(27) PARTONDING NI ACARA PARMINGGUON - 03 MEI 2020

PARTORDING NI PARMINGGUON 

DI MINGGU J U B I L A T E

(Psalmen 66: 1)

     Ev: 1 Kronika 16 : 31 – 36                                 Ep: Epesus 5 : 15 – 21  

TOPIK:

MAROLOPOLOP MA TU DEBATA

   

HURIA KRISTEN BATAK PROTESTAN

Minggu, 3 Mei 2020

I.       PARHOBASON:

1.        Partangiangan on ni uluhon ni Ama manang Ina.

2.        Diaturhon ma na mamboanhon tangiang pangondianan

3.        Diparade hian ma inganan ni pelean.

II.        PARMINGGUON:

1.        PAMUHAI:

U   :  Hamuna angka dongan na hinaholongan, sadarion sahat hita tu minggu JUBILATE, na marlapatan: Marolopolop tu Debata ma, ale sandok tano on! (Psalmen 66 : 1). Antong, hita angka na pinarhamaol ni Debata, beta ma hita mangendehon hamuliaon ni goarNa, marmulia bahen hamu pujipujianNa! Dok hamu ma mandok Debata: Tung na songkal do angka pambahenanMu! 

R   :  Tu ibana do joujou pamanganhu, jala pujipujian mampe tu dilanghu.

U   :  Ro be ma hamu marnida angka pambahenan ni Debata, tung na songkal do pangarajaionNa di manisia. Puji ma Debatanami, hamu ale angka bangso, jala patubegehon hamu ma soara pujipujianNa! Ibana mambahen hosanta mangolu, jala ndang diloas totta tarsulandit.

R   :  Tu ibana do joujou pamanganhu, jala pujipujian mampe tu dilanghu.

U   :  Antong hamu na hinaholongan, beta ma hita marsomba laho mamuji dohot pasangaphon Tuhanta. Ro ma hita mangadop tu joloNa. Marende ma hita:

2.        Marende BE No. 565 : 1+4  “LAS ROHANGKU LAO MAMUJI”  

v  Las rohangku lao mamuji Debata Parholong i,

Songon bunga na mangerbang di na binsar ari i.

Arsak, dosa, haporsuhon mago dibaen asiMi.

Las ni roha na manongtong lehon di au Tuhanhi.

v  Rap ma hita mangendehon sangap di GoarNa i.

Tapangiar soaranta lao mamuji Tuhan i.

Sun do holong ni rohaNa na so marnamontok i.

I do pasadahon hita salelenglelengna i.

3.        VOTUM – introitus – tangiang:

U   :  Marhitehite Goar ni Debata Ama dohot Goar ni AnakNa Tuhan Jesus Kristus dohot Goar ni Tondi Parbadia, na tumompa langit dohot tano on. Amen. (Parhalado partohonan).

U   :  Marolopolop tu Debata ma ho, ale sandok tano on! Endehon hamu ma hamuliaon ni GoarNa marmulia bahen hamu pujipujianNa. Dok hamu mandok Debata tung na songkal do angka pambahenanMu. Binahen ni hinatimbul ni gogoM, ingkon marsomba tu Ho angka musuM.  Haleluya.

R   : (Mangendehon): Haleluya, Haleluya, Haleluya!

U   :  Martangiang ma hita:  Ale Tuhan Debata, Pargogo ma so hatudosan! Na mandok mauliate do hami tu Ho, ala dipapatar Ho dohot tu angka na so tumanda Ho AnakMu Tuhan Jesus Kristus. Sai asi rohaM, sai paian ma di hami ro di pinomparnami Barita na Uli i, jala pararat ma i tu saluhut bangso, asa binsar sondang ni hasangaponMi dohot di angka na hundul di haholomon dohot na nilinggoman ni hamatean marhitehite Anak haholongan ni rohaM, Tuhan Jesus Kristus, Tuhannami. Amen.

4.        Marende BE No. 125: 4 “MARLASNIROHA HITA ON”

v  O Jesus tatap hami on sai pargogoi sude.

Marhitehite TondiMi pasauthon angka patikMi.

