(16). PARTURE ACARA PARMINGGUON DI HAMAMATE TUHAN JESUS KRISTUS

 PARTURENA PARMINGGUON 

DI PARNINGOTAN HAMAMATE NI TUHAN JESUS

HKBP PETUARAN RESSORT PERBAUNGAN

DISTRIK XXIX DELI SERDANG

Ev: Matius  27 : 45 – 56                       Ep: Heber 10: 19 - 29

TOPIK:

Panghophopon ni Jesus na Paluahon

Jumat, 10 April 2020

I.      PARHOBASON:

1.       Marpahean na hohom ma hita na patupahon partangingan on

2.       Diparade hian ma inganan ni pelean.

II. PARMINGGUON: (U = Uluan; K = Keluarga)

JOUJOU TU PARTANGIANGAN:

U  :  Huria ni Tuhanta, nuaeng nunga masuk hita tu Minggu Parningotan Ari Hamamate ni Tuhan Jesus tanda holong ni roha ni Debata na so halompoan tu hita jolma pardosa. Taida ma induk ni haporseaonta na manaon haporsuhon dohot haleaon ala ni hita. Hita hian do na ingkon hona bura ni patik alai sude bura i nunga dituhuk Jesus, Anak ni Debata Parholong roha na so hatudosan,:

K  : ( Mangendehon BE No. 88: 1 -2 )

1.      Jesusku naung manobus ahu sai naeng haholonganku Ho, tu dolok Golgata Ho laho nionjar ni holongMu do. Hupuji nasa asiMialai gumodang holongMi.

2.      Tarsolsol bagi do rohangku paidaida dangolMi, marningot sasude dosangku ai ido na tinaonMi Hupuji nasa asiMi alai gumodang holongMi

U  :  Sude do portibi on nuaeng mangae ala ni Wabah Virus  Corona (Covid 19), alani lam tagomos ma mangidohon asi ni rohaNa topet di pesta Parningotan Ari Hamamte ni Tuhanta jesus Kristus sadari on,   marpungu hita di bagasta  laho martangiang huhut mangido tu Debata Asi Ni rohani Debata asa tumibu malum Portibion . Jahowa do hatuaonta. Ibana ma na mandongani dohot na mangaramoti hita, tu Ibana ma hita marpangunsandean.

K  :  Ale Tuhan Parasiroha na sumurung, pamalum ma portibi on, tangihon ma hami

U  :  Dibagasan serep dohot unduk ni roha tu Debata, marsaor ma hita rap dohot Ibana asa jumpangan las ni roha hita di bagasan Tuhan i. Marende ma hita!

Marende BE No. 77 : 1 + 3  “ Hamu Saluhut Halak ”  BL. 65

v  Hamu saluhut halak, ro ma hamu manatap hangoluaonmu on

Na gantung diparsilang tumahan hamatean, naeng ingotonmu i tongtong

v  Aha do manginona tu Ho Silehon tua di hajolmaon i ?

So dung hea marsala Ho doshon hami jolma, ndang dung dibahen Ho dosa i

01.     Tangiang PAMUHAI:

U  :  Marhitehite goar ni Debata Ama dohot goar ni AnankNa Tuhan Jesus Kristus dohot Goar ni Tondi Porbadia, na tumompa langit dohot tano on, Amen

       Sintua ni Malim sisongoni do na tama di hita, na badia na so jahat, na so marlindang , na so marbolat sian angka pardosa , naung gabe tumimbo sian angka banuaginjang. Na so pola ganup ari songon angka sintua ni malim i mamboan na torop i, ai sahali do i diulahon, di na mamelehon diriNa Ibana, Haleluya.

