(25). TATA IBADAH PARTANGIANGAN KELUARGA - RABU, 29 APRIL 2020

PARTORDING PARTANGIANGAN KELUARGA/SEKTOR (KHUSUS)

MENYIKAPI SITUASI “PHYSICAL DISTANCING” MEMBERANTAS PENYEBARAN CORONAVIRUS DISEASES – 19 (COVID – 19)

DI HKBP PETUARAN RESSORT PERBAUNGAN

RABU, 29 APRIL 2020                   PUKUL 19:30 WIB

P A N G A R A D E O N

ü  Paradehon Buku Ende, Bibel,  tarlumobi roha di bagasan haporseaon di Tuhan Jesus Kristus

01. MARENDE : BE. HKBP. NO. 557 : 1 – 2   “DAO DUMENGGAN”                 

         1.   Dao dumenggan, asi ni rohaM. Dao ummarga sian ngolungkon.

                Sai pujionku ma Ho Tuhanku, Dao ummarga, asi ni rohaM.

      2.    Ala goarMu ro do au tu Ho, Herbang tanganhu lao mamuji Ho,

Dao ummarga sian ngolungku, Dao dumenggan asi ni rohaM.

02.  VOTUM – INTROITUS - TANGIANG

P:     Marhitehite Goar ni Debata Ama, dohot Goar ni AnakNa Tuhan Jesus Kristus, dohot Goar ni Tondi Parbadia na tumompa langit dohot tano on. Amen.

K:     Amen.

P:     Marolopolop tu Debata ma ho, ale sandok tano on ! Endehon hamu ma hamuliaon ni GoarNa marmulia bahen hamu pujipujianNa. Dok hamu mandok Debata : Tung na songkal do angka pambahenanMu ! Binahen ni hinatimbul ni gogoM ingkon marsomba tu Ho angka musuM. Haleluya ... ! Martangiang ma hita !  Ale Tuhan Debata, Parasiroha na sumurung ! Didok HataM do, ingkon manaon hami jala mate rap dohot Tuhan Jesus Kristus, asa rap hami dohot Ibana tu hasangapon. Sai parrohai ma hami, asa unduk hami tu lomo ni rohaM jala hot hami di haporseaon na ture asa tongtong mangkirim di haheheon dohot di hasangapon sogot silehononMu tu angka na porsea di Ho. Amen.

03.  MARENDE : BE. HKBP. NO. 435 : 1 - 2    “MAROLOPOLOP TONDINGKI”

1.      Marolopolop tondingki ai  naung  di  tobus Jesus i.

Hamu sude, bege ma i, sai las ro hangku  mandok i.   Sonang ni ting ki i,

Dung jumpang Jesus Tuhanki !  Tondi na manga ja ri au,  tarbaen marlas

Ni ro ha au ! Sonang ni tingki i, dung jumpang Jesus Tuhanki.

  2.    Dihaol holongna rohangki, tung na so boi be mago i.

MataNa do manatap au, pinggolNa tumangihon au. Sonang ni ting ki i,

Dung jumpang Jesus Tuhanki !  Tondi na manga ja ri au,  tarbaen marlas

Ni ro ha au ! Sonang ni tingki i, dung jumpang Jesus Tuhanki.

04.  EPISTEL :                 1 Kronika 16 : 31 – 36

P:     Turpuk Epistel di partangianganta di bodari on tarsurat di 1 Kronika 16 : 31 – 36, tajaha ma marsingkat sorin, Ingkon marlas ni roha ma antong angka langit, jala marolopolop tano on, jala paboaboa hamu ma di tongatonga ni angka parbegu, Jahowa do Raja!

K:     Marhasakhasak ma laut i ro di isina! Marolopolop ma ladang i ro di nasa na disini!

P:     Marolopolop ma disi sude angka hau di tombak di adopan ni Jahowa, ai nunga ro Ibana laho manguhum tano on.

K:     Mandok mauliate ma hamu di Jahowa, ai na basa do ibana, ai ro di saleleng ni lelengna do asi ni rohana i.

P:     Jala dok hamu ma: Tumpahi ma hami, ale Debata ni hatuaonnami, jala papungu, jala palua hami sian angka bangso parbegu, asa hupuji Goarmu na badia i jala martanggulhon pujipujianmi hami.

K:     Pinuji ma Jahowa, Debata ni Israel, sian na saingan sahat ro di salelenglelengna, jala rim bangso i mandok: Amen! Jala pujipujian di Jahowa!

P:     Ima sahatna. Martua do angka na tumangihon Hata ni Debata dohot na umpeopsa. Amen.

05. MARENDE : BE. HKBP. NO. 565 : 1           “LAS ROHANGKU LAO MAMUJI”

   1.   Las rohangku lao mamuji Debata Parholong i,

Songon bunga na mangerbang di na binsar ari i.

Arsak, dosa, haporsuhon mago dibaen asiMi.

