng ni lelengna, Amen

U   :  Pasupasu ! (Parhalado Partohonan).

R   :  (Mangendehon) Amen, Amen, Amen.