K  : (Mangendehon): Haleluya, Haleluya, Haleluya

U  :  Martangiang ma hita!  Ale Tuhan Jesus , na mate tarsilang do Ho humonghop hami ! ajari ma hami paingotingot Ho, na targantung di hau na pinarsilang humonghop hami, ai Ho do haporusannami maradophon rimas ni Debata dohot panoruion ni patik dohot panolsolion ni roha. Sai sesa jala urati ma dosa sian rohanami marhitehite tondiM  na badia i, jala pargogoi ma hami maralohon roha sibuk dohot hisaphisap dohot sangkapsangkap ni rohanami laho mangihuthon Ho, na mangolu jala na manggomgomi rap dohot Ama i, dohot Tondi Parbadia ro di saleleng ni lelengna . Amen

02.   Marende B.E. No. 78   O’ ULU NA SAP MUDAR       BL. 158

O ulu na sap mudar  Binaen ni bugangMi  Na sian jangarjangar Sisungsang duri i. O ulu hatongamon Hian do tumpalMi   Ditaon Ho haleaon Ho naeng sombaonki?

03.     Patik : Konfessi HKBP

U:   Tajaha ma Konfessi HKBP di Bindu I ,taringot tu  Debata Anak

Debata Anak, ima Jesus kristus hapataran ni Debata Ama na mangarumari diriNa gabe jolma; natinubuhon ni si Maria, na gabegabean sian Tondi Parbadia andorang so habubuhan. Ibana do Tuhan na humonghop dohot dohot paluahon jolma manisia. Diantoi  Ibana do parsorion ni hajolmaon dohot nasa bangso di sude tingki jala haposan situtu do Ibana sahat ro di saleleng ni lelengna.

K:     Dipalua do jolma manisia sian gomgoman ni sibolis sian parhatobanon ni dosa. Sian uhum alani dosa dohot sian hamagoan nang hamatean, na tumaon na bernit pola mate di hau pinarsilang. Ibana do hagogok ni pelean pardengganan tu Debata si ala dosa ni hajolmaon.

U:      Na tuat do Ibana tu banuatoru dung di tanom, na mulak mangolu di ari patoluhon, na manaek tu surgo, laho hundul tu siamun di Debata  Jahowa Amanai . marhite I do dipatimbo Debata Ibana jala dibasabasahon  goar na sumurung asa nasa goar. Asa somba tu goar ni Jesus nasa ulu ni tot na di banuaginjang I dohot na di tano nang na di toru ni tano.

K:     Sian i do Ibana mangondihon nasa na porsea huhut manggomgomi saluhut, paima mulak sohot tu tanoon, manguhumi na mangolu dohot na mate. Asa nasa soara marhatopothon : “Jesus Kristus do Tuhan, bahen hasangapon ni Debata Ama.

U:      Marhite poda on, taondolhon do na sian tahi ni Debata sitolusada do haroroNa gabe jolma. Hot do Ibana Debata di bagasan hajolmaonNa, jala dipatimbo Debata diriNa di na mulak Ibana tu Debata AmaNa i, dung singkop ulaon haluaon i dipatupa Ibana.  Naung sian mula ni mulana do “ tahi na sun badia I”. angkup nii taondolhon do na huhut Jesus manguhumi nasa hajolmaon, paima ro ujung ni portibi on.

K:     Ta ondolhon do na holan sahali  Jesus tarsilang manghophop jolma i, alani tatulak do poda, na mandok : adong haluaon na asing sian naung pinatupa ni Jesus, na adong dalan na asing mandapothon Debata asing sian Jesus. Na mandok holan panurirang sambing di Jesus, na mangondolhon holan hadebataon manang hajolmaon ni Jesus. Songon i nang poda na mandok boi ulaon  na denggan pinatupa ni jolma manumpahi tu haluaonNa.

U:      Laos tatulak do pangajaran na mandok, na pinarsilangkon do mangulahi Jesus Kristus i, di Ulaon Parpadanan Na Badia. Rap mangido gogo ma hita sian Tuhan Debata.

K:     Ale Tuhan Debata sai Pargogoi ma hami , mangulahon na hombar tu PatikMi. Amen   

04.     Marende BE No. 79 : 1 – 2 “ Di na ponjot rohangku” BL. 124

v  Di naponjot rohangku, binaen ni dosangki, paingot au Tuhanku, di hamamateMi, di hau na pinarsilangi digarar Ho utangku marhite mudarMi

v  Tama longang rohangku mamingkir hata on, Panghophopi Tuhanku di ahu pardosa on, Ai hosa ni AnakNa I dilehon Debantangku, tumobus tondingki.