Las ni roha na manongtong lehon di au Tuhanki.

06. JAMITA : Epesus 5 : 15 – 21

Hita na hinaholongan ni Tuhanta Jesus Kristus. Sian hurungan do disurathon apostel Paulus surat in tu huria Epesus. On ma sada “karangan manusia yang paling hebat” ala marisihon pamikirion na mansai bagas jala uli taringot tu ngolu parugamoon dohot poda hakristenon. Jala godang do hadosanna dohot surat Kolosse. Sada sangkap ni si Paulus manurathon surat on, tarlobi di turpuk on, ima asa lam tarida hatandion (keunggulan) ni ruas ni Epesus songon siihuthon Kristus sian halak na asing. Ai ruas ni huria Epesus ima na ro sian ugamo na so Jahudi, na so marsunat, na so masuk tu golongan Israel (Epesus 2:11-12). Jala mangolu do nasida di tongatonga ni masyarakat Epesus na gok haholomon. Alani i, di turpuk on, tarlobi di sude bindau 5 on, dihirim si Paulus do asa diradoti nasida pangalaho na boi manirai, mempengaruhi masyarakat ni Epesus, asa malua sian haholomonna i. Unang ma adong nasida na dipengaruhi hagolapon ni Epesus (5:11). Ima nian nang siradotanta. Ingkon gabe sira dohot panondang do hita di tonga ni masyarakat na so saugamo dohot hita, nang di masyarakat na lumlam, asa hita ma na manirai, manondangi, mengubah masyarakat i asa gabe marpangalaho songon Tuhan Jesus. Unang ma hita olo dipengaruhi angka i. Hita na hinaholongan ni Tuhanta Jesus Kristus. Asa dapot i, aha ma sibahenonta ? Taguruhon ma sian turpuk on :

1)     Ingkon gabe halak na marroha (arif) hita. Na marroha nidokna dison, ima na olo manangkasi dengan seksama (bhs. Yunani : akribos = benar, akurat, konsisten, dan sempurna) angka parulanna (perilaku). Ima halak na mangaradoti sude parulanna secera benar, akurat, konsisten dan sempurna. Na tangkas mamingkiri, manat mambuat haputusan laho mamillit jala mangulahon parulan na tingkos. Na olo torus mengevaluasi diri marhite panangkasion diri na jujur jala obyektip di jolo ni Debata dohot di dirina sandiri, dung i secara sadar olo paubahon na hurang denggan jala olo pahembanghon parulan na denggan. Alat evaluasi na dumenggan ima marhite na burju manangkasi Hata ni Debata, ai Hata ni Debata do na boi pature dirinta (2 Timoteus 3:16-17). Ima mambahen hita lam dewasa di parulan, mambahen hita gabe lam tudos ma hita tu Kristus. Alai halak na so marroha (orang bebal), ima na sembrono, paloashon dirina paihutihut na so hasea, olo terbawa arus, tidak punya pendirian, ala ndang olo manangkasi diri secara seksama (Jakobus 1:23-24). Dibege do nian Hata ni Debata alai ndang diulahon.

2)     Parhaseang ma tingki (ay. 16). Adong do na menterjamhkan on : Boronglah setiap kesempatan (momen – kairos). Kesempatan tidak datang dua kali, ninna umpasa ni sileban. Hape, ari na jahat do nuaeng on. Alani i, ingkon pakeonta do ganup tingki, kesempatan na adong laho padengganhon parulanta, meingkatkan iman percaya kita. Lihatlah setiap hari merupakan kesempatan bagimu, baik itu waktu sedih atau gembira, rugi atau untung, gagal atau berhasil sebagai kesempatan dari Tuhan untuk mendewasakan imanmu, sehingga kejahatan zaman ini tidak mengalahkanmu ; justru kita yang harus mengalahkannya dengan menggunakannya sebagai kesempatan.

3)     Gabe halak na marroha ma hita, ima na manangkasi dia lomo ni roha ni Tuhan i songon nidokna di ay. 17. Domu dope i tu ay. 16 i. Di zaman na jahat on, siluluanta ima lomo ni roha ni Debata, asa i taula. I do tatangianghon di Tangiang Ale Amanami, “Sai saut ma lomo ni rohaM”. I do halak na marroha, yaitu orang yang tahu apa kehendak Allah yang sepatutnya dan seharusnya dilakukannya, dan menggunakan semua kesempatan untuk melakukannya.

4)     Unang gohi dirim dohot tuak anggur, ai halak na oto do i (ay. 18). Halak na so marroha do halak na so umboto jala na so parduli tu lomo ni roha ni Tuhan i, dung i dipaihutihut ma hisap, hagiot dohot na masa di zaman on. Alai, sabalikna, gohi ma dirim dohot Tondi Parbadia (ay. 18b). Ai na marroha, ima na manggohi dirina dohot Tondi Parbadia. Orang-orang yang bukan Kristen merasa bahagia kalau dia memenuhi dirinya dengan minuman anggur yang memabukkan dan kenikmatan duniawi. Tetapi orang Kristen bahagia bila memenuhi dirinya dengan Roh Kudus.

