(23). TATA IBADAH PARTANGIANGAN KELUARGA - RABU, 22 APRIL 2020

PARTORDING PARTANGIANGAN KELUARGA/SEKTOR (KHUSUS)

MENYIKAPI SITUASI “PHYSICAL DISTANCING” MEMBERANTAS PENYEBARAN CORONAVIRUS DISEASES – 19 (COVID – 19)

HKBP PETUARAN RESSORT PERBAUNGAN

RABU, 22 APRIL 2020                   PUKUL 19:30 WIB 

P A N G A R A D E O N

ü  Paradehon Buku Ende, Bibel,  tarlumobi roha di bagasan haporseaon di Tuhan Jesus Kristus

01. MARENDE : BE. HKBP. NO. 10 : 1 – 2      “HUPUJI HUPASANGAP HO”    

1.  Hupuji, hupasangap Ho, Amang pardenggan basa.

     Ai jadijadianMu do sude, angka na masa.

     Ditompa Ho do sasude, dagingku ro di tondi pe,  pinuji ma goarMu.

2.  Saluhut na tinompaMi naeng sonang di rohaMu ;

     Arian dohot borngin pe disarihon rohaMu

     Nang uhum di gomgomanMi, na tigor, na sintong do i, pinuji ma goarMu.

02.  VOTUM – INTROITUS - TANGIANG

P   :        Marhitehite Goar ni Debata Ama, dohot Goar ni AnakNa Tuhan Jesus Kristus, dohot Goar ni Tondi Parbadia.

K: Amen.

P   :        Gok asi ni roha ni Jahowa do tano on. Marhitehite Hata ni Jahowa do manjadi angka langit. Marolopolop ma hamu, ale angka partigor, mangasahon Jahowa, talup do marende angka na unjur marroha. Haleluya ... ! Martangiang ma hita !  Ale Tuhan Debata ! Suru ma Tondi Parbadia tu rohanami, asa tarapul situtu rohanami marhitehite haheheon ni anakMu, Tuhan Jesus Kristus, jala asa lam ganda haporseaonnami marhitehite panghirimon na mangolu, asa tongtong huingot hami, na hehe do hami muse sian na mate songon Tuhan Jesus Kristus, Tuhannami, naung hehe sian na mate i. Amen.

03.  MARENDE : BE. HKBP. NO. 755 : 1 + 3   “HAPOSAN HO TUHAN”   

1.   Haposan Ho Tuhan hot do holongMu, Di las ni roha tingki arsak pe

 Asi ni rohaMi nang pambaenanMu, Ho Sipalua pangondingan pe.

      Haposan Ho Tuhan haposa Ho Tuhan, Ndang na mansohot asi ni rohaM

      Nasa na ringkot di au di parade, Tung ala ni asiM do I sude.

3.   Di rade Ho do dame na manongtong, Di togu Ho do au di dalanki

Marlas ni roha au marpanghirimon. Jala margogo ala basaMi

Haposan Ho Tuhan ………

04.  EPISTEL :                                 Rom 3 : 1 – 8

P   :        Turpuk Epistel di partangianganta di bodari on tarsurat di Rom 3 : 1 – 8, tajaha ma marsingkat sorin, Asa dia nama hasurungan ni Jahudi? Tu aha ma hasea parsunatoni?

K:  Sandok godang do i. Parjolo: Hasahatan ni angka pandok ni Debata do nasida.

P:  Ai beha nama, ia so porsea na deba? Tung tarbahen nasida na so porsea i ma manegai haburjuon ni Debata Sihaposan i?

K:  Dao ma i! On do tahe: Parsintong do ia Debata, alai pargabus do nasa jolma, songon na tarsurat i: “Asa pintor ho di angka pandohanmu jala monang di panguhumonmi!”

P:  Alai beha ma dohononta? Ia dipajongjong hageduhonta hatigoran ni Debata, nda na geduk ma Debata, molo dipalalu rimasna? Santabi di Debata!

