(10). PARTONDING NI ACARA PARMINGGUON - 05 APRIL 2020

PARTURE NI PARTANGIANGAN 

DI MINGGU PALMARUM NA PINATUPA

DI BAGAS

Ev: Johannes 12 : 12 - 19                                       Ep: Jesaya 52 : 7 - 12

TOPIK

IDA MA NA RO DO RAJAM

HURIA KRISTEN BATAK PROTESTAN

05 APRIL 2020

I.      PARHOBASON:

1.       Partangiangan on ni uluhon ni Ama manang Ina.

2.       Diaturhon ma na mamboanhon tangiang pangondianan

3.       Diparade hian ma inganan ni pelean.

4.       Andorang so dipungka partangiangan on denggan ma jolo diparsiajari angka ende na di bagasan acara on. 

III.     PARMINGGUON: (U = Uluan; K = Keluarga)

1.         JOUJOU TU PARTANGIANGAN:

U    :  Huria ni Tuhanta, on ma minggu na mangihut di hita patupa partangiangan di bagasta siala ni sahit sorimago Virus Corona (Covid-19). Ia tapatupa Parmingguan on di bagasta, ima paboa parsidohot do hita mangoloi pandohan ni pamarenta nang dohot pandohan ni pimpinan ni hurianta HKBP laho manggotap harararat ni virus i. Anggiat ma lam togu haporseaonta tu Debata na sun gogo jala na mangatasi saluhut. Sai tumibu ma disalpuhon Ibana sahit i sian sandok portibi on.

K   :  Ale Tuhan, tumibu ma salpuhon sahit na binahen ni Virus Corona i sian portibi on.

U    :  Sadarion nunga bongot hita tu Minggu PALMARUM na marlapatan: Maremare.  Di tingki i ma Jesus naeng bongot tu Jerusalem, dibuat nasida ma angka maremare laho manomunomu Ibana, dijouhon nasida ma “Hosianna, pinasupasu ma na ro marhite goar ni Tuhan i, Raja ni Israel” Antong dohot ma hita na tongon marungkil nuaeng jala tahutan ala ni Virus Corona on, manjanghon Jesus Rajanta i, asa tung Ibana ma na mandongani hita dohot mangondihon hita di hangoluanta on.  Di bagasan serep dohot unduk ni roha tu Debata, Tapuji ma Ibana. Marende ma hita!

2.         Marende BE No. 1 : 1 + 4       “Ringgas ma ho tondingku”          BL. 223

ü  Ringgas ma ho tondingku mamuji Debatanta i

Ai di parmudumudu ho unang halupahon i

Disesa do dosamu, di daoni sahitmi, diudut do hosamu, diburi tondimi

Huhut diapulapul roham namarsak i

Asa tung lam humibul, mingot uhumNa i

3.         Tangiang PAMUHAI:

U    :  Asi ma rohaM di ahu ale Jahowa, ai targogot do ahu, maras do rohangku dohot dagingku.

K   :  Alai anggo ahu, tu Ho do ahu marhaporusan ale Jahowa, ningku do : Ho do Debatangku.

U    :  Marguru tu tanganMu do angka parsoriongki, sai palua ma ahu sian tangan ni angka musungku dohot sian angka na mangalotongi ahu. Ale Jahowa, sai unang paurak ahu, ai Ho do na hujou, sai palua ma ahu marhitehite hatigoranMu.  Haleluya!

K   :  (Mangendehon): Haleluya, Haleluya, Haleluya

U    :  Martangiang ma hita!  Ale Tuhan Debata, Amanami, Na Badia jala na bonar do Ho, Ho do haporusannami sian najolo ro di nuaeng. Diloas Ho do nuaeng hasusaan masa tu hami, jala holsoan do hami, ala masa sahit na binahen ni Virus Corona. Ala ni i marpungu hami na sakeluarga nuaeng tu joloM, huhut marunduk ni roha ro tu toru ni tanganMu na gogo i. Sai sesa sude dosanami dohot dosa ni dongannami.  Sai unang baloshon tu hami pambahenannami na hurang i, sai huphupi ma i sude ala ni asi ni rohaM. Ho sambing do haporusannami jala marhaposan tu Ho do hami. Sai salpuhon ma sahit ala ni Virus Corona i sian portibi on, jala palua ma hami sian hagogotan on, asa hupuji hami Ho ro di saleleng ni lelengna marhitehite AnakMu Tuhan Jesus Kristus Tuhannami. Amen.