05.     Manopoti Dosa:

U  : Asa tung Hibul rohanta manolsoli dosanta taingot ma Jesus na tarsilang i. marsipal jala gok haporsuhon Ibana manaon sude dosanta . dileai, ditijuri, dipastapi jala dipartumpalhon sungsang duri tu simanjujungNa. Laos Ibana muse mamorsan hau pinarsilang isian bagas paruhuman i sahat tu Golgata. Lam leleng lam dokdok do silangi dituhuk Tuhani, pola martinggangan Ibana mamorsan. Hansit do i, jala porsuk. Patut do ndang tarpaidaida angka parompuan na paihutihut Tuhan i parniahapan ni Jesus i.

K  : Ale Tuhan, manghilala  do tu rohanami linsinglinsing na manambai ni parniahapanMi. Ndang tartuhuknami silangMi, ndang tarrampas hami linsinglinsing ni soldadu I, gale do hami

U  :  hamu angka parompuan, tung sura sai mangadungi jala tumatangis, ndang tuk i paneangkon sitaonon ni Tuhan i, ai ndanda alani ilumuna jala tangismuna I nenag sitaonon ni Tuhan i , tangihon ma hata ni Tuhan I “ hamu angka boru Jerusalem, unang ma Ahu, tatangisi hamu , dirimuna dohot anakkonmuna ma”

K  :  Ale Tuhan Jesus, Sipalua dosa ni portibi on  hutatangisi hami ma nuaeng dirinami dohot saluhut na masa ditongatonga nami, namarsahit do Portibi na tinompaMi, alani Panahit virus Corona na mambahen godang na marmatean. Hualualuhon hami ma nuaeng tu adopanMu angka dongan nami na marungkil alani parsahiton i.

U  : Ale Tuhan Debata, na sumarihon saluhut jolma nang sude na tinompaMi.  Asi ma rohaM di hami. Palua ma hami sian nasa sahit i . Godang do nang dosa na huula hami maradophon dongannami nang maradophon Ho. Sesa ma dosanami, siala ni angka hagaleon dohot halembaonnami. Sai lam togutogu ma hami di dalan hasintonganMu asa jumpang las ni roha di bagasan Ho marhitehite ngolunami. Amen.

K  : (Mangendehon): BE No. 452: 1 “Na Ro Pandaoni Bolon I” BL. 303

v  Na ro pandaoni bolon i, i ma Tuhanta Jesus

Didaoni na marsahit i, hisar dibahen Jesus.

Uli ni barita i, las ni roha Bolon i

Sai dipuji rohangki, Jesus, Jesus, Jesus.

U  : Bagabaga ni Debata:  Alani pangalaosiontado umbahen na tartulang Kristus, jala binahen ni hajahatonta do Ibana mabugang. Ampe tu Ibana pinsangpinsang parhitean ni hasonanganta, jala binahen ni bugangNa malua itahilala.  Hasangapon ma di Debata na di ginjang!

K : Amen.

06.     Marende B.E. No.194:1-2   AUT SO ASI ROHAM   BL. 62

v  Aut so asi rohaM Aut so godang basaM Tu dia au?

Alai dibaen basaM Dohot asi rohaM Tu surgo au

v  Mauliate ma Di Ho o Debata Ala basaM

Sibahen dalan i Marhite AnakMi Tu banuaM

07.          E p i s t e l: HEBER 10 : 19 - 29

U  : Tajaha ma Epistel di Minggunta sadari on ima na tarsurat di  Heber 10  ; 19 – 29, ‘ antong ale angka dongan, adong do di hita hiras ni roha laho bongot tu bagasan na badia i, dibagasan mudar ni Jesus

K  : ai dibungka do tu hita dalan  na imbaru jala na mangolu sian rimberimbe i, ima dagingna i

U  :  jala adong do dihita malim na Bolon, sigomgom bagas ni Debata

K : Dibaheni, tadapothon ma marroha na sintong, di bagasan hagogok ni haporseaon, dung diurasi rohanta, unang be disolsoli panggora ni roha I hita, jala dung diburi  dagingta dohot aek na ias.

U : momos ma tatiop panghirimon  na taparhatopot I, ai haposan do na marbagabagahonsa.