Mambaen rarat baritaMi, di nasa jolma pe, di nasa jolma pe.

5.        Patik: 

U    :  Patik ni Debata sihangoluhonta di minggu Jubilate sadari on dienaet sian 1 Tessalonik 5 : 16 – 18. Tongtong ma hamu marlas ni roha! Unang mansadi hamu martangiang! Mandok mauliate ma hamu siala saluhutna! Ai i do dipangido Debata sian hamu marhitehite Kristus Jesus.  

         Antong rap mangido gogo ma hita sian Tuhan Debata.

R   :  Ale Tuhan Debata, sai pargogoi ma hami mangulahon na hombar tu PatikMi. Amen.

6.        Marende BE No. 683 : 1 – 2  “DI ADOPANMU JESUS”  

v  Di adopanMu Jesus, lea tutu do diringkon,

Dibaen godang ni dosangkon, di adopanMu Jesus.

v  Di adopanMu Jesus, marsomba au huhut tungki,

Lao manopoti dosangki, di adopanMu Jesus.

7.        TANGIANG pangidoan dohot BAGABAGA NI DEBATA:

U  :  Ale Tuhan Debata, na marmulia jala na songkal. Amanami, Parasiroha na sumurung. Tung na songkal do angka pambahenanMu. Ho do na jumadihon angka langit dohot nasa isi ni portibi on. Ho do na mangalehon hosa hangoluan. Ho do Debata na so manulak angka tangiangnami.  Na pungu do hami nuaeng di joloM martangiang tu Ho; Ndada mangasahon hatigorannami, na mangasahon asi ni rohaM na godang i do. Sai asi ma rohaM di tangiang dohot elekeleknami, ala ni AnakMu Tuhan Jesus Kristus Tuhannami..

R  :  Ale Tuhan Debata na marmulia jala na songkal, asi ma rohaM di hami.

U  :  Ale Tuhan Debata, na marmulia jala na songkal. Di ida Ho do parsorion ni bangsonami nang sandok portibi on ala ni mara Covid-19 on. Na mampangkorhon ndada holan tu parsahiton alai dohot do tu parngoluan si ganup ari. Holang ma hami sian angka dongan, mula ulaon pe ndang tontu, godang ma angka ruas na so karejo ala tutup perusahaan, godang angka na so dapot mangan dohot angka parsorion na asing na mambahen hami marsak. Ale Tuhan, sai asi ma rohaM, salpuhon ma Covid-19 on sian bangsonami nang sian sandok sandok portibi on, asa tung sonang hami mangula ulaonnami, jala asa tarbahen hami mamuji Ho rap dohot sandok dongannami di tonga ni huriaM nabadia i.

R  :  Ale Tuhan Debata na marmulia jala na songkal, asi ma rohaM di hami.

U  :  Ale Tuhan Debata, na marmulia jala na songkal. Huboan hami ma tu adopanMu angka dakdanak dohot enterenter. Na so boi nasida marsiajar di parsikolaanna. Ramoti jala pasupasu ma nang nasida molo ingkon sian bagas nasida marsiajar. Pasupasu jala ramoti ma nasida asa gabe angka na pistar jala na malo. Unang loas mangolu di bagasan biar alai mangasahon hamuliaon dohot hasongkalonMu tarpasupasu ma nang nasida.

R  :  Ale Tuhan Debata na marmulia jala na songkal, asi ma rohaM di hami.

U  :  Ale Tuhan Debata, na marmulia jala na songkal. Huboan hami ma tu adopanMu angka naposo. Na so boi be marsiajar di parsikolaanna alai ingkon sian bagas na ma nasida marsiajar. Suang songon i angka naung karejo hian gabe so karejo be alani mara Covid-19 on. Asi ma rohaM nang di nasida asa sai tongtong marpangkirimon di denggan ni basaM. Ramoti ma nang nasida asa unang mandele alai di bagasan pos ni roha na sian Ho i ma mandongani nasida.

R  :  Ale Tuhan Debata na marmulia jala na songkal, asi ma rohaM di hami.