K:  Dao ma i! Ai aut i, songon dia ma taruhum Debata portibi on?

P:  Alai molo lam timbul hasintongan ni Debata binahen ni gabushu paganda hasangaponna boasa uhumon dope ahu songon pardosa?

K   :        Nda tagonan ma taula na roa, asa ro na denggan, songon pandok ni na deba magarehei hita; songon i do hatanta, ninna. Patut ma antong hona uhum angka sisongon i!

P:  Ima sahatna. Martua do angka na tumangihon Hata ni Debata dohot na umpeopsa. Amen.

05. MARENDE : BE. HKBP. NO. 743 : 1 – 2   “O TUHAN TOGUTOGU MA”

1.      O Tuhan togu-togu ma au, tu dalan lomo ni rohaMi, Raphon Ho sonang mardalan au, nang rahis maol sidalananki, TondiMi baen manggohi au on, Margogoihon au naposoMon,  Pasangap Ho dingolungkon, Paima sahat tu surgo au on.

2.      Panghulingi ma au O Tuhan, Na rade tumangihon hataM, Sai tumpahi ruasMu Tuhan, Na uasan nuaeng di hataM, Sai patau ma au on naposoM, Manjou halak na dao sian Ho, Ro di na so tumanda Ho, Muba gabe pangoloi di Ho.

06. JAMITA : 4 Musa 14 : 17 – 19

Mangantusi Asi ni roha dohot hatigoran ni Debata

                Hita na hinaholongan ni Tuhanta Jesus Kristus. Na mamarmula do turpuk jamitata on sian cara berfikir na negatif. Uju i, disuru si Musa ma 12 halak panghahap (pengintai) tu Kanaan. Sampulu halak sian nasida mamboan barita na negatif, ala cara berfikir na negatif, mandok, mansai uli jala subur do Kanaan i, alai pangisina angka raksasa ; dung i annon, songon sihapor do hita, suda ma hita panganonna (bnd. 13:31-33), ninna nasida. Ima mambahen gabe mangangguhi ma sude Israel, pola dituduh nasida na laho pamatehon nasida do si Musa umbahen diboan nasida haruar sian Misir. “Tumagon ma hami mulak tu Misir”, ninna (ay. 1 – 4). Ima mambahen tarrimas Debata. Didok ma, ingkon rasiphononNa bangso i sude (ay. 12). Boasa ? Ala i ma tanda ketidakpercayaan nasida tu Debata ; hape nunga songon i godangna nian angka tanda halongangan dibahen Debata di jolo ni mata nasida, na seharusnya nunga ingkon mambahen nasida porsea di hagogoon ni Debata. Alai nuaeng, justru marungutungut do nasida, ndang porsea. Penghinaan (panginsahion) tu Debata do sikap na songon i (ay. 11). Uhum ni Debata ma ro tu halak sisongon i. Hape sasintongna, holan piga arinari, sahat nama nasida tu Kanaan. Alai ala ni panginsahion marhite ketidakpercayaan nasida i, ingkon hona uhum ma nasida, ingkon 40 taon nari ma nasida di parhorsihan, paimahon asa jolo mate sude na tubu di Misir disi, asing ni si Josua dohot si Kaleb na berfikir positif.

                Hamu angka dongan ! Tudosan panjoraan manang peringatan ma on tu hita, paboa ketidakpercayaan terhadap Allah akan mendatangkan hukuman dan kesukaran besar bagi kita. Dan cara berfikir negatif hanya akan memperunyam keadaan. Dumenggan ma hita berfikir positif songon si Josua dohot si Kaleb, na porsea situtu di hagogoon ni Debata di situasi na maol, gabe olo ma hita mangoloi na nidok ni si Musa : “Jahowa do marporang humophop hamu, asal hohom hamu” (2 Musa 14:14). I do gabe tarpasupasu nasida na dua, gabe pemimpin besar, manggontihon si Musa. Orang yang berfikir positif akan menjadi pemimpin besar. (Dalam hal ini juga, perlu sekali, gunakanlah kata-kata positif, terhadap dirimu dan orang lain, karena kata-katamu adalah doamu). Alai, hamu angka dongan, tutu situtu ma si Musa pemimpin na luar biasa. Nang pe dibagabagahon Debata, na ibana ma bahenon ni Debata gabe bangso na bolon (ay. 12b), ndang lomo roha ni si Musa disi. Alai, martangiang pangondianon (berdoa syafaat) do ibana mangondihon bangso i tu Jahowa.

