(19). TATA IBADAH PARTANGIANGAN KELUARGA - RABU 15 APRIL 2020

PARTONDING NI ACARA PARTANGIANGAN KELUARGA

 HKBP PETUARAN RESSORT PERBAUNGAN

Rabu, 15 April 2020

Topik : Mauas Do Tondingku Tu Debata 

    1.       Marende BE. No. 421 : 1 – 2      “Marsomba au dijoloMon”

v  Marsomba au di joloMon
Ponjot, targogot rohangkon
Dibaen godang ni dosangkon
Sai jangkon dohot au
Sai jangkon ma au on, na ramun diringkon,
Tung pos do rohangki di Ho, Dijangkon Ho au on

v  Ndang haurupan au au on
Na busuk nama rohangkon
Alai hutangkup hataMon
Sai ro ma ho tu Au
Sai jangkon ma au on, na ramun diringkon,
Tung pos do rohangki di Ho, Dijangkon Ho au on

    2.       Tangiang Pamuhai 

    3.       Epistel : Psalmen 42 : 1 - 6

(Turpuk di jaha marsorinsorin, Molo dung sidung dijaha marsorinsorin, ditutup na manguluhon ma mandok : “Ido sahat na. “Martua do na tumangihon Hata ni Debata jala na umpeopsa. Amen”)

    4.       Marende BE. No. 772 : 1             “Tu JoloMi Tuhanku”

v  Tuhan hu do pature dalanhi,

Tuhan hu do patiur langkang ki.

Sian na sa rohangki hupasahat ngolungki,

Tuhan hu do patiur Langkang ki. 

    5.       Jamita : 1 Petrus 5 : 1 - 5

(Dibuhai ma marhite Tangiang, Dungi dijaha ma Turpuk Jamita laos diuduti ma tu Hatorangan ni Jamita” 

TURPUK ; 1 Petrus 2 : 1 - 5

Songon Posoposo na imbaru tubu, uasan ma di susu na tama, na so marlaok, asa lam magodang hamu.

1.       Syalom,( Taparade ma jo bibelta be, tabuka sijahaon di panimpuli ni jamita on; 5 Musa 6 : 4 – 9; Roma 10 : 17 ).  Selamat Paskah ma di hita sasudena.  Boasa nibonaan pandohan ni iba dohot hata Selamat Paskah, amang dohot hamu inang ?  Di sada sisi; Adong do 2 hata na dipangke halak Kristen na parjolo ganup pajumpang dohot angka dongan sahaporseaon, ima Hata manang pandohan Selamat Paskah; dohot hata IKTUS = GABAR IKAN.        Hata IKTUS na dipajempek sian kalimat; Yesus Kristus, Theos = Tuhan (tuan ), Um = umat, manusia, Sother = Selamat, penyelamat.  Ala songon i do hasomalan ni halak Kristen na parjolo sahali, ai ganup pajumpang na sada maradophon dongan, sai ganup do nasida mandok; selamat Paskah ma di hita. Molo di alusi dongan i dohot hata Selamat Paskah, tarida ma di parjumpangan i, na rap sisada haporseaon dohot sisada panindangion do nasida na pajumpang i.  Molo ndang hata Selamat Paskah didok diparjumpangan i, didok nasida ma IKTUS, ia so i, dipatuduhon mainan ni kalung na margombaran ikan, di balos dongan i ma molo adong gambar ni ikan ditiop dongan na pajumpang i, dipatuduhon ma i. Molo ndang adong gambar ni ikan di ibana jala ndang direspon gambar ni ikan i, naso si sada haporseaon ma i, ndang pola hansit roha ni na so mameop gambar ni ikan i, alai mamoto ma na mameop gambar ni ikan i, naso dongon sahaporseaon do dongan na pajumpang i.  Di sisi na asing, na rap marningot jala rap manghatindanghon do nasida di Tuhan Jesus naung mate jala mulak mangolu, naung patuduhon diriNa naung mulak mangolu i, jala nungnga manaek tu hasangaponNa tu Ama i. Panindangion na songon i do di nasida mambahen lam magodang, lam matoras haporseaon nasida tu Tuhan Jesus naung mate jala naung mulak mangolu i. Alai molo lam sai dipaingotingot halak Kristen i Hamamate dohot Haheheon ni Tuhan Jesus, lam magodang, lam matoras ma haporseaon nasida (Roma 10 : 17 ).