U  :  Ale Tuhan Debata, na marmulia jala na songkal. Huboan hami ma tu adopanMu sandok ngolunami asa Ho tongtong na mangaramoti dohot na mamparmudu hami. Urupi ma panggomgominami, urupi ma masyarakat, urupi ma huriaM di Indonesia nang di portibi on, asa marsada ni roha, masiurupan dohot masitoguan laho mangotapi sorimago Covid-19 on.

R  :  Ale Tuhan Debata na marmulia jala na songkal, asi ma rohaM di hami jala sesa ma dosanami.

U  :                  Ale Tuhan Debata, na badia jala na bonar. Parasi jala Partalup ni roha jala na basar do Ho! Sai marpangulahi ma rohaM mida hami. Dibahen i sai sesa ma sude dosanami! Ndang adong na hupangasahon hami dungkon ni asi ni rohaM; hatigoran na pinatupa ni AnakMu do na hupangasahon hami tu joloM. Dibahen i pasonang jala apuli ma hami angka na hinophop ni Tuhan Jesus Kristus, Tuhannami. Amen.

R  :  (Mangendehon): BE No. 227: 1 – 2  “JESUS NGOLU NI TONDINGKU”

v  Jesus ngolu ni tondingku, Ho do haporusanhi.

Gok di Ho na ma diringku, ro di nasa langkaki

v  Lam tangkas ma patuduhon tu au on panghophopMi.

Asa i huhalungunhon, hot ma au di lambungMi.

U  :                  Bagabaga ni Debata : Munsat pe angka dolok, jala humuntal angka robean, alai anggo parasi ni rohangKu na so tupa munsat sian ho, jala padan ni hadameonKu na so tupa humordit, ninna Jahowa Siasii ho. Hasangapon ma di Debata na di ginjang!

R  :  Amen.

8.        Marende BE No. 806: 1 “AHA PE MASA DINGOLUMON”

v  Aha pe masa di ngolumon, Tuhan manjaga ho,

HolongNa do mangondihon ho, Tuhan manjaga ho.

Tuhan manjaga ho, las pe roham marsak pe ho,

Sai diramoti ho, Tuhan manjaga ho.

9.        E p i s t e l:

U   :   Hata ni Debata turpuk di minggu Jubilate on, ima na tarsurat di  Epesus 5 : 15 – 21. Antong, manat ma hamu mamereng manangkasi parulaonmuna; songon angka na marroha, unang ma songon angka na hurang roha!

R   :  Parhaseang hamu ma tingki, ai ari hasusaan do nuaeng.

U   :   Dibahen i, unang ma gabe maoto hamu; alai antusi hamu ma, manang dia lomo ni roha ni Tuhan i.

R   :  Unang ma mabuk hamu bahenon ni anggur, ai hamagoan do di bagasan i; alai gok Tondi ma hamu!

U   :   Hatahon hamu ma sama hamu angka ende psalmen, angka ende pujipujian dohot ende partondion; endehon jala puji hamu ma Tuhan i di bagasan rohamuna!

R   :  Manongtong ma hamu mandok mauliate siala saluhutna tu Debata Ama, di bagasan Goar ni Tuhanta Jesus Kristus!

U   :   Masioloan ma hamu sian biar ni rohamuna mida Kristus! Ima sahatna. Martua ma angka na tumangihon Hata ni Debata jala na umpeopsa. Amen.

10.     Marende BE No. 443: 1 “DUNG TUHAN JESUS”

v  Dung Tuhan Jesus nampuna au, songgop dameNa, biarhu lao.

Taripar gogo, ngoluNa i, nasa dosangku naung sae do i.

Tabaritahon holongNa i, di dia Tuhan, tudoshon i?

Tuk manumpahi, tarlobi da? Sasada Jesus pinuji ma.

11.     MANGHATINDANGHON HAPORSEAON:

U   :  Tahatindangkon ma haporseaonta i, songon na hinatindangkon ni donganta sahaporseaon di sandok portibi on. Rap ma hita mandok:

R    :  Ahu Porsea…..

12.       Marende BE No. 428: 1   “HO NA LOJA HO NA SORAT”

v  Ho na loja, ho na sorat, pos roham di Debatam.

Di na hansit, di na borat, dipapita do roham.