K  : marsiantoan ma hita, masipajujuan tu haholongan dohot tu angka ulaon na denggan.

U  :  Unang tatadingkon parpunguanta hian songon na hinasomalhon ni na deba, tung masipaingotan ma hita, jala  lam i ma nian, ala lam jonok diida hamu arii.

K  : alai anggo tatuntun mardosa dung jolo tajalo parbinotoan di hasintongan i, ndang adong be dapot pelean pasaehon dosa

U  :  Uhum na jorbut nama sipaimaon dohot api ni haririmas, siallang angka na mangalo

K  : Sitompas patik ni si Musa ingkon mate do, anggo adong dua manang tolu sitindangi, so siat asi ni roha.

U  : Timbang hamu ma : saida dumokdok ma uhum mangonai tu jolma na mandegedegei Anak ni Debata jala na mansoadahon mudar parpadananparhitean ni habadiaonna nian, jala na manoisi Tondi Parasiroha i. Martua ma angka na tumangihon Hata ni Debata jala na umpeopsa. Amen.

08.          Marende BE No. 622 : 1  ” Mansai Nalnal di Angka Partingkian  

v  Mansai nalnal di angka partingkian, sinondang ni silangMu, Tuhanhi,

Sian hatiuron na marsinondang holong na naso halompoani.

Sude na bangso do marpangkirimon tu sondang ni asi ni roha i.

Songon parluga na manghalungunhon parbinsar ni mata ni ari i. 

09.        MANGHATINDANGHON HAPORSEON:

U      : Di bagasan sada panindangion dohot donganta sahaporseaon di sandok portibi on tahatindanghon ma haporseaonta i, rap ma hita mandok:

S       :  Ahu porsea …..                                                                        (Hundul)

10.        Boa boa sian Huria:

untuk memutus rantai penyebaran Virus Corona (Covid 19) sampai selesai maka perlu disampaiakan beberapa hal:

1.  Dihimbau kepada seluruh jemaat tetap menjaga kesehatan sesuai dengan anjuran pelayanan kesehatan dan teruslah berdoa.

2.  Untuk kegiatan Partangiangan dan Ibadah Minggu dilaksanakan di rumah masing masing dan lembaran acara partangiangan dibagikan kepada jemaat (boleh diterima dari Gereja) ataupun WA Group masing masing huria dan panduan melalui live Streaming langsung melalui Face Book dengan nama Freddin Sofian Rober Lubis.

3. Hari ini kita beribadah dalam Memperingati hati Kematian Tuhan Jesus untuk menebus dosa kita (Jumat Agung).

4.  Pada hari Minggu tgl 12 April 2020,  ibadah buha buha ijuk kita gabungkan dalam  ibadah minggu memperingati Kebangkitan Yesus (Paskah I dan II)  jam 10.00 wib  di rumah masing masing.

5. Untuk pelaksanaan Perjamuan Kudus (Marulaon na badia) di undur atau dilaksanakan dikemudian hari setelah ibadah minggu sudah dilaksanakan di gereja, dan juga di huria pagaran.

6. Untuk sementara warta keuangan belum dicetak, baiknya setelah dipastikan beribadah di gereja dilaksanakan maka warta keuangan di wartakan.

7. Dalam setiap ibadah partangiangan dan Ibadah minggu di rumah masing-masing, persembahan  kita laksanakan setelah khotbah dan dilaksanakan hanya sekali, tanpa mengurangi makna dari persembahan IA,IB, dan persembahan ke 2 ke Pusat. 

11.        Marende BE No. 412: 1 -- “NDI DI DOLOK ADUI”  BL. 387

&  Ndi di dolok adui silang ni Tuhan i, sap mudar, sap tijur do i.

Jesus mate disi asa malum dibaen sude angka gondok roha i.

Dibaen i, tung holong rohangki mida silang di Golgata i.

Hupasolhot diringku tusi dompak surgo pardalananhi.

&  Dileai jolma i silang ni Tuhan i hape haluaon do i.

Nang godang dosangki, alai sesa do i, dibaen mudar na durus disi.

