(09). SURAT PASTORAL KEEMPAT OMPUI EPHORUS HKBP

Pearaja, 03 April 2020

Nomor             : 353/L02/IV/2020

Hal.                 : Parmahanion Na Paopathon Taringot Tu Panghorhon Virus Corona

Sifat                : Sijahaon di ganup parmingguon

Lamp.              : -

Nahinormatan :

1.      Sude Pangula na gok tingki ni HKBP

2.      Sude Ruas ni HKBP

d/p Praeses dohot Pandita Ressort

Di : Ingananna be

Tabe sian hami dibagasan goar ni Tuhanta Jesus Kristus, Ulu ni huria I,

Hupasahat hami ma tabe parhorasan tu hamu sude Amanami, Inanami, sude pangula nag ok tingki ni HKBP, suang songoni ruas ni huria ni HKBP di ingananta ganup marsadasada. Dibagasan tangiang nang panghirimon na marsitutu do hita sude managam anggiat tumibu nian boi hita pasohon panghorhon ni sahit Virus Corona di portibion lumobi di bangsonta on. Ndada holan manghirim hita, alai dohot do hita patupa ragam ni siulaon dalam parsidohotanta rap dohot panggomgomi, nang pangubati pe (tenaga medis) laho pasohon sahit i. Sudena I patupahonta holan mangasahon goar ni Tuhanta Jesus Kristus Sipalua hita.

Alani I ma songon halak na porsea hita tu Tuhan Jesus Kristus, asa di bagasan roha na mandok mauliate tu Debata ma hita mangihuthon angka protocol ni hahipason naung pinaruar ni panggomgomi ni bangsonta, suang songon I muse mangulahon parmahanion naung pinaharuar tu hita saluhutna.

Hombar tu panghorhon ni sahit Virus Corona songon naung dipasahat BNPB – Gugus Tugas Penanganan Virus Corona di bangsonta on, nungga ditotophon pamarenta naung Status Darurat Kesehatan Masyarakat dohot Pembatasan Sosial Berskala Besar (PSBB) di Indonesia. Tontu marhonaan do I tu angka ulaon ni hurianta na naeng patupaonta dope, lumobi ima parningotan Ari Hamamate ni Tuhanta Jesus Kristus, Parningotan Haheheon ni Tuhanta Jesus Kristus, suang songon I ulaon na marhadomuan tusi.

Alani ma, dung marrapot hami, Uluan nu hurianta di tgl. 01 April 020 di Kantor Pusat HKBP, Pearaja, hupasahat hami ma parmahanion na paopathon domu tu sahit Virus Corona, ima :

1.   Parningotan Jumat Agung (Parningotan ari hamamate ni Tuhan Jesus) dohot Pesta Paskah I (Pesta Parjolo Parningotan Ari Haheheon ni Tuhan Jesus) suang songon I Pesta Paskah II (Pesta Paduahon Parningotan Ari Hahehon ni Tuhan Jesus), denggan ma tapatupa di bagas / jabunta be. Khusus di parningotan Jumat Agung I, hot ma dipalua giring-giring ni hurianta ganup marsadasada di pukul 15.00 Wib laho paingothon hita di Ari Hahamate ni Tuhan Jesus naung manobus hita sian dosa.

2.     Partangiangan Passion, na somal dipatupa gareja, tapatupa ma opat (4) borngin padodot alai dibagasta be ma.

3.  Ulaon Buhabuha Ijuk songon naung somal tapatupa di manogot ni ari Pesta Paskah, denggan ma tapasada tu parmingguon Pesta Paskah na Parjolo I di bagasta be.

4.  Sakramen Ulaon Na Badia naung somal tapatupa di Parningotan Jumat Agung, manang di Pesta Paskah, mansohot ma jolo I. Alai Buhulonta do sada tigki di ari Minggu patupa Sakramen Ulaon na Badia di sandok HKBP, dung jolo salpu sahit Virus Corona, huhut dalan mandok mauliate tu Debata na tongtong marmudumudu hita.

5.   Pinagido tu sude Pangula na gok tingki I, asa tongtong hot, dungo, jala hobas, marhite marbisuk di bagasan goar-Na laho patupa ragam ni panghobasion di bagasan partingkian na masa on.

6. Molo ringkot, boi do pangkeon Bagas Joro (Gereja) ni Tuhanta laho martangiang tu na mangharinghothonsa marsadasada halak, alai ingkon mangihuthon ruhut (Protokol) ni hahipason. Asa ingkon do tongtong dibuka Bagas Joro ni Tuhan i.

7.    Marhite on, hupabotohon hami ma, Kantor Pusat HKBP marhite Biro Ibadah dohot Musik, tongtong do paharuarhon angka partonding ni angka ulaon na naeng patupaonta dope, isara ni Parmingguon, Partangiangan Passion, Jumat Agung, Pesta Paskah, dohot lan na asing dope muse.

Songon I ma parmahanion hupasahat hami tu hita saluhutna. Di bagasan panghirimon dohot pangauhon di bagasan haporseaon ma hita patupa i dibagasta be. Pos do rohanta, ndada ditadingkon Tuhan hita angka na porsea, alai urupan jala paluaon ni Tuhanta do hita malua sian ragam ni panahit na masa on.

Tongtong ma hita manghaporseai Ibana songon HataNa na mandok: Alai ingkon oloanmuna do Jahowa Debatamuna I, jadi pasupasuonNa ma sagusagum sohot tapianmu, jala pasalpuonHu angka sahitsahit sian tongatonganmuna” (2 Musa 23:25), Amen.

Tabe mardongan tangiang,

HURIA KRISTEN BATAK PROTESTAN

Ephorus

Dpd

Pdt. Dr. Darwin Lumbantobing

Tembusan :

1.      Sekretaris Jendral HKBP

2.      Kepala Departemen Koinonia

3.      Kepala Departemen Marturia

4.      Kepala Departemen Diakonia

5.      Kepada Biro Jemaat HKBP

6.      Bendahara Umum HKBP

7.      Kepala Biro Ibadah dan Musik HKBP

8.      Pertinggal