Unang ganggu rohamuna di pandok ni Debatam.

PasautonNa bagabaga, pos roham di Debatam.

13.       TANGIANG PANGONDIANON:

14.       Marende BE No. 428: 3   “HO NA LOJA HO NA SORAT”

v  Ala ni padao arsakmu, hot ma tiop Tuhanmi.

Tu na denggan do ditogu saluhut na masa i.

Unang ganggu rohamuna di pandok ni Debatam.

PasautonNa bagabaga, pos roham di Debatam.

15.       JAMITA:

“MAROLOPOLOP MA TU DEBATA”

(1 Kronika 16: 31 – 36) 

Dongan sahaporseaon dibagasan goar ni Tuhanta Jesus!

Godang do alasan ni jolma laho marolopolop dibagasan dirina. Isara ni dakdanak, ingkon marolopolop jala mariaria do ibana siala dapotan silehonlehon sian natorasna, dungi ala ni rangking 1 ibana di kelas, dungi muse ala dapot juara ibana di Olimpiade, dlna. Molo halak na matoras (dewasa) pe,  ingkon marolopolop jala mariaria do ibana ala dapotsa panen na godang, dungi gelar, pangkat, kedudukan, pangomoan na balga naung jinalona, penghargaan siala ni prestasi naung di dapot. Dlna. Sada hal na wajar do i molo marolopolop jala marlas ni roha hita di tingki na normal. Alai nuaeng boha do kenyataan siadopanta di tingki on? Boi dope hita marolopolop jala mariaria di tingki na dangol on siala ni Pandemi Covid-19 na mambahen susa jala gok angka korban lobian sian 200 negara? Maol situtu do i tahilala angka donganhu! Nunga lobi sabulan lelengna portibion dibagasan parsahiton. Jala tubu ma angka hadangolon, biar dohot lomos ni roha, mandele, galau, jenuh jala bosan. Na pasti ndang adong suasana roha na marolopolop disi. 

Antong molo songon i, hamu angka donganhu, boha do Huria ni Kristus i manjou hita asa marolopolop jala mariaria di bagasan hagogotan jala hadongolon sinuaeng?  Hata ni Debata mamanghulingi hita di Minggu on: mangarahon hita, ruas ni Tuhan i, asa marolopolop tu Debata. Ndada holan angka jolma alai dohot do angka langit dohot sude pangisi di tano on nang angka hau na di tombak mamuji jala marolopolop di adopan ni Debata. On ma gombaran ni Debata na hadir di sude angka na tinompaNa. Di masa ni Raja David hatiha i, mansai balga do peran ni Debata marmudumudu Bangso Israel di na laho papindahon Poti Parpadanan ni Jahowa i mulak tu Jerusalem. Ai sanga do ia poti i ditaban halak Filistin hatiha i sadia gok lelengna. Tontu ndada hal na mura boi direbut kembali Poti Parpadanan i, mansai gumogo jala berjuang do si David laho pataluhon halak Filistin i. jala di ujungna, marhite hagogoon ni Debata boi do tarpalua Poti Parpadanan i sian tangan ni halak Filistin jala diboan ma i mulak tu Jerusalem (1 Tawarikh 1:26). Marhite pambahenan ni Debata siala boi mulak poti parpadanan i tu Bagas Joro ni Jerusalem, patut do mandok mauliate bangso i tu Debata, jala marolopolop, mariaria huhut marlas ni roha do Bangso i, marhite pujipujian nang angka tortor dipasahat tu Debata. On ma pengalaman na mansai arga rap dohot Debata. Jala marhite perjuangan iman na luar biasa ni adopan ni Bangso Israel, ndada lupa nasida tu Jahowa siala pambahenan-Na na balga i.

Hamu angka dongan na hinaholongan ni Tuhan Jesus! Aha do na boi putihonta marhite turpukta sadarion?