Dibaen i………………………

12.   RENUNGAN: Matius 27 : 45 – 56

“PANGHOPHOPON NI JESUS NA PALUAHON”

(PENGORBANAN YESUS YANG MENYELAMATKAN)

Hita na hinaholongan ni Tuhan Jesus Kristus! Sadarion Ari Parningotan Hamamate ni Tuhan Jesus di hau na pinarsilang I manjouhon tu hita saluhutna; nunga dihophop Tuhan Jesus saluhutna jolma pardosa, songon I nang keluarganta. Dilehon do gogo naimbaru tu hita laho mangadopi ragam ni angka na masa tabolus nuaeng ima sahit Covid 19 na mewabah di sandok portibion dohot di bangsonta. Marhite na masa I hatindangkononta ma mansai arga do hape hahipasonta di jolo ni Debata, jala marhite na masa I lam marsangap do Debata. Marhite parningotan on didok Endeta I, “Nasa jolma ingkon mate”.  Hamatean I parhitean do I laho manopot Tuhan Jesus i. Manang ise halak na naeng pajumpang dohot Tuhan Jesus ingkon jumolo pamatehon hagiothagiot ni roha portibion. Marhite panghophopon ni Jesus na paluahon hita pataridahon tu hita dohot tu portibion ima :

Parjolo, Ndang ditadingkon Debata angka na porsea di Ibana.

Unduk do tu pangomgomion ni Debata nasa na masa di portibion; partingkian pe dohot manghatindangkon na Anak ni Debata do Tuhan Jesus I. Dungi dipangiar Jesus ma soaraNa jala dianggukhon : “Ale Debatangku, Debatangku, boasa tung tadingkononmu Ahu” (Eli, Eli, lama sabachtani)? Manggombarhon na so tarsirang Debata Ama dohot AnakNa Tuhan Jesus I; na so ditadingkon Debata Ama sitaonon na tinuhuk ni Tuhan Jesus di hau na pinarsilang, alani dosa ni portibion (pat.Joh.3:16). Alani molo mangadopi sitaonon  hita angka na porsea di Ibana, ndang tadingkonna hita, ai Ibana nampuna hita, jala ruasNa do hita. Na ringkot molo marsitaonon hita asa mangalualu tu Ibana ma hita di parsorion na tabolus nuaeng dohot na naeng ro ai sarihononna do hita. Marragam do pangalaho/sikap ni donganta jolma molo ro sitaonon ima; adong do I tu horong na jongjong mainondur (menonton) na masa I, songon na masa diturpuk on mandok: Na manjou si Elia do. Sian dia jouonna si Elia, ai nunga tarhinsat ibana tu banua ginjang. Adong na simpati  naeng mangurupi alai ndang sintong carana, songon na masa di turpuk on pintor marlojong  mangalap limut, dibutongi ma i tu na asom, dipalohot ma tu tolong painumhon Ibana. Sian ma boi hita marsiajar, sai na ro angka na mangurupi molo marsitaonon hita, alai parsatongkinan do I jala  holan Debata sambing do na boi mangurupi dohot marmudumuduhon hita.

Paduahon, Marujung do saluhutna nasa na masa di portibion

Marsoara na gogo ma Tuhan Jesus, dungi tos ma hosaNa; manggombarhon naung marujung panghophoponNa di portibion, parungkilonta pe marujung do muse di tingkina molo so pargale hita. Pos ma rohanta, di parningotan hamamate ni Tuhanta Jesus sadarion, nunga marujung nang sorop ni Covid 19 I, na ringkot marhabiaran tu Debata ma hita, mulak ma hita tu Debata, tatinggalhon ma bangkobangko na robi, hasomalan na sala. Dungi maribak ma hirehire na di bagasjoro sian ginjang ro di toru. Manggombarhon, dos do jolma di adopan ni Debata, ndang mardiaimbar mardiaimbar manang ise pe; asing panghulingna (bahasa), asing hulinghulingna (warna kulit), na ringkot taulahon ma lomo ni rohaNa. Dung i humuntal ma tano i, marigat ma dohot angka batu mamak, mungkap ma angka tanoman, dung i hehe ma daging ni torop na badia angka na modom disi, gabe ruar ma nasida sian angka tanoman i; jadi dung hehe Jesus, ro do nasida tu huta na badia i, pataridahon nasida tu torop halak. Pataridahon tu hita Anak ni Debata ni Debata do Ibana, na mangungkap dalan tu banua ginjang. Laos I do na hinatindangkon ni angka induk ni soldadu I : Tutu do On Anak ni Debata! Dohot torop boruboru, naung mangihuthon Jesus sian Galilea, patureturehon Ibana. Si Maria Magdalena, si Maria, ina ni Jakobus dohot Josep, dohot ina ni angka anak ni si Sebedeus. Dohot do nasida manghatindangkon na masa i. Alani hita pe siihuthon Tuhan Jesus I marlas ni roha ma hita, ala nunga dohot hita dihophop Tuhan Jesus, malua sian nasa ragam ni parungkilon dohot angka na naeng masa sibolushonta dope. Amen.

