(15). PARTURE ACARA PASSION DOHOT PARTANGIANGAN

PARTURENA PARTANGIANGAN PASSION

MARNINGOT SITAONON NI TUHAN JESUS

HKBP PETUARAN RESSORT PERBAUNGAN

DISTRIK XXIX DELI SERDANG

Rabu, 08 April 2020

1.      Marende: BE. No. 449: 1 – 2       “Sai solhot tu silangMi”     BL.300

♫ Sai solhot tu silangMi, Jesus ingananku, Mual na mabaor disi, ima inumonku. SilangMi Tuhanki, ima pujionku

Paima sogot sahat au, i endehononku

~~~ jongjong ~~~

♫ Lao ma au tu silangMi, i haporusanku. Sai asi ma rohaMi, unang tulak ahu. SilangMi Tuhanki, ima pujionku

Paima sogot sahat au, i endehononku

2.      Votum – Introitus – Tangiang                 (U: Uluan; K: Huria)

U : Marhitehite Goar ni Debata Ama, dohot Goar ni AnakNa Tuhan Jesus Kristus, dohot Goar ni Tondi Parbadia, na tumompa langit dohot tano on.

H : Amen

U : Tabereng ma induk ni haporseaon i jala na paujunghonsa, ima Jesus na manaonhon parsilangon i. Singkat ni las ni roha tohapNa i hian, so dietong i hailaon.

H : Paingotingot hamu ma Ibana, na pataontaon paraloan si songon i sian angka pardosa, asa unang marnaloja hamu, unang mandate Tondimuna.

U : Martangiang ma hita!

      Ale Tuhan Jesus, hupuji hami ma GoarMu ala ni saluhut na binahenMi patupahon hangoluannami. Sai dongani hami marhite asi ni rohaM, asa huarsakkon hami dosanami, jala tubu di hami haporseaon na sintong, gabe marroha haholongon hami huhut mandok mauliate tu Ho, jala olo mangihuthon Ho ro di hamatean. Ale Tuhan, di Ho ma pujipujian olat ni on ro di saleleng ni lelengna. Amen                                             ~~~ hundul ~~~                             

3.      Marende: BE. No. 452 : 2          “Na Ro Pandaoni Bolon I”   BL. 303

♫ Tung sae do dosa i sude, ai nunga mate Jesus

Ndang jujuronNa i muse, parholong roha Jesus

Uli ni Barita i, las ni roha bolon i

Sai dipuji rohangki, Jesus, Jesus, Jesus

4.      Haboborhat tu Jerusalem                      (U: Uluan ; H: Huria)

U : Onom ari nari asa dapot Pesta Paska, sahat ma Jesus tu huta Betania, inganan ni si Lazarus, na sinunggul ni Jesus sian na mate. Jadi dipauli nasida ma disi panganon ujuan di Ibana, si Marta do marhobasi, si Lasarus ma sada donganna mangan disi. Dibuat si Maria ma sahati miak Nardus na arga na so marsaor, dimiahi ma pat ni Jesus, obukna ma dibahen mangalapu. Gabe ro ma si Judas Iskariot na naeng manjehehon Ibana, mandok: “Boasa so ginadis miak i arga tolu ratus hupang, bahen silehonlehon nian di angka na pogos”.

H : Dungi ninna Jesus ma: “Pasombu ma ibana, ai diparade do i hira tu ari hatatanomHi. Tongtong do adong na pogos di tongatongamuna, asal olo hamu, tarpatongon hamu do na denggan tu nasida, alai anggo Ahu ndang tongtong dilambungmuna.

U : Dua ari andorang so dapot Pesta Paska, ro ma hata ni Jesus mandok tu siseanNa: “Diboto hamu do, haduan ma dapot Pesta Paska, disi ma pasahatonna Anak ni jolma i, asa diparsilangkon”. Alai marpungu ma

uju i angka sintua ni malim dohot angka sintua ni bangso i tu godung ni sintua ni malim na margoar Kayapas, laho martuptup, manang bisuk dia bahenonna manangkup Jesus dohot mamusa Ibana. Laos didok nasida ma:

H : Unang ma di pesta i, sotung guntur na torop i.

U : Alai dibege angka na torop ma na naeng ro Jesus tu Jerusalem, jadi dibuat nasida ma maremare, laho manomunomu Ibana huhut manjoujouhon:

H : Hosianna! Pinasupasu ma na ro marhite Goar ni Tuhan i, Raja ni Israel!