4.         Marende BE No. 712 : 2                  “Togu au ale Jahowa”

ü  Ro ma Ho aek hangoluan na pahisar tondingki

Sai di jolo ma Ho Tuhan dohot tiang apiMi

Sipartogi na gumogo, Ho ma lombulombungki

Ho ma lombulombungki

5.         sori ni ngolu dohot Manopoti Dosa:

U    :  Ndang tarbahen hita dope marsaor di gareja ala ni sorimago virus corona na sai maotaot humaliang hita. Ndang pola taparsoalhon boasa masa i nuaeng, alai ingkon taingot do na gumogo do Debata sian saluhutna i. Hamuna donganku sajabu, tingki on ma di paingot Tuhan i hita muse, asa lam sada rohanta marhaporseaon tu Debata, paunduk diri di adopan ni Debata, martangiang huhut pasahathon ngolunta tu bagasan linggoman ni asi ni rohaNa. Tongtong ma hita mangoloi di angka aturan naung pinasahat ni panggomgominta songoni nang sian uluan ni hurianta HKBP. Tapaholang ma jolo diri sian parjumpangan  dohot torop dongan. Sai tapadao ma hatahuton na mambahen gale pamatangta, taparinggas ma marhaiason di pamatang nang dohot di bagasta on. Hata ni Debata mandok di Jesaya 26 : 20 “Laho ma ho ale bangsongKu, bongoti ma angka bilutmu, jala hinsu ma pintumi di pudim. Martamonding ma ho satongkin, paima salpu rimas i” Antong, hohom ma hita pasahat diri tu Ibana asa Ibana na manalpuhon sorimago na masa nuaeng.

K   :  (Mangendehon): BE No. 806 : 1    “Aha pe masa di ngolumon”

ü  Aha pe masa di ngolumon, Tuhan manjaga ho

HolongNa do mangondihon ho, Tuhan manjaga ho

Tuhan manjaga ho, las pe roham, marsak pe ho

Sai di ramoti ho, Tuhan manjaga ho

U    :  Panghorhon ni virus corana on, godang do angka hamaolon na ingkon tabolus, masa do biar ni roha di hita, boha do nuaeng pamatangkon, tarbahen ahu do mangalo sahit namasa on nuaeng ? Masa do dohot biar di perekonomian ni keluarganta, adong do sipanganon dohot si inumonta ganup ari? Mabiar do hita nang di pangalaho ni angka dongan na sai tongtong dibagasan hatangkangon, so olo marholong ni roha ala sai holan mamingkirhon tu dirina sandiri. Tapatogu ma haporseaonta paboa Debata tongtong rade manjaga hita, tangihononNa do tangiangta.

K   :  (Mangendehon): BE No. 806 : 2    “Aha pe masa di ngolumon”

ü  Sai disarihon do ngolumi, Tuhan manjaga ho

Sai ditangihon tangiangmi, Tuhan manjaga ho

Tuhan manjaga ho, las pe roham, marsak pe ho

Sai di ramoti ho, Tuhan manjaga ho

U    :  Martangiang ma hita: Ale Tuhan Debata, Amanami na di banua ginjang. Ho do nampuna langit dohot tano ro di pangisina sudena. Jadijadian ni tanganMu do sude na adong, jala na pinarmuduM do umabhen mangolu sede na tinompaMi. Na mangido do hami nuaeng tu asi ni rohaM nagodang i, sai sesa ma dosanami, sai digohi asi ni rohaM ma hami. Sai unang alang asinirohaM di hami naung hinophop ni Kristus anakMi.  Sai lehon ma ubat na boi pahabanghon virus corona sian na humaliang hami, parbisuki sude angka na pistar na sai marsitutu nuaeng mandiori na gabe ubat pamalumhon angka naung marsahit binahen ni virus corona i.  Sai lam patandahon ma tu hami godang ni denggan ni basaM, asa huboto hami mandok mauliate tu Ho dohot mamuji GoarMu nabadia i, dibagasan Tuhan Jesus Kristus Tuhan sipalua hami. Amen.

K   :  (Mangendehon): BE No. 806 : 3    “Aha pe masa di ngolumon”

ü  Molo borat siporsanonmi, Tuhan manjaga ho

Tung pe golap parnidaanmi, Tuhan manjaga ho

Tuhan manjaga ho, las pe roham, marsak pe ho

Sai di ramoti ho, Tuhan manjaga ho

U    : Bagabaga ni Debata : Songon on do Hata ni Jahowa : Unang ho mabiar, ai Ahu do siluluhon ho, nunga pola Hujou goarmu, Ahu nampuna ho. Hasangapon ma di Debata na di ginjang.