13.   Marende BE No. 86 : 1- 2  “ Silang na badia I”   BL. 67 (Pelean)

v  Silang na Badia I, Ho do lombulombungki;maralohon dosai, dohot pandeleani

Di sude sitaonon I, Ho ma lombulombungki

v  Nasa na huulai ndang tau hasonanganhi ; nang ringkot pe rohangki, polar o nang ilungki. Holan asi ni rohaM pangurupi O Tuhan

14.  Marningot Panaonon ni Tuhan Yesus (Marulaon Na hohom)

Marende BE. No.449: 1 “Sai Solhot tu SilangMi”        BL.300

Sai solhot tu silangMi, Jesus Ingananku. Mual na mabaor disi, I ma inumonku. SilangMi, Tuhanki I ma pujionku Paima sogot sahat au, i endehononku

PITU PANDOHAN NI JESUS DI HAU SILANG.

(dijahahon Parjamita).

Parjamita :

Pitu pandohan ni Jesus di hau silang i, paingothon  huhut mangarahon hita asa lam solhot mananda Ibana.                   

Antong tangihon jala tanda ma Ibana marhite  pandohanNa on:

Hata na parjolo: Manesa dosa (Lukas 23:34)

“Ale Amang marparmuati ma rohaM mida nasida, ai ndang diboto nasida nabinahen nasida i.”

Holan sahalak Raja do nampuna Holong na Balga na tau manatap simalolong ni angka na mambursikhon Ibana, jala na mandok “sai sesa ma nasida..” Halak na mabugang, marsitaonon, jala digantung tu hau hira parjahat, alai Ibana do manesa dosa ni angka mamparsilanghon Ibana.

Hata na paduahon: Haluaon (Lukas 23:43)

“Situtu do hatangKon tu ho: sadarion do ho rap dohot Ahu di Paradeiso”

Uju sahalak parjahat mangido asa diingot Jesus ibana molo dung sahat tu Harajaon ni Debata, dilehon Jesus do bagabaga haluaon tu ibana. Di bagasan pangaramotion ni Jesus, dilehon do haluaon tu angka na olo porsea tu Ibana.

Hata na patoluhon: Mandok mauliate (Johanes 19:26)

“Ndi ma, inang, anakmi!”

Di tonga ni sitaononNa, dipasahat Ibana do donganna tu inangNa, jala inangNa tu donganNa i. Ndang mansohot holong di ujung ni ngoluNa di hasiangan on. Holong ni Jesus tongtong mangolu nang pe mate Ibana.

Hata na paopathon: Sitaonon ni partondion (Matius 27:46)

“Ale DebatangKu, DebatangKu boasa tung tadinghononMu Ahu?”

Sai hira na mago do suara ni Debata uju dihilala Jesus holom saluhutna diujung ni ngolu hajolmaonNa. Diboto Jesus do lapatan ni na gabe jolma di tingki panosak ni sitaonon na bernit di bagasan ngoluNa. Alai nang pe songon i, tongtong do joujou Ibana tu AmaNa i laho pasahathon ngoluNa.

Hata palimahon: Sitaonon ni pardagingon (Johanes 19:28)

“Mauas Ahu!”