2.       Di hamu amang dohot hamu inang dongan sahaposeaon di Tuhan Jesus naung naung mate jala mulak mangolu. Mansai rata dope di parningotanta 2 pesta na bolon na sai ingkon patupaon ni huria na parjolo sahat tu partingkianta saonari; ima Pesta Jumat Na Badia, Jumat Agung; Parningotan di haluaon naung pinatupa ni Debata, paluahon bangsoNa bangso Israel i (1 Musa 12 : 9 – 13); Mangan birubiru Paskah ni Jahowa di borngin parpudi andorang so borhat sian Mesir, ai di borngin i; Jahowa mambehnrimas tu bangso Misir, alai patupa haluaon tu bangso Israel). Sipanganon Paskah i do na pinasingkop ni Tuhan Jesus di na rap marsipanganon dohot siseanNa di borngin parpudi andorang so tartangkap, dipusa Tuhan Jesus (Matius 26 : 26 – 29).  Alai dipadomu huria na parjolo i do las ni roha na jumpang di Jumat na Badia i tu Pesta Haheheon ni Tuhan Jesus sogon naung pinatujolo ni Tuhan Jesus di boa-boaNa, mate, alai mulak mangolu di ari patoluhon. Ari Jumat na Badia i, patuduhon holong ni roha ni Debata, manobus hita jolma sian uhum ala ni dosanta, alai marhite i do angka na porsea tu Jesus i, taruli haluaon sian dosa, sian rimas ni Debata, taruli tu status na parjolo ima Imagodey (rupa dohot pangalaho na sian Debata). Dipasingkop Tuhan Jesus haluaon i, di na mulak mangolu Jesus i sian hamatean, sian banua toru, na manogu siseanNa, manogu hita tu panindangion; naso sihabiaran be hamatean pardagingon parsatongkianan i. 

3.       Panindangion na di point parjolo dohot paduahon i do na sai pinagomos ni angka Apostel i, tu huria angka na di bagasan pangaleleion sian parugamo Jahudi, pangaleleion sian angka panggomgomi ni halak Rom. Boasa ingkon di lelei, jala torop angka halak Kristen i na tarbunu (umpamana, Si Stepanus dna; Ul. Ap. 7 : 54 – 60). Sanga do dohot Si Saulus pangalelei, patupa pamunuon tu halak Kristen i (Ul. Ap. 5 – 8). Lam hona lelean, lam marserak do ruas ni huria, alai di inganan parserahan i do nasida marpanindangion; Kristus nunga mate jala mulak mangolu, manobus hita jolma sian hadosaon. Ai mangula do tondi Parbadia i, mandongani, margogoihon angka ruas ni huria i. Orang Kristen itu, ketika dibabat semakin merambat, semakin dibabat, semakin deras merambat, karena Kristus yang telah mati dan bangkit menyertai mereka. Di angka partingkian na hona lelean i do huria na marserak di Pontus, di Galatia, Kappadokia, Asia na metmet dohot Britania (Inggris, Eropa) di tongos apostel Petrus suraton (jamita on) pamomoshon haporseaon ni huria i. Diida apostel Petrus do parngoluon ni huria i, songon huria na imbaru tubu marpanindangion di hamamate dohot haheheon ni Jesus, alai pintor mangadopi pangaleleion, sian angka na so olo manangihon hamamate dohot haheheon ni Jesus. Songon i do nigombarhon ni minggu Pesta Paskah na mansai jonok tu minggu Quasimodogenity = Songon poso-poso na imbaru tubu (i1 Petrus 2 : 2 i). Imbaru dope panindangionta tu hamamate dohot haheheon ni Jesus i, ingkon ganup ari do hatindanghononta Kristus nungnga mate jala mulak mangolu Paskah. Alai panindangion i asa lam matoras, ingkon sai tongtong do hita manohali (manganhon) Hata ni Debata, ingkon ganup ari do hita manangihon Hata ni Debata, asa martua hita (Lukas 11 : 28), ai sian na tumangihon do tubu haporseaon i, ia panangihonon i, sian hata ni Kristus do (tajaha ; Rom 10 : 17).