                Hamu angka dongan ! Dasorna mangondihon bangso i, ima Hata ni Debata. Ima na pinasahat ni Debata di dolok Horeb, na tarsurat di 2 Musa 34:6-7, “Jadi mamolus ma Jahowa sian adopan ni Musa huhut Ibana joujou: Jahowa, Jahowa do Debata na talup jala na asi roha, lambat tarrimas, jala godang denggan basana dohot habonaronna. Na pahothon denggan basana i pola marriburibu sundut jala marpamuati rohana mida hajahaton, pangalaosion dohot dosa, alai ndang loasonna malua sian uhum anggo halak parsala, sai na luluhononna do hajahaton ni amaama tu angka anakna dohot pahompuna ro di sundut patoluhon dohot paopathon”. Diingot si Musa do habasaron ni Debata tu bangso i, ai tung bangso na tangkang marroha do nasida (2 Musa 34:9). Aia sai rade do Debata manesa dosa dohot hasalaan nasida (ay. 19). I do ala didok si Musa di ay. 18, “Na lambas do roha ni Jahowa jala parasi roha godang, na marpamuati do rohana mida hajahaton dohot pangalaosion”. Jala songon naung taarbis nangkin, di ay. 20 didok Debata do, “Nunga marpamuati rohangKu, ala pangidoanmu”.

                Sian i ma taida, tung pardengganbasa jala tung na balga do asi ni roha ni Debata. Ido sifat ni Debata na luar biasa. Ndang lomo rohaNa mida hamatean ni pardosa, alai hamumulakna do asa mangolu. Jala puncakna, ima di na olo Debata marsuru AnakNa Tuhan Jesus Kristus gabe jolma. Ala holongNa na so halompoan i, diseahon Jesus do dagingNa dohot hosaNa di silang na di Golgata, asa marhite i diparade di hita pardosa on, hasesaan ni dosa. Ai disi ma dituhuk Ibana sude bura ala ni dosa, sahat tu na olo mate, asa ditobus hita sian hamatean i, ai upa tinuhor ni dosa do hamatean. Marhite dagingNa i dipatupa ma pardameanta tu Debata. Lombang na manirang hita tu Debata ala ni dosa i, dijembatani Jesus marhite haheheonNa, diparade ma di hita hangoluan na saleleng ni lelengna i. Ima haluaon na singkop, na boi dapot holan di Jesus Kristus, Tuhanta i, ndada di na asing. Jala dilehon ma i tu hita jolma, ndada marhite ulaon manang parangenta na denggan. Holan marhite asi ni rohaNa sambing do, na tajalo marhite haporseaonta di Tuhan Jesus.

                Ima asi ni roha ni Debata na so tarasam. Ima na ingkon sipaingotingotonta, songon na binahen ni si Musa dison, na mangondihon bangso i ala diingot do asi ni roha ni Debata. I do nang joujou ni Minggu Misericordias Domini, na mandok : “Gok asi ni roha ni Jahowa do tano on” na dienet sian Psalm 33:5b. Molo balga dosanta, unang mandele. Ingot ma, na gok asi ni roha ni Jahowa do tano on. Alai, taingot ma peringatan on : Diuhum Debata do sude angka na tangkang roha, naung paidaida asi ni roha dohot pambahenan ni Debata sian mulai naeng borhat nasida sian parhatobanon Misir sahat tu na masa on di turpuk on. Ima halak na tangkang marroha, na so olo porsea. Alai malua do si Josua dohot si Kaleb, ala porsea do nasida di Debata. Alani i, songon nidok ni si Paulus di 1 Korint 10:6, gabe tudosan panjoraan ma i di hita (contoh bagi kita untuk memperingatkan kita) asa unang adong hita na maniru nasida. Alai maniru si Josua dohot si Kaleb ma.