Ndada holan sipanganon diharingkothon daging, alai tarlumobi ma siinumon. Mauas do daging molo mahiang aruaru dohot pamatangna, songon i ma panghilalaan ni Jesus, mauas! Ganup jolma na male jala mauas diboto nasida ma paboa Jesus pe nunga hea manghilala si songon i. Alai holan Ibana do na tau pataluhon pangunjunan na ro uju male dohot mauas.

Hata paonomhon: Hamonangan (Johanes 19:30)

“Nunga marujung!”

Ndada hata hataluan ianggo hata on, alai pos ni roha paboa saluhut na sangkap maradophon ngoluNa nunga sidung, nunga marujung! Hamonangan nunga dompak dijoloNa.

Hata papituhon: Pasahathon tondiNa (Lukas 23:46)

“Amang! tu bagasan tanganMu ma Hupasahat tondingKu!”

Ai mangholom ma mataniari di luat i. Maribak ma hirehire na di Bagas Joro i, bola dua. Ndang tolhas mataniari tu dolok Golgata. Di inganan i ma Jesus pasahathon ngoluNa dohot tondiNa tu Ama i, songon sahalak anak marpos ni roha pasahathon ngoluna tu pangaramotion ni amana, songon sahalak boru na sonang panghilalaanna uju dihaol inana.

Tu bagasan tanganMu ma Hupasahat tondingKu!

Nunga ditarik na holom i na tiur i, gabe holom saluhutna. Molo songon i na so ro be hatiuron i? Ndang binsar be hatiuron i? Tarpaima do sandok portibi on di haheheon ni Sipalua i huhut mamboan hatiuron na imbaru. 

Mangkuling giringgiring 7 hali (Martangiang ma di bagasan rohanta be)

Marende BE. No.681:1  “Ale Amang Asi RohaM”

Ale Amang asi rohaM di au pardosa on. Unduk do rohangkon nuaeng marsomba di joloM. Unang jujur unang jujur angka dosangki. Sai salpuhon sai salpuhon sian rohaMi

15.  PANGUJUNGI:   

U  :  Tadok Ma mauliate tu Debata, ala naung sahat Haluaon i di hita jala nunga tabege Barita nauli na mamaritahon ia hamamte ni Kristus di Hau pinarsilang i, holan ala ni dosanta do, dosa ni sandok portibi on, antong taauhon ma panghophoponNai dibagasan rohanta be, asa unang be hita madabu tu bagasan dosa alai hot ma hita jongjong di ojahan na Sintong i, ima BARITA NAULI nang pe adopanta angka parungkilon ditongatonga ni portibi on.

K  : Tabahen ma Hata ni Debata ojahan ni ngolunta ro di salelenglelengna

U  :  songon angka  naung tinobus ni Tuhan Jesus Kristus tongtong ma hita mangolu di bagasan panobusionNa I marhitehite na mangolu hita dibagasan biar mida Debata. Tapelehon ma dagingta bahen pelean na mangolu na hinalomohon ni Debata marhitehite na manghaholongi Debata, manghaholongi dongan jolma huhut mangaramoti nasa Natinompa ni Debata.

K  : (Mangendehon) BE No. 512: 4 “ Di dalani Jesus Tano ” BL. 352

v  Ganggu roha mida pangunjunan i moru pe gogonta lao marungkil i. sai tabereng dompak Jesus Tuhan i, ganda hiras ni rohanta baenon nii. Hahaanggi ro hamu sude taarahon ma donganta be, hahaanggi dao nang jonok be, hara tu joloNa donganmu sude.

U  :  Tatangianghon ma peleanta: Ale Tuhan Debata Amanami, haroroan ni saluhut pasupasu na mauliutus, godang do hujalo hami sian asi ni rohaM. Mauliate ma di Ho, hupasahat hami ma nuaeng peleannami tu Ho, sai jalo ma i gabe pelean na hushus di di joloM. Pasupasu ma na niula ni tangannami jala ajari ma hami manghamuliatehon saluhutna i marhite parange nang pambahenannami. Ungkap rohanami asa sai ringgas hami pasahat pelean tu Ho hombar tu asi ni rohaM naung hujalo hami, marhite Kristus Jesus Tuhan nami. AMEN.

 K : (Rap Mandok): Tangiang Ale Amanami.