4.       Alani i adong ma (tolu  point) niondolhon ni apostel Peterus tu halak Kristen na di parserahan i dohot tu hita na patupa partangiangan di ganup jabunta be.

a.     Ala naung tahaporseai jala tahatindanghon Jesus Kristus naung hehe i, tatadinghon ma angka pangalaho hajahaton, na so lomo ni roha ni Debata, alai sai mauas ma hita di hata ni Debata songon poso-poso na imbaru tubui, asa lam magodang haporseaonta. Tung dijabunta be pe hita mandohoti partangiangan di ganup wyik, songon halak Kristen na di parserahan i, lam matoras ma haposeaonta (1 Petrus 2 : 1 – 3).

b.     Tadapothon ma tongtong Jesus i. Tatiru ma Tuhan Jesus i na digombarhon songon batu na binolonghon. Ai sangkap pamatehon do sangkap ni angka Farise, sintua ni malim, angka siboto surat, pola ingkon mate tarsilang, alai hehe do Ibana di ari patoluhon. Hamamate dohot haheheonNa i do ojahan ni panindangion ni halak Kristen na parjolo. Tung songon diape sogo ni roha ni portibion tu halak Kristen na di parserahan i, ala hasetiaon ni huria i tu Jesus i, unang adong ruas ni huria na gabe sumurut di panindangion i, manongtong ma marbenget ni roha, jala patupa na denggan na hombar tu lomo ni roha ni Debata. Unang ma ala ni na mangulahon na jahat gabe manaon na porsuk. Tung ala ni hasatiaon haporseaon tu Jesus i ma asa martua (ay. 4 – 8; 1 Pet. 3 : 14). Ai nungnga jomolo Kristus i mambahen tiruan na denggan di angka na porsea. Unang ma adong sian hita na porseai na patupa partuktuhan, songon angka siulahon hajahaton i, songon angka na olo sumurut i.

c.     Sai taparhatopot ma silehonlehon ni Debata naung manjou hita tu hamalimon na raja, na badia, nampuna ni Debata, asa sai tabaritahon ma pambahenan ni Debata, sian na so bangso ni Debata hian, alai ala haporseaon tu Jesus i, nuang gabe bangso ni Debata. Angka ama , ina, naung tardidi tu bagasan hamamate dohot haheheon ni Jesus, angka naung manghatindanghon haporseaon di huria i, nunga tarjou hita gabe hamalimon na raja di tonga ni bagasta be. Sai tatogutogu ma angka sundut na umposo di tonga ni bagasta be asa sai mauas di  bagasan ajar dohot poda na sian Tuhan i. Ganup ma hita manjaha manghangoluhon 5 Musa 6 : 4 – 9 tajaha be ma jo marganti sorin 2 – 3 hali, Sai mauas ma hita di Hata ni Debata.

Renungan. Adong do sian hita naung songon halak Kristen na di parserahan i, dilelei sian tonga ni huta, gabe agoan bagas, dohot agoan hosaala ni haporseaon tu Jesus i ? Tontu ndang adong dope ra. Nda ingkon patuduhonon ni ama, dohot ina do hadirionna gabe hamalimon na raja, asa baoi tartogu-togu angka anakhon i gabe sai mauas di Hata ni Debata ? Alani i, sai taparinggas ma rohanta tumangihon Hata ni Debata, patupa partangiangan di tonga ni jabunta be. Amen.

    6.       Marende BE. 392: 1 “Sai Pasiat Tuhan Jesus”

v  Sai pasiat Tuhan Jesus tu bagasan rohami
Sai maimaima Jesus, bege panuktukNa i
Sai pasiat Tuhan Jesus, jangkon i tu rohami
Nunga tingki parasian, sotung jolo salpu i

    7.       Tangiang Pangondianon :

    8.       Marende BE. 585: 1….   “Somba ma Jahowa”        (PP)

v  Somba ma Jahowa Debatanta Amen Haleluya Sigomgom langit tano on ro diisi na Amen Haleluya Beta hita lao, marsinggang tu joloNa Amen Haleluya na songkal jala na badia do Jahowa Amen Haleluya endehon Amen haleluya endehon Amen haleluya endehon Amen haleluya endehon Amen haleluya

v  Puji ma Jahowa Debatanta, Amen Haleluya Parasi roha na sumurung do Ibana, Amen Haleluya Taendehon ma goar ni Debatanta, Amen Haleluya Alani denggan ni basaNa tu hita, Amen Haleluya. Endehon; Amen Haleluya, endehon Amen Haleluya Endehon Amen Haleluya, endehon Amen Haleluya. 

    9.       Tangiang Panutup

(Molo Parhalado na Manguluhon, dipatupa ma Tangiang Pelean + Ale Amanami + Pasupasu + Amen 3 X. Molo so Parhalado manguluhon, dipatupa ma Tangiang Ale Amanami Amen 3 x)

“TUHAN MEMBERKATI”