1. Mandok mauliate ma ngolunta on tu Debata ala Holong-Na na so halompoan i.

Godang tongon pambahenan ni Debata na boi masa di ngolunta sahat tu tingki on. I ma Holong-Na na balga i tu hita. Taingot dope balga ni HolongNa i? Manang gabe ndang margogo hita marningot Ibana siala pandemi Covid-19 on na gabe pergumulan na balga di ngolunta? Tutu sada pergumulan na bahat do Pandemi on na gabe mambahen ngolu haporseaonta lomos, mabiar, jala ganggu roha maradophon huaso ni Debata marhite sungkunsungkun na tubu di rohanta: “Adong dope pangurupion ni Debata di tingkinta si saonari on? Marhite turpukta on, ingkon taingot tongtong Holong ni Roha ni Debata na mansai balga marhite Anak-Na Jesus Kristus, na olo manaon hamatean sahat tu na targantung di Hau Pinarsilang i, asa dapotan haluaon na manongtong hita marhite haheheonNa i. Ipe tapestahon di Pesta Paskah.

Alani i patut do ingkon mandok mauliate hita siala Balga ni Holong-Na dohot Denggan ni Basa-Na i (Ay. 34 “Mandok mauliate ma hamu di Jahowa, ai na basa do ibana, ai ro di saleleng ni lelengna do asi ni rohana”). Molo mandok mauliate manang bersyukur hita di ngolunta on, ndada holan di tingki sonang manang ditingki las ni roha, alai mandok mauliate ma hita di tingki mangadopi parungkilon nang sitaonon. Ido umbahen na didok di 1 Tes 5:18 “Mandok mauliate ma hamu siala saluhutna” (Indonesia: mengucap syukurlah dalam segala hal) Boasa? Ala marhite keadaanta na dangol jala susa on, boi tadapot jala taputihi angka hal-hal na positif di ngolunta. Isarana, ditogihon hita asa mangolu dibagasan hahipason, ias dirinta, mangula jala marsaor di tonga ni bagasta be laho menghargai keselamatan, dlna.

2. Ringkot do hita marolopolop alani Pambahenan ni Debata naung Paluahon hita.

Songon goar ni Minggunta sadarion: Jubilate na marlapatan: Marolopolop tu Debata ma sandok tano on. Songon Bangso Israel na marende, marolopolop mamuji Jahowa siala panarihonon ni Jahowa tu bangsoNa, suang songoni ma hita marolopolop tu Jahowa. Sada Parjamita di Inggris Hatiha i na margoar Charles H Spuergon mandok: “ketika kita hendak memulai suatu hari, jadikanlah pikiranmu sebagai mazmur, doamu sebagai dupa, dan nafasmu sebagai pujian.” Songon i ma nang hita, na ingkon olo tapangke pingkiranta songon ende psalmen, dungi tangiangtai gabe pelean na hushus di adopan-Na, jala hosanta tongtong mamuji pasangaphon Ibana. Molo taulahon na sisongoni pasti do hita margogo mangadopi pandemi Covid-19 on sahat di ujungna.

3. Marpanindangion.

Songon Angka panompaon ni Debata: langit dohot tano na marlas ni roha; laut ro di isina marhasakhasak, ladang dohot sude angka hau na di tombak marolopolop manghatindanghon Balga ni HolongNa i. Suang songon i nang hita, Ruas naung Tinobus ni Kristus ingkon rade manghatindanghon Balga ni HuasoNa dohot HolongNa i marhite parange ni ngolunta. Bapak Reformator ni Huria na Margoar Martin Luther mandok: Allah menulis firmanNya tidak hanya di Alkitab tetapi juga di pohon-pohon, bunga-bunga, awan dan binatang-binatang. Lapatanna disi, sude nasa na tinompa manghatindanghon Huaso ni Debata na manompa ibana. Sada sungkunsungkun tu hita nang tu ahu sandiri: Olo do hita manghatindanghon Debata di tongatonga ni Parungkilonta na dokdok jala borat na taadopi nuaeng? Di tongatonga ni Pandemi Covid-19 naung godang mangallang angka korban nang patubuhon hasusaan olo dope hita manghatindanghon Huaso ni Debatanta i? PASTI KITA BISA! Boi do hita manghatindanghonsa! Boi do tahatindanghon Debata na burju i, Debata Sipangapul roha i, Debata na Mangaramoti, jala Debata na marhuaso di tongatonga ni ngolunta sahat ro di ujungna.