U : Dung i didapot Jesus ma halode sada, ima dihunduli, hombar tu na tarsurat: : “Unang Ho mabiar boru Sion, ida ma, Rajam do na ro, marsihundul di anak ni halode”. Alai ro ma halak Parise mandok tu Ibana: “Orai ma antong angka siseanMi, Guru!” Alai ninna ma mangalusi: “Hudok ma di hamu: aut mauhom nasida, manjoujou ma angka batu!”

5.      Marende: BE. No. 462: 1   “Ale Tondi Parbadia”  BL. 311

♫ Ale Tondi Parbadia i, sai songgopi hami on. Rohanami ma paria, lao mamuji Ho tongtong. Ho tongtong, Ho tongtong, lao mamuji Ho tongtong

6.      Patupahon Ulaon Na Badia                   (U: Uluan; H: Huria)

U : Alai di ari parhobasan parjolo di Paska i, didapothon siseanNa ma Jesus, jala ninna ma: “Tudia ma patureonnami di Ho panganon Paska i dipangido rohaM?” Gabe didok ma: “Laho ma hamu tu huta i,

pajumpang ma hamu disi dohot sada halak na mangusung aek sahudon, ibana ma ihuthon hamu!”.

H : Jadi, borhat ma siseanNa, dibongoti ma huta i, jadi jumpang ma tutu songon na nidokNa i, gabe dipature ma Paska i.

U : Jadi di na mangan i nasida, hehe ma Jesus sian na mangan i, ditanggal ma ulosNa, dibuat ma basahan, ditapolhon ma tu Ibana, diusehon ma aek tu sambong, dung i diburi ma pat ni angka siseanNa, diapusi ma dohot basahanNa na tinapolhonNa i. Dung i sahat ma Ibana tu si Simon Petrus, jadi didok ma mandok ibana:

H : “Tung Ho ma ale Tuhan mamuri pathu?”

U : Dung i ninna Jesus ma mangalusi: “Molo so burionHu ho, ndang partohap Ho di Ahu!” Dung i ninna si Petrus ma: “Ale Tuhan unang ma holan pathu, dohot ma tangan, dohot ulungku”. Jadi didok Jesus ma tu ibana: “Halak naung maridi i ndang be burion, ai nunga sude ibana ias , naung ias do anggo hamu, alai ndang luhut hamu!”. Ai ditanda do sipasahat Ibana umbahen didok: “Ndang luhut hamu ias!” Asa dung diburi Jesus pat nasida, dipangke ma muse ulosNa, hundul ma Ibana, didok ma tu nasida:

H : “Ai diantusi hamu do pambahenanHi tu hamu? Digoari hamu do Ahu Guru dohot Tuhan, jadi ture do pandokmuna disi, ai i do Ahu tutu. Asa molo Ahu Tuhan jala Gurumuna, tama nang hamu masiburian pat, ai sitiruon do Hulehon tu hamu, asa dibahen hamu songon na Hubahen i tu hamu! Na tutu situtu do na Hudok on tu hamu, ndang umbalga anak somang sian indukna, ndang sumurung suruan sian na marsuru Ibana. Molo diboto hamu i, martua ma hamu mangulahonsa!” 

7.      Marende: BE. No.083: 4   “Na Lao Do Birubiru I”       BL.214

♫  Saleleng na mangolu au, naeng ingotonku Jesus

Sude na binaenMi di au, hataM naeng hupatulus

Ho naeng haholonganku do, huhut ihuthononku Ho

Di dalan hangoluan, tung ingkon Ho nampuna au

Mangolu manang mate au, sai Ho do tioponku

8.      Parjeheon ni si Judas                              (U: Uluan ; H: Huria)

U : Jadi di na mangan i nasida, ninna Jesus ma: “Situtu do na Hudok on tu hamu, sada sian hamu naeng pasahathon Ahu!”. Dung i marsak situtu ma nasida, gabe

dipandok be ma tu Ibana: “Nda tung ahu Tuhan?”. Alai ninna ma mangalusi: “Ia i na rap dohot Ahu manurdukhon tanganna tu paringkauan, i do na pasahathon Ahu. Tong do nian ujung ni Anak ni jolma i songon na tarsurat hian, alai marjea do halak na pasahathon Anak ni jolma i, tagonan unang sanga tubu ibana tu hasiangan on!”

      Alai adong sada sian angka sisean i na hundul jumonok tu Ibana, haholongan ni Jesus i, ima dihilap si Petrus. Jadi ninna ma mandok ibana:  “Sungkun ma, ise do na nidokNa i”. Jadi dipajonok ma tu lambung ni Jesus, didok ma mandok Ibana:  “Tuhan, ise i?”

H : Gabe dialusi Jesus ma: “Ia tusi Hulehon na santopik na husornophon on, ima Ibana!”

U : Jadi disornophon ma saotik, dilehon ma tu si Judas Iskariot, anak ni si Simon, jadi dung dibondut i, dibongoti sibolis i ma Ibana. Dung didok Jesus ma tu ibana: “Humatop ma ula siulaonmu!”. Asa dung dijalo si Judas na santopik i, laho ma ibana tu balian.

      Jadi di na mangan i nasida, dihindat Jesus ma roti i, dipasupasu ma, diponggoli ma, jala diparlehon ma tu angka siseanNa huhut ma didok: “Jalo hamu, pangan hamu, dagingKu do on!”. Dung i dihindat ma panginuman i, didok ma mauliate, dilehon ma tu nasida huhut ma didok: “Jalo hamu, sude hamu manginum sian i, mudarHu do on, mudar parpadanan i, na niusehon humophop natorop bahen hasesaan ni dosa”.

9.      Marende: BE. No. 174 : 1 “Torop dope na siat i”    BL. 003

♫  Torop dope na siat i, di hasampuran rea

Ipe hamu pardosa i, sai olo ma porsea

Ai Debata manjou hamu, tu hasonangan situtu

Hamu, hamu, dijou Debatamu.

10.  Porlak Getsemane                                   (U: Uluan; H: Huria)

U : Sisean na sampuludua i borhat tu dolok Jetun, sahat ma nasida tu sada porlak na margoar Getsemane, jala didok ma tu nasida: “Hundul ma hamu jolo dison, saleleng disan Ahu martangiang”. Dungi ditogihon ma si Petrus dohot anak ni si Sebedeus na dua i, gabe marsak situtu ma Ibana jala bobonosan. Jala didok ma tu nasida: “Mansai marsak situtu do rohangku, hira na mate do. Dison ma hamu, dungo rap dohot Ahu!” Dung i laho ma Ibana saotik tu jolo, dipatungkap ma bohiNa tu tano martangiang. On ma didok Jesus di tangiangNa i:

H : “Ale Amang, namun na tarbahen, salpuhon ma siinumon on sian Ahu! Alai tahe, unang marguru tu rohangKu, rohaM do”.

U : Dung i mulak ma Ibana tu angka siseanNa, jala tarpodom do nasida didapot, jala didok ma tu si Petrus: “Ndang margogo hamu hape dungo rap dohot Ahu nanggo sangombas? Dungo ma hamu jala martangiang, asa unang hamu bongot tu pangunjunan, ai na girgir do nian Tondi i, alai gale do ia daging”. Dung i laho ma Ibana paduahalihon martangiang, ninna ma:

H : “Ale Amang, molo so tarbahen salpu on, nda ingkon huinum, sai saut ma lomo ni rohaM!”

U : Dung sun Ibana martangiang na paduahalihon i, didapothon ma muse angka siseanNa, tarpodom do nasida jumpang ni Jesus. Didok ma tu nasida: “Datdatanmuna dope modom dohot maradian? Nunga dapot tingkina nuaeng, sahat ma Anak ni jolma i tu tangan ni pardosa. Hehe ma hamu, laho ma hita! Ndi, nunga ro na pasahathon Ahu!”

11.  Marende: BE. No. 432: 1    “Sian Hurungan Ni Dosangki”       BL. 292

♫      Sian hurungan ni dosangki,  ro au tu Ho, ro au tu Ho. Tu haluaon dimudarMi, Jesus au ro tu Ho. Nasa rohangku malum hipas,  gabe mamora nang pe pogos. Sian jeangku ro au tu Ho, Jesus au ro tu Ho.

12.  TARTANGKUP TUHAN JESUS DI GETSEMANE (U: Uluan ; H : Huria)

U : Alai diboto si Judas i do inganan i, ai jotjot do marpungu disi dohot angka sisean i. Diarahon si Judas ma angka soldadu dohot angka naposo ni Sintua ni Malim, didapothon ma tusi mantat sulusulu, palito dohot sinjata. Diboto Jesus do saluhut na naeng songgop tu Ibana. Jadi ruar ma Ibana didok ma tu nasida: “Ise do na jinalahanmuna?” Gabe ninna nasida ma mangalusi:

H : “Jesus halak Nasareth i do!”

U : Asa dung didok tu nasida: “Ahu do i!”, sumurut ma nasida, martinggangan ma tu tano. Dungi diulakhon ma manungkun nasida: “Ise do na niluluanmuna?”. Jadi didok nasida ma:

H : “Jesus halak Nasareth i do!”

U : Dungi ninna Jesus ma mangalusi ibana: “Nunga Hupaboa tu hamu, Ahu do i. Asa molo Ahu dilului hamu, loas ma laho angka on, ai naeng do jumpang nanidokNa i: Ndang adong mago hubahen agia sada na nilehonMi tu Ahu!”. Alai nunga dipabotohon parjehe i hian partinandaan dinasida: “Ia i na huumma, i ma tangkup hamu!”. Asa pintor didapothon ma Jesus, didok ma: “Tabi di Ho Guru!”, laos diumma, alai ninna Jesus ma mandok ibana:

H : “Marhua Ho ro tuson anggia? Ooo Judas, pangummaon do hape dibahen Ho pasahathon Anak ni jolma i!”

U : Dungi ro ma nasida, dilaluhon ma tangan nasida tu Jesus manangkup Ibana. Dungi, adong ma sian angka dongan ni Jesus mangalaluhon tanganna, disintak ma podangna, ditampulhon tu naposo ni malim sahalak, dipisikkon ma pinggolna. Jadi didok Jesus ma tu ibana:

H : Ai na so tarbahen Ahu dirohaM mangido sian Damang, asa dipadiri di Ahu saonari sampuludua loksa suruanNa? Alai songon dia ma disi saut hata ni surat i na mandok: “Ingkon masa do songon i!”

U : Uju i ma didok Jesus tu natorop i: “Hira na dompak panamun do hamu hehe marpodang jala marlombutlombut manangkup Ahu. Ariari do Ahu nian hundul mangajari di bagas joro, so adong ditangkup hamu Ahu. Alai

masa do sudena on, asa jumpang hata ni panurirang i”. Dungi ditadingkon saluhut sisean i ma Ibana laho maporus.

13.   Marende: BE. No. 083 : 2   “Na Lao Do Birubiru i”          BL. 214

♫      Ianggo birubiru i, i ma alealengku

Na paluahon tondingku, disuru Debatangku.

Didok mandok AnakNa i:

 “Sai topot ma pardosa i, naung sun tinoruanku.

Balga tutu do rimasHi, alai tarbaen do mombun i,

horhonon ni mudarMu”.

14. TUHAN JESUS TARBOAN TU JOLO NI MALIM (U: Uluan ; H : Huria)

U : Dung ditangkup Jesus jala diihoti, ditogihon ma Ibana jumolo tu si Hannas, i ma simatua ni si Kayafas. Diihuthon si Simon Petrus, dohot sisean na sada nari ma Jesus. Jadi bongot ma Ibana rap dohot Jesus tu alaman ni malim i. Alai disungkun sintua ni malim i ma Jesus taringot tu angka siseanNa i. Jadi dialusi Jesus ma ibana: “Patar do hatangKi dihatoropan, na tongtong do Ahu mangajari di parguruan nang

di bagas joro pe, parpunguan ni saluhut halak Jahudi, ndang adong huhatahon marsibuni, boasa Ahu disungkun Ho? Nasida naung umbege hatangKi ma sungkun, ai diboto nasida do na Huhatahon i”

H : Dungi didok Jesus songon i, dipastap sada opas na jongjong disi ma Ibana, huhut ma didok: “Songon i ma pangalusiM tu sintua ni malim?” Dungi ninna Jesus ma mangalusi: “Ia hurang na Hudok, hajongjonghon na hurang i, alai ianggo na hona do, boasa pastaponmu Ahu?”

U : Asa disuru si Hannas ma Ibana  tu sintua ni malim Kayafas. Disi do marpungu angka sibotosurat dohot sintua ni natorop i. Alai sai mangihut do si Petrus, mandaodao, sahat ro di alaman ni sintua ni malim i. Angka sintua ni malim ro disandok rapot godang mangalului panindangion gapgap dompak Jesus na tuk mambahen Ibana marutang hosa. Alai nang pe hehe torop halak, ndang adong jumpangsa. Alai parpudi ro ma dua halak, ninna ma: “Didok halak on, tarbahen Ahu do mangalohai bagas joro ni Debata jala pajongjongonNa i dibagasan tolu ari!”

H : Dungi dipangkulingi sintua ni malim i ma Ibana: “Hupatolon ma Ho tu Debata Sipangolu i, asa dipaboa Ho tu hami, manang na tutu Ho Kristus Anak ni Debata”.

U : Dungi didok Jesus ma tu ibana: “Songon na nidokmi ma tutu. Alai hudok ma tu hamu, olat ni on ma idaonmuna Anak ni Jolma i hundul di siamun ni hagogoon jala ro di atas ni ombun”. Gabe diribakkon sintua ni malim ma paheanna mandok: “Na mangaleai Debata do Ibana! Pola luluan dope sitindangi? Nunga dibege hamu pangaleaiNa i!”

H : Jadi ditijuri nasida ma bohiNa, na deba manompuk, na deba nari mangalinsingi, huhut mandok: “Surirangi hami Kristus, ise do na mamunu Ho?”

15.  Marende: BE. No. 081 : 2       “Aha ma endehononku”     BL. 185

♫      Haleaon,  insakinsak,  reherehe,  tijur pe

Tali dohot pastappastap, tung ditaonhon Ho sude

Paluahon au na pogos, sian tangan ni si bolis

Ala ni hupuji Ho, tung marribu hali do.

16. DISOADAHON SI PETRUS TUHAN JESUS                 (U : Uluan ; H : Huria)

U : Alai hundul do ianggo si Petrus di alaman i jadi didapothon sada parompuan ma ibana mandok: “Dohot do ho dongan ni Jesus na sian Galilea i?” Alai diporso si Petrus do, didok ma:

H : “Ndang huboto jala ndang huantusi na nidokmi!”. Laos ruar ma ibana tu alaman jolojolo, jala martahuak ma manuk.

U : Alai marnida Ibana diulahi naposo boruboru i ma mandok tu angka na jongjong disi: “On do sada sian nasida!” Alai mamorso muse ianggo ibana. Jadi dung satongkin nari, didok angka na jongjong disi ma muse mandok si Petrus: “Tongon do dongan nasida ho, ai halak Galilea do ho!” Gabe dipungka ma mambuburahon dirina huhut manolonnolon:

H : “Ndang hutanda na nidokmuna i!”

U : Dungi martahuak ma manuk i paduahalihon, jadi diingot si Petrus ma na nidok ni Jesus tu ibana: “Tolu hali do soadahononmu Ahu andorang

so martahuak manuk paduahalihon!” Jadi marningot i, tumatangis ma

Ibana. Jadi dung diida si Judas parjehe i naeng hona uhum nama Jesus, disolsoli ma rohana, dipaulak ma na tolupulu rupia i tu angka sintua ni malim dohot sintua ni bangso: “Sala do ahu, hujehehon do halak na so marpipot!” Alai didok nasida ma: “Ndang ro dihami i, Ho do na sari disi!” Alani i ma umbahen margoar i “ladang mudar” sahat ro disadarion.

17. Marende: BE. No. 077 : 1 – 2    “Hamu Saluhut Halak”       BL. 065

♫      Hamu saluhut halak, ro ma hamu manatap

Hangoluanmu on, na gantung diparsilang

Tumahan hamatean,  naeng ingotonmu i tongtong

♫      Patangkas ma luhutna, sap mudar do dagingNa

Sai hir hodokNa i, buas huhut hosaNa

Hinorhon ni bernitNa, modar sude dagingNa i.

18. TUHAN JESUS DI JOLO NI SI LATUS (U : Uluan ; H : Huria)

U : Torang ni arina i martuptup ma sude angka sintua ni malim dohot sintua ni bangso i dompak Jesus laho mamusa Ibana. Ditalu jala ditogu nasida ma Ibana laho pasahathon tu panguhum si Latus. Asa dung jongjong Jesus di jolo ni panguhum i, didok ma mandok na torop: “Pangaluan dia do diboan hamu dompak halak on?” Dungi ninna nasida ma mangalusi:

H : “Aut unang sibahen na jahat on, ndang tagamon pasahatonnami Ibana tu ho!”

U : Gabe ninna si Latus ma mandok nasida: “Boan hamu ma Ibana. Uhum hamu ma Ibana marguru tu adatmuna i! Alai ninna angka Jahudi ma mandok ibana, “ndang jadi pusaonnami manang ise!” Jadi dialuhon nasida ma Ibana ninna ma: “Na dapot hami do on pabalikbalikhon bangsonami,  jala mangorai mangalehon guguan tu Kesar i, dipandok: “Raja Kristus do Ibana”.

H : Dung dibege si Latus pangaluan ni bangso i ditangkasi do Jesus manang na toho Ibana Raja. Dialusi Jesus do si Latus jala didok ma: “Ianggo harajaonKu ndada sian portibi on, alai harajaon hasintongan do!”

U : Ndang dapot si Latus manang aha hasalaan ni Tuhan Jesus,  alai disuru dope Tuhan Jesus tu jolo ni si Herodes,  panggomgomi Galilea, na tongon di Jerusalem. Las do roha ni si Herodes mamereng Jesus, ai nunga leleng dipangido rohana naeng idaonna tanda halongangan. Alai ndang dialusi Jesus ibana. Dung direhei si Herodes Jesus, disuru ma mulak tu si Latus. Dungkon ni i ma maraleale si Latus dohot si Herodes na masihosoman hian.

19. Marende: BE. No. 077 :  5    “Hamu Saluhut Halak”    BL. 065

♫      Sandok mauliate, do au di Ho naung mate Lao pangoluhon au, sai tong parrohaonku. Na busuk bunuonku,  tu Ho sambing marguru ahu

20. HONA UHUM TUHAN JESUS (U : Uluan ; H : Huria)

U : Alai adong ma tarhurung uju i sada parjahat na sumalin na margoar si Barabas, jadi di na pungu i nasida,  didok si Latus ma tu nasida: “Ise do dipangido hamu paluaon, si Barabas do manang Jesus na targoar Kristus?”. Ai diboto late ni rohanasida do umbahen na dipasahat nasida Ibana. Alai sai disosoi angka sintua ni malim rap dohot sintua ni bangso i do na torop i,  ai dipangido nasida asa si Barabas dipalua,  anggo Jesus sipusaon do. Dungi didok si Latus ma tu nasida:

H : “Antong aha ma bahenonku tu Jesus na margoar Kristus?”. Gabe saluhut nasida mandok: “Parsilangkon, parsilangkon ma Ibana!”. Alai ninna panguhum i ma: “Ai aha na jahat dibahen?”, dungi dialusi na torop i ma: “Pasilangkon ma Ibana!”.

U : Dungi ditogu si Latus ma Jesus,  didokhon ma linsingan. Jadi didandani angka sordadu ma sungsang duri bahen tumpal,  diampehon ma i tu uluNa. Baju dapdap ma dialithon tu dagingNa. Dungi ro ma nasida tu jolo ni Jahudi,  laos dipastapi ma Ibana. Dungi ruar ma muse si Latus, didok ma tu angka Jahudi i:

H : “Ida ma hutogihon do Ibana tu jolomuna,  asa diboto hamu,  na so adong jumpang ahu salaNa!”

U : Asa dung diida sintua ni malim dohot angka naposo na Ibana,  dijouhon nasida ma: “Parsilangkon ma Ibana”. Asa dung diida si Latus na so marguna hatana,  lam ganda tahe gaorna,  dibuat ma aek mamuri

tanganna di jolo ni na torop,  huhut mandok: “Lias do ahu sian mudar ni On! Hamu do na sari disi”. Dungi ninna sude na torop i ma: “Marsapata tu hami dohot tu ianakhonnami ma mudarNa i!”. Dungi saut ma dipalua si Barabas,  alai anggo Jesus dipasahat ma asa diparsilangkon.

21. Marende: BE. No. 412 : 1      “Ndi Dolok Adui” BL. 387

♫      Ndi dolok adui,  silang ni Tuhan i, sap mudar,  sap tijur do i.

Jesus mate disi,  asa malum dibaen, sude angka gondok roha i.

Dibaen i, tung holong rohangki,  mida silang di Golgata i,

Hupasolhot diringku tusi,  dompak surgo pardalananki

22. Jamita: Heber 12: 1 – 3

Jesus Kristus Do Tiruan di Sude Angka na Porsea

a. Ia turpuk on laho mangondolhon lapatan ni haporseaon tu Jesus Kristus, boha do halak na porsea di Kristus Jesus i mangadopi angka na masa (penderitaan) di tongatonga ni Huria i ? Tadingkonon nasida do huria i jala mulak tu ugamona hian manang tongtong manahan aha pe na masa ?  Nunga dipaingot Jesus hian angka siseanNa taringot tu angka na naeng masa jala na ingkon adopan nasida. Adopan nasida do penderitaan, bahkan mungkin sahat ro di na mate. Jala pangaleleion i ndada holan sian angka halak na leban alai dohot do nang sian parugamo Jahudi na mandok dirina porsea tu Debata Jahowa.

b. Marhite pandohan “dibahen i....” tarida do pardomuan ni turpuk on tu bindu na di jolo. Disosoi do huria i asa mamparateatehon angka naung masa. Nunga torop angka sitindangi, i ma angka na porsea tu Debata. Angka pergumulan dohot haporseaon nasida naeng ma dohot mangalehon inspirasi tu ngolu ni huria i di tingki nuaeng. Molo angka na porsea di Padan na Robi i mampu mempertahanhon haporseaonna, boha do ia huria nuaeng ? Halak Kristen diibarathon songon halak na mandohoti sada pertandingan di gelanggang. Asa monang, tontu do ingkon adong persiapan na denggan. Jala ganup halak na bertanding ingkon mampu memusatkan perhatian  manang konsentrasina tu tujuan na naeng dicapai. Sude boban na mambahen ibana ketinggalan ingkon ditanggali. Ala ni i, di ayat parjolo diondolhon do dua hal: tapeakhon ma na pasorathon dohot dosa; marbenget ni roha ma marlojong. Lapatanna, dosa do (pangalaho na robi ) na mambahen boban tu jolma i, gabe ndang tarbahen ibana mananda dirina naung tarjou mangihuthon Kristus. Hape ganup halak Kristen ingkon tangkas umboto: aha do gabe tujuan ni ngoluna di portibi on (Heb.4: 9). Alai andorang so sahat tu tujuan i, na ingkon marlojong do hita dibagasan habengeton.

c.  Ndang pola ganggu halak Kristen marlojong, ai Kristus naung paujungkon saluhutna i do mangalehon gogo asa mampu hita sahat tujuan. Jesus Kristus nunga manaon laho manghophop jolma, huhut sekaligus mangalehon tiruan na denggan (ptds. 1 Ptr.2: 21). I do na umbahen na didok ayat 2: “Tabereng ma induk ni haporseaon i....”, lapatanna, nunga dilehon Jesus tu angka siseanNa aha na ingkon bahenonnasida tu na asing. Ndang adong na boi mangurupi halak Kristen di parlojongonna i, asing sian Tuhan Jesus Kristus. Jesus sandiri nunga manghamonanghon paraloan na dokdok i, jala dipaujung do i marhite hamonangan (ptds. Heb.2: 10). Jesus Kristus sandiri do na secara sempurna mangulahon dohot mangoloi na nidok ni Debata Ama i. Ala ni i, Ibana do Tuhan ni saluhut jolma, termasuk dohot angka na porsea na ginoaranNa di Padan na Robi (ptds. Heb.11: 40). Ibana do naung hundul di siamun ni Ama i. Pandohan “tabereng ma” mengandung pangantusion; menyerahkan diri, ala tangkas manghirim holan sian Ibana do dapot pangurupion.

d. Pandohan “paingot ingot hamu ma Ibana” (ingatlah selalu akan Dia) naeng mangondolhon perenungan na mendalam, pertimbangan yang baik, jala dung i tangkas mambuat sada keputusan. Asa ganup halak Kristen ingkon mangalehon alus na tangkas marhite na mambuat keputusan di dirina, mulak do ibana tu ugamona hian manang torus ibana mampartahanhon haporseaonna tu Tuhan Jesus, nang pe mungkin ingkon masa angka penderitaan. Ganp halak Kristen ingkon tangkas merenungkan naung niula ni Tuhan Jesus, na di bagasan habengeton manaon angka reherehe sahat ro di na mate Ibana, alai ndang sumurut pangoloionNa. Ndang adong alasan ni halak Kristen sumurut sian haporseaonna tu Jessus, ndang jadi mandele manang mandate.

e.  Marhite turpuk on disosoi do huria nuaeng manang hita, asa mampu mamereng angka na masa ditongatonga  ni portibi on lumobi dohot di na humaliang hita songon sada dalan panogunoguon ni Debata laho mendewasakan haporseaonta. Jala marhite angka na masa na taida manang tabolus, gabe tabuat keputusan tongtong mamereng dompak Jesus. Lam tamba ma kesadaran di hita, ala ni i, pergumulan di masyarakat ndang tarhamonanghon hita sian dirinta sandiri. Lai, Jesus Kristus naung manghamonanghon hita i do na gabe Induk ni Haporseaonta, jala na tahaporseai mampu mangurupi.

f.  Songon na marlojong di portibi on ingkon tulus do tujuan ni, jala sada do tujuan; i ma haluaon na saleleng ni lelengna. Sude na tadapot, tabolus, taalami, na tonggi dohot na paet, gabe paingothon hita tu tujuan i. Ndang portibi on na gabe tujuan ni ngolunta jala ndang dison hita maringan saleleng ni lelengna. Ala ni i, hot ma hita marhaporseaon tu Ibana manang aha pe na masa! Amen.

23. Marende: BE. No.200: 1-, ...    “Di surgo do Alealenta”      BL.106

(Huhut Papungu Pelean)

♫  Di surgo do Alealenta, na burju roha situtu

Ndang piga di banuatonga, donganta na tongtong burju

Antong tabahen ma Jesus i, tongtong Alealenta i

♫  Na meoleol songon arung, do dongan na di tano on.

Na hot do Jesus na sumurung, donganNa pe hot do tongtong

Antong tabahen ma Jesus i, tongtong Alealenta i

24.  Tangiang Pamorhation.     ( Jongjong )

U  : Hamu angka dongan, ida ma Tuhanta Jesus Kristus Anak ni Debata, di       taon Ibana na hassit, dipukpuhi pamatangna, diinsahi, ditijuri,             soada hasalaan dohot dosa     diula Ibana. Haluaon do na naeng boanonNa tu hita dohot tu portibi on.

R  : O Tuhan Jesus birubiru ni Debata, asi ma roham di hami sai taruli ma             hami    dihasesaan nidosanami ala ni hamamate mi.

U:   Songon i ma holong ni roha ni Debata di portibi on, dibagasan anak-Nya Jesus Kristus dihophop do sude dosa dohot hajahatonta.  Alai molo tapamanat parulaonta nuaeng on, tung jotjot do hita manimbil sian lomo ni rohaNa, sai tongtong dope mian hita di ragam ni pangalaho na so hinalomohon ni Debata, jotjot dirinta tapatujolo nang di ganup ulaonta. Alai nuaeng marhite parningotan hamamate ni Tuhan Jesus, borhat ma hita manguduti ngolunta marpangalaho haimbaruon.

R  : Na olo au ale Amang sian sandok rohangku.

U:   Ale Tuhan, mansai balga do holong ni rohaM tu hami, ndang tarasam hami marhite sere dohot perak. Nuaeng jongjong do hami di adopanMu, asi ma roham di hami paingothon ma hami di ngolunami,  hinaarga ni panghophopMi, asa mangolu hami dibagasan lomonirohaM. Lam solhot ma hami tu Ho asa Ho hutiop hami, Ho huihuthon hami jala mardalan hami ditoru ni sinondang ni silangMi.

R  :             Mangendehon BE. No. 449 : 3   “Sai solhot tu silangMi”      Logu. 300.         

       Domu ma tu silangMi, ima tioponku, Asa unang lilu au, Ho ihuthononku.

       SilangMi, Tuhanki I ma pujionku, Paima sogot sahat au, i endehononku.

25. Tangiang Panutup: Pelean, Ale Amanami, Pasupasu(Partohonan),   Amen – Amen – Amen.

SUNGGUL SUNGGUL

1.      Berdasarkan Himbauan Ephorus HKBP dan Maklumat POLRI, Untuk ibadah Jumat Agung Tgl. 10 April 2020 Tetap dilaksanakan dirumah bersama dengan keluarga pada pukul 11.00 Wib.

2.      Untuk Ibadah Buhabuha Ijuk Tgl. 12 April 2020 Tetap dilaksanakan dirumah bersama dengan keluarga pada pukul 05.00 Wib.

3.      Untuk Ibadah Paskah I Tgl. 12 April 2020 Tetap dilaksanakan dirumah bersama dengan keluarga pada pukul 11.00 Wib.

4.      Untuk Ibadah Paskah II Tgl. 13 April 2020 Tetap dilaksanakan dirumah bersama dengan keluarga pada pukul 11.00 Wib.

5.      Persembahan Ibadah Partangiangan, Ibadah Jumat Agung & Ibadah Paskah I,II Dapat disampaikan Kepada Sintua Lingkungan Atau Sekretaris Gereja.