5)     Ringgas marende (ay. 19) marhite ende psalmen, pujipujian dohot ende partondion. Ima marJubilate mangendehon hamonangan ni Tuhan Jesus sian nasa roha. Jala dung i, ingkon manongtong mandok mauliate tu Debata ala ni saluhutna (ay. 20), ala tung halongangan do sude pambahenan ni Debata tarlobi ma haluaonta naung pinarade ni Tuhan Jesus.

         Hita na hinaholongan ni Tuhanta Jesus Kristus. Dia ma na boi mangurupi jala patoguhon haporseaonta sian Barita na Uli di partangiangan bodari on, tarlumobi di na taadopi dope di partingkian on ima situasi na borat jala na so lazim on ? Tutu, molo di hurianta HKBP Adolina nunga tolupulu dua ari (32 ari) ma hita na sai berKebaktian holan di jabunta be. Nunga torop hita angka ruas na sai manghasiholi (merindukan) marpungu di bagas joro ni Tuhanta i. Tutu, nunga tung mansai ‘bosan’ hita holan mangula angka siulaonta di bagasta be. Jala sai ro parungkilonta molo naeng marsaor dohot dongan di humaliangta ala mabiar atik beha na dohot do hita gabe ‘terpapar’ Covid 19 on. Torop do ma mandok “pola ma hita mabiar jala mangulahon situasi na songon on nuaeng, ai di wilayahta so pola merebak Covid 19 on”, jadi nunga boi hita patupahon ngolu na somal (normal) be. Alani, dohonon ni Hata ni Debata ma tu hita laho paingothon jala tongtong mangajari hita songon siihuthon Kristus, asa hita pe parsidohot ma mendukung pemberantasan mata rantai penyebaran Covid 19 on. Ido dalanta patuduhon songon halak na porsea hita na marparulaon na denggan songon angka na marroha hita. Parsidohot ma hita mamboan hangoluan tu angka dongan na di humaliangta. Songon halak naung manjalo hangoluan na sian Tuhan i hita, hita pe tongtong ma mamboan hangoluan tu torop halak. Sai diramoti jala dipasupasu Tuhan Jesus Kristus ma hita di situasi na taadopi dope di tingki on. Amen.

07. MARENDE : BE. HKBP. NO. 574 : 1 – 2   “PUJI MA DEBATA”

1.  Puji ma puji ma Debata, na ni ainNa do umpuji Debata. Nunga sesa dosami,

     malum do hot rohami. Puji ma puji ma Debata  na ni ainNa do umpuji Debata

2.  Olophon-olophon Tuhan i, Hatindangkon denggan ni basaNa i,  Sai arahon donganmi, ro tu sipalua i, Olophon-olophon Tuhan i, Hatindangkon ma denggan basaNa i,

08.  TANGIANG PANGONDIANON

09.  MARENDE : BE. HKBP. NO. 453 : 1 - ...             “SADA GOAR NA UMULI” 

1.      Sada goar na umuli sian nasa goar i, goar ni Tuhanta Jesus, i do na umuli i, goarMi, Tuhanki, holan i do endengki, goarMi, Jesuski do pamalum rohangki.

2.      Tung  na malum do rohangku, nunga sonang tondingki,

GoarMi do sinjatangku dompak angka musu i. GoarMi……….

10.  TANGIANG PELEAN, ALE AMANAMI, PASUPASUPASU, ENDE PANGUJUNGI

P:     Tatangianghon ma peleanta, martangiang ma hita. Ale Debata, Amanami na di banua ginjang, Ho do haroroan ni saluhut silehonlehon na denggan dohot nasa ulibasa na mauliutus. Hupasahat hami ma sian na nilehonMi tu hami, peleannami tu Ho. Sai jalo ma i gabe uap na hushus di joloM. Pasupasu ma i jala ramoti asa huparhaseang hami pelean on, patimbulhon harajaonMu di tongatonga ni HuriaM dohot di portibi on. Buhai ma rohanami marhitehite TondiM, asa lam hutanda hami godang ni silehonlehonMi tu hami, asa lam girgir hami mandok mauliate tu Ho, marhitehite Jesus Kristus Tuhannami. Amen. Rap ma hita mandok di Tangiang Ale Amanami ... (Molo parhalado partohononan jumolo ma mandok Tangiang Pasupasu). Alai molo ndang langsung ma mangendehon :

K:     (MANGENDEHON) BE. HKBP. NO. 36 : 3 “PASUPASU HAMI”

3) Amen hudok hami, ale Tuhannami ; na marasi roha i, sangap ma di goarMi.