Antong, Donganku na hinaholongan! Mar-Jubilate ma hita di sude keadaan, di siala saluhutna i. Nang pe las rohanta manang jut pe rohanta, tongtong ma hita patuduhon Jubilate i; ala HolongNa naso halompoan i.  Amen.

Pdt. Dr. Anna Ch. Vera Pangaribuan

Kepala Depatemen Marturia HKBP

16.       Marende BE No. 213: 1, 4 “DUNG SONANG ROHANGKU” ( Pelean I tu Huria; Pelean II tu Hatopan)

v  Dung sonang rohangku, dibaen Jesus I,

Porsuk pe hutaon dison.

Na pos do rohangku di Tuhanta i,

Dipasonang tongtong rohangkon.

Sonang do, sonang do, di pasonang tongtong rohangkon.

v  Mangolu nang mate di Jesus do au,

Ibana haporusanhi.

HataNa sambing do partogi di au,

ai na tau haposanhu do i.

Sonang do, sonang do, dipasonang tongtong rohangkon.

17.       PANGUJUNGI:

U    :   Marolopolop ma hamu tu Debata, ai nunga dipasupasu Jahowa, Debatam ho di saluhut ulaon ni tanganmu. Ibana do manarihon ho saleleng mardalan di halongonan na bolon.

R    :   Marhaposan tu asi ni rohani Debata do ahu, ingkon  marolopolop rohangku mida pangurupiNa.

U    :   Dipargogoi TondiNa do hita saluhutna, tung pe sahat tu tungki on dibagasan parungkilon sandok portibi on alani mara Covid-19, asa dibagasan haporseaon na togu do hita mandok : Ida ma, on do Debatanta, na itahaposi, na mangurupi hita, dison do Jahowa na itahaposi. Marolopolop ma hita jala marlas ni roha mida hatuaonNa i.

R    :   Sai jalo ma olopolopnami on ale Debata, gabe pelean na hushus di adopanMu, ala AnakMu, Tuhan Jesus Kristus, Tuhannami.

R    :   (Mangendehon) BE No. 772: 3 “TUHANHU DO PATURE DALANHI”

v  Tuhanhu do pature dalanhi,

Tuhanhu do patiur langkangki.

Hupasahat diringki tu tangan ni Tuhanhi.

Tuhanhu do patiur langkangki.

U   :  Tatangianghon ma peleanta: Ale Debata, Amanami na di banua ginjang, Ho do haroroan ni saluhut silehonlehon na denggan dohot nasa ulibasa na mauliutus. Hupasahat hami ma sian na nilehonMi tu hami, peleannami tu Ho. Sai jalo ma i gabe uap na hushus di joloM. Pasupasu ma i jala ramoti asa huparhaseang hami pelean on, patimbulhon harajaonMu di tongatonga ni huriaM dohot di portibi on. Buhai ma rohanami marhitehite TondiM, asa lam hutanda hami godang ni silehonlehonMi tu hami, asa lam girgir hami mandok mauliate tu Ho, marhitehite Jesus Kristus Tuhannami. AMEN

R    :  (Mangendehon) BE No. 204 : 2 “Ndang Tadingkononhu Ho”

v Nasa na nilehonMi, tondi ro di pamatanghu.

Hosa dohot gogongki, ro di saluhut artanghu.

Hupasahat i tu Ho, na so unsatonhu do.

U   :  Ale Amanami na di banua ginajang! Sai pinarbadia ma GoarMu! Sai ro ma harajaonMu! Sai saut ma lomo ni rohaM di banua tonga on songon na di banua ginjang! Lehon ma tu hami sadari on hangoluan siapari! Sesa ma dosanami songon panesanami di dosa ni dongan na mardosa tu hami! Unang hami togihon tu pangunjunan! Palua ma hami sian pangago!

R   :  (Mangendehon):

         Ai Ho do nampuna harajaon dohot hagogoon ro di hasangapon saleleng ni lelengna. Amen!

U   :  Pasupasu ! (Parhalado Partohonan).

R   :  (Mangendehon) Amen, Amen, Amen.