K   :  Amen.

6.         Marende BE No. 689 : 1              ”Di holong ni rohaNa”  

ü  Di holong ni rohaNa sonang do tondingki

Maporus nasa biar, arsak nang holsongki

Nang ro pe habahaba palomos rohangki

PangaramotionNa paposhon rohangki.

7.         E p i s t e l:

U    : Tajaha ma Epistel di Minggunta sadari on ima na tarsurat di  Jesaya 52 : 7 – 12. Lehetna i di atas ni angka dolok angka pat ni parbarita na uli, na patubegehon hadameon, na mamaritahon barita na uli, na patubegehon hatuaon, na mandok tu Sion:  Debatam do bangkit Rajam. Soara ni jolma parhalmu, angka dipangiar be soarana rap marolopolop,

K   :  ai adop bohi be diida nasida, molo mulak Jahowa tu Sion.

U    :  Pangiar ma soaramuna rap marolopolop ma hamu, ale angka pasipasi ni Jerusalem, ai nunga marpangulahi roha ni Jahowa mida bangsoNa, nunga dipalua Jerusalem. Nunga pola dipatoltol Jahowa tanganNa na badia i di adopan ni saluhut bangso parbegu,

K   :  jadi saluhut ujung ni tano on marnida hatuaon ni Debatanta.

U    :  Ruar, ruar, borhat ma hamu sian i, unang jama hamu na ramun! Ruar ma hamu sian tongatonganasida! Manguras ma hamu, ale angka na mangusung ulaula ni Jahowa.

K   :  Ai ndang pola humalaput hamu laho ruar, manang marlojong songon halak na maporus,

U    :  ai  Jahowa do manguluhon hamu, jala Debata ni Israel mangiringiring hamu sian pudi. Ima sahatna. Martua ma angka na tumangihon Hata ni Debata jala na umpeopsa. Amen.

8.         Marende BE No. 405 : 1  “Adong Sada Mual” BL. 386

ü  Adong sada mual, tung sae uli ni. Sombu do disi uasmi.

Ai manang behajorbut ni sahitmi, na malum luhut na disi.

Oloi ma joujouNa i, lului mual na uli i.

So pola martuhor mual i. Porsea! Di ho nama i.

9.      TANGIANG PANGONDIANON:

10.   Marende BE No. 385 : 1-2       “Dijouhon Jesus ro hamu”     BL. 384

ü  Dijouhon Jesus ro sude hamu na loja i

Hutogutogu do hamu tu hasonangan i

Hamu sude pamanat i, hamu ni arahonNa i

Tadinghon ni arsakhonmi, dompakhon Tuhan i

Sonang ni roha i, sonang ni roha i

Sonang ni roha i, dilehon Jesus i

11.   RENUNGAN:  

“IDA MA, NA RO DO RAJAM”

(Johannes 12 : 12 - 19)

Nunga masuk hita nuaeng tu minggu Palmarum, na marlapatan lima ari tu joloan on masuk ma hita tu ari parningotan sitaonon ni Tuhan Yesus paima sahat hita marningot ari hamamateNa. On ma pangalaman haporseaonta na pola ingkon marminggu sian bagasta be marningot ari hamamateNa songon i partangiangan Buhabuha Ijuk dohot Paskah. Dua minggu ma hita paholang diri di bagasta be jala tontu nunga godang sian hita na so tahan be. Tarlumobi ma angka ianakhonta, nangpe nunga dipatupa ragam ni ulaon songon i nang angka tugas sian sikolana be. Hita pe angka natuatuana manguji haruar sian bagasta dohot sidalian “cari angina dulu” holan alani naung bosan. Sian sisi positif-na lam godang do tubu kreatifitasta na so hea tapingkiri, lam malo mula ulaon, marolah raga, marladang, marende, marmusik dohot lan na asing, asa boi hatop mardalan ariarinta dohot denggan. 

Di partingkian na masa on boi do hita mabiar jala biahaton, sadia godangnai tamba bilangan ni na agoan hosa alani virus corona on, parngoluan na lam paet, jala mungkin do martamba kriminalitas, hubungan sosial na lam kaku ala ingkon mandalanhon “social distancing”, manjaga jarak physik. Di tonga ni partingkian na songon i,  dijouhon turpuk on do hita laho marningot panomunomuon ni Tuhan Jesus di tingki mamasuhi huta Jerusalem na tongon marpungu halak laho patupahon paska.  Paska ima marningot haluaon napinatupa ni Debata tu ompunasida haruar sian panabanan Mesir. Marningot i ma marroan godang halak pangisi ni Jerusalem dohot sian luat na asing laho mandohoti paskah di Jerusalem.

Barita haroro ni Jesus marpanghorhon pahehehon roha dohot panghirimon na togu taringot tu haroro ni Mesias naung jonok. Di buat natorop ima maremare, ima bulung na biasa dipangke halak tarlumobi angka na pogos, rakyat biasa, laho mamestahon pesta las ni roha laho pasangapon Jesus na roi. Ia natorop i ro tu Jesus dang mamboan holsona dohot sitaononna alai didapothon nasida Jesus huhut dipuji nasida marhite olopolop mandok: "Hosiana! Pinanasupasu ma na ro marhite Goar ni Tuhan i, Raja ni Israel”, (pat.. Psalmen. 118:26). Hosana na marlapatan “haluaon”. Raphon Tuhan Jesus i, godang halak manghilala haluaon.

Ia haroroNa i di bagasan bulus ni roha na dipataridahon marhite  na manghunduli halode jala ditomu dohot olopolop, marasing sian na di Yohanes 10: 22-39, Jesus di tolak halak Jahudi huhut didangguri marhite batu laho pamatehon. Ndang marnaloja nasida mangulahon na jat, tung pe sai malua do Jesus sian hajahaton nasida alai sai dilului do dalan laho manangkup dohot pamatehon Jesus. Nangpe sai dihasogohon halak Jahudi dohot Farisi Ibana ndang gabe mangambati pardalananNa manaripari sunge Jordan tu inganan ni si Johannes Pandidi (Pat. Joh 10:40). Gariada lam godang do angka tanda halonganan dipatupa Ibana, isarani pahehehon si Lazarus naung mate 40 ari di tanomanna (Pat. Joh. 11:1-44). Marnida i lam muruk do angka Parise i huhut naeng pamatehon Jesus (Pat. Joh. 11:45-57). Ndada holan tu Jesus tahe, dohot do nang si Lazarus naeng pamateon nasida (Pat. Joh. 12:9-11). Nunga jonok be tingkina naeng pasahatonna Jesus tu hau pinarsilang.

Biasana marragam na boi tapatupa laho manomunomu angka halak na penting isara ni Presiden, Mentri, Bupati, Gubernur dohot na asing. Tung pe Presiden nuaeng on mansai dao sian angka ulaon na sifatna holan na ceremony. Tujuanna ima songon dia laho palashon roha ni na ro jala dibagasan roha olopolop asa las roha ni pemimpin na ro i. Sarupa do molo ro halak na penting tu bagasta tontu massam tabaen boha ma asa las roha ni na ro tu bagasta i. Tontu panomunomuon si songon i ndang mungkin be ulahonononta di na ro Covid 19 on. jala tabege do barita sian BNPB na pabotohon tu hita ia  keadaan gawat darurat dipaganjang sahat tu 29 Mei on. Lobi hurang 3 bulan ma lelengna angka ulaonta targanggu. Di situasi na songon on boi do hita marlas ni roha manomunomu Tuhan Jesus? Alusana: Boi. Didok di Pilippi 4:13 “Saluhutna do tarpatupa ahu marhitehite Ibana na margogoihon ahu”, Ndada holan sorimago Covid 19 na boi tasalpui, sitaonon na umborat sian i pe boi do aeonta songon sitaonon  ni Jesus na manuhuk silang, manaon dosanta, gabe pardamenta Ibana. Ido umbahen boi hita mangolu sahat tu tingkion. Haluaonta holan marhite asi ni rohaNa na mate di hau pinorsilang humokhop dosanta, ido sasintongna na mambahen hita boi marlas ni roha songon dia pe borat ni sitaonon songon na masa nuaeng.  Molo adong dame di hita laho manjanghon Jesus huhut mamuji Ibana di bagasan las ni roha, di si do adong pangarajaion diri, maniopi dirinta asa hot mangula ulaon kantor di jabu, marsiajar di jabu jala marparsaoran raphon Debata di jabu huhut manjouhon: “Hosiana " Pinanasupasu ma na ro marhite Goar ni Tuhan i, Raja ni Israel!  Selamat Minggu Palmarum, Tuhanta ma namamasumasu.  Amin

Pdt. Debora P. Sinaga, MTh

Kepala Departemen Diakoniaa HKBP

12.     Marende BE No. 785 : 1+3               “Alo pangunjunan” (Pelean)

ü  Alo pangunjunan sai benget ma ho

Ai molo dung monang, lam togu ma ho

Angka hajahaton, sai patunduk ma

Jesus pangasahon ingkon monang ho

Jalo pangurupion sian Tuhanta Jesus

Dapot ho hagogoon mandopang musu i

ü  Tumpal diparade Debata di ho

Tu sude na monang di portibi on

Kristus pamalumhon, pahisarhon ho

Jesus pangasahon, ingkon monang ho

Jalo pangurupion sian Tuhanta Jesus

Dapot ho hagogoon mandopang musu i

13.     PANGUJUNGI:

U    :  Mauliate ma tadok tu Tuhanta Debata parasiroha i, ai ditopot do parmingguanta on marhite hataNa naung tangkas tatangihon. Unang ho mabiar ale boru Sion, ida ma Rajam do na ro manopot ho. Sai dao ma biar ni roha sian hita tu joloanon, tapapos ma rohanta, dongananNa do hita, taluhononNa angka musunta. LehononNa hahisaron di pamatangta. Antong sai jouhonma : Hosianna.

K   :  Hosianna ma di Ho ale Tuhannami, ai ditopot Ho do hami marhite HataM nabadia i.

U    :  Debatanta i do pargogo na so hatudosan, saguru di Ibana do langit dohot tano. Tarbahen Ibana do pamalum nasa sahit, Tarbahen Ibana do manamparhon nasa sorimago. Gari hamatean pe saguru di Ibana do, ido tutu, ai naung disunggul Jesus do si Lazarus sian hamatean, alani i haposi ma asi ni rohaNa na manongtong i.

K   :  (Mangendehon) BE No. 814 : 3      “Sai ajari au Tuhanku”

ü  Dibagasan Ho Tuhanku boi marlas ni roha au

Ho sambing haporusanku, Ho ma paluahon au

Pargogoi ma au Tuhanku ai mansai gale do au

Unang lomo ni rohangku, lomo ni rohaM ma saut.

U    :  Tatangianghon ma peleanta: Ale Tuhan Debata Amanami, haroroan ni saluhut pasupasu na mauliutus, godang do hujalo hami sian asi ni rohaM. Mauliate ma di Ho, hupasahat hami ma nuaeng peleannami tu Ho, sai jalo ma i gabe pelean na hushus di di joloM. Pasupasu ma na niula ni tangannami jala ajari ma hami manghamuliatehon saluhutna i marhite parange nang pambahenannami. Ungkap rohanami asa sai ringgas hami pasahat pelean tu Ho hombar tu asi ni rohaM naung hujalo hami, marhite Kristus Jesus Tuhan nami. AMEN

 K  :  (Rap Mandok): Tangiang Ale Amanami – (Mangendehon): Amen, Amen, Amen.

SUNGGUL-SUNGGUL

1.      Setiap Jemaat Hendaknya Mengadakan Ibadah Passion Pada Tgl. 06 hingga tgl. 09 April 2020, masuk pukul 19.30 Wib. Acara akan dibagikan melalui sintua lingkungan.

2.      Pada Hari Rabu Tgl. 08 April 2020, kita tetap mengadakan Ibadah Partangiangan Keluarga Masuk Pukul 19.30 Wib. Acara Akan Dibagikan Melalui sintua lingkungan.

3.      Untuk Ibadah Jumat Tgl. 10 April 2020 untuk sementara dialihkan menjadi Ibadah Keluarga pada Pukul 11.00 Wib hingga ada pemberitahuan terbaru dari pihak gereja.

4.      Untuk Ibadah Buhabuha Ijuk Tgl. 12 April 2020 untuk sementara dialihkan menjadi Ibadah Keluarga pada Pukul 05.00 Wib (Subuh) hingga ada pemberitahuan terbaru dari pihak gereja.

5.      Untuk Ibadah Minggu Tgl. 12 April, 2020 untuk sementara dialihkan menjadi Ibadah Keluarga pada pukul 11.00 Wib hingga pemberitahuan selanjutnya dari piihak gereja.