                Hamu na angka dongan na hinaholongan ni Tuhanta Tuhan Jesus Kristus. Na naeng dohonon ni Hata ni Debata tu tongatonga ni pardalanan ni ngolunta di oombas na parpudi on. Sada pangajaran, singotsingot, poda ma Hata ni Debata tu hita di tingki on, di na taadopi dope situasi na sulit dohot na so lazim on. Ima ala merebaknya Virus Corona 19 sahat tu tingki on. Tutu, dipaingot ma tu hita asa manongtong ma panghirimonta i marhite haporseaonta, sai donganan ni asi ni roha ni Debata do pardalananta mangadopi huhut laho padaohon sian ngolunta be panahit i. Tutu, maol dope antusanta na masa on, alai ingkon do hita managam tongtong di asi ni rohaNa i. Ala nunga digohi asi ni rohaNa i do parngoluonta na sailaon. Molo tung pe di tingki di situasi na mansai borat dope tahilala, alai sai pasahathon ni Debata do tu hita, tu keluarganta, suang songon i tu negaranta on asi ni rohaNa i. Sai diramoti jala dipasupasu ma hita saluhutna. Amen.

07. MARENDE : BE. HKBP. NO. 262 : 4 – 5   “JAHOWA TUHANKI”      

1.  Jahowa Tuhanki  Ho mual ni na denggan, Sitompa sasude Silehon hangoluan

         Sai lehon ma di au Pamatang na hipas. Maringan ma di au Baen roha na ias.

08.  TANGIANG PANGONDIANON

09.  MARENDE : BE. HKBP. NO. 443 : 1 - ...    “DUNG TUHAN JESUS”  (P. Pelean)            

1.   Dung Tuhan Jesus  nampu au,  songgop dame na, biar hu lao, 

      Taripar gogo ngoluna i,  nasa dosangku naung sae do i. Tabari tahon holong-na i. Didia Tuhan, tudoshon i ? Tuk manum pahi, tarlobida ? Sasada Jesus pinujima !

2.   Di Ho ngolungku !  Las rohangki jumolo Jesus siluami.

      PangiringonMu, tolongMu i, mangalo dosa nang rohangki.  Tabaritahon……..

10.  TANGIANG PELEAN, ALE AMANAMI, PASUPASUPASU, ENDE PANGUJUNGI

P   :        Tatangianghon ma peleanta, martangiang ma hita. Ale Debata, Amanami na di banua ginjang, Ho do haroroan ni saluhut silehonlehon na denggan dohot nasa ulibasa na mauliutus. Hupasahat hami ma sian na nilehonMi tu hami, peleannami tu Ho. Sai jalo ma i gabe uap na hushus di joloM. Pasupasu ma i jala ramoti asa huparhaseang hami pelean on, patimbulhon harajaonMu di tongatonga ni HuriaM dohot di portibi on. Buhai ma rohanami marhitehite TondiM, asa lam hutanda hami godang ni silehonlehonMi tu hami, asa lam girgir hami mandok mauliate tu Ho, marhitehite Jesus Kristus Tuhannami. Amen. Rap ma hita mandok di Tangiang Ale Amanami ... (Molo parhalado partohononan jumolo ma mandok Tangiang Pasupasu). Alai molo ndang langsung ma mangendehon :

K   :        (MANGENDEHON) BE. HKBP. NO. 36 : 3 “PASUPASU HAMI”

3) Amen hudok hami, ale Tuhannami ; na marasi roha i, sangap